Iyo, Puede Kamong Makanompong nin Kaogmahan

KUN beses an kaogmahan—an tunay, nagdadanay na kaogmahan—masakit manompongan. An partikularmenteng dahelan kaini iyo na an dakol na tawo na daing ontok sa paghanap nin kaogmahan naghahanap sa salang gikanan. Kun igwa sana kutana sindang mapagtitiwalaan asin kualipikadong katood na puedeng magtokdo sa sainda kan tamang gikanan!

An Biblia sarong gikanan kan kaipuhan na paggiyang iyan. Isipon nindo an saro sana kan mga libro kaiyan—an Salmo. An librong ini sarong koleksion nin 150 sagradong awit ki Jehova Dios, na mga kabanga kaiyan an kinomponer ni Hadeng David kan suanoy na Israel. Alagad an may mas dakulang importansia kisa sa pakaaram kun siisay an kagsurat kaiyan iyo an pakaaram na an librong ini isinurat paagi sa pasabong kan kadarudakulaing Katood kan katawohan, si Jehova. Sa siring, makakasegurado kita na yaon dian an paggiya nin Dios para sa ikakarahay niato asin sinasabi kaiyan an dalan pasiring sa kaogmahan.

Segurado an mga kagsurat kan Salmo na an kaogmahan resulta kan pagkaigwa nin saro nin nakakarahay na relasyon sa Dios. “Maogma an tawo na natatakot ki Jehova,” an isinurat kan Salmista. (Salmo 112:1) Mayo nin relasyon sa tawo, mayo nin materyal na rogaring, asin mayo nin personal na nagibo an makakatao kan kaogmahan na hale sa pagigin kabtang kan “banwaan na an Dios iyo si Jehova.” (Salmo 144:15) Pinapatunayan ini kan buhay nin dakol na lingkod nin Dios sa presenteng aldaw.

Si Susanne, na mga labi nang 40, sarong halimbawa kaini. * Sia nagsabi: “Ngonyan, dakol an minaayon sa nagkapirang grupo tanganing magibo an pararehong mga pasohan o makikabtang sa pararehong mga pinagkakainteresan. Minsan siring, bihira na minamansay ninda bilang katood an lambang kagrupo. Laen an banwaan ni Jehova. An satong pagkamoot ki Jehova an nagpapangyari na magkaigwa kita nin kapadangatan sa lambang saro. Sa tahaw kan banwaan nin Dios, pamugtak an satong boot, saen  man kita sa ano man na panahon. Biyong pinaparahay kan pagkasararong ini an kualidad kan satong buhay. Siisay pa an makakasabi na sinda igwa nin mga katood hale sa biyong laen na grupo sosyal asin pinaghalean saka kadakol na laen-laen na nasyonalidad? Sa bilog kong puso, masasabi ko na an pagigin sarong miembro kan banwaan ni Jehova nagbubunga nin kaogmahan.”

Naaraman man ni Maree, na namundag sa Scotland, na an marahay na relasyon ki Jehova mahalagang marhay tanganing makanompong nin kaogmahan. “Bago ako makanood kan katotoohan sa Biblia,” an pagsaysay nia, “naoogma akong magdalan nin makatatakot na mga pelikula. Alagad sa banggi dai ako nakakatorog na dai ko kapot an sarong krus tanganing magrayo an mga multo asin bampira, na iyong ipinapaheling sa dakol na pelikula. Minsan siring, kan manodan ko an katotoohan asin kan dai na ako nagdadalan nin siring na mga pelikula, huli sa sakong relasyon ki Jehova nakakatorog na ako na daing kinakatakotan, na maogmang naglilingkod sa Dios na mas makapangyarihan kisa sa mga demonyo o iniimahinar na mga bampira.”

An Pagtitiwala ki Jehova Nagbubunga nin Kaogmahan

Mayo kita nin dahelan na pagdudahan an pagigin makakamhan sa gabos kan Kaglalang asin an saiyang daing limiteng kadonongan. Huling aram nia na sia biyong makakakompiar ki Jehova asin makakapaili sa Saiya, si David nagsurat: “Maogma an pusog na lalaki na ibinugtak si Jehova bilang saiyang pinagtitiwalaan.”—Salmo 40:4.

Si Maria nagsabi: “Base sa sakong eksperyensia sa España asin sa iba pang lugar, kun ginigibo niato an mga bagay-bagay kaoyon kan paagi ni Jehova, minsan ngani an satong mga saboot asin emosyon tibaad bako kutana iyan an gustong gibohon, nakukua niato an pinakamarahay na posibleng mga resulta. Minaresulta ini sa kaogmahan huli ta an paagi ni Jehova iyo an pirmeng pinakamarahay.”

