Estorya nin Buhay

Magayagayang Naglilingkod sa Ibong nin mga Kamatean

ISINAYSAY NI VARNAVAS SPETSIOTIS

Kan 1990, sa edad na 68, ako biyong naparalisar. Pero, sa laog nin mga 15 taon na ngonyan, magayagaya akong naglilingkod bilang bilog na panahon na ministro sa isla nin Chipre. Ano an nagtao sa sako nin kosog na magdanay na aktibo sa paglilingkod ki Jehova sa ibong kan sakong mga kamatean?

NAMUNDAG ako sa sarong pamilya na may siyam na aki—apat na lalaki asin limang babae—kan Oktubre 11, 1922. Nakaistar kami sa baryo nin Xylophagou, sa Chipre. Minsan ngani an sakong mga magurang medyo may kaya, an pag-ataman sa arog kaiyan kadakulang pamilya nangangaipo nin dakol na magabat na pagtrabaho sa oma.

An sakong ama na si Antonis natural nang mainadal asin mainusisa. Dai nahaloy pagkamundag ko, mantang nagbibisita si Tatay sa maestra kan baryo, narisa nia an sarong pulyeto na may titulong Peoples Pulpit, na ipinublikar kan Mga Estudyante sa Biblia (na apod sa Mga Saksi ni Jehova kaidto). Pinonan niang basahon iyan, asin dai nahaloy nawili sia sa pagbasa kaiyan. Bilang resulta, si Tatay asin an saro sa saiyang mga katood, si Andreas Christou, an kabilang sa enot na nasa isla na nakiasosyar sa Mga Saksi ni Jehova.

Pag-oswag sa Ibong nin Pagtumang

Pag-abot nin panahon, sindang duwa nagkua nin dakol pang publikasyon na basado sa Biblia hale sa Mga Saksi ni Jehova. Dai nahaloy, namotibar si Tatay asin si Andreas na isabi sa mga kababaryo ninda an mga katotoohan sa Biblia na nanonodan ninda. An saindang paghuhulit nakapukaw nin makosog na pagkontra kan klerong Griego Ortodokso  asin kan iba pa na nagsasaboot na an Mga Saksi ni Jehova igwa nin nakakadanyar na impluwensia.

An dakol sa mga taga duman iginagalang nanggad an duwang paratokdong ini sa Biblia. An sakong ama midbid na marhay sa saiyang kabootan asin pagigin buka an palad. Parateng marhay na nagtatao sia nin tabang sa dukhang mga pamilya. Kun beses sia patagong minaluwas sa harong sa matangang banggi asin nagwawalat nin trigo o tinapay sa pinto kan daing sukat na mga pamilya. An siring na daing kaimotan na Kristianong gawe-gawe an nagin dahelan na an mensahe kan duwang ministrong ini magin mas nakakaakit pa ngani.—Mateo 5:16.

An resulta iyo na mga sarong dosena an naghimate sa mensahe kan Biblia. Mantang nagtatalubo an saindang pag-apresyar sa katotoohan, namatean ninda an pangangaipo na magtiripon sa manlaenlaen na harong tanganing pag-adalan an Biblia bilang grupo. Kan mga 1934, si Nikos Matheakis, sarong bilog na panahon na ministro hale sa Grecia, nag-abot sa Chipre asin nakipaghelingan sa grupo sa Xylophagou. Paagi sa tiaga asin determinasyon, si Tugang na Matheakis nagtabang sa pag-organisar kan grupo asin tinabangan sinda na orog na masabotan an Kasuratan. An grupong ini an nagin nukleo kan enot na kongregasyon kan Mga Saksi ni Jehova sa Chipre.

Mantang nag-ooswag an Kristianong gibohon asin nagdadakol an nag-aako kan katotoohan sa Biblia, namatean kan mga tugang na kaipuhan an permanenteng lugar para sa mga pagtiripon ninda. Iinalok kan pinakamatuang tugang kong lalaki, si George, asin kan saiyang agom, si Eleni, an sarong kuarto na ginagamit nindang kamalig. An propiedad na ini, na kataed kan saindang harong, hinirahay asin ginibong angay na lugar para sa mga pagtiripon. Sa siring, an mga tugang nagkaigwa kan sadiri nindang enot na Kingdom Hall sa isla. Kanigoan an pagpasalamat ninda! Asin ini nakaenganyar nanggad para sa dugang pang paghiwas!

