Ipinapaisi ni Jehova an “Mangyayari sa Huri Poon Pa sa Kapinonan”

“An Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon pa kan suanoy.”—ISAIAS 46:10.

1, 2. Ano an pambihira manongod sa mga pangyayaring konektado sa pagpabagsak sa Babilonya, asin ano an ipinaparisa kaini manongod ki Jehova?

SA KADIKLOMAN nin banggi, patagong nag-aabante an kaiwal na mga soldados sa Salog nin Eufrates pasiring sa saindang punteriya, an makosog na siudad nin Babilonya. Kan sinda nagdadangadang na sa entrada kan siudad, naheling ninda an sarong makangangalas na bagay. An dakulaon na mga pintong duwa kadahon sa lanob kan Babilonya nabayaan na nakabukas! Nagsarakat sinda hale sa salog; nagralaog sinda sa siudad. Marikason na nabihag an siudad. Si Ciro, an namomoon sa sainda, tolos-tolos na nagkapot kan pamamahala sa nabihag na nasyon asin kan huri nagpaluwas nin dekreto na nagpapatalingkas sa mga bihag na Israelita. Rinibong desterrado an nagpuruli tanganing ibalik sa dati an pagsamba ki Jehova sa Jerusalem.—2 Cronica 36:22, 23; Esdras 1:1-4.

² An mga pangyayaring idto kan mga taon 539-537 B.C.E. masarig na pinapatotoohan ngonyan kan mga historyador. An pambihira iyo na an mga pangyayaring idto aram na 200 na taon antes pa. Pinasabngan ni Jehova an saiyang propeta na si Isaias na iladawan nin siring kaiyan kaamay an pagbagsak kan Babilonya. (Isaias 44:24–45:7) Ihinayag nin Dios bako sanang an mga pangyayaring konektado sa pagpabagsak sa Babilonya kundi siring man an ngaran kan namomoon na kongkistador. * Kaolay an mga Israelita, na mga saksi nia kaidto, si Jehova nagsabi: “Girumdoma nindo an enot na mga bagay kaidtong haloy nang panahon, na ako an Dios asin mayo na nin ibang Dios, ni siisay man na kabaing ko; an Saro na nagpapaisi kan mangyayari sa huri poon pa sa kapinonan, asin kan mga bagay na dai pa nahahaman poon pa kan suanoy.” (Isaias 46:9, 10a) Si Jehova totoo nanggad na sarong Dios na kayang aramon antes pa kun ano an mangyayari.

3. Eestudyaran niato ngonyan an simbag sa anong mga hapot?

 ³ Gurano daw kadakol kan aram nin Dios manongod sa ngapit? Aram na daw ni Jehova antes pa an gigibohon kan lambang saro sa sato? Sa katunayan, itinalaga na daw antes pa an satong ngapit? Eestudyaran niato an simbag kan Biblia sa mga hapot na ini asin sa konektadong mga hapot sa artikulong ini asin sa kasunod.

Si Jehova—Sarong Dios nin mga Hula

4. Siisay an Ginikanan kan mga hula na nakasurat sa Biblia?

⁴ Huling kaya niang maaraman antes pa an ngapit, pinasabngan ni Jehova an saiyang mga lingkod kaidtong mga panahon kan Biblia na isurat an dakol na hula, na nagpangyari na maaraman niato antes pa kun ano an katuyohan na gibohon ni Jehova. “An enot na mga bagay—uya na an mga iyan, alagad ipinapahayag ko an bagong mga bagay,” an sabi ni Jehova. “Bago sinda magruluwas, ipinapaisi ko na iyan sa saindo.” (Isaias 42:9) Pribilehiado nanggad an banwaan nin Dios!

