Tampok na mga Kabtang sa Ikaduwang Libro nin Salmo
An Tataramon ni Jehova Buhay
Tampok na mga Kabtang sa Ikaduwang Libro nin Salmo
BILANG mga lingkod ni Jehova, linalaoman niato na maagi kita nin mga pagbalo. “An gabos na nagmamawot na mamuhay na may diosnon na debosyon kaibahan ni Cristo Jesus paglalamagon man,” an sinurat ni apostol Pablo. (2 Timoteo 3:12) Ano an makakatabang sa sato na matagalan an mga pagbalo asin paglamag, na paagi kaiyan mapapatunayan niato an satong integridad sa Dios?
An ikaduwa sa limang koleksion nin salmo nagtatao kan tabang na iyan. Ipinapaheling sa sato kan Salmo 42 sagkod 72 na kun gusto niato na mapangganang matagalan an mga pagbalo, kaipuhan na lubos kitang magtiwala ki Jehova asin makanood na maghalat sa saiyang pagliligtas. Mahalagang leksion nanggad iyan para sa sato! An mensahe kan Ikaduwang Libro nin Salmo, arog kan ibang kabtang kan Tataramon nin Dios, tunay nanggad na “buhay asin mapuersa” dawa ngonyan.—Hebreo 4:12.
SI JEHOVA AN SATONG “PAILIHAN ASIN KOSOG”
An sarong Levita nakadistiero. Namomondo huling dai sia makakaduman sa santuaryo ni Jehova tanganing sumamba, rinanga nia an saiyang sadiri na nagsasabi: “Taano ta namomondo ka, O kalag ko, asin taano ta nariribok ka sa laog ko? Maghalat ka sa Dios.” (Salmo 42:5, 11; 43:5) An paorootrong bersikulong ini an nagkokonektar kan tolong estropa kan Salmo 42 asin 43 na magin sarong berso. An Salmo 44 sarong pakiolay para sa Juda—sarong nasyon na nasa kasakitan, na tibaad namemeligro sa pagsalakay kan mga Asirio kan mga aldaw ni Hadeng Ezequias.
An Salmo 45, na sarong awit manongod sa kasal nin sarong hade, naghuhula manongod sa Mesiyanikong Hade. An minasunod na tolong salmo ilinaladawan si Jehova bilang “pailihan asin kosog,” “sarong dakulang Hade sa bilog na daga,” asin “ligtas na kalangkawan.” (Salmo 46:1; 47:2; 48:3) Kanigoan kagayon na ipinaheling kan Salmo 49 na mayo nin tawo “na sa ano man na paagi makakabalukat minsan sa tugang”! (Salmo 49:7) An enot na walong salmo kan ikaduwang koleksion iinaatribwir sa mga aki ni Core. An ikasiyam, Salmo 50, komposisyon ni Asaf.
Mga Hapot sa Kasuratan na Sinimbag:
44:19—Ano an “lugar kan mga layas na ayam”? An salmista tibaad nagtataram manongod sa sarong lugar nin ralaban, kun saen an mga gadan nagigin kakanon kan mga layas na ayam.
45:13, 14a—Siisay “an aking babae kan hade” na “dadarahon sa hade”? Sia an aking babae kan “Hade sa panahon na daing sagkod,” si Jehova Dios. (Kapahayagan 15:3) Sia nagrerepresentar sa pinamuraway na kongregasyon nin 144,000 na Kristiano, na inampon ni Jehova bilang saiyang mga aki paagi sa paglahid sa sainda kan saiyang espiritu. (Roma 8:16) An “aking babae” na ini ni Jehova, na “inandam siring sa nobya na sinamnohan para sa saiyang agom na lalaki,” dadarahon sa nobyo—an Mesiyanikong Hade.—Kapahayagan 21:2.
45:14b, 15—Kiisay nagrerepresentar “an mga birhen”? Sinda an “dakulang kadaklan” nin tunay na mga parasamba, na nag-iiriba asin nagsusuportar sa linahidan na natatada. Huling sinda buhay na “nagluwas sa dakulang kahorasaan,” sinda nasa daga kun matapos na sa langit an kasal kan Mesiyanikong Hade. (Kapahayagan 7:9, 13, 14) Sa okasyon na iyan, sinda mapapano nin “kaogmahan asin kagayagayahan.”
