“An Saimong mga Pagirumdom Iyo an Sakong Nawiwilihan”

“An gabos na bagay na isinurat kaidto isinurat sa pagtokdo sa sato.”—ROMA 15:4.

1. Paano kita tinatawan nin mga pagirumdom ni Jehova, asin taano ta kaipuhan niato iyan?

SI Jehova nagtatao nin mga pagirumdom sa saiyang banwaan tanganing tabangan sindang atubangon an mga kasakitan sa depisil na mga panahon na ini. An nagkapira sa mga pagirumdom na ini nakukua durante nin personal na pagbasa sa Biblia, mantang an iba paagi sa impormasyon o mga komento sa Kristianong mga pagtiripon. An kadaklan sa nababasa o nadadangog niato sa mga okasyon na ini bako nang bago sa sato. Posibleng marhay na naestudyaran na niato an kaagid na impormasyon kan nakaagi. Minsan siring, huling kita may tendensiang makalingaw, kaipuhan niatong padagos na irepresko an satong memorya mapadapit sa mga katuyohan, ley, asin instruksion ni Jehova. Maninigo niatong pahalagahan an mga pagirumdom nin Dios. Pinapakosog giraray kaiyan an satong boot paagi sa pagtabang sa sato na pirmeng isaisip an mga dahelan na nagmotibar sa sato na sundon an diosnon na pamumuhay. Sa siring, an salmista nag-awit ki Jehova: “An saimong mga pagirumdom iyo an sakong nawiwilihan.”—Salmo 119:24.

2, 3. (a) Taano ta prineserbar ni Jehova sagkod sa satong kaaldawan an estorya nin buhay kan mga karakter sa Biblia? (b) Arin na mga salaysay sa Kasuratan an totokaron sa artikulong ini?

² Minsan ngani isinurat kaidtong dakol na siglo na an nakaagi, mapuersa an Tataramon nin Dios. (Hebreo 4:12) Iinaatubang kaiyan sa sato an totoong mga salaysay manongod sa buhay kan mga karakter sa Biblia. Minsan ngani dakula na an pagbabago sa mga kostumbre asin punto de vista poon kaidtong mga panahon kan Biblia, an mga problemang kaipuhan niatong atubangon parate na kaagid kan mga inatubang kaidto. An dakol na estorya na prineserbar sa Biblia para sa kapakinabangan niato nagtatao sa sato nin nakakapukaw sa boot na mga halimbawa nin mga tawo na namoot ki Jehova asin maimbod na naglingkod sa saiya sa ibong nin bakong paborableng mga kamugtakan. An ibang salaysay nagsasabi kan klase nin paggawe na ikinakaongis nin Dios. Iiniba ni Jehova sa Biblia bilang mga pagirumdom an gabos na salaysay na ini manongod sa mga tawo, marahay man asin maraot. Siring iyan kan isinurat ni apostol Pablo: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.”—Roma 15:4.

³ Magkonsentrar kita sa tolong salaysay sa Kasuratan: an salaysay manongod sa pagtratar ni David ki Saul, manongod ki Ananias asin Safira, asin an salaysay manongod sa paggawe ni Jose may koneksion sa agom ni Potifar. An balang saro sa mga estoryang ini nagtotokdo sa sato nin mahalagang mga leksion.

Kaimbodan sa mga Areglo nin Dios

4, 5. (a) Ano an nagin situwasyon may koneksion ki Hadeng Saul asin David? (b) Ano an nagin reaksion ni David sa kaanggotan ni Saul?

⁴ Si Hadeng Saul nagin bakong maimbod ki Jehova asin dai maninigo na mamahala sa Saiyang banwaan. Kaya hinaboan sia nin Dios asin pinagbotan si propeta Samuel na lahidan si David bilang an magigin hade sa Israel. Kan ipaheling ni David an saiyang tibay bilang parapakilaban asin tawan sia nin pag-omaw kan banwaan, si Saul nagpoon na mansayon si David bilang karibal. Paorootrong prinobaran ni Saul na gadanon sia. Naligtasan ni David an lambang pangyayari huli ta si Jehova nasa kaibahan nia.—1 Samuel 18:6-12, 25; 19:10, 11.

