Sarong Seguradong Giya sa Kaogmahan

“AN PAGMAMAIGOT na kamtan an Kaogmahan” iyo an deretso nin gabos na tawo. Iyan an pagmansay kan mga kaggibo kan Deklarasyon nin Independensia kan Estados Unidos nin Amerika. Alagad an pagmamaigot na kamtan an sarong pasohan laen sa pakaabot kaiyan. Minsan ngani dakol na hoben an may pinagmamaigotan na kamtan na mga karera sa aling-alingan asin isport, pira an midbid nindo na talagang nakua an minamawot nindang marhay na kapangganahan? “Tibaad dai nindo iyan maabot,” an sabi nin sarong bantog na parakanta na aram an sakit tangani na magin mapangganang musikero.

Kun arog kaiyan an saboot nindo manongod sa paghanap nin kaogmahan, dai kamo dapat na panluyahan nin boot. Kun hahanapon nindo an kaogmahan sa tamang paagi, makakamit nindo iyan. Taano ta masasabi an arog kaiyan? Nasambitan sa naenot na artikulo an manongod sa “maogmang Dios,” si Jehova. (1 Timoteo 1:11) Sa Biblia, an Dios nagtatao nin giya tanganing an saindong pagmamaigot na kamtan an kaogmahan dai magbunga nin pagkadesganar. Puede kamong tabangan ni Jehova na madaog an parateng mga dahelan nin kamondoan. Bilang halimbawa, isipon nindo an karangahan na iinaalok nia sa saindo kun magadan an sarong namomotan.

Kun Magadan an Sarong Namomotan

Igwa daw nin masasabing marahay na bagay manongod sa kagadanan? Isinusuway nin kagadanan an mga magurang sa mga aki asin an mga aki sa mga magurang. Pinagsusuruway kaiyan an dayupot na mga magkakatood asin nagdadara nin takot asin kahaditan sa urugos na mga komunidad. Kun may magadan, an sarong maogmang pamilya tibaad malunosan huli sa kamondoan.

Risang-risa na an kagadanan sarong trahedya. Minsan siring, may mga tawo na dinedeharan an katotoohan na iyan asin ilinaladawan an kagadanan bilang sarong bendisyon. Mangnohon an  nangyari pagkatapos na tamaan kan Bagyong Katrina an Golpo nin Mejico kan Agosto 2005. Sa lobong nin sarong biktima, an ministro nagsabi: “Dai sia ginadan ni Katrina. Inapod sia nin Dios pasiring sa langit.” Sa saro pang pangyayari, an sarong klerk sa ospital na may marahay na intension nagsabi sa aking babae na dai mahadit, huli ta dinara na nin Dios an saiyang ina sa langit. An aki naghibi: “Taano, taano ta kaipuhan niang kuanon sia sa sako?”

Malinaw nanggad, an siring na salang ideya manongod sa mga gadan parateng dai nakakaranga sa mga nagadanan. Taano? Huli ta an mga ideyang ini dai nagsasabi kan katotoohan manongod sa kagadanan. Mas maraot pa ngani, ilinaladawan ninda an Dios na hinahabon an mga namomotan sa mga kapamilya asin katood ninda sa makatatakot asin makolog na mga paagi. Imbes na magin gikanan nin karangahan, pinapaluwas ninda na an Dios sarong kontrabida sa trahedya nin kagadanan. Alagad sinasabi kan Tataramon nin Dios an katotoohan manongod sa kagadanan.

Inaapod kan Biblia an kagadanan na kaiwal. Iinaagid kaiyan an kagadanan sa sarong hade na namamahala sa katawohan. (Roma 5:17; 1 Corinto 15:26) An kagadanan sarong kaiwal na siring kaiyan kadakula an kapangyarihan kaya mayo nin tawo na kayang labanan iyan, asin an lambang magadan na namomotan saro sana sa dai mabilang na mga biktima nin kagadanan. An katotoohan na ini sa Biblia an nagsasabi kan dahelan kan kamondoan asin pagkadaing maginibo na namamatean niato kun magadan an sarong namomotan. Pinapatunayan kaiyan na normal an mga pagmate na iyan. Minsan siring, ginagamit daw nin Dios an kaiwal na kagadanan tanganing darahon sa langit an satong mga namomotan? Pasimbagon niato an Biblia sa hapot na iyan.