45:16—Sa anong paagi magkakaigwa nin mga aki na kasalihid kan mga apoon kan hade? Kan mamundag si Jesus sa daga, igwa sia nin mga apoon na daganon. Sinda magigin mga aki nia kun sinda buhayon na nia liwat hale sa mga gadan durante kan saiyang Sangribong Taon na Paghade. An nagkapira sa sainda mapapabilang sa mga nonombrahan na “mga prinsipe sa bilog na daga.”
50:2—Taano an Jerusalem ta inapod na “an sangkap na kagayonan”? Bako ining huli sa itsura kan siudad. Imbes, an dahelan iyo na ginamit iyan ni Jehova asin tinawan nia iyan nin kagayonan paagi sa paggibo kaiyan na lugar kan saiyang templo asin kabisera kan saiyang linahidan na mga hade.
Mga Leksion Para sa Sato:
42:1-3. Kun paanong an sarong usang babae sa marang lugar naghahanap nin tubig, an Levita naghahanap ki Jehova. Grabe an kamondoan kan tawong iyan huling dai sia makakasamba ki Jehova sa Saiyang santuaryo kaya ‘an saiyang luha nagin pagkakan nia aldaw asin banggi’—nawaran sia nin ganang kumakan. Bako daw na maninigong kultibaron niato an hararom na pagpahalaga sa pagsamba ki Jehova kaiba kan mga kapagtubod?
42:4, 5, 11; 43:3-5. Kun huli sa sarong dahelan na dai niato kontrolado kita temporaryong napasuway sa Kristianong kongregasyon, an paggirumdom sa mga kagayagayahan sa arog kaiyan na asosasyon kan nakaagi puedeng makasustenir sa sato. Minsan ngani sa primero tibaad madadagdagan kaini an kolog kan satong kapungawan, iyan magpapagirumdom man sa sato na an Dios an satong pailihan asin na kaipuhan niatong maghalat sa saiya para sa pakaginhawa.
46:1-3. Ano man na kalamidad an tibaad maeksperyensiahan niato, kaipuhan na igwa kita nin marigon na kompiansa na “an Dios pailihan asin kosog para sa sato.”
50:16-19. An siisay man na nagtataram nin panloloko asin naggigibo nin marigsok na mga bagay mayo nin deretso na magrepresentar sa Dios.
50:20. Imbes na ipagparapangestorya an mga sala kan iba, maninigong lingawan na sana niato an mga iyan.—Colosas 3:13.
‘SA DIOS MAGHALAT KA NA DAING GIRONG, O KALAG KO’
An grupong ini nin mga salmo nagpopoon paagi sa odok sa pusong pamibi ni David pagkatapos kan saiyang pagkakasala kaiba ni Bat-seba. An Salmo 52 sagkod 57 nagpapaheling na ililigtas ni Jehova an mga nagtatao kan saindang pasan sa saiya asin naghahalat sa saiya para sa kaligtasan. Siring kan ipinapahayag sa Salmo 58-64, durante kan gabos niang kasakitan, ginibong pailihan ni David si Jehova. Sia nag-aawit: “Sa Dios maghalat ka nanggad na daing girong, O kalag ko, huli ta sa saiya hale an sakong paglaom.”—Salmo 62:5.
An kadayupotan sa satong Paraligtas maninigong magpahiro sa sato na ‘umawit nin melodiya sa kamurawayan kan saiyang ngaran.’ (Salmo 66:2) Inoomaw si Jehova bilang sarong paratao na buka an palad sa Salmo 65, bilang Dios nin mga pagliligtas sa Salmo 67 asin 68, asin bilang Paratao nin dudulagan sa Salmo 70 asin 71.
Mga Hapot sa Kasuratan na Sinimbag:
51:12—Kiisay na “espiritu nin pagigin gikan sa boot” nagpasuportar si David? Ini nanonongod, bakong sa pagigin andam nin Dios na magtabang ki David ni sa banal sa espiritu ni Jehova, kundi sa espiritu mismo ni David—sa saiyang inklinasyon nin isip. Hinahagad nia sa Dios na tawan sia nin pagmawot na gibohon an tama.
53:1—Paanong “daing isip” an tawong nagnenegar sa pag-eksister nin Dios? An pagkadaing isip digdi dai nangangahulogan nin pagkadaing intelihensia. An katunayan na an siring na tawo daing isip sa moral maheheling sa ibinubungang pagbagsak kan moral na ilinadawan sa Salmo 53:1-4.
