“Kanigoan an Sakong Pagkamoot sa Saimong Ley!”
“Kanigoan an Sakong Pagkamoot sa Saimong Ley!”
“Kanigoan an sakong pagkamoot sa saimong ley! Sa bilog na aldaw iyan an sakong inaatoman.”—SALMO 119:97.
1, 2. (a) Anong situwasyon an napaatubang sa pinasabngan na kagsurat kan Salmo 119? (b) Ano an nagin reaksion nia, asin taano?
AN KAGSURAT kan Salmo 119 napaatubang sa grabeng pagbalo. Sia inolog-olog asin binalobagi kan pangahas na mga kaiwal na dai nag-iintindi sa ley nin Dios. An mga prinsipe nagkonsulta sa lambang saro tumang sa saiya asin pinersegir sia. Pinalibotan sia kan mga maraot, asin nameligro an saiyang buhay mismo. Huli kan gabos na ini sia “dai napapatorog huli sa kamondoan.” (Salmo 119:9, 23, 28, 51, 61, 69, 85, 87, 161) Sa ibong kan pagbalong ini, an salmista nag-awit: “Kanigoan an sakong pagkamoot sa saimong ley! Sa bilog na aldaw iyan an sakong inaatoman.”—Salmo 119:97.
2 Marahay na ihapot nindo, “Paano nagin gikanan nin karangahan para sa salmista an ley nin Dios?” An saiyang kompiansa na si Jehova interesado sa saiya iyo an nagsustenir sa saiya. An pagigin pamilyar sa mamomoton na mga probisyon sa ley na iyan an nagpaogma sa salmista, sa ibong kan mga kasakitan na inagihan nia sa mga nagkokontra sa saiya. Aram nia na marahay an pagtratar sa saiya ni Jehova. Dugang pa, huli sa pag-aplikar kan paggiya na yaon sa ley nin Dios, an salmista nagin mas madonong kisa sa saiyang mga kaiwal asin naingatan pa ngani siang buhay. An pagkuyog sa ley nagtao sa saiya nin katoninongan asin marahay na konsensia.—Salmo 119:1, 9, 65, 93, 98, 165.
3. Taano ta masakit para sa mga Kristiano na mamuhay ngonyan oyon sa mga pamantayan nin Dios?
3 An nagkapira sa mga lingkod nin Dios ngonyan nag-aagi man nin nakakarinding mga pagbalo sa saindang pagtubod. Tibaad dai man kita mapaatubang sa sarong huma sa buhay na siring kan sa salmista, alagad kita nabubuhay sa “delikadong mga panahon na masakit pakibagayan.” An dakol na tawo sa palibot niato sa aroaldaw mayo nin pagkamoot sa espirituwal na mga pamantayan—sadiri sana an iniintindi asin materyalistiko an saindang mga pasohan, arogante asin daing galang an saindang aktitud. (2 Timoteo 3:1-5) Kaipuhan na danay na labanan kan hoben na mga Kristiano an mga huma sa saindang moral na integridad. Sa siring na mga kamugtakan, puedeng magin depisil na papagdanayon an satong pagkamoot ki Jehova asin sa kun ano an tama. Paano niato mapoprotehiran an satong sadiri?
4. Paano ipinaheling kan salmista an pag-apresyar sa ley nin Dios, asin maninigo daw na gibohon man iyan kan mga Kristiano?
4 An pagdusay nia nin panahon para sa hararom na pag-adal asin paghorophorop na may pag-apresyar sa ley nin Dios an nakatabang sa salmista na tagalan an mga kasakitan na naeksperyensiahan nia. Sa siring na paagi namotan nia iyan. Tunay nanggad, haros gabos na bersikulo kan Salmo 119 nagtataram manongod sa sarong aspekto kan ley ni Jehova. * An mga Kristiano ngonyan dai na sakop kan Ley ni Moises, na itinao nin Dios sa suanoy na nasyon nin Israel. (Colosas 2:14) Minsan siring, an mga prinsipyo na yaon sa Ley na iyan igwa nin nagdadanay na halaga. An mga prinsipyong ini nakaranga sa salmista, asin makakaranga man iyan sa mga lingkod nin Dios na maigot na naghihingoang atubangon an mga kadepisilan nin pamumuhay sa presenteng panahon.