 ⁵ Sa laog nin dakol na taon, si David napiritan na mamuhay bilang dulag. Kan magkaigwa nin mga oportunidad na gadanon si Saul, si David sinadol kan saiyang kairiba na gibohon iyan, na nagsasabi na itinatao ni Jehova sa kamot ni David an saiyang kaiwal. Pero, nagsayuma si David. An saiyang kaimbodan ki Jehova asin an saiyang paggalang sa posisyon ni Saul bilang linahidan na hade kan banwaan nin Dios an nagpahiro sa saiya na gumawe sa paaging ini. Si Jehova an nagnombra ki Saul bilang hade kan Israel, bako daw? Si Jehova man an mahale sa saiya kun pagmamarhayon Niang gibohon iyan. Si David nangatanosan na bako niang trabaho na makiaram. Pakatapos niang gibohon an gabos na makakaya nia sa mga situwasyon na iyan tanganing palumoyon an kaanggotan sa saiya ni Saul, si David nagkonklusyon: “Si Jehova mismo an mahampak sa saiya; o an aldaw nia maabot asin sia magagadan, o sia mahilig sa pakilaban, asin sia nanggad mapapara. Dai ko lamang pepensaron, sa punto de vista ni Jehova, na bikyawon an sakong kamot tumang sa linahidan ni Jehova!”—1 Samuel 24:3-15; 26:7-20.

6. Taano ta importanteng estudyaran niato an estorya manongod ki David asin Saul?

⁶ An salaysay na ini igwa nin mahalagang marhay na leksion. Napag-isip-isip na daw nindo kun taano ta minalataw an nagkapirang problema sa Kristianong kongregasyon? Tibaad bakong angay an iginagawe nin sarong indibiduwal. An saiyang gawe-gawe tibaad dai man ikakabilang na grabeng salang gibo, alagad iyan nakakapurisaw sa saindo. Ano an maninigong magin reaksion nindo? Huli sa Kristianong pagmakolog sa indibiduwal na iyan asin huli sa kaimbodan ki Jehova, puede kamong magdesisyon na kaolayon sia sa maboot na paagi, na an katuyohan madara nindo sia. Pero, ano kun magpadagos an problema? Pakatapos nindong gibohon an gabos na rasonableng magigibo nindo, puede nindong booton na ipabaya an bagay sa kamot ni Jehova. Iyan an ginibo ni David.

7. Bilang pag-arog ki David, ano an maninigo na magin reaksion niato kun kita nakakaeksperyensia nin inhustisya o daing binabasaran na pagkaanggot?

⁷ O tibaad napapaatubang kamo sa mga problema dapit sa inhustisya sosyal o daing binabasaran na pagkaanggot huli sa relihion. Posibleng haros mayo o talagang mayo kamong magigibo ngonyan manongod dian. An siring na situwasyon tibaad magin depisil na marhay na tagalan, alagad an reaksion ni David sa inhustisya nagtotokdo sa sato nin leksion. An mga salmo na isinurat ni David nakakapahirong rekord bako sana kan saiyang odok sa pusong mga pamibi sa Dios na logod dai sia abotan ni Saul kundi patin kan saiyang kaimbodan ki Jehova asin kan saiyang interes sa pagkapamuraway kan ngaran nin Dios. (Salmo 18:1-6, 25-27, 30-32, 48-50; 57:1-11) Si David nagdanay na maimbod ki Jehova minsan ngani si Saul nagpadagos na guminawe nin daing hustisya sa laog nin dakol na taon. Kita man maninigong magdanay na maimbod ki Jehova asin sa saiyang organisasyon ano man na mga inhustisya an inaagihan niato asin ano man an ginigibo nin iba. Makakasierto kita na biyong aram ni Jehova an situwasyon.—Salmo 86:2.

