May Pagmakolog an Dios sa mga May Edad Na

BAKONG makangangalas an lakop na pagmaltrato sa mga may edad na ngonyan. Kaidtong haloy nang panahon, ihinula kan Biblia na sa “huring mga aldaw” kan bakong diosnon na sistemang ini, an mga tawo magigin “mga mamomoton sa sainda man sana, . . . mga dai nin natural na kapadangatan.” (2 Timoteo 3:1-3) An termino sa Griego na trinadusir na “natural na kapadangatan” puedeng kaiba an pagkamoot na normal nang yaon sa laog kan pamilya. Tamang-tama sa hula kan Biblia, risang-risa na mayo na ngonyan an klaseng iyan nin kapadangatan.

Kabaliktaran na marhay sa mga nagmamaltrato sa mga may edad na, si Jehova Dios dakula an pagpahalaga asin pagmakolog sa mga halangkaw na an edad. Estudyare kun paano ini ipinapaheling sa Biblia.

“Hokom nin mga Babaeng Balo”

An pagmakolog ni Jehova Dios sa mga may edad na risang-risa sa Hebreong Kasuratan. Halimbawa, sa Salmo 68:5 inaapod ni David an Dios na “hokom nin mga babaeng balo,” na sa parate mga may edad na. * Sa ibang traduksion kan Biblia, an terminong “hokom” trinadusir na “parasurog,” “protektor,” asin “paradepensa.” Malinaw nanggad, si Jehova nagmamakolog sa mga babaeng balo. Sa katunayan, an Biblia nagsasabi na kun sinda minamaltrato, an saiyang kaanggotan minalaad. (Exodo 22:22-24) An mga babaeng balo—asin an gabos na maimbod na may edad na—pinapahalagahan na marhay nin Dios asin kan saiyang mga lingkod. Ipinapahayag kan Talinhaga 16:31 an pagmansay ni Jehova Dios asin kan saiyang banwaan kan iyan magsabi: “An pagkaigwa nin uban korona nin kagayonan kun iyan nakukua sa dalan nin katanosan.”

Bakong makangangalas na an paggalang sa  mga gurang pundamental na kabtang kan Ley na itinao ni Jehova sa Israel. Pinagbotan an mga Israelita: “Maninigo na tumindog ka sa atubangan nin may uban, asin dapat na magtao ka nin konsiderasyon sa persona nin gurang, asin dapat na matakot ka sa saimong Dios. Ako si Jehova.” (Levitico 19:32) Huli kaini, sa Israel an pagpahalaga sa mga gurang konektadong marhay sa mismong relasyon nin saro ki Jehova Dios. Dai masasabi nin saro na namomotan nia an Dios kun minamaltrato nia an mga may edad na.

An mga Kristiano mayo sa irarom kan Ley ni Moises. Minsan siring nasa irarom sinda kan “ley kan Cristo,” na may dakulang epekto sa saindang gawe-gawe asin aktitud, kaiba an pagpaheling nin pagkamoot asin pagmakolog sa mga magurang asin sa mga may edad na. (Galacia 6:2; Efeso 6:1-3; 1 Timoteo 5:1-3) Asin an mga Kristiano nagpapaheling nin pagkamoot bako sanang huli ta pinagbotan sinda na gibohon iyan kundi huli ta napapahiro sinda hale sa puso. “Magkaminorootmootan kamo nin makosog gikan sa puso,” an sadol ni apostol Pedro.—1 Pedro 1:22.

Si disipulo Santiago nagtatao nin dugang pang dahelan tanganing pagmakolgan niato an mga may edad na. Sia nagsurat: “An klase nin pagsamba na malinig asin daing digta sa pagheling kan satong Dios asin Ama iyo ini: an pag-ataman sa mga ilo asin babaeng balo sa saindang kasakitan, asin an pagpadanay sa sadiri na daing digta kan kinaban.” (Santiago 1:27) Nakakapukaw sa boot an sinabi ni Santiago. Ipinapaheling kaiyan sa sato kun gurano kaimportante ki Jehova an mga namomotan na ini.