5. Anong mga aspekto kan Ley ni Moises an totokaron niato?
5 Helingon niato kun anong pamparigon sa boot an makukua niato dawa sa tolo sanang aspekto kan Ley ni Moises: an areglo nin Sabbath, an probisyon para sa pag-arahit, asin an togon tumang sa kaaraan. Sa lambang situwasyon, manonodan niato na an pakasabot sa mga prinsipyo sa likod kan mga ley na ini mahalagang marhay tangani na maatubang niato an mga kasakitan sa satong kapanahonan.
Pagpanigo sa Satong Espirituwal na Pangangaipo
6. Ano an pundamental na mga pangangaipo kan gabos na tawo?
6 Linalang an katawohan na igwa nin dakol na pangangaipo. Halimbawa, kaipuhan an kakanon, inomon, asin istaran tanganing an sarong tawo magdanay na may marahay na pisikal na salud. Pero, kaipuhan man na asikasohon kan tawo an saiyang “espirituwal na pangangaipo.” Dai sia magigin maogma talaga kun dai nia iyan gigibohon. (Mateo 5:3) Ibinilang ni Jehova na pundamental na marhay an pagpanigo sa natural na pangangaipong ini kaya pinagbotan nia an saiyang banwaan na mag-ontok sa saindang normal na mga aktibidad sa sarong bilog na aldaw kada semana tanganing magtao nin atension sa espirituwal na mga bagay.
7, 8. (a) Paano ginibo nin Dios na napapalaen an Sabbath sa ibang mga aldaw? (b) Anong katuyohan an naotob kan Sabbath?
7 Idinodoon kan areglo nin Sabbath an halaga kan espirituwal na mga aktibidad. An enot na paglataw kan terminong “sabbath” sa Biblia igwa nin koneksion sa probisyon na manna sa kaawagan. Sinabihan an mga Israelita na maninigo sindang kumua kan milagrosong tinapay na ini sa anom na aldaw. Sa ikaanom na aldaw, dapat sindang kumua kan “tinapay na sa duwang aldaw,” huli ta sa ikapito, mayong itataong probisyon. An ikapitong aldaw magigin “sarong banal na sabbath ki Jehova,” na durante kaiyan an lambang saro maninigong padagos na tumukaw sa saiyang sadiring lugar. (Exodo 16:13-30) An saro sa Sampulong Togon nagboot na dai nanggad magtrabaho kun Sabbath. An aldaw na iyan sagrado. Kagadanan an padusa sa dai pag-otob kaiyan.—Exodo 20:8-11; Bilang 15:32-36.
8 Ipinaheling kan ley nin Sabbath an pagmakolog ni Jehova sa pisikal sagkod espirituwal na ikakarahay kan saiyang banwaan. “An sabbath ginibo para sa tawo,” an sabi ni Jesus. (Marcos 2:27) Iyan bako sanang nagtogot sa mga Israelita na magpahingalo kundi nagtao man sa sainda kan oportunidad na dumayupot asin ipaheling an pagkamoot sa saindang Kaglalang. (Deuteronomio 5:12) Iyan sarong aldaw na eksklusibong idinusay sa espirituwal na intereses. Kaiba dian an pampamilyang pagsamba, pamibi, asin paghorophorop sa Ley nin Dios. An areglo nagprotehir sa mga Israelita na dai ninda gamiton an gabos nindang panahon asin kosog sa materyal na mga okupasyon. Ipinagirumdom sa sainda kan Sabbath na an saindang relasyon ki Jehova an pinakamahalagang bagay sa saindang buhay. Inotro ni Jesus an dai nagliliwatliwat na prinsipyong iyan kan sabihon nia: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’”—Mateo 4:4.
9. Anong leksion an itinatao kan areglo nin Sabbath para sa mga Kristiano?
9 Dai na hinahagad sa banwaan nin Dios na otobon an literal na 24 oras na pahingalo sa sabbath, alagad an areglo kan Sabbath bako sanang sarong interesanteng bagay sa kasaysayan. (Colosas 2:16) Bako daw na pagirumdom iyan na dapat man niatong ipaorog an espirituwal na mga aktibidad? An sagradong intereses dapat na dai matahoban nin materyal na mga preokupasyon o aktibidad sa pag-aling-aling. (Hebreo 4:9, 10) Kaya puede niatong hapoton an satong sadiri: “Ano an pinakanangongorog sa sakong buhay? Ipinapaorog ko daw an pag-adal, pamibi, pag-atender sa Kristianong mga pagtiripon, asin an paghuhulit kan maogmang bareta kan Kahadean? O naaagawan daw nin lugar kan ibang intereses an siring na mga aktibidad?” Kun ineenot niato sa satong buhay an espirituwal na mga bagay, inaasegurar kita ni Jehova na dai kita magkukulang sa mga pangangaipo sa buhay.—Mateo 6:24-33.