Isinapuso Ko an Katotoohan

Kan 1938, sa edad na 16, nagdesisyon ako na magin karpintero. Sa siring, pinaduman ako ni Tatay sa kabisera nin Chipre, an Nicosia. Huling may mahiwas na pananaw sa ngapit, inareglo nia na makiistar ako ki Nikos Matheakis. An maimbod na tugang na ini nagigirumdoman pa man giraray nin dakol sa isla huli sa saiyang kaigotan asin  pagkamapag-istimar. An saiyang dai mapogolan na entusiasmo asin marigon na kosog nin boot kaipuhan na mga kualidad para sa siisay man na Kristiano sa Chipre durante kan enot na mga panahon na idto.

Dakulaon an ikinatabang sa sako ni Tugang na Matheakis na magkaigwa nin masarig na pundasyon sa kaaraman sa Biblia asin mag-oswag sa espirituwal. Mantang nakaistar ako sa saiya, nakaatender ako sa gabos na pagtiripon na ginibo sa saiyang harong. Sa kaenot-enote, namatean ko na nagtatalubo an pagkamoot ko ki Jehova. Nagkaigwa ako nin determinasyon na magpatalubo nin makahulogan na relasyon sa Dios. Sa laog nin pira sanang bulan, hinapot ko si Tugang na Matheakis kun puede akong mag-iba sa saiya sa paglilingkod sa langtad. Nangyari ini kan 1939.

Pakalihis nin pirang panahon, nagbuelta ako sa harong tanganing dalawon an sakong pamilya. Mas ruminarom an sakong kombiksion na nanompongan ko na an katotoohan asin an kahulogan nin buhay kan makaibanan ko an sakong ama sa kadikit na panahon. Kan Setyembre 1939, nagpoon an Guerra Mundial II. Dakol na hoben na lalaki na kaedad ko an nagboluntaryong makiguerra, alagad sa pagsunod sa paggiya kan Biblia, nagdesisyon ako na magdanay na neutral. (Isaias 2:4; Juan 15:19) Kan taon man sanang idto, idinusay ko an sakong sadiri ki Jehova asin nabautismohan kan 1940. Sa kaenot-enote, namatean ko na dai na ako natatakot sa tawo!

Kan 1948, pinakasalan ko si Efprepia. Binendisyonan kami nin apat na aki. Dai nahaloy narealisar mi na kaipuhan ming magmaigot tanganing mapadakula sinda “sa disiplina asin pagtatanos nin isip ni Jehova.” (Efeso 6:4) An samong mga pamibi asin paghihingoa nakasentro sa pagtadom sa samong mga aki kan hararom na pagkamoot ki Jehova asin paggalang sa saiyang mga ley asin prinsipyo.

An mga Problema sa Salud Nag-atubang nin Kasakitan

Kan 1964, sa edad na 42, nakamate ako nin pamamagol sa sakong toong kamot asin tabay. Luway-luway, naglakop ini sa sakong wala. Nadiskobre na igwa ako nin muscle atrophy, sarong helang na mayo nin bolong na pag-abot nin panahon nagigin kompletong paralisis. Nabigla akong marhay sa baretang iyan. Marikason asin bigla an mga pangyayari! Huling pinangibabawan ako nin grabeng kaanggotan, naisip ko: ‘Taano ta nangyari ini sa sako? Ano an ginibo ko tanganing mangyari ini sa sako?’ Minsan siring, pag-abot nin panahon, napangganahan ko an enot na pagkabigla sa diagnosis na iyan. Dangan pinangibabawan ako nin kahaditan asin kadaihan nin kasegurohan. Nagkapirang  hapot an paorootrong minasabong sa sakong isip. Ako daw magigin biyong paralisado asin biyong masarig sa iba? Paano ko iyan makakayanan? Makakaya ko pa daw na sustentohan an sakong pamilya—an sakong agom asin an samong apat na aki? Napapaulnok talaga ako sa pag-isip-isip kaiyan.