5. Anong paninimbagan an kaiba kan pakaaram antes pa kan gigibohon ni Jehova?

⁵ Inaasegurar kita ni propeta Amos: “An Soberanong Kagurangnan na Jehova dai magibo nin ano man sagkod na dai pa nia ikinakapahayag an saiyang kompidensial na bagay sa saiyang mga lingkod na propeta.” An kaaraman na ini na itinao antes pa may kaibang paninimbagan. Mangnohon an mapuersang ilustrasyon na sunod na ginamit ni Amos: “May leon na nag-ungal! Siisay an dai matatakot?” Kun paanong an pag-ungal nin sarong leon minapukaw nin ensegidang reaksion sa tawo sagkod hayop na yaon sa palibot, siring man an mga propeta na arog ki Amos tolos-tolos na itinaram an mga kapahayagan ni Jehova. “An Soberanong Kagurangnan na Jehova mismo nagtaram! Siisay an dai maghuhula?”—Amos 3:7, 8.

An “Tataramon” ni Jehova “Siertong Magigin Mapanggana”

6. Sa anong paagi na nagin mapanggana an “desisyon” ni Jehova may koneksion sa pagbagsak kan Babilonya?

⁶ Paagi sa saiyang propetang si Isaias, sinabi ni Jehova: “An sakuyang desisyon magdadanay, asin an gabos na sakong ikinakaogma sakong gigibohon.” (Isaias 46:10b) An “desisyon” nin Dios, an boot sabihon, an saiyang kabotan o katuyohan kun mapadapit sa Babilonya, may labot sa pag-apod ki Ciro hale sa Persia tanganing kongkistaron an Babilonya asin pabagsakon iyan. Ipinahayag ni Jehova an katuyohan na iyan nin haloyon na panahon antes pa. Siring kan nasabi na, iyan nangyari nin daing salto kan taon 539 B.C.E.

7. Taano ta puede kitang magkompiar na an “tataramon” ni Jehova pirmeng magigin mapanggana?

⁷ Haros apat na siglo bago kongkistaron ni Ciro an Babilonya, inatubang ni Hadeng Josafat kan Juda an pinagsarong mga hukbo nin Amon asin Moab. Sia may kompiansang namibi: “O Jehova na Dios kan samong mga apoon, bakong ika an Dios sa kalangitan, asin bakong nagdodominar ka sa gabos na kahadean kan mga nasyon, asin bakong nasa saimong kamot an kapangyarihan asin kakosogan, kaya mayo nin makakatindog tumang sa saimo?” (2 Cronica 20:6) Ipinahayag ni Isaias an kaagid na kompiansa kan sabihon nia: “Si Jehova nin mga hukbo mismo nagdesisyon, asin siisay an makakapapondo kaiyan? Asin an kamot nia an nakaunat, asin siisay an makakapogol kaiyan?” (Isaias 14:27) Kan huri, kan makabalik na sa saiyang toltol na pag-iisip pakatapos na mabua sa laog nin sarong peryodo nin panahon, mapakumbabang  inadmitir ni Hadeng Nabucodonosor kan Babilonya: ‘Mayo nin nabubuhay na makakapogol sa kamot nin Dios o sumabi baga sa saiya, “Ano an pinagparagibo mo?”’ (Daniel 4:35) Iyo, inaasegurar ni Jehova an saiyang banwaan: ‘An sakong tataramon dai mabalik sa sako na mayong nahaman, kundi gigibohon nanggad kaiyan an ikinakaogma kong marhay, asin iyan siertong magigin mapanggana sa sakuyang sinobolan kaiyan.’ (Isaias 55:11) Puede kitang lubos na magkompiar na pirmeng nagigin totoo an “tataramon” ni Jehova. An katuyohan nin Dios seguradong maootob.

An “Daing Sagkod na Katuyohan” nin Dios

8. Ano an “daing sagkod na katuyohan” nin Dios?

⁸ Sa saiyang surat sa mga Kristianong taga Efeso, nasambitan ni apostol Pablo na an Dios may “daing sagkod na katuyohan.” (Efeso 3:11) Bako sana ining plano kan saiyang gigibohon, na garo baga nangaipo na detalyadong planohon nin Dios kun paano nia gigibohon an sarong bagay. Imbes, konektado iyan sa determinasyon ni Jehova na gibohon an orihinal na intension nia para sa katawohan asin sa daga. (Genesis 1:28) Tangani na matabangan kitang masabotan an pagigin segurado kan saiyang katuyohan, estudyaran niato an enot na hula na isinurat sa Biblia.

