“Dapat na Kuyogon Niamo an Dios Bilang Namamahala Imbes na mga Tawo”

“Ki Jehova an Ralaban”

DUWANG magkaribal na hukbo an magkaatubang sa mag-ibong na kampi nin sarong kababan. Sa laog nin 40 aldaw an kalalakihan sa Israel nagsumuksok sa takot asin pinaoranan nin mga insulto ni Goliat, an parasurog kan mga Filisteo.​—⁠1 Samuel 17:1-4, 16.

Inangat ni Goliat sa makosog na tingog an mga Israelita paagi sa mga tataramon na ini: “Pumili kamo nin sarong lalaki, asin paatubangon sia nindo sa sako. Kun kaya niang lumaban sa sako asin mapabagsak nia ako, dangan kami magigin mga lingkod nindo. Alagad kun makaya ko sia asin mapabagsak ko sia, kamo naman an magigin mga lingkod mi, asin paglilingkodan nindo kami. . . . Dinuduhagi ko an hukbo kan Israel sa aldaw na ini. Tawan nindo ako nin lalaki, asin kami an maglaban!”​—⁠1 Samuel 17:8-10.

Kan suanoy na mga panahon, sa parate an mga parasurog an nagrerepresentar sa saindang mga hukbo sa mano-manong labanan. Kun siisay an manggana, gana man an mga kakampi nia. Alagad an kalaban na ini kan Israel bakong ordinaryo sanang soldados. Sia halangkawon na higante​—⁠sarong maringis asin nakakatakot na kalaban. Minsan siring, sa pagtuyatuya sa hukbo kan banwaan ni Jehova, si Goliat na an nagtalaga kan saiyang kaaabtan.

Bako sana ining militar na labanan. Ini labanan sa pag-oltanan ni Jehova asin kan mga dios kan mga Filisteo. Imbes na may kosog nin boot na pangenotan an saiyang hukbo laban sa mga kaiwal nin Dios, si Hadeng Saul kan Israel naparalisar sa takot.​—⁠1 Samuel 17:11.

Nagtiwala ki Jehova an Sarong Hoben na Lalaki

Durante kan dai pagkakaoyon na ini, sarong hoben na lalaki na ninombrahan nang magin hade kan Israel an nagdalaw sa saiyang mga tugang na nasa hukbo ni Saul. David an ngaran nia. Kan madangog an mga tataramon ni Goliat, sia naghapot: “Siisay man ining dai tinuring Filisteong ini na saiyang dinuduhagi an mga hukbo kan nabubuhay na Dios?” (1 Samuel 17:26) Sa pagheling ni David, si Goliat nagrerepresentar sa mga Filisteo sagkod sa mga dios ninda. Huli sa matanos na pagkaanggot na marhay, si David nagmawot na manindogan para ki Jehova asin para sa Israel patin labanan an paganong higante. Alagad si Hadeng Saul nagsabi: “Dai mo kayang atubangon an Filisteong ini tanganing makipaglaban sa saiya, huli ta ika saro sanang aki.”​—⁠1 Samuel 17:33.

Magkalaen nanggad an pagmansay ni Saul asin David! An naheheling ni Saul sarong solteritong pastor na gustong makipaglaban sa sarong maringis na higante. Minsan siring, an naheheling ni David sarong tawo na kinakalaban an Soberanong Kagurangnan na si Jehova. An kosog nin boot ni David nakabasar sa saiyang marigon na pagtubod na dai totogotan nin Dios na an Saiyang ngaran asin an Saiyang banwaan pag-olog-ologon na dai mapapadusahan an naggigibo kaiyan. Mantang ipinaghahambog ni Goliat an saiyang kosog, si David minasarig ki Jehova, na hineheling an situwasyon basado sa punto de vista nin Dios.

“Ako Minadolok sa Saimo sa Ngaran ni Jehova”

Masarig an basehan kan pagtubod ni David. Nagigirumdoman nia na tinabangan sia nin Dios na iligtas an saiyang karnero sa sarong oso asin leon. Nakakasierto an hoben na pastor na tatabangan sia ni Jehova ngonyan na atubangon an makatatakot na Filisteong kaiwal na ini. (1 Samuel 17:34-37) Dara an simpleng lagpitaw asin limang makinis na gapo, inatubang ni David si Goliat.

Inatubang kan hoben na si David an garo baga imposibleng angat na ini paagi sa pagsarig  sa kosog na itinatao ni Jehova. May kosog nin boot na sinabihan nia an Filisteo: “Ika minadolok sa sako na may darang espada asin may budyak patin may garod, alagad ako minadolok sa saimo sa ngaran ni Jehova nin mga hukbo, an Dios kan posisyon para sa ralaban nin Israel, na saimong dinuduhagi. Sa aldaw na ini itatao ka ni Jehova sa sakuyang kamot . . . An mga tawo sa bilog na daga makakaaram na igwa nin Dios an Israel. Asin an bilog na kasararoan na ini makakaisi na si Jehova dai nagliligtas paagi sa espada o budyak, huli ta ki Jehova an ralaban.”​—⁠1 Samuel 17:45-47.

Ano an resulta? An ipinasabong na salaysay nagsasabi: “Si David, paagi sa lagpitaw asin gapo, napatunayan na mas makosog kisa sa Filisteo asin linugad an Filisteo patin ginadan sia; asin mayo nin espada sa kamot ni David.” (1 Samuel 17:50) Mayo nin espada sa kamot nia, alagad yaon sa saiya an mapuersang pagsuportar ni Jehova Dios.⁠ *

An pagtubod ni David ki Jehova napatunayan nanggad na tama sa labanan na iyan! Kun kaipuhan niatong pumili sa pag-oltanan kan pagkatakot sa mga tawo asin pagtitiwala sa kapangyarihan ni Jehova na magligtas, risang-risa an dapat na pilion: ‘Dapat na kuyogon niato an Dios bilang namamahala imbes na mga tawo.’ (Gibo 5:29) Dugang pa, kun hehelingon niato an masakit na mga situwasyon basado sa punto de vista ni Jehova Dios, magkakaigwa kita nin tamang pagmansay dawa sa nakakapanluya sa boot na mga problema.

[Nota sa Ibaba]

[Kahon/Ritrato sa pahina 9]

GURANO KADAKULA SI GOLIAT?

An pagkasaysay sa 1 Samuel 17:4-7 nagsasabi sa sato na an langkaw ni Goliat labing anom na sokol sa siko​—⁠mga tolong metro. An nagpaparisa kan kadakulaan asin kosog kan Filisteong iyan iyo an saiyang gubing na tanso. Iyan may gabat na 57 kilos! An tugod kan saiyang budyak garo panalgan na kahoy, asin an batbat na tarom kaiyan may gabat na 7 kilos. Tara, posibleng marhay na an pangalasag ni Goliat mas magabat pa kisa ki David mismo!