Sa kritikal na puntong ini sa sakong buhay, orog kisa kasuarin man, namatean ko na kaipuhan kong dumolok ki Jehova sa pamibi asin isabi sa saiya na may lubos na sinseridad an gabos na ikinakapurisaw asin ikinakahadit ko. Aldaw-banggi akong namibi na nagluluha. Dai nahaloy naranga ako. An nakakarangang mga tataramon sa Filipos 4:6, 7 nagin totoong marhay sa kamugtakan ko: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”

Pag-atubang sa Paralisis

An sakong kamugtakan padagos na nagruro. Narealisar ko na kaipuhan kong mag-adaptar tolos sa sakong bagong kamugtakan. Huling dai na ako makakapagtrabaho bilang karpintero, nagdesisyon akong maghanap nin bakong gayong magabat na trabaho na tama sa sakong pisikal na kamugtakan asin na masusuportaran ko pa man giraray an sakong pamilya. Sa primero, nagtinda ako nin sorbetes sa sarong sadit na van. Ini an trabaho ko sa laog nin mga anom na taon sagkod na kinaipuhan ko nang gumamit nin silyang de rueda huli sa sakong helang. Dangan nagbalyo ako sa manlaenlaen na mas magian na trabaho na kaya ko.

Poon kan 1990 an sakong salud ruminuro sagkod sa punto na dai ko na nanggad kayang gibohon an ano man na sekular na trabaho. Ngonyan, biyo na akong nakadepende sa iba, dawa sa mga gibohon na normal na sa tawong may marahay na salud. Kaipuhan na tabangan akong maghigda, magkarigos, asin magbulos. Tanganing makaatender sa Kristianong mga pagtiripon, kaipuhan na itulod an sakong silyang de rueda pasiring sa kotse dangan kargahon ako tanganing isakay dian. Sa Kingdom Hall, kaipuhan na kargahon ako paluwas sa kotse asin isakay sa silyang de rueda dangan itulod palaog. Durante kan pagtiripon, igwa ako nin de koryenteng pampainit na yaon sa harani ko tanganing pahimbongon an sakong mga bitis.

Pero, sa ibong kan paralisis, regular nanggad akong nag-aatender sa gabos na pagtiripon. Nasasabotan ko na digdi kami tinotokdoan ni Jehova, asin an pagigin kaiba kan sakong espirituwal na mga tugang na lalaki asin babae sarong tunay na pailihan asin gikanan nin pagsuportar asin pagparigon sa boot. (Hebreo 10:24, 25) An regular na pagdalaw kan espirituwal asin maygurang na mga kapagtubod nagin dayaday na tabang sa sako. Totoong namamatean ko an arog ki David: “An sakuyang kopa pano nanggad.”—Salmo 23:5.

An sakong mahal na agom nagin marahayon na katuwang ko sa laog nin dakol na taon. An sakong mga aki nagin mapagsuportar man na marhay. Sa laog nin nagkapirang taon na ngonyan, tinatabangan ninda ako sa sakong pangaroaldaw na mga pangangaipo. Bakong pasil an ginigibo ninda, asin sa paglihis nin mga taon, paorog nang paorog na nagigin depisil an pag-ataman sa sako. Sinda totoo nanggad na arogan sa pagkultibar nin pasensia asin sa paggibo kan makakaya ninda, asin ipinapamibi ko na logod padagos sindang bendisyonan ni Jehova.

An saro pang marahayon na probisyon hale ki Jehova na mapasarig sa saiyang mga lingkod iyo an pamibi. (Salmo 65:2) Bilang simbag sa sakong odok sa pusong mga pagngayongayo, tinawan ako ni Jehova nin kosog na magdanay sa pagtubod sa nag-aging mga taon na ini. Nangorogna kun nanluluya an sakong boot, an pamibi nakakaginhawa asin nakakatabang sa sako na mapagdanay an sakong kagayagayahan. An dayaday na pakikikomunikar ki Jehova nagtatao sa sako nin karepreskohan asin ibinabalik an sakong determinasyon na magpadagos. Biyo akong kombensido na dinadangog ni Jehova an mga pamibi kan saiyang mga lingkod asin tinatawan sinda nin katoninongan nin isip na kaipuhan ninda.—Salmo 51:17; 1 Pedro 5:7.

Orog sa gabos, napapakosog liwat ako kada ginigirumdom ko na pag-abot nin panahon papaomayan nin Dios an gabos na binendisyonan nin buhay sa Paraiso sa irarom kan pamamahala kan Kahadean kan saiyang Aki, si Jesu-Cristo. Labi sa sarong beses na buminolos an sakong mga luha nin kagayagayahan mantang hinohorophorop ko  an makangangalas na paglaom na iyan.—Salmo 37:11, 29; Lucas 23:43; Kapahayagan 21:3, 4.

Paglilingkod Bilang Bilog na Panahon na Ministro

Kan mga 1991, pagkatapos na analisaron ko an sakong situwasyon narealisar ko na an pinakamarahay na paagi tanganing dai madaog nin pagkaherak sa sadiri iyo an magdanay na sibot sa pagpaabot sa iba kan mahalagang marhay na maogmang bareta kan Kahadean. Kan taon na iyan, nagpoon akong maglingkod bilang bilog na panahon na ministro.