9. Paano konektado an Genesis 3:15 sa katuyohan nin Dios?

⁹ An panuga sa Genesis 3:15 nagpaparisa na pakatapos tolos na magkasala si Adan asin Eva, dineterminaran ni Jehova na an saiyang simbolikong babae mapaluwas nin sarong banhi, o aking lalaki. Naheling man ni Jehova antes pa an resulta kan pag-iiwal kan saiyang simbolikong babae asin ni Satanas patin kan saindang magkalaban na mga banhi. Minsan ngani itotogot ni Jehova na malugadan sa bool an Banhi kan simbolikong babae nin Dios, sa itinalaan na panahon nin Dios, an halas, o si Satanas na Diablo, lulugadon kan Banhi sa payo. Mientras tanto, an katuyohan ni Jehova nagpapadagos na daing salto paagi sa piniling linahe sagkod sa paglataw ni Jesus bilang an ipinanugang Mesiyas.—Lucas 3:15, 23-38; Galacia 4:4.

Kun Ano an Itinalaga ni Jehova Antes Pa

10. Dineterminaran daw ni Jehova antes pa poon sa kapinonan na si Adan asin Eva magkakasala? Ipaliwanag.

¹⁰ Sa pagtaram manongod sa papel ni Jesus sa katuyohan nin Dios, si apostol Pedro nagsurat: “Sia [si Jesus] namidbid antes pa bago kan pagtugdas kan kinaban, alagad sia ihinayag sa katapusan kan mga panahon para sa saindo.” (1 Pedro 1:20; nota sa ibaba) Dineterminaran daw ni Jehova antes pa poon sa kapinonan na si Adan asin Eva magkakasala asin na an atang na pantubos na itinao paagi ki Jesu-Cristo kakaipuhanon? Dai. An terminong “pagtugdas” trinadusir hale sa termino sa Griego na sa literal nangangahulogan na “pagsabwag nin banhi.” Nagkaigwa daw nin “pagsabwag nin banhi,” o pangingidam nin aki nin tawo, bago magkasala si Adan asin Eva? Dai. Nagkaaki si Adan asin Eva pakatapos kan saindang akto nin kasumbikalan. (Genesis 4:1) Kaya pakatapos kan pagrebelde alagad bago mangidam nin aki si Adan asin  Eva, itinalaga ni Jehova antes pa an paglataw kan “banhi.” Huli sa kagadanan asin pagkabuhay liwat ni Jesus nagkaigwa kan mamomoton na areglo nin pantubos, na paagi kaiyan mapapara an minanang kasalan asin an gabos na paghihingoa ni Satanas.—Mateo 20:28; Hebreo 2:14; 1 Juan 3:8.

11. Anong pangyayari an itinalaga ni Jehova antes pa para sa pagkaotob kan saiyang katuyohan?

¹¹ Itinalaga nin Dios antes pa an saro pang pangyayari para sa pagkaotob kan saiyang katuyohan. Ipinaparisa ini kan isinurat ni Pablo sa mga taga Efeso, arin na baga, na ‘titiponon giraray nin Dios an gabos dian ki Cristo, an mga bagay sa kalangitan asin an mga bagay sa daga.’ Dangan, may koneksion sa “mga bagay sa kalangitan,” an boot sabihon, an mga pinili bilang mga paramana kaiba ni Cristo, si Pablo nagpaliwanag: “Kita itinalaga antes pa segun sa katuyohan nia na nagpapahiro sa gabos na bagay segun sa nagigin desisyon kan saiyang kabotan.” (Efeso 1:10, 11) Iyo, dineterminaran ni Jehova antes pa na may mga tawo na limitado an kabilangan na makompuesto nin sekondaryong kabtang kan banhi kan simbolikong babae nin Dios asin magigin kaiba ni Cristo sa pagtao kan mga pakinabang gikan sa pantubos. (Roma 8:28-30) An mga ini inaapod ni apostol Pedro na “banal na nasyon.” (1 Pedro 2:9) Nagkapribilehio si apostol Juan na maaraman paagi sa bisyon an kabilangan kan magigin mga kapwa paramana ni Cristo—144,000. (Kapahayagan 7:4-8; 14:1, 3) Kasararo ni Cristo bilang Hade, sinda maglilingkod para sa ‘kaomawan kan kamurawayan nin Dios.’—Efeso 1:12-14.