Huli kaini, bakong igo na dai sana niato pagmaltratohon an mga may edad na. Imbes, maninigong magpaheling kita nin aktibong pagmakolog sa sainda paagi sa positibong mga gibo. (Helingon an kahon na “Pagkamoot na Ginigibo,” sa pahina 6-7.) Si Santiago nagsurat: “An pagtubod na daing mga gibo gadan.”—Santiago 2:26.

Pagranga “sa Saindang Kasakitan”

May saro pa kitang manonodan sa mga tataramon ni Santiago. Mangnohon na sinabihan ni Santiago an mga Kristiano na atamanon an mga babaeng balo “sa saindang kasakitan.” An termino sa Griego na trinadusir na “kasakitan” sa pundamental nangangahulogan nin kapurisawan, makuring sakit, o pagdusa na resulta kan mga sakit sa satong kamugtakan sa buhay. Daing pagduwaduwa na dakol sa mga may edad na an nakakaeksperyensia kan arog kaiyan na kapurisawan. An nagkapira napupungaw. An iba nagmomondo nin makuri huli sa mga limitasyon na resulta nin paggurang. Tibaad madesganar dawa an mga aktibo nanggad sa saindang paglilingkod sa Dios. Isipon nindo si John, * sarong maimbod na parabalangibog kan Kahadean nin Dios sa laog nin labing apat na dekada, na an ultimong tolo kaiyan ginamit nia sa espesyal na bilog na panahon na paglilingkod. Ngonyan na sia labi nang 80, inaadmitir ni John na kun beses nadedesganar sia. Sabi nia: “Sa parate sinasalingoy ko an nakaagi asin nagigirumdoman ko an sakong mga sala, an kadakol na sala. Pirme kong iniisip na puede kutanang orog pa karahay an nagibo ko.”

Mararanga an mga siring kaiyan sa pakaaram na si Jehova, minsan ngani sangkap, dai naghahanap nin pagkasangkap. Minsan ngani aram nia an satong mga sala, an Biblia nagsasabi manongod sa saiya: “Kun mga sala an saimong binabantayan, O Jah, O Jehova, siisay an makakatindog?” (Salmo 130:3) Iyo, si Jehova dai nagpopokus sa satong mga sala kundi hineheling nia an nasa puso. Paano niato naaaraman ini?

Si Hadeng David—na nakagibo nin sala asin bakong sangkap—pinasabngan nin Dios na isurat an minasunod na mga tataramon, na nakarekord sa  Salmo 139:1-3: “O Jehova, siniyasat mo ako, asin midbid mo ako. Ika mismo nakaaram kan sakong pagtukaw asin kan sakong pagtindog. Inestudyaran mo an sakong pag-isip hale sa harayo. An sakong pagbiahe asin an sakong paghigda saimong sinokol, asin tatao ka minsan sa gabos kong dalan.” An termino digdi na “sinokol” sa literal nangangahulogan na “saligsigon,” na kaparehong marhay kan ginigibo nin sarong paraoma na pagpahimalid kan apa tanganing mawalat an paroy. Paagi sa pasabong nin Dios, inaasegurar kita ni David na aram ni Jehova kun paano pipilion asin iingatan sa saiyang memorya an satong marahay na mga gibo.

Ginigirumdom kan satong maheherakon na langitnon na Ama—asin pinapahalagahan nia—an satong marahay na mga gibo sagkod na kita nagdadanay na maimbod sa saiya. Sa katunayan, an Biblia nagsasabi na mamansayon nia na akto nin kabikoan na lingawan an satong ginibo asin an pagkamoot na ipinaheling niato para sa saiyang ngaran.—Hebreo 6:10.

“An Enot na mga Bagay Nakalihis Na”

Ipinapaheling kan Biblia na an problema nin paggurang bakong katuyohan nin Dios para sa katawohan. An nakakapagpaluyang mga epekto nin paggurang nagin kabtang kan eksperyensia nin tawo  kaidto sanang pakatapos na magrebelde tumang sa saindang Kaglalang an enot niatong mga magurang, an enot na lalaki asin babae. (Genesis 3:17-19; Roma 5:12) Dai ini magpapadagos sagkod pa man.