An Eclesiastes 9:5, 10 nagsasabi: “Kun dapit sa mga gadan, mayo man lamang sinda nin pakaaram . . . Mayo nin gibohon ni pagplano ni kaaraman ni kadonongan sa Sheol, an lugar na saimong padudumanan.” Ano an Sheol? Iyan an pankagabsan na lolobngan nin katawohan na dinudumanan nin mga tawo kun sinda magadan. Sa lolobngan an mga gadan biyong daing ginigibo, dai naghihiro, mayo nin pagmate, o mayo nin ano man na klase nin kaisipan. An kamugtakan ninda ikakaagid sa nanok na pagtorog. * Sa siring, maliwanag na sinasabi kan Biblia na dai kinukua nin Dios an satong mga namomotan tanganing makaibanan nia sa langit. Mayo sindang buhay sa lolobngan dahelan sa mga epekto nin kagadanan.

Kinompirmar ni Jesus an katotoohan na ini pagkagadan kan saiyang katood na si Lazaro. Iinagid ni Jesus an kagadanan sa pagtorog. Kun si Lazaro nagpasiring sa langit tanganing makaibanan an Makakamhan sa Gabos na Dios, bakong kabootan an pagpabalik ni Jesus sa saiya sa daga tanganing sa kahurihurihi magadan giraray. An ipinasabong na pagkasaysay nagsasabi na sa lolobngan, si Jesus nagsabi sa makosog na tingog: “Lazaro, lumuwas ka!” An Biblia nagpapadagos: “An tawong nagadan luminuwas.” Si Lazaro nagpoon na mabuhay giraray. Aram ni Jesus na si Lazaro dai noarin man huminale sa daga. Sia yaon sa lolobngan asin daing buhay.—Juan 11:11-14, 34, 38-44.

An pangyayaring ini na isinurat sa Biblia nagtatabang sa sato na masabotan na an kagadanan dai ginagamit na paagi nin Dios tanganing ibalyo an mga tawo hale sa daga pasiring sa langit. Sa siring, puede kitang maparani sa Dios, sa pakaaram na bako sia an dahelan kan satong kamondoan. Makakapagtiwala man kita na biyo niang  nasasabotan an kapungawan asin danyos na dinara sa sato kan kaiwal na kagadanan. Asin an katotoohan sa Biblia manongod sa kamugtakan kan mga gadan nagpapatunay na an mga gadan dai nagdudusa sa kalayo sa impierno o purgatoryo kundi daing buhay sa lolobngan. Huli kaini, an paggirumdom sa satong mga namomotan dai kaipuhan na madigtaan nin pagkabalde sa Dios o pagkatakot huli ta dai niato aram kun haen sinda. Apuera kaiyan, sa Biblia, si Jehova nagtatao nin dugang pang karangahan.

An Paglaom Nagbubunga nin Kaogmahan

Ipinaparisa kan mga teksto na tinokar niato na an paglaom mahalagang marhay na kabtang kan tunay na kaogmahan. An terminong “paglaom” siring kan pagkagamit sa Biblia nangangahulogan nin kompiadong paghalat sa marahay. Tanganing masabotan niato kun paanong an paglaom puedeng magbunga nin kaogmahan ngonyan, balikan niato an pagkasaysay manongod sa pagbuhay liwat ni Jesus ki Lazaro.

Igwa nin kisuerra duwang dahelan kun taano ta ginibo ni Jesus an milagrong iyan. An sarong dahelan iyo na tanganing haleon an kamondoan ni Marta, Maria, asin kan nagmomondong mga katood. Sa giraray, makakaibanan ninda an saindang namomotan. Alagad nasambitan ni Jesus ki Marta an ikaduwa asin mas mahalagang dahelan: “Bakong sinabi ko sa saimo na kun tumubod ka maheheling mo an kamurawayan nin Dios?” (Juan 11:40) An The New Testament in Modern English, ni J. B. Phillips, tinatawan nin kahulogan an huring frase na “ngangalasan na kayang gibohon nin Dios.” Sa pagbuhay liwat ki Lazaro, ipinaheling nin antemano ni Jesus kun ano an kayang gibohon asin talagang gigibohon ni Jehova Dios sa ngapit. Uya an dugang pang detalye manongod sa “ngangalasan [na ini] na kayang gibohon nin Dios.”

Sa Juan 5:28, 29, si Jesus nagsabi: “Dai kamo magngalas kaini, huli ta an oras maabot na an gabos na nasa mga lolobngan na girumdoman makakadangog kan saiyang tingog asin maruluwas.” Nangangahulogan ini na an gabos na gadan na nasa Sheol, kaiba an satong mga namomotan, mabubuhay liwat. May dugang pang ihinahayag an Gibo 24:15 manongod sa makangangalas na pangyayaring ini, na nagsasabi: “Magkakaigwa nin pagkabuhay liwat an mga matanos sagkod an mga bakong matanos.” Kaya dawa “an mga bakong matanos,” an dakol na indibiduwal na dai nakakamidbid asin naglilingkod ki Jehova, magkakaigwa nin