Pag-oswag sa Tahaw kan Laen-Laen na mga Tawo sa Uganda

AN Uganda, na yaon sa pag-oltanan kan sirangan asin solnopan na kabtang kan Great Rift Valley sa Sirangan na Aprika asin nasa mag-ibong na kabtang kan ekwador, biniyayaan nin pambihirang gayon. Igwa iyan nin laen-laen na tanawon, matubang na mga pananom, asin interesanteng mga hayop. Huling yaon iyan sa dakula asin halangkaw na buklod kan Aprika, iyan igwa nin tama sanang klima asin kawiliwiling tanawon na mga bulod na ginatos na kilometro an sakop.

Pira sanang nasyon an igwa nin parte na malipoton sagkod tropiko sa laog nin sadit na lugar, alagad an Uganda igwa kaiyan. Iyan minapoon sa may niebeng mga alitoktok kan Mountains of the Moon, an Ruwenzori Mountains, sa solnopan sagkod sa medyo marang rehion sa sirangan. May mga elepante, mangsad, asin leon sa mga kaplanodohan kaiyan. An kabukidan asin mahibog na mga kadlagan iniistaran nin mga gorilya, chimpanzee, asin labing 1,000 klase nin gamgam. An kadaklan na kabtang kan kontinente nin Aprika nasasakitan huli sa tigmara asin tiggutom, alagad an Uganda igwa nin mga salog asin danaw, arog kan Victoria, an ikaduwang pinakadakulang danaw sa kinaban na tabang an tubig. An amihanan na luwasan kan Danaw nin Victoria minabolos pasiring sa Salog nin Nilo. Bakong makangangalas na inapod ni Winston Churchill an nasyon na ini na “an perlas kan Aprika”!

“An Perlas” Nagkikinang Ngonyan

Minsan siring, an pangenot na atraksion kan Uganda iyo an mga tawo kaiyan—na makikatood, mapag-istimar, asin laen-laen. An nasyon na ini na an kadaklan na nag-iistar “Kristiano” ikakaladawan bilang pinagsaralak na dakol na grupong etniko asin kultura. Dawa ngonyan, an laen-laen na mga tawong idto mamimidbid paagi sa saindang mga tradisyon asin gubing.

Kasuarin pa sana, nagdadakol an mga taga Uganda na naghihimate sa maogmang bareta kan Biblia mapadapit sa panahon na mangingibabaw an nagdadanay na katoninongan sa bilog na daga. (Salmo 37:11; Kapahayagan 21:4) Depisil ipaabot an mensaheng ini sa gabos na tawo, sa nasyon na haros kapareho kadakula kan Gran Britania.

Gikan sa sadit na kapinonan kan enot na pagbautismo sa sarong lokal na residente bilang nagdusay  na Saksi ni Jehova, na nangyari sa Danaw nin Victoria kan 1955, “an sadit” sa katapustapusi nagin sangribo kan 1992. Poon kaidto, nagkaigwa nin dagos-dagos na pag-oswag. Kaoyon ini kan nakakapakosog liwat sa boot na mga tataramon nin Dios: “Ako mismo, si Jehova, maparikas kaiyan sa kapanahonan kaiyan.”—Isaias 60:22.

Pagpanggana sa Kaolangan sa Lenguahe

Ingles an opisyal na lenguahe asin iyan an ginagamit nin dakol, espesyalmente sa edukasyon, pero bako iyan an sadiring lenguahe kan kadaklan na taga Uganda. Huli kaini, sa pagmamaigot na mapaabotan kan maogmang bareta an mga tawo, kinonsiderar man kan mga Saksi ni Jehova an ibang pangenot na lenguahe. Kinaipuhan ini huli ta labing 80 porsiento kan 25 milyones katawo sa nasyon an nakaistar sa puerang mga lugar o saradit na banwaan, kun saen an pangenot na ginagamit kan mga tawong ini sa pan-aroaldaw na komunikasyon iyo an sadiri nindang tataramon. An paghuhulit sa mga grupong ini na magkakalenguahe asin pagpanigo sa espirituwal na mga pangangaipo kan mga tawo nangangaipo nin dakulang paghihingoa.

Minsan siring, an mga Saksi ni Jehova naghingoang ikatao an mga pangangaipong ini paagi sa paghuhulit sa mga tawo sa sadiri nindang tataramon asin pag-andam nin mga literatura sa Biblia sa laen-laen na lenguahe. Sa sangang opisina sa kabisera, an Kampala, an mga grupo sa pagtradusir naglilingkod sa apat na lenguahe: Acholi, Lhukonzo, Luganda, asin Runyankore. Apuera kaini, an Kristianong mga asamblea na ginigibo sa manlaenlaen na lenguahe sa bilog na nasyon igwa nin marahayon na kabilangan nin mga nag-atender, labing doble kan kabilangan kan mga Saksi ni Jehova. Malinaw nanggad na ipinaparisa kaini na an mga paghihingoa na maabot an laen-laen na mga grupo na magkakalenguahe nakakakontribwir sa marikas na espirituwal na pag-oswag. Alagad bako sana ini.