58:3-5—Sa anong paagi na an mga maraot garo halas? An mga kaputikan na sinasabi ninda manongod sa iba garo kamandag nin halas. Hinihilo kaiyan an marahay na reputasyon kan saindang mga biktima. “Siring sa rimoranon na sineserahan an talinga kaiyan,” an mga maraot dai naghihinanyog sa paggiya o pagtatanos.
58:7—Paanong an mga maraot ‘matutunaw na garo nasa tubig na nagbobolos’? Tibaad nasa isip ni David an katubigan kan nagkapirang kababan kan mga sapang masulog sa Dagang Panuga. Minsan ngani minalangkaw an tubig sa siring na kababan dahel sa biglang pagbaha, an katubigan na ini tolos na naghuhubas asin nawawara. Si David namimibi para sa marikas na pagkawara kan mga maraot.
68:13—Paanong ‘an mga pakpak nin sarong salampati natatakopan nin pirak asin an mga gilid kan pakpak kaiyan nin medyo amarilyo asin berdeng bulawan’? May mga salampating kolor asul asin abohon na igwa nin garo hablondawaning kinang sa nagkapirang balukag kaiyan. An balukag kan mga iyan nagigin garo metal paghelingon sa kinang kan saldang. An mapangganang mga parapakilaban na Israelita na hale sa ralaban tibaad iinaagid ni David sa arog kaiyan na salampati—na makosog an pakpak asin makinang paghelingon. Arog kan isinusuherir kan nagkapirang intelektuwal, an deskripsion puede man na iaplikar sa sarong gibo nin arte, sarong tropeo, na kinua bilang samsam. Sa paano man, nasasambitan ni David an mga kapangganahan na itinao ni Jehova sa saiyang banwaan tumang sa saindang mga kaiwal.
68:18—Sairisay an “mga balaog sa porma nin mga lalaki”? Ini an mga lalaki na kabilang sa mga dinarang bihag durante kan pagkongkistar sa Dagang Panuga. An siring na mga lalaki iinasignar kan huri na magtabang sa mga Levita sa saindang gibohon.—Esdras 8:20.
68:30—Ano an kahulogan kan kahagadan na “sawayon mo an mabangis na hayop na yaon sa mga gaho”? Nagtataram sa piguratibong paagi manongod sa mga kaiwal kan banwaan ni Jehova bilang mabangis na mga hayop, hinagad ni David sa Dios na sawayon sinda, o pogolan an saindang puersa na gumibo nin danyos.
69:23—Ano an kahulogan kan ‘pagilogiloon an mga piad kan mga kaiwal’? An mga kalamnan sa piad mahalagang marhay sa paggibo nin magabat na mga trabaho, arog kan pagbuhat asin pag-alsa nin magagabat na pasan. An bakong masarig na piad nagpaparisa nin pagkawara nin kosog. Namibi si David na an saiyang mga kaiwal mawaran kan saindang kosog.
Mga Leksion Para sa Sato:
51:1-4, 17. An pakakomiter nin kasalan dai kaipuhan na makaparayo sa sato ki Jehova Dios. Kun kita magsolsol, makakasarig kita sa saiyang pagkaherak.
51:5, 7-10. Kun nagkasala kita, puede niatong hagadon an kapatawadan ni Jehova huli sa satong minanang pagkamakasalan. Maninigo man kitang mamibi sa saiya na logod linigon kita, ibalik kita sa dati, tabangan kita na mahale an makasalan na mga tendensia sa satong puso, asin na tawan kita nin marigon na espiritu.
51:18. An kasalan ni David nagsapeligro kan ikakarahay kan bilog na nasyon. Kaya namibi sia na logod pahelingan nin Dios nin marahay na boot an Sion. Kun kita makakomiter nin magabat na kasalan, iyan parateng madara nin katuyawan sa ngaran ni Jehova asin sa kongregasyon. Kaipuhan na mamibi kita sa Dios na pakarhayon an danyos na puedeng nagibo niato.
52:8. Puede kitang magin “arog nin sarong marambong na poon nin olibo sa harong nin Dios”—harani ki Jehova asin mabunga sa paglilingkod sa saiya—paagi sa pagkuyog sa saiya asin paagi sa gikan sa boot na pag-ako kan saiyang disiplina.—Hebreo 12:5, 6.