8. Ano an nagin reaksion kan mga Saksi ni Jehova sa Mozambique kan mabalo an saindang kaimbodan ki Jehova?

⁸ An mga Kristiano sa Mozambique nagseserbing halimbawa sa presenteng aldaw nin mga nagdanay na maimbod ki Jehova sa panahon nin  pagbalo sa presenteng panahon. Kan 1984 an saindang mga baryo paorootrong sinakyada kan armadong mga miembro kan sarong mobimiento nin oposisyon, na nanhabon, nansolo nin mga harong, asin nangadan. Garo baga mayong magigibo an tunay na mga Kristianong ini tanganing depensahan an saindang sadiri. An mga nag-eerok sa lugar na iyan pinagparahingoang paayonon sa militarisadong mobimiento o pinuersang sumuportar dian sa iba pang mga paagi. Ibinilang kan mga Saksi ni Jehova na an paggibo kaiyan bakong kaoyon kan saindang paninindogan sa Kristianong neutralidad. An saindang pagsayuma ikinaanggot na marhay. Treintang Saksi an ginadan durante kan maribok na peryodong iyan, alagad maski pa ngani an huma nin kagadanan dai nakaraot sa kaimbodan kan banwaan nin Dios. * Siring ki David, tinagalan ninda an mga inhustisya alagad nagin mapanggana sa kahurihurihi.

Sarong Nagpapatanid na Pagirumdom

9, 10. (a) Paano kita makikinabang sa nagkapirang halimbawa sa Kasuratan? (b) Ano an sala sa ginibo ni Ananias asin Safira?

⁹ An nagkapirang indibiduwal na nasambitan sa Kasuratan nagtatao nin nagpapatanid na mga pagirumdom manongod sa gawe-gawe na dapat likayan. Tunay nanggad, an Biblia igwa nin dakol na salaysay manongod sa mga tawo, dawa sa tahaw kan mga lingkod nin Dios, na naggibo nin sala asin nagsapar kan mga epekto kaiyan. (1 Corinto 10:11) An saro kaiyan iyo an mapadapit ki Ananias asin Safira, sarong mag-agom na miembro kan Kristianong kongregasyon sa Jerusalem kan enot na siglo.

¹⁰ Pakatapos kan Pentecostes 33 C.E., nagkaigwa nin pangangaipo na magtao nin materyal na tabang sa bagong nagturubod na nagdanay sa Jerusalem tanganing makinabang sa pakikiasosyar sa mga apostol. An nagkapirang miembro kan kongregasyon nagpabakal nin rogaring tangani na magkaigwa nin pondo na paghihirirasan tanganing mapanigoan an pangangaipo kan gabos. (Gibo 2:41-45) Si Ananias asin Safira nagpabakal nin oma asin kabtang sana kan kabaklan an dinara ninda sa mga apostol, na nagsasabi na an itinao nindang regalo iyo na an bilog na kabaklan. Totoo, si Ananias asin Safira may deretsong magtao nin maski gurano kadakol o kadikit na gusto ninda, alagad maraot an saindang motibo, asin bakong onesto an saindang ginibo. Gusto nindang magpasikat asin paluwason na naggigibo sinda nin orog kisa aktuwal na ginibo ninda. Paagi sa pasabong kan banal na espiritu, ibinuyagyag ni apostol Pedro an saindang pagkabakong onesto asin pagsaginsagin, asin ginadan sinda ni Jehova.—Gibo 5:1-10.

11, 12. (a) Ano an nagkapirang pagirumdom manongod sa pagkaonesto? (b) Ano an mga pakinabang na ibinubunga kan pagigin onesto?

¹¹ Kun kita enkaso masugotan na biribidon an katotoohan tanganing pahangaon an mga tawo,  logod na an estorya manongod ki Ananias asin Safira magserbing nakakapapensar na pagirumdom. Puede niatong madaya an satong kapwa, alagad dai niato madadaya si Jehova. (Hebreo 4:13) Paorootro kitang sinasadol kan Kasuratan na magin onesto sa lambang saro, huli ta an mga putikon dai magkakaigwa nin lugar sa sarong daga na mayo nang karatan. (Talinhaga 14:2; Kapahayagan 21:8; 22:15) Malinaw nanggad an dahelan kaiyan. An promotor kan gabos na kaputikan daing iba kundi si Satanas na Diablo.—Juan 8:44.