Pinapangenotan kan mga Payunir an Gibohon

Maogmang sinusuportaran kan mga kongregasyon an taonan na mga kampanya sa laog nin mga tolong bulan, na durante kaiyan hinuhulitan an napapasuway na mga teritoryo. (Gibo 16:9) Pinapangenotan kan nagdadakol na maigot na hoben na mga payunir, o bilog na panahon na mga ebanghelisador, an gibohon na ini. Sinda nagbibiahe sa harayong mga lugar kun saen, huli sa nagkapirang kamugtakan, dai pa noarin man nadangog an maogmang bareta.

 Duwang Saksi an idinestino bilang espesyal payunir sa laog nin tolong bulan sa Bushenyi, sarong sadit na banwaan sa solnopan na Uganda. Inibanan ninda an solo sanang Saksi ni Jehova sa lugar na iyan sa paghuhulit asin pag-organisar kan Kristianong mga pagtiripon. Mayo pang sambulan, an duwang payunir naggigibo na nin regular na pakikipag-olay sa Biblia sa 40 indibiduwal, na 17 kaiyan an nagpoon nang mag-atender sa mga pagtiripon kan Mga Saksi ni Jehova. An mga payunir nagsaysay: “An nagkapira na winalatan mi kan brosyur na Ano an Kahagadan sa Sato nin Dios? * nagpasiring sa samong harong pakalihis nin nagkapirang aldaw na isinurat na ninda an simbag sa mga hapot sa nagkapirang pahina kan brosyur. Gusto nindang maaraman kun tama an saindang mga simbag.” Ngonyan, igwa nin sarong kongregasyon na may sadiring Kingdom Hall sa banwaan na iyan.

Duwang payunir an nagbiahe pasiring sa sarong teritoryo sa solnopan na Uganda kun saen dai pa ikinahulit kaidto an maogmang bareta. Sinda nagsurat: “An mga tawo talagang napapaha sa katotoohan sa Biblia. Durante kan tolong bulan na yaon kami digdi, nakapoon kami asin nakagibo nin 86 na pag-adal sa Biblia.” Dai nahaloy sarong grupo nin mga Saksi an pormal na naestablisar sa lugar na iyan.

Iba Pang Maigot na Trabahador sa Langtad

Kabilang sa maigot na mga payunir an nagkapira na naglingkod sa laog nin dakol na taon. Bago nagin saro sa Mga Saksi ni Jehova, si Patrick nagtutugtog nin klarinete sa banda nin abyasyon militar kan namamahala sa Uganda na si Idi Amin. Anom na bulan pagkatapos na mabautismohan si Patrick kan 1983, sia nagin bilog na panahon na ministro. Ngonyan sia sarong nagbibiaheng paraataman, na nagsosongko asin nagpaparigon sa boot kan mga kongregasyon.

Si Margaret nabautismohan kan 1962. Apisar na mag-ootsenta na asin may diperensia sa piad na nakakalimitar sa saiyang paghiro, sia naggagamit nin mga 70 oras kada bulan sa paghuhulit kan paglaom na basado sa Biblia sa saiyang mga kataed. Sia nagbubugtak nin mga literatura sa sarong bangko sa luwas kan saiyang harong asin nakikipag-olay sa siisay man na mag-agi na gustong maghinanyog sa maogmang bareta manongod sa matoninong na bagong kinaban.

Si Simon, sarong paraoma hale sa sirangan na Uganda, haloy nang naghahanap kan katotoohan sa laog nin 16 na taon asin kan 1995 sia nakakua nin nagkapirang literatura na ipinublikar kan Mga Saksi ni Jehova. An nabasa nia nagpamate sa saiya nin pagmawot na makanood nin orog pa manongod sa Kahadean nin Dios asin sa marahayon na katuyohan ni Jehova para sa daga. Mayo nin mga Saksi sa Kamuli kun saen sia nakaistar, kaya si Simon nagbiahe nin mga 140 kilometros pasiring sa Kampala tanganing hanapon sinda. Ngonyan, igwa nin sarong kongregasyon sa saiyang baryo.

 “Kami Magdadanay Digdi”

Arog kan totoo sa ibang lugar sa Aprika, inaasahan nin dakol na tawo na an sarong relihiosong grupo igwa nin angay na lugar nin pagsamba. Ini garo baga dai mapapangganahan na problema para sa nagkapirang kongregasyon kan Mga Saksi ni Jehova, huli ta kulang an saindang kuarta tanganing makatogdok nin angay na Kingdom Hall. Dai ikakaladawan paagi sa mga tataramon an pagpasalamat kan mga tugang, na kan huring mga bulan kan 1999, sarong pinarikas na programa para sa pagtogdok nin mga Kingdom Hall an pinonan sa bilog na kinaban. Durante kan suminunod na limang taon, 40 bagong Kingdom Hall an nahaman sa Uganda. Ngonyan, haros gabos na kongregasyon igwa kan sadiri nindang simple sana alagad presentableng Kingdom Hall. An mensahe na ipinapahayag sa lokal na mga komunidad kan siring na aktibidad na pagtogdok iyo an, “Kami magdadanay digdi.” Nakakontribwir ini sa pagdakol.