55:4, 5, 12-14, 16-18. An pagkasapakat kan sadiri niang aki na si Absalon asin an pagpasaloib kan pinagtitiwalaan niang konsehero na si Ahitofel nagtao ki David nin grabeng emosyonal na kolog. Minsan siring, dai pinaluya kaiyan an pagsarig ni David ki Jehova. Dai niato maninigong pagtogotan na paluyahon kan emosyonal na kolog an satong pagtitiwala sa Dios.
55:22. Paano niato itinatao ki Jehova an pagabat sa sato? Ginigibo niato ini (1) paagi sa pagpamibi niato sa saiya dapit sa bagay na ikinakapurisaw niato, (2) paagi sa pagsarig niato sa saiyang Tataramon asin organisasyon para sa paggiya asin suporta, asin (3) paagi sa paggibo kan rasonableng makakaya niato na pagianon an situwasyon.—Talinhaga 3:5, 6; 11:14; 15:22; Filipos 4:6, 7.
56:8. Aram ni Jehova bako sanang an satong situwasyon kundi pati an emosyonal na epekto kaiyan sa sato.
62:11. An Dios dai kaipuhan na magsarig sa ano man na panluwas na gikanan nin kosog. Sia an mismong gikanan nin kosog. ‘Sa saiya an kakosogan.’
63:3. An ‘mamomoton na kabootan nin Dios orog karahay kisa buhay’ huli ta kun mayo iyan, an buhay daing kahulogan asin daing katuyohan. Madonong na kultibaron niato an pakikikatood ki Jehova.
63:6. An banggi—na toninong asin mayo nin disturbo—puedeng magin marahayon na panahon para sa paghorophorop.
64:2-4. An nakakadanyar na tsismis puedeng makaraot sa marahay na reputasyon nin sarong daing kasalan. Dai kita maninigong magdangog sa siring na tsismis ni magpalakop kaiyan.
69:4. Tanganing mapagdanay niato an katoninongan, kun beses tibaad madonong na ‘magsulit’ paagi sa paghagad nin dispensasyon, dawa kun dai kita kombensido na may sala kita.
70:1-5. Dinadangog ni Jehova an satong apretadong mga pakiolay para sa tabang. (1 Tesalonica 5:17; Santiago 1:13; 2 Pedro 2:9) Tibaad itogot nin Dios na magpadagos an sarong pagbalo, pero tatawan nia kita nin kadonongan tanganing maatubang an situwasyon asin nin kosog tanganing matagalan iyan. Dai nia itotogot na masugotan kita nin labi sa makakaya niato.—1 Corinto 10:13; Hebreo 10:36; Santiago 1:5-8.
71:5, 17. Si David nakapatalubo nin rigon nin boot asin kosog paagi sa paggibo ki Jehova na magin saiyang kompiansa sa saiyang pagkahoben—dawa bago pa nia atubangon an Filisteong higante na si Goliat. (1 Samuel 17:34-37) An mga hoben maninigong magsarig ki Jehova sa gabos na ginigibo ninda.
“Makapano Logod an Saiyang Kamurawayan sa Bilog na Daga”
An pangultimong awit sa ikaduwang koleksion nin mga salmo, an Salmo 72, manongod sa pamamahala ni Salomon, na nagseserbing anino kan magigin kamugtakan sa irarom kan paghade kan Mesiyas. Kanigoan kamakangangalas na mga bendisyon an ilinaladawan dian—abundang katoninongan, an katapusan nin pan-aapi asin kadahasan, abundang tipasi sa daga! Magigin kabilang daw kita sa mga magkakamit kaini asin kan iba pang mga bendisyon kan Kahadean? Puede kitang mapabilang dian kun, arog kan salmista, kita kontentong mahalat ki Jehova, na ginigibo sia na magin satong pailihan asin kosog.
“An mga pamibi ni David . . . natapos” paagi sa mga tataramon na: “Pag-omawon si Jehova Dios, an Dios nin Israel, na iyo sana an naggigibo nin makangangalas na mga gibo. Asin pag-omawon an saiyang mamuraway na ngaran sagkod sa panahon na daing katapusan, asin makapano logod an saiyang kamurawayan sa bilog na daga. Amen asin Amen.” (Salmo 72:18-20) Bilog na puso man niatong omawon si Jehova asin an saiyang mamuraway na ngaran.
[Ritrato sa pahina 9]
Aram daw nindo kun kiisay naglaladawan an “aking babae kan hade”?
[Ritrato sa pahina 10, 11]
An Jerusalem inaapod na “an sangkap na kagayonan.” Aram daw nindo kun taano?