12. Paano niato naaaraman na an mga indibiduwal na minakompuesto sa 144,000 dai itinalaga antes pa?

¹² An pagtalaga antes pa sa 144,000 dai nangangahulogan na may mga indibiduwal na itinalaga antes pa tanganing maimbod na maglingkod sa Dios sa paaging ini. Tunay nanggad, an konseho sa Kristianong Griegong Kasuratan sa pangenot isinurat tanganing giyahan asin pakosogon an mga linahidan na magdanay na may integridad asin maninigo sa langitnon na pag-apod sa sainda. (Filipos 2:12; 2 Tesalonica 1:5, 11; 2 Pedro 1:10, 11) Aram ni Jehova antes pa na an 144,000 na indibiduwal magigin kualipikado para sa saiyang katuyohan. Kun baga sairisay sinda madepende sa kun ano an pipilion na paagi nin pamumuhay kan mga indibiduwal na inimbitaran, sarong desisyon na dapat gibohon mismo kan balang saro sa sainda.—Mateo 24:13.

Kun Ano an Aram ni Jehova Antes Pa

13, 14. Kaoyon kan ano an paggamit ni Jehova kan saiyang pakaaram antes pa, asin taano?

¹³ Mantang si Jehova sarong Dios nin mga hula asin katuyohan, paano nia ginagamit an saiyang pakaaram antes pa? Enot sa gabos, makakasegurado kita na sadiosan, matanos, asin mamomoton an gabos na dalan nin Dios. Kan sinusuratan an Hebreong mga Kristiano kan enot na siglo C.E., kinompirmar ni apostol Pablo na an panunumpa nin Dios asin an saiyang panuga iyo an “duwang dai naliliwat na bagay na dian dai mangyayaring magputik an Dios.” (Hebreo 6:17, 18) Sa saiyang surat sa disipulong si Tito, ipinahayag man ni Pablo an puntong ini kan isurat nia na an Dios “dai makakapagputik.”—Tito 1:2.

¹⁴ Apuera kaini, minsan ngani daing sagkod an kapangyarihan ni Jehova, sia nungkang minahiro nin daing hustisya. Ilinadawan ni Moises si Jehova na “Dios nin kaimbodan, na dian sa saiya mayo nin inhustisya; matanos asin tanos sia.” (Deuteronomio 32:4) Ano man an ginigibo ni Jehova iyan kaoyon kan saiyang marahayon na personalidad.  Ipinapaheling kan saiyang mga gibo an sangkap na pagkaoroyon kan saiyang pangenot na mga kualidad nin pagkamoot, kadonongan, hustisya, asin kapangyarihan.

15, 16. Anong mga pagpipilian an ipinaliwanag ni Jehova ki Adan sa hardin nin Eden?

¹⁵ Estudyare kun paano ini gabos konektado sa mga pangyayari sa hardin nin Eden. Bilang mamomoton na Ama, itinao ni Jehova an gabos na kaipuhan nin mga tawong linalang. Tinawan nia si Adan kan kakayahan na mag-isip, mangatanosan sa sarong bagay, asin makaabot sa sarong konklusyon. Bakong arog kan linalang na mga hayop, na sa pangenot ginigiyahan nin naturalesa, si Adan may kakayahan na pumili. An resulta kaini iyo na an Dios duminungaw hale sa saiyang langitnon na trono asin naheling “an gabos niang ginibo asin, uya! idto marahayon.”—Genesis 1:26-31; 2 Pedro 2:12.