Sarong sadit na kongregasyon sa amihanan na Uganda an dating nagtitiripon sa sirong nin nagkapirang poon nin mangga na may marambong na mga dahon. Kan makakua nin sarong lote, marikas na nagpadagos an pagtogdok. An mga tugang sa grupo nin pagtogdok, na nagtatrabaho kaiba kan lokal na mga Saksi, nagpoon na magtogdok nin sarong Kingdom Hall. Napahanga sa pagtogdok na iyan an sarong dating prominenteng politiko sa lugar na iyan. Ipinagamit nia an saiyang garahe para sa mga pagtiripon ninda sagkod na matapos an Kingdom Hall. Nag-ako man sia nin pag-adal sa Biblia sa saro kan mga boluntaryo sa pagtogdok. Ngonyan sia sarong maigot na bautisadong parahayag, na maogmang nagsasamba ki Jehova sa magayon asin bagong Kingdom Hall na iyan!

Sa sarong proyekto sa pagtogdok nin Kingdom Hall sa timog-sirangan na kabtang kan nasyon, sarong lokal na kantero an napahirong marhay kan espiritu nin pagigin makikatood, pagkamoot, asin kooperasyon na naheling nia sa tahaw kan mga tugang kaya sia nagboluntaryong magtabang sa gibohon. Sa pagtatapos kan proyekto, sia nagtrabaho pa ngani nin magdamlag tanganing ikaandam kan mga tugang an Kingdom Hall para sa dedikasyon pagkaaga. Sia nagkomento: “Kamo sana an totoong nagkakaminorootmootan, bako sanang sinasabi iyan.”

Sa Tahaw nin Kariribokan, Posible an Dugang na Pag-oswag

Mantang nakokobrehan an bagong mga teritoryo sa Uganda, igwa nin dagos-dagos na pag-oswag sa kabilangan kan mga Saksi, asin dakol na interesado an nakikiasosyar sa mga kongregasyon. Minsan siring, an apretadong inaasikaso iyo an dakol na dulag na biglang uminabot sa Uganda. An guerra sibil sa kaharaning mga nasyon nakaapektar man sa banwaan ni Jehova. An mga Saksi sa mga kampo nin mga dulag nagpaheling nin pambihirang kompiansa ki Jehova. Nagigirumdoman nin sarong dating halangkaw na opisyal hale sa kaharaning nasyon, na dating nagpepersegir man sa mga Saksi kan igwa nin pagprohibir sa nasyon na iyan, an saiyang komportableng estilo nin pamumuhay. Pagkatapos na mag-adal sa Biblia sa saro kan mga kampo nin mga dulag asin magin Saksi, sia nagkomento: “An materyal na kaginhawahan asin halangkaw na posisyon sa kinaban na ini mayo nin tunay na halaga. Minsan ngani ako dukha asin may helang na ngonyan, an sakong buhay mas marahay kisa kasuarin man kaidto. Midbid ko si Jehova, asin nagpapasalamat ako sa pribilehio nin pamibi. Apuera sa igwa ako nin marigon na paglaom sa ngapit, aram ko kun taano ta kaipuhan niatong tagalan an mga problema ngonyan. Kaya igwa ako nin katoninongan nin isip na dai ko noarin man naeksperyensiahan kaidto.”

Sinasabi na kun itusok nindo an sarong sanga sa balunbon na daga kan Uganda sa banggi, iyan magkakaigwa nin gamot pagkaaga. An espirituwal na pag-oswag sa nasyon na iyan nagsusuherir na an espirituwal na daga balunbon man na marhay. Nagpapasalamat kita ki Jehova Dios sa pagtao nin panahon para sa dugang pang laen-laen na tawo sa Uganda na makanood manongod sa saiyang Kahadean. An pagigin mahalagang marhay kan Kahadean iinagid ni Jesus sa sarong “perlas na halangkaw an halaga.” Padakol nang padakol na tawo sa Uganda an nakakasabot kaiyan.—Mateo 13:45, 46.

[Nota sa Ibaba]

[Mga Mapa sa pahina 8]

(Para sa aktuwal na format, hilingon an publikasyon)

SUDAN

UGANDA

Salog nin Nilo

Kamuli

Tororo

Kampala

Bushenyi

Danaw nin Victoria

KENYA

TANZANIA

RWANDA

[Ritrato sa pahina 9]

Tolo sa dakol na maigot na ministrong payunir

[Ritrato sa pahina 10]

Si Patrick

[Ritrato sa pahina 10]

Si Margaret

[Ritrato sa pahina 10]

Si Simon

[Ritrato sa pahina 10]

Pandistritong kombension sa Tororo

[Picture Credit Line sa pahina 8]

Retrato sa likod: © Uganda Tourist Board