10. Paano kita makikinabang sa pagdusay nin panahon para sa espirituwal na mga bagay?
10 An mga panahon na ginagamit niato sa pag-adal sa Biblia asin sa mga publikasyon na basado sa Biblia, siring man an hararom na paghorophorop sa mensahe kaiyan, makakatabang sa sato na magin mas dayupot ki Jehova. (Santiago 4:8) Inadmitir ni Susan, na nagpoon na magtagama nin panahon para sa regular na pag-adal sa Biblia kaidtong mga 40 taon na an nakaagi, na sa primero bako iyan kawiliwili. Iyan mapawot. Alagad mientras na orog siang nagbabasa, orog man niang nagugustohan iyan. Ngonyan talagang namomondo sia kun sa ano man na dahelan dai nia nagibo an saiyang personal na pag-adal. “An pag-adal nakatabang sa sako na orog pang mamidbid si Jehova bilang sarong Ama,” an sabi nia. “Puede akong magtiwala sa saiya, magsarig sa saiya, asin libreng magdolok sa saiya sa pamibi. Makangangalas nanggad na maheling kun gurano kadakula an pagkamoot ni Jehova sa saiyang mga lingkod, kun paano sia nagmamakolog sa sako personalmente, asin kun paano sia naghihiro para sako.” Kanigoan kadakulang kagayagayahan an puede man niatong makamtan sa regular na pag-asikaso kan satong espirituwal na mga pangangaipo!
An Ley nin Dios Mapadapit sa Pag-arahit
11. Paano ginibo an areglo nin pag-arahit?
11 An ikaduwang aspekto kan Ley ni Moises na nagpapabanaag kan pagmakolog nin Dios para sa ikakarahay kan saiyang banwaan iyo an deretsong mag-arahit. Si Jehova nagboot na kun an sarong Israelitang paraoma mag-ani nin mga prutas sa saiyang tanoman, an mga daing sukat maninigong togotan na mangua kan mga natada kan mga paraani. Dai dapat na uboson na anihon kan mga paraoma an mga gilid kan saindang mga oma, ni kukuanon pa ninda an natadang mga ubas o oliba. An mga goygoy nin tipasi na dai tinutuyong nawalat sa mga oma maninigo na dai na pagbalikan. Saro ining mamomoton na areglo para sa mga dukha, nakikihimanwa, ilo, asin balo. Totoo, an pag-arahit nangangaipo na sinda mahigos na magtrabaho, pero paagi kaiyan, malilikayan nindang makilimos.—Levitico 19:9, 10; Deuteronomio 24:19-22; Salmo 37:25.
12. Anong oportunidad an itinao sa mga paraoma kan areglo nin pag-arahit?
12 An ley mapadapit sa pag-arahit dai nagsabi nin espesipiko kun gurano kadakol an iwawalat kan mga paraoma para sa mga daing sukat. Nasa sainda na kun baga halakbang o hayakpit an dai aanihon sa mga gilid kan saindang mga oma. Paagi kaini, an areglo nagtokdo nin pagigin buka an palad. Nagtao iyan nin oportunidad sa mga paraoma na ipaheling an saindang pag-apresyar sa Paratao kan ani, huling “an nagpapaheling nin pabor sa dukha nagpapamuraway sa [saiyang Kaggibo].” (Talinhaga 14:31) Si Booz saro sa naggibo kaiyan. May kabootan niang sinegurado na si Rut, sarong balo na nag-aarahit sa saiyang mga oma, makakua nin awad-awad na tipasi. Mayaman na binalosan ni Jehova si Booz huli sa saiyang pagigin buka an palad.—Rut 2:15, 16; 4:21, 22; Talinhaga 19:17.