¹⁶ Kan booton ni Jehova na pagbotan si Adan na dai kumakan hale sa “kahoy kan pakamidbid sa marahay asin maraot,” nagtao Sia nin igong instruksion tanganing makadesisyon si Adan kun ano an saiyang gigibohon. Itinogot nia na kumakan si Adan hale sa “gabos na kahoy sa hardin” apuera sa saro asin nagpatanid sia manongod sa nakakagadan na mga resulta kan pagkakan kan bunga kan ipinapangalad na kahoy. (Genesis 2:16, 17) Ipinaliwanag nia ki Adan an mga kaaabtan kan saiyang mga aksion. Ano daw an gigibohon ni Adan?

17. Taano ta masasabi niato na mapamili an paggamit ni Jehova nin pakaaram antes pa?

¹⁷ Minalataw na pinili ni Jehova na dai aramon antes pa kun ano an gigibohon ni Adan—asin Eva—dawa ngani may kakayahan Siang aramon an gabos antes pa. Kun siring, an kuestion bakong kun baga kayang aramon ni Jehova an ngapit antes pa, kundi kun baga gusto niang aramon iyan. Dugang pa, puede kitang mangatanosan na dai gigibohon ni Jehova, huling sia Dios nin pagkamoot, na tuyo asin may karingisan na italagang mangyari an pagrebeldeng iyan—pati an gabos na makamomondong resulta kaiyan. (Mateo 7:11; 1 Juan 4:8) Sa siring, kun dapit sa paggamit ni Jehova nin pakaaram antes pa, iyan mapamili.

18. Taano an mapamiling paggamit ni Jehova kan pakaaram antes pa ta dai nagpaparisa nin pagigin bakong sangkap?

¹⁸ An mapamili daw na paggamit ni Jehova kan saiyang pakaaram antes pa nangangahulogan na maski paano sia kulang, o bakong sangkap? Dai. Ilinadawan ni Moises si Jehova bilang “an Gapo,” na sinasabi pa: “Sangkap an saiyang gibo.” Dai sia mababasol sa mga resulta kan kasalan nin tawo. An kapahapahamak na mga epekto na naeeksperyensiahan niato gabos ngonyan resulta kan bakong matanos na aktong iyan nin kasumbikalan. Si apostol Pablo malinaw na nangatanosan na “paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.”—Deuteronomio 32:4, 5; Roma 5:12; Jeremias 10:23.

19. Anong mga hapot an sisimbagon sa sunod na artikulo?

¹⁹ Sa satong natokar na, naheling niato na mayo nin inhustisya ki Jehova. (Salmo 33:5) Imbes, an mga kakayahan, moral na mga kualidad, asin mga pamantayan ni Jehova ginagamit kaoyon kan saiyang katuyohan. (Roma 8:28) Bilang an Dios nin mga hula, si Jehova nagpapaisi “kan mangyayari sa huri poon pa sa kapinonan, asin kan mga bagay na dai pa nahahaman poon pa kan suanoy.” (Isaias 46:9, 10) Naheling man niato na mapamili an saiyang paggamit kan pakaaram antes pa. Kun siring, paano kita naaapektaran kaini? Paano niato masesegurado na an satong mga desisyon kaoyon kan mamomoton na katuyohan nin Dios? Asin anong mga bendisyon an itatao sa sato kan paggibo kaiyan? Sisimbagon kan sunod na artikulo an mga hapot na ini.

[Nota sa Ibaba]

Ikakapaliwanag daw Nindo?

• Anong suanoy na mga halimbawa an nagpapatotoo na an “tataramon” nin Dios ‘siertong nagigin mapanggana’ sa gabos na panahon?

• Ano an itinalaga ni Jehova antes pa may koneksion sa saiyang “daing sagkod na katuyohan”?

• Paano ginagamit ni Jehova an saiyang pakaaram antes pa?

[Mga Hapot Para sa Pag-adal]

[Ritrato sa pahina 22]

Si Josafat may kompiansa ki Jehova

[Ritrato sa pahina 23]

Ihinula nin Dios an pagkagadan asin pagkabuhay liwat ni Jesus

[Ritrato sa pahina 24]

Itinalaga daw ni Jehova antes pa an gigibohon ni Adan asin Eva?