Paagi sa personal na eksperyensia, aram man ni Andreas, sarong Kristianong magurang sa kongregasyon na naglingkod sa nagkapirang nasyon sa Europa, na puede kitang magtiwala ki Jehova. Sia nagsabi: “An sakong matuang tugang na lalaki, na bako kong kapareho an pagtubod, nagkaigwa nin makosog na impluwensia sa sako kan ako hoben pa, na ineenkaminar ako na pagmaigotan na aboton an karera na nakakakontento sa pinansial. Biyo siang nadesganar kan maglaog ako sa bilog na panahon na ministeryo asin dai nagsarig sa seguridad daa na itinatao kan sekular na mga plano sa pension. Durante kan sakong bilog na panahon na paglilingkod, dai ako noarin man nagkulang, asin naeksperyensiahan ko an mga bendisyon na pangarap sana para sa iba.”

Kan 1993, naimbitaran si Felix na tumabang sa  pagpahiwas kan mga pasilidad kan sangang opisina kan Mga Saksi ni Jehova sa Selters, Alemania. Kan matapos an trabaho, inimbitaran sia na magin permanenteng miembro kan pamilyang Bethel duman. Ano an saiyang reaksion? “Inako ko an imbitasyon na medyo may pag-alangan. Alagad ngonyan haros sampulong taon na akong yaon digdi, asin kombensido ako na sinimbag ni Jehova an sakong mga pamibi. Aram nia kun ano an pinakamarahay para sa sako. Paagi sa biyong pagsarig sa saiya asin pagpagiya sa saiya, tinatawan ko sia nin oportunidad na ipaheling sa sako kun ano an gusto niang gibohon ko.”

Si Susanne, na nasambitan sa enotan, gustong maglingkod bilang bilog na panahon na ministro, sarong payunir, alagad nadedepisilan siang makakua nin por ora sanang trabaho. Pagkatapos na maghalat nin sangtaon tanganing magkaigwa nin trabaho, sia huminiro na may pagtitiwala ki Jehova. Sia nagsaysay: “Itinao ko an sakong aplikasyon para sa pagregular payunir. Nakatipon ako nin igo para sa ordinaryong mga gastos ko sa laog nin mga sarong bulan. Asin nagin pambihira nanggad na bulan idto! An sakong ministeryo nagin gikanan nin dakulang kagayagayahan, alagad daing nangyari sa dakol na interbio ko sa trabaho. Minsan siring, arog kan panuga ni Jehova, dai nia ako pinabayaan. Sa huring aldaw kan bulan, nakakua ako nin kontrata sa trabaho. Aram ko na ngonyan na talagang makakapagtiwala ako ki Jehova! An enot na eksperyensiang ini sa bilog na panahon na paglilingkod nakakontribwir sa sarong nakakakontento asin maogmang buhay.”

An Pag-ako sa Hatol nin Dios Nagtatao nin Kaogmahan

Si Hadeng David nakaginibo nin nagkapirang magabat na sala. Kun beses, sia nangaipo nin madonong na hatol. Kita daw andam na umako nin hatol asin instruksion arog ni David?

Narealisar kaidto ni Aida, na taga Pransia, na nakaginibo sia nin sarong magabat na sala. Sia nagsaysay: “An pangenot sa sako iyo an makabalik an sakong relasyon ki Jehova. Mayo na nin ibang mahalaga pa sa sako.” Naghagad sia nin tabang sa Kristianong kamagurangan. Nakapaglingkod na sa laog nin labing 14 taon sa bilog na panahon na ministeryo, sia nagsasabi ngonyan: “Kanigoan kanakakakontentong maaraman na pinatawad ni Jehova an sakong sala!”

An pagigin andam na umako nin hatol nin Dios puedeng makaolang sa sato na gumibo nin sala sa primero pa sana. Si Judith nagpaliwanag: “Sa edad na 20, namoot ako sa sarong Aleman na kaibaiba ko sa negosyo na nagmaigot na marhay na pahangaon ako. Sia iginagalang, may asensadong karera, asin may agom na! Narealisar ko na kaipuhan kong pumili kun baga kukuyogon ko an mga ley ni Jehova o biyong tatalikdan Sia. Nagtuga ako sa sakong mga magurang. An sakong ama nagin prangkang marhay sa pagpagirumdom sa sako kan inaasahan ni Jehova sa sako. Prangka nia akong sinabihan—na iyo nanggad an kaipuhan ko! Dawa siring, an sakong puso naghahanap nin malulusotan. Sa laog nin dakol na semana an sakong ina nakikipag-olay sa sako kun banggi kun gurano kahalaga asin kanakakapagligtas-buhay an mga ley nin Dios. Nagpapasalamat akong marhay na an sakong puso luway-luway na naparani ki Jehova. An madisiplina asin matokdoan nia nagtao sa sako nin dakulang kaogmahan—dakol na nakakakontentong taon sa bilog na panahon na ministeryo asin sarong marahayon na Kristianong agom, na namomoot sa sako asin namomoot ki Jehova nin bilog na puso.”