13. Ano an itinotokdo sa sato kan suanoy na ley mapadapit sa pag-arahit?
13 An prinsipyo sa likod kan ley mapadapit sa pag-arahit dai nagbago. Linalaoman ni Jehova na an saiyang mga lingkod magin buka an palad, nangorogna sa mga daing sukat. Mientras na kita orog na buka an palad, orog man an magigin bendisyonan sa sato. “Magin matinao, asin an mga tawo magtatao sa saindo,” an sabi ni Jesus. “Iuula ninda sa saindong paa an marahay na takad, dusok, ginugo asin naglilipwas. Huli ta sa takadan na itinatakad nindo, iyan man sana an itatakad sa saindo.”—Lucas 6:38.
14, 15. Paano kita makakapaheling nin pagigin buka an palad, asin na may anong posibleng mga pakinabang sa sato sagkod sa mga tinatabangan niato?
14 Si apostol Pablo nagsadol na “gumibo kita kan marahay sa gabos, alagad orog na sa mga may relasyon sa sato sa pagtubod.” (Galacia 6:10) Sa siring, dapat nanggad kitang magin interesado na an mga kapwa Kristiano niato matawan nin espirituwal na tabang kun sinda mapaatubang sa mga pagbalo sa saindang pagtubod. Alagad bako daw na tibaad nangangaipo man sinda nin praktikal na tabang, halimbawa, sa pagpasiring sa Kingdom Hall o sa saindang pamamakal? Igwa daw nin siisay man na may edad na, may helang, o dai nakakaluwas sa harong sa saindong kongregasyon na maoogmang dalawon tanganing maparigon an boot o umako nin tabang? Kun kita naghihingoang magin mapagrisa sa siring na mga pangangaipo, kun siring tibaad magamit kita ni Jehova sa pagsimbag sa mga pamibi nin sarong daing sukat. Minsan ngani sarong Kristianong paninimbagan an pag-asikaso sa lambang saro, an paggibo kaiyan nakakatabang man sa nag-aasikaso. An pagpaheling nin tunay na pagkamoot sa mga kapwa parasamba sarong gikanan nin dakulang kagayagayahan asin hararom na satispaksion na paagi kaiyan nakakamtan niato an huyom nin pag-oyon ni Jehova.—Talinhaga 15:29.
15 An saro pang mahalagang paagi na ipinapaheling kan mga Kristiano an bakong maimot na aktitud iyo an paggamit kan saindang panahon asin kosog na magtaram manongod sa mga katuyohan nin Dios. (Mateo 28:19, 20) An siisay man na nakaeksperyensia na kan kagayagayahan nin pagtabang sa sarong indibiduwal sagkod sa punto na idusay kaini an saiyang buhay ki Jehova nakakaaram kan katotoohan kan mga tataramon ni Jesus: “Igwang orog na kaogmahan sa pagtao kisa pag-ako.”—Gibo 20:35.
Pagmaan sa Kaaraan
16, 17. Ano an ipinangalad kan ikasampulong togon, asin taano?
16 An ikatolong aspekto kan Ley nin Dios sa Israel na totokaron niato iyo an ikasampulong togon, na nangangalad sa kaaraan. An Ley nagsasabi: “Dai mo pagmawoton an harong kan saimong kapwa. Dai mo pagmawoton an agom na babae kan saimong kapwa, ni an saiyang oripon na lalaki ni an saiyang oripon na babae ni an saiyang toro ni an saiyang asno ni an ano pa man na sadiri kan saimong kapwa.” (Exodo 20:17) Dai kayang ipaotob nin dawa siisay man na tawo an siring na togon, huling mayong tawong nakakabasa nin puso. Minsan siring, huli sa togon na iyan an Ley mas halangkaw kisa hustisya nin tawo. Ipinarealisar kaiyan sa balang Israelita na sia direktang maninimbag ki Jehova, na nakakabasa kan mga inklinasyon kan puso. (1 Samuel 16:7) Dugang pa, direktang sinasabi kan togon na ini an pinakagamot kan dakol na salang gibo.—Santiago 1:14.
17 An ley tumang sa kaaraan nag-enkaminar sa banwaan nin Dios na likayan an materyalismo, kahanaban, asin pagreklamo manongod sa saindang kamugtakan sa buhay. Prinotehiran man sinda kaiyan na dai masugotan na maghabon o magkomiter nin inmoralidad. Pirmeng may mga tawong igwa nin materyal na mga rogaring na hinahangaan niato o minsan paano garo baga mas asensado kisa sato. Kun dai niato kokontrolon an satong kaisipan sa siring na mga situwasyon, puede kitang mamondo asin maara sa iba. An Biblia nagsasabi na an kaaraan naghahayag nin “kaisipan na dai inooyonan.” Mas marahay nanggad kun mayo kita nin kaaraan.—Roma 1:28-30.
