Mga Hapot Hale sa mga Parabasa

Ano an nagpapangyari sa “kawiliwiling mga bagay kan gabos na nasyon” na lumaog sa “harong” kan tunay na pagsamba?​—⁠Haggeo 2:7.

Paagi ki propeta Haggeo, si Jehova naghula: “Yuyugyugon ko an gabos na nasyon, asin an kawiliwiling mga bagay kan gabos na nasyon dapat na lumaog; asin papanoon ko nin kamurawayan an harong na ini.” (Haggeo 2:7) An pagyugyug daw sa “gabos na nasyon” an nagpapangyari sa “kawiliwiling mga bagay” kan mga nasyon​—⁠mga indibiduwal na sadiosan an puso⁠​—⁠​na akoon an tunay na pagsamba? An simbag bako.

Isipon nindo kun ano an nakakayugyug, o nakakatanyog, sa mga nasyon asin kun ano an magigin resulta kan pagtanyog na ini. An Biblia nagsasabi na “maribok an mga nasyon asin an mga grupo nasyonal mismo nagpaparagumodgumod nin daing halagang bagay.” (Salmo 2:1) An “daing halagang bagay” na padagos nindang ‘pigpaparagumodgumod,’ o hinohorophorop, iyo an pagpapadanay kan saindang sadiring soberaniya. Mayo nin orog na makakatanyog sa sainda kundi an ano man na huma sa saindang pamamahala.

An pambilog na kinaban na paghuhulit manongod sa naestablisar nang Kahadean nin Dios na ginigibo kan Mga Saksi ni Jehova nagin arog nanggad kaiyan na huma sa mga nasyon. Ini huli ta an Mesiyanikong Kahadean nin Dios sa kamot ni Jesu-Cristo “an maronot asin matapos kan gabos na [gibo nin tawong] kahadean.” (Daniel 2:44) An mensahe nin paghokom na kaiba sa satong paghuhulit nagpapakunogkunog sa mga nasyon. (Isaias 61:2) Asin an pagtanyog mas nagkokosog mantang orog na naghihiwas asin nagkokosog an paghuhulit. Tanda nin ano an pagyugyug na ihinula sa Haggeo 2:7?

Sa Haggeo 2:​6, mababasa niato: “Iyo ini an isinabi ni Jehova nin mga hukbo, ‘Saro pang beses​—⁠dai na mahahaloy⁠​—⁠​asin yuyugyugon ko an kalangitan asin an daga asin an dagat patin an marang daga.’” Kinokotar an bersikulong ini, si apostol Pablo nagsurat: “Sia nanuga, na an sabi: ‘Tatanyogon ko nin makasaro pa bako sanang an daga kundi pati an langit.’ Ngonyan an tataramon na ‘Makasaro pa’ nangangahulogan kan paghale sa mga bagay na natanyog bilang mga bagay na ginibo, tanganing an mga bagay na dai natanyog [an Kahadean] magdanay.” (Hebreo 12:​26, 27) Iyo, an bilog na presenteng sistema nin mga bagay tatanyogon tanganing mawara asin tanganing tawan nin lugar an bagong kinaban na gibo nin Dios.

An mga tawong sadiosan an puso naaakit sa tunay na pagsamba alagad bakong huli ta an mga nasyon nayuyugyug, o natatanyog. An aksion na nakakaakit sa sainda pasiring ki Jehova asin sa pagsamba sa saiya iyo man sana an aksion na nakakayugyug sa mga nasyon, iyo na ngani an pambilog na kinaban na paghuhulit manongod sa naestablisar nang Kahadean nin Dios. An pagpahayag kan ‘nakakaogmang notisya kan daing katapusan na maogmang bareta’ an nakakaakit sa mga indibiduwal na may tamang tendensia sa pagsamba sa tunay na Dios.​—⁠Kapahayagan 14:​6, 7.

An mensahe kan Kahadean sarong mensahe nin paghokom asin kaligtasan. (Isaias 61:​1, 2) Duwa an resulta kan paghuhulit kaiyan sa bilog na kinaban: an pagyugyug sa mga nasyon asin an paglaog kan kawiliwiling mga bagay kan mga nasyon sa ikakamuraway ni Jehova.