Arog kan nasambitan na, an dakol sa maraot na mga kamugtakan na naeeksperyensiahan niato ngonyan—kaiba an pagmaltrato sa mga may edad na—ebidensia na kita nabubuhay na sa “huring mga aldaw” kan sistemang ini nin mga bagay. (2 Timoteo 3:1) An katuyohan nin Dios iyo na haleon an mga epekto nin kasalan, kaiba an danyos nin pagkagurang asin kagadanan. An Biblia nagsasabi: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:4.

Sa bagong kinaban nin Dios, an mga kolog nin paggurang magigin bagay na nakalihis na. Siring man an pagmaltrato sa mga may edad na. (Miqueas 4:4) Pati an mga nagkagaradan na asin nasa memorya nin Dios bubuhayon liwat, tanganing sinda magkaigwa man nin oportunidad na mabuhay sagkod lamang sa sarong paraisong daga. (Juan 5:28, 29) Sa panahon na iyan, magigin risang-risa orog kasuarin man na si Jehova Dios nagmamakolog bako sanang sa mga may edad na kundi sa gabos na nagkukuyog sa saiya.

[Mga Nota sa Ibaba]

[Kahon/​Mga Ritrato sa pahina 6, 7]

Pagkamoot na Ginigibo

Sa tahaw kan Mga Saksi ni Jehova, an mga magurang sa kongregasyon an nangengenot sa pagpaheling nin pagpahalaga sa mga may edad na. Sineseryoso ninda an konseho ni apostol Pedro: “Pastoran nindo an aripompon nin Dios na nasa saindong pangataman.” (1 Pedro 5:2) Kabtang kan pag-ataman sa aripompon nin Dios an pag-asikaso sa praktikal na mga paagi sa mga may edad na. Pero, ano an tibaad kalabot digdi?

Nangangaipo nin pasensia asin posibleng nagkapirang pagsongko asin pakipag-estoryahan tanganing masierto kun ano man nanggad an kaipuhan nin saro na may edad na. Tibaad kaipuhan an tabang sa pamamakal asin paglinig, transportasyon pasiring sa Kristianong mga pagtiripon, pagbasa kan Biblia asin Kristianong mga publikasyon, asin dakol na iba pang bagay. Kun posible, maninigong gumibo asin mag-implementar nin praktikal asin masasarigan na mga areglo. *

Pero, paano kun an sarong may edad nang tugang na lalaki o babae sa kongregasyon nasa masakit na marhay na kamugtakan, na tibaad nangangaipo nin tabang sa pinansial? Enot, marahay na aramon kun igwa sinda nin mga aki o iba pang paryente na puedeng tumabang. Kaoyon ini kan sinasabi sa 1 Timoteo 5:4: “Kun an siisay man na balo igwa nin mga aki o makoapo, pabayaan nguna an mga ini na makanood na maggibo nin diosnon na debosyon sa saindang kasararo sa harong asin padagos na magtao nin nanonongod na balos sa saindang mga magurang asin apoon, huli ta ini makawiwili sa pagheling nin Dios.”

Tibaad an may edad na nangangaipo nin tabang sa pagdeterminar kun sia kualipikadong mag-ako nin ano man na tabang na itinatao kan gobyerno. Tibaad may nagkapira sa kongregasyon na kayang tumabang. Kun mayo nin makukuang tabang sa mga paaging ini, puedeng determinaran kan kamagurangan kun an indibiduwal na iyan kualipikadong mag-ako nin tabang hale sa kongregasyon. Sa nagkapirang kamugtakan, tinogotan ini sa kongregasyon kan enot na siglo, huli ta si apostol Pablo nagsurat sa saiyang kapwa trabahador na si Timoteo: “Ilista sana an balo na anom na polong taon na an edad, nagin agom na babae nin sarong agom na lalaki, na may nagpapatotoo sa saiyang marahay na mga gibo, kun sia nag-ataman nin mga aki, kun sia nag-istimar sa mga estranyo, kun sia naghanaw sa mga bitis nin mga banal, kun sia nakapaginhawa sa mga nagsasakit, kun sia mahigos na nagsunod sa lambang marahay na gibo.”—1 Timoteo 5:9, 10.

[Nota sa Ibaba]

[Ritrato sa pahina 5]

Si Dorcas nagmakolog sa daing sukat na mga babaeng balo.—Gibo 9:36-39