18. Anong espiritu an nangingibabaw sa kinaban ngonyan, asin anong negatibong mga epekto an puedeng ibunga kaiyan?
18 An espiritu na nangingibabaw sa kinaban ngonyan nagpapalakop nin materyalismo asin kompetisyon. Paagi sa mga anunsio, pinupukaw kan komersio an pagmawot sa bagong mga produkto asin sa parate nagpapasabot kan ideya na dai kita magigin maogma kun dai kita magkakaigwa kaiyan. Ini mismo an klase nin espiritu na kinokondenar kan Ley ni Jehova. Konektado dian an pagmawot na umasenso sa buhay sa ano man na paagi asin magdamot nin kayamanan. Si apostol Pablo nagpatanid: “Idtong mga determinadong yumaman nahuhulog sa sugot asin sa siod patin sa dakol na daing isip asin nakakaraot na mawot, na nagdadara sa mga tawo sa kalaglagan asin kapahamakan. Huli ta an pagkamoot sa kuarta gamot nin gabos na klase nin nakakadanyar na bagay, asin sa pag-aabot sa pagkamoot na ini an nagkapira nagkaralagalag parayo sa pagtubod asin sinaksak an bilog nindang sadiri nin dakol na kakologan.”—1 Timoteo 6:9, 10.
19, 20. (a) Para sa namomoot sa ley ni Jehova, ano an mga bagay na talagang mahalaga? (b) Ano an totokaron sa sunod na artikulo?
19 Nasasabotan kan mga namomoot sa ley nin Dios an mga peligro nin materyalistikong espiritu asin napoprotehiran sinda tumang dian. Halimbawa, an salmista namibi ki Jehova: “Ikiling mo an sakong puso sa saimong mga pagirumdom, asin bakong sa mga ganansia. An ley kan saimong ngoso marahay para sa sako, orog pa kisa sa rinibong pidaso nin bulawan asin pirak.” (Salmo 119:36, 72) An pagigin kombensido sa katotoohan kan mga tataramon na ini matabang sa sato na papagdanayon an pagkatimbang na kaipuhan tanganing malikayan an mga siod nin materyalismo, kahanaban, asin pagkadiskontento sa satong kamugtakan sa buhay. An “diosnon na debosyon,” bakong an pagdamot nin mga rogaring, an liabe sa pinakadakulang pakinabang na posible.—1 Timoteo 6:6.
20 An mga prinsipyo sa likod kan Ley na itinao ni Jehova sa suanoy na nasyon nin Israel mahalaga pa man giraray sa satong depisil na mga panahon kapareho kaidtong itao ni Jehova an Ley na iyan ki Moises. Mientras na orog niatong iinaaplikar an mga prinsipyong ini sa satong buhay, orog man niatong masasabotan iyan, orog man niatong mamomotan iyan, asin orog man kitang magigin maogma. Nakapreserbar sa Ley an dakol na mahalagang leksion para sa sato, asin an malinaw na mga pagirumdom kan kahalagahan kaiyan maheheling sa buhay asin mga eksperyensia kan mga karakter sa Biblia. An nagkapira sa mga ini totokaron sa sunod na artikulo.
[Nota sa Ibaba]
^ par. 4 Sa enterong 176 na bersikulo kan salmong ini apuera sa 4 na bersikulo nasasambitan magsalang an mga togon, hudisyal na mga desisyon, ley, mga pagboot, regulasyon, pagirumdom, sinasabi, reglamento, dalan, o tataramon ni Jehova.
Ano an Isisimbag Nindo?
• Taano ta namomotan kan kagsurat kan Salmo 119 an ley ni Jehova?
• Ano an manonodan kan mga Kristiano sa areglo nin Sabbath?
• Ano an nagdadanay na halaga kan ley nin Dios mapadapit sa pag-arahit?
• Paano kita pinoprotehiran kan togon tumang sa kaaraan?
[Mga Hapot Para sa Pag-adal]
[Ritrato sa pahina 21]
Ano an idinoon kan ley nin Sabbath?
[Ritrato sa pahina 23]
Ano an itinotokdo sa sato kan ley mapadapit sa pag-arahit?