Mga Hapot Hale sa mga Parabasa

Ano an boot sabihon ni Jesus kan magsabi sia ki Nicodemo: “Mayo nin tawo na nagsakat sa langit kundi idtong naghilig hale sa langit, an Aki nin tawo”?—Juan 3:13.

Si Jesus yaon kaidto sa daga, asin dai pa sia nagsakat, o nagbalik, sa langit. Minsan siring, an aram niato manongod ki Jesus asin sa konteksto kan saiyang mga tataramon makakatabang sa sato na masabotan an kahulogan kaiyan.

Si Jesus “naghilig hale sa langit” sa dahelan na sia dating nag-eerok sa rona nin mga espiritu kaiba kan saiyang Ama, alagad sa itinalaan na panahon, an buhay kan Aki ibinalyo sa matris ni Maria, na nagresulta sa pagkamundag ni Jesus bilang tawo. (Lucas 1:30-35; Galacia 4:4; Hebreo 2:9, 14, 17) Pagkagadan nia, si Jesus bubuhayon liwat bilang sarong espiritung linalang asin mabuelta tanganing makaibanan si Jehova. Huli kaini, dai nahaloy bago sia gadanon, si Jesus namibi: “Ama, pamurawaya ako sa kataed mo kan kamurawayan na dating yaon sa sako sa kataed mo bago an kinaban.”—Juan 17:5; Roma 6:4, 9; Hebreo 9:24; 1 Pedro 3:18.

Kan makipag-olay si Jesus ki Nicodemo, sarong Fariseo asin paratokdo sa Israel, si Jesus dai pa nakakabalik sa langit. Siempre, mayo pa nin ibang tawo na nagadan asin nagsakat sa rona nin mga espiritu, sa langit. Si Jesus mismo nagsabi na si Juan Bautista daing kapantay bilang propeta nin Dios, alagad an saro na “sadit sa kahadean kan kalangitan orog pa kadakula kisa sa saiya.” (Mateo 11:11) Asin ipinaliwanag ni apostol Pedro na dawa an maimbod na si Hadeng David nagadan asin yaon pa man giraray sa saiyang lolobngan; si David dai nagsakat sa langit. (Gibo 2:29, 34) Igwa nin dahelan kun taano ta an mga nagadan bago ki Jesus, arog ni David, Juan Bautista, asin an iba pang tawong may pagtubod, dai nagsakat sa langit. Nagadan sinda bago itinalaga ni Jesus an dalan o posibilidad na buhayon liwat an mga tawo pasiring sa langitnon na buhay. Si apostol Pablo nagsurat na “itinalaga” ni Jesus, arog nin saro na naenot, ‘an bago asin buhay na dalan’ pasiring sa langit.—Hebreo 6:19, 20; 9:24; 10:19, 20.

Mantang si Jesus dai pa nagadan asin binuhay liwat, ano an boot niang sabihon kan magsabi sia ki Nicodemo: “Mayo nin tawo na nagsakat sa langit kundi idtong naghilig hale sa langit, an Aki nin tawo”? (Juan 3:13) Isipa an konteksto, o kun ano an ipinapakipag-olay ni Jesus ki Nicodemo.

Kan an Judiong namamahala na iyan magpasiring ki Jesus sa banggi, sinabihan sia ni Jesus: “Totoong-totoo na sinasabi ko sa saimo, Kun an saro dai namundag giraray, dai sia makakaheling kan kahadean nin Dios.” (Juan 3:3) Bilang simbag, si Nicodemo naghapot: ‘Paano mangyayari iyan? Paano mamumundag an sarong tawo sa ikaduwang beses?’ Dai nia nasabotan an katokdoan na ini nin Dios manongod sa pagigin nasa Kahadean nin Dios. May paagi daw na manodan nia an manongod digdi? Bueno, mayo kun sa punto de vista nin tawo; mayo nin tawo na puedeng magtokdo sa saiya manongod dian huli ta mayo nin siisay man na naghale sa langit asin sa siring nasa kamugtakan na ipaliwanag an ano man manongod sa paglaog sa Kahadean. Apuera sana ki Jesus. Puede niang tokdoan si Nicodemo asin an iba pa huli ta Sia naghilig hale sa langit asin kualipikadong magtokdo sa mga tawo manongod sa siring na mga bagay.

Sa siring, an hapot dapit sa tekstong ini nag-iilustrar nin sarong mahalagang punto manongod sa pag-adal kan Tataramon nin Dios. Bakong rasonable na pagdudahan an sarong teksto huli sana ta garo baga depisil na masabotan iyan. An sinasabi kan Biblia sa sarong kabtang kaiyan kaipuhan na saboton sa tabang kan ibang teksto asin maninigo na kaoyon kaiyan. Apuera kaini, sa parate an konteksto—an situwasyon o kun ano an pinag-oolayan—makakatabang sa sato na manompongan an rasonable asin lohikong kahulogan nin sarong teksto na masakit masabotan.