An Telebisyon—Marahay daw na Paraaling nin Aki?

KUN beses, tibaad garo baga nakakaakit na padalanon nin telebisyon an saindong mga aki tanganing malibang sinda mantang inaasikaso nindo an ibang bagay. Alagad paano daw ini makakaapektar sa saindong mga aki?

“Dawa an mga omboy puedeng maimpluwensiahan nin emosyonal na mga mensahe na ipinapaabot paagi sa telebisyon,” an bareta kan The New York Times. Sa sarong dai pa sana nahahaloy na pagsiyasat, an mga sangtaon an edad pinadalan nin haralipot na pasale sa telebisyon kun saen ipinapaheling an laen-laen na reaksion nin sarong artista sa sarong kawatan. “Kun an artista nagpapaheling na sia takot sa kawatan,” an sabi kan Times, “an mga omboy nagrarayo sa kawatan na iyan asin mas garo nahahadit, nagngungurot, nagmumurusdot o naghihibi. Kun an artista entusiastiko sa kawatan, mas nagugustohan man kan mga omboy an kawatan na iyan.”

Malinaw na an telebisyon nakakaapektar sa mga omboy. Kumusta man an panhaloyan na impluwensia kaiyan sa mga aki? Inobserbaran ni Dr. Naoki Kataoka, sarong propesor sa pediatria sa Kawasaki Medical College sa Kurashiki, Hapon, an dakol na aki na sobra katoninong asin mayo nin ekspresyon an saindang lalauogon. Gabos sinda nagdalan nin TV o video sa halawig na peryodo nin panahon. An sarong dos anyos na aking lalaki dai tataong makipag-olay asin limitado an bokabularyo. Sia aroaldaw na nagdadalan nin mga video magpoon aga sagkod banggi poon kan sia sarong taon. Luway-luway na nadagdagan an bokabularyo kan aki kaidto sanang pagkatapos na papondohon sia kan ina, bilang pagsunod sa sadol kan doktor, na magdalan nin mga video asin magpoon an ina na makikawat sa aki. Iyo, an mga magurang kaipuhan na magkaigwa nin interaksion sa saindang mga aki.

Idinoon ni Jehova Dios, an Autor kan areglo nin pamilya, an kahalagahan kan pinakamarahay na interaksion. Kaidtong haloy nang panahon sinabihan nia an saiyang banwaan: “Dapat na itadom mo an mga [tataramon nin Dios] sa saimong aki asin magtaram ka manongod dian kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon.” (Deuteronomio 6:7) Mga magurang, bakong telebisyon, an pinakamarahay na makakapagtokdo sa mga aki paagi sa tataramon asin halimbawa, “oyon sa dalan” para sa sainda.—Talinhaga 22:6.