¹² An onestong pamumuhay niato nagbubunga nin dakol na pakinabang. Kabilang sa mga iyan an malinig na konsensia asin an satispaksion sa pakaaram na an iba nagtitiwala sa sato. Sa dakol na pangyayari, huli ta sinda onesto, an mga Kristiano nagkatrabaho o nagdanay sa saindang trabaho. Pero an pinakamahalagang pakinabang iyo na paagi sa pagkaonesto nakakamtan niato an pakikikatood kan Makakamhan sa Gabos na Dios.—Salmo 15:1, 2.

Pagpapadanay nin Kabinian

13. Ano an nagin situwasyon ni Jose, asin ano an nagin reaksion nia?

¹³ Si Jose, na aki kan patriarkang si Jacob, ipinabakal sa kaoripnan sa edad na 17. Sa kahurihurihi, napaduman sia sa harong ni Potifar, sarong opisyal sa palasyo nin Egipto, kun saen naakit ki Jose an agom kan saiyang kagurangnan. Nagmawot ining makidorog ki Jose, na sarong guapong hoben na lalaki, asin aroaldaw nia siang pinapakiolayan: “Dumorog ka sa sako.” Si Jose harayo sa saiyang pamilya, sa sarong nasyon na mayong nakakamidbid sa saiya. Pasil sana kutana para sa saiya na magkaigwa nin relasyon sa babaeng ini na dai naaaraman kan ibang tawo. Pero, kan sa katapustapusi kaptan sia kan agom ni Potifar, duminulag si Jose.—Genesis 37:2, 18-28; 39:1-12.

14, 15. (a) Taano ta importanteng estudyaran niato an estorya manongod ki Jose? (b) Taano ta nagpapasalamat an sarong Kristiana na hinimate nia an mga pagirumdom nin Dios?

¹⁴ Si Jose pinadakula sa sarong pamilya na matatakton sa Dios, asin nasasabotan nia na sala an pagdodorog nin duwang tawong bakong mag-agom. “Paano ko magigibo an dakulang karatan na ini asin totoong magkasala tumang sa Dios?” an hapot nia. Posibleng marhay na an saiyang konklusyon nagiyahan kan kaaraman manongod sa pamantayan nin Dios para sa mga tawo na sinabi sa Eden, an monogamiya. (Genesis 2:24) An banwaan nin Dios ngonyan puedeng makinabang paagi sa paghorophorop sa nagin reaksion ni Jose sa situwasyon na iyan. Sa nagkapirang lugar, kinokonsinteng gayo an pagdodorog kaya an mga hoben na habong mapalabot sa inmoralidad inoolog-olog kan saindang mga kaedad. An pakipagrelasyon sa iba apuera sa agom ordinaryo na sana. Huli kaini, an estorya manongod ki Jose sarong napapanahon na pagirumdom para sa sato. An pamantayan nin Dios iyo na kasalan pa man giraray an pakikisaro asin pagsambay.  (Hebreo 13:4) An dakol na nagpadara sa pan-iimpluwensia na magkomiter nin bawal na sekso minaoyon na igwa nin mapuersang dahelan na dai iyan paggibohon. Puedeng kabilang sa bakong marahay na mga resulta an pagkapasupog, nariribok na konsensia, mga pag-imon, pagbados, asin helang na ikinakaolakit paagi sa pagdodorog. Siring kan ipinapagirumdom sa sato kan Kasuratan, an tawong nakikisaro “nagkakasala tumang sa saiyang sadiring hawak.”—1 Corinto 5:9-12; 6:18; Talinhaga 6:23-29, 32.

¹⁵ Si Jenny, * sarong daing agom na Saksi ni Jehova, may dahelan na magpasalamat sa mga pagirumdom nin Dios. Sa trabaho, sarong guapong katrabaho an nagpaheling nin romantikong atension sa saiya. Kan dai sia intindihon ni Jenny, orog pa siang nagpaheling nin atension. “Nasakitan akong magdanay na mabini,” an inadmitir nia, “huli ta nakakapataba sa puso kun may nagtataong atension sa saimo na bakong kasekso.” Pero, narealisar nia na naghihingoa sana an lalaking idto na idagdag sia sa dakol na babae na nakarelasyon kaini. Kan mamatean nia na nagluluya na an saiyang determinasyon na labanan iyan, nagngayongayo sia ki Jehova na tabangan siang magdanay na maimbod sa Saiya. Naeksperyensiahan ni Jenny na an mga bagay na nanodan nia sa saiyang pagsiyasat sa Biblia asin sa Kristianong mga publikasyon garo mga pagirumdom na nagserbing pampukaw sa saiya na magdanay na nagmamaan. An saro sa mga pagirumdom na idto iyo an estorya manongod ki Jose asin sa agom ni Potifar. “Mientras na danay kong ipinapagirumdom sa sakong sadiri kun gurano an pagkamoot ko ki Jehova,” an konklusyon nia, “dai ko kaipuhan na matakot na gigibohon ko an dakulang karatan na ini asin magkasala tumang sa saiya.”

Himateon an mga Pagirumdom nin Dios!

16. Paano kita makikinabang sa pagrepaso asin paghorophorop manongod sa buhay nin mga indibiduwal na nasambitan sa Biblia?

¹⁶ Mapapatalubo niato gabos an satong pag-apresyar sa mga pamantayan ni Jehova paagi sa pagmamaigot na masabotan kun taano ta prineserbar nia sa Kasuratan an nagkapirang salaysay para sa sato. Ano an itinotokdo kaiyan? Anong mga kualidad o tendensia na ipinaheling kan mga karakter sa Biblia an kaipuhan niatong arogon o likayan? Sa aktuwal, ginatos na salaysay manongod sa mga indibiduwal an nakarekord sa Tataramon nin Dios. Marahay na kultibaron kan gabos na namomoot sa pagtotokdo nin Dios an pagmawot para sa nagtatao nin buhay na kadonongan, kaiba an mga leksion na puede niatong manodan sa mga halimbawa na maingat na prineserbar ni Jehova. Sa parate itinampok kan magasin na ini an mga artikulo manongod sa siring na mga indibiduwal na an estorya igwa nin itinotokdo sa sato. Taano ta dai magtao nin panahon na repasohon an mga ini?

17. Ano an saboot nindo manongod sa mga pagirumdom ni Jehova, asin taano?

¹⁷ Nagpapasalamat nanggad kita sa mamomoton na pagmakolog na ipinaheling ni Jehova sa mga nagmamaigot na gibohon an saiyang kabotan! Bako nanggad kitang sangkap, kun paanong an mga lalaki asin babae na nasambitan sa Biblia bakong sangkap. Minsan siring, an nasusurat na salaysay manongod sa saindang mga ginibo kapakipakinabang na marhay na impormasyon para sa sato. Paagi sa paghimate sa mga pagirumdom ni Jehova, malilikayan niato na makagibo nin magabat na mga sala, asin puede niatong arogon an marahay na halimbawa kan mga naglakaw sa mga dalan nin katanosan. Kun gigibohon niato iyan, puede kitang umawit na kapareho kan salmista: ‘Maogma an mga nag-ootob sa mga pagirumdom ni Jehova; sa bilog na puso sia padagos na hinahanap ninda. Inootob kan kalag ko an saimong mga pagirumdom, asin namomotan ko iyan nin labi-labi.’—Salmo 119:2, 167.

[Mga Nota sa Ibaba]

Ano an Isisimbag Nindo?

• Ano an manonodan niato sa aktitud ni David may koneksion ki Saul?

• Ano an itinotokdo sa sato kan salaysay manongod ki Ananias asin Safira?

• Taano ta nangorognang importante na estudyaran niato an estorya nin buhay ni Jose?

[Mga Hapot Para sa Pag-adal]

[Ritrato sa pahina 26]

Taano ta dai nagtogot si David na gadanon si Saul?

[Ritrato sa pahina 27]

Ano an manonodan niato sa salaysay manongod ki Ananias asin Safira?

[Ritrato sa pahina 28]

Ano an dahelan ta sinayumahan ni Jose an inmoral na mga pan-aakit?