Huling ako baldado, an kadaklan kan sakong pagpapatotoo ginigibo ko paagi sa pagsurat. Minsan siring, para sa sako, an pagsurat bakong pasil na gibohon; nangangaipo iyan nin grabeng paghihingoa. Nadedepisilan akong kapotan nin higot an bolpen, ta nagluya na an sakong kamot huli sa naalang na kalamnan. Pero, paagi sa pagmamaigot asin pamibi, nagpapatotoo ako paagi sa pagsurat sa laog nin labing 15 taon na ngonyan. Ginagamit ko man an telepono sa paghuhulit sa mga tawo. Nungka kong pinapalihis an oportunidad na ipakipag-olay an sakong paglaom manongod sa bagong kinaban asin sa Paraisong daga sa mga paryente, katood, asin kataed na nagdadalaw sa sakong harong.

Bilang resulta, nagkaigwa ako nin dakol na nakakaparigon sa boot na eksperyensia. Ogmahon akong marhay na maheling an saro sa sakong mga makoapo, na inadalan ko sa Biblia mga 12 taon na an nakaagi, na nag-oswag sa espirituwal asin nagpaheling nin pagpahalaga sa katotoohan sa Biblia. Huling namotibar kan saiyang konsensia na sinanay sa Biblia, nagdanay siang maimbod asin marigon sa isyu manongod sa Kristianong neutralidad.

Partikularmenteng naoogma ako kun an mga tawong sinusuratan ko nakikipagkomunikar sa sako para sa dugang pang impormasyon manongod sa Biblia. Kun minsan, an nagkapira naghahagad nin dugang pang babasahon sa Biblia. Halimbawa, sarong babae an nag-apod sa sako sa telepono asin nagpasalamat sa sako sa nakakaparigon sa boot na surat na ipinadara ko sa saiyang agom. Nanompongan nia na interesanteng marhay an laog kan surat. Nagbunga ini nin dakol na pakikipag-olay manongod sa Biblia sa saiya asin sa agom nia sa sakong harong.

Sarong Maliwanag na Pananaw

Sa nag-aging mga taon, naheling ko an pagdakol kan mga parabalangibog kan Kahadean sa parteng ini kan kinaban. An sadit na Kingdom Hall sa kataed kan harong kan sakong tugang na si George dakol na beses nang pinahiwas asin hinirahay. Iyan sarong magayon na lugar nin pagsamba, na ginagamit nin duwang kongregasyon kan Mga Saksi ni Jehova.

Nagadan si Tatay kan 1943, sa edad na 52. Alagad kanigoan na espirituwal na pamana an saiyang iwinalat! Walo sa saiyang mga aki an nag-ako kan katotoohan asin naglilingkod ki Jehova sagkod ngonyan. Sa baryo nin Xylophagou, na namundagan ni Tatay, asin sa kaharaning mga baryo, igwa na ngonyan nin tolong kongregasyon, na may total na 230 parahayag kan Kahadean!

An marahayon na mga resultang iyan nagin gikanan nin dakulang kagayagayahan para sa sako. Ngonyan, sa edad na 83, may kompiansa man ako sa mga tataramon kan salmista: “An may bunday na ogbon na leon mismo natitikapo asin nagugutom; alagad kun dapit sa mga naghahanap ki Jehova, dai sinda magkukulang nin ano man na marahay.” (Salmo 34:10) Galaga kong hinahalat an panahon na magigin totoo an hula na nakasurat sa Isaias 35:6: “Sa panahon na iyan an pilay matukad na garo lalaking usa.” Sagkod sa panahon na iyan, determinado akong padagos na maglingkod ki Jehova na magayagaya sa ibong kan sakong mga kamatean.

[Mapa sa pahina 17]

(Para sa aktuwal na format, hilingon an publikasyon)

TURKIYA

SIRIA

LEBANON

CHIPRE

Nicosia

Xylophagou

Dagat Mediterraneo

[Ritrato sa pahina 17]

An enot na Kingdom Hall sa Xylophagou, na ginagamit pa sagkod ngonyan

[Ritrato sa pahina 18]

Kaiba ko si Efprepia kan 1946 asin ngonyan

[Ritrato sa pahina 20]

Nakakanompong ako nin kagayagayahan sa pagpapatotoo paagi sa telepono asin pagsurat