Malinaw nanggad, idinodoon kan siring na mga eksperyensia an mga tataramon ni David: “Maogma idtong an pagrebelde pinatawad, na an kasalan tinahoban. Maogma an tawo na dai kinukuentahan ni Jehova nin sala.”—Salmo 32:1, 2.

Kaogmahan sa Pagpaheling nin Konsiderasyon sa Iba

“Maogma an siisay man na minahirong may konsiderasyon sa dukha,” an isinurat ni David. Sia nagpapadagos: “Sa aldaw nin kapahamakan si Jehova magtatao sa saiya nin dudulagan. Si Jehova an magbabantay sa saiya asin magliligtas sa saiya. Sia ipahahayag na maogma.” (Salmo 41:1, 2) An mamomoton na konsiderasyon na ipinaheling ni David ki Mefiboset, an pilay na aki kan namomotan na katood ni David na si Jonatan, sarong halimbawa kan tamang aktitud sa dukha.—2 Samuel 9:1-13.

Si Marlies, na misyonera sa laog nin 47 nang taon, nagkapribilehio na maghulit sa mga nagdurulag sa peligrosong mga lugar sa Aprika, Asia, asin Europa Oriental. Sia nagsabi: “Sinda igwa nin laen-laen na problema asin sa pankagabsan nagsasaboot na sinda biyong dai inaako, na sinda, sa  katunayan, tinatratar na may diskriminasyon. An pagtabang sa siring na mga tawo pirmeng nagbubunga nin kaogmahan.”

Si Marina, na labi nang 40, nagsurat: “Huling daing agom, nakakarangang maaraman na yaon an iba tangani na tumabang sa saindo. Nagpapahiro ini sa sako na parigonon an boot kan mga tawo paagi sa pag-apod sa sainda sa telepono o pagsurat sa sainda. Dakol an nagpahayag kan saindang pag-apresyar. An pagtabang sa iba nagtatao sa sako nin kagayagayahan.”

Si Dimitar, na mga 25 anyos, nagsabi: “Pinadakula ako kan sakong ina na solo sana sia. Kan ako aki pa, naoogma ako na an paraataman sa Pag-adal sa Libro kan Kongregasyon iiniiba ako kada semana tanganing sanayon ako sa ministeryo. Nagpapasalamat pa man giraray ako sa saiyang pagkadesidido. Aram ko na bako pirmeng pasil na motibaron ako.” Bilang pagpasalamat sa tabang na inako nia kaidto, si Dimitar nagtatabang ngonyan sa iba: “Pinagmamaigotan kong iiba sa ministeryo sa langtad kisuerra sarong beses kada bulan an sarong hoben asin siring man an sarong mas may edad na.”

An libro nin Salmo nagsasambit man nin iba pang bagay na nagtatao nin kaogmahan. An saro iyo an importansia nin pagsarig sa kosog ni Jehova imbes na sa sadiri: “Maogma an mga tawo na an kosog nasa [ki Jehova].”—Salmo 84:5.

Nasasabotan ini ni Corinna. Sia nagbalyo sa sarong nasyon na may dakulang pangangaipo sa ministeryo. “Napaatubang ako sa bagong lenguahe, bagong kultura, asin bagong paagi nin pag-isip. An pagmate ko garo ako nasa ibang planeta. Ninenerbios ako kun iniisip ko na maghuhulit ako sa laen na kamugtakan. Naghagad ako nin tabang ki Jehova, asin paagi sa saiyang kosog nakaya kong maghulit nin bilog na aldaw sa sarong napapasuway na teritoryo. Pag-abot nin panahon, an paggibo kaiyan garo baga natural nang marhay. Nakapoon ako nin dakol na pag-adal sa Biblia, asin nakikinabang pa man giraray ako sa eksperyensiang ini. Naaraman ko na paagi sa kosog ni Jehova, mapapangganahan niato dawa an garo baga dai mapapangganahan na mga olang.”

Iyo, manlaenlaen na bagay an nakakakontribwir sa kaogmahan, arog kan pagkultibar nin pakikikatood sa Dios asin sa saiyang banwaan, lubos na pagtitiwala ki Jehova, pag-ako sa saiyang hatol, asin pagigin makonsiderasyon sa iba. Paagi sa paglakaw sa dalan ni Jehova asin pagkuyog sa saiyang mga ley, maogma niatong maeeksperyensiahan an saiyang pag-oyon.—Salmo 89:15; 106:3; 112:1; 128:1, 2.

[Nota sa Ibaba]

[Ritrato sa pahina 12]

Si Maria

[Ritrato sa pahina 13]

Si Maree

[Ritrato sa pahina 13]

Si Susanne asin si Andreas

[Ritrato sa pahina 15]

Si Corinna

[Ritrato sa pahina 15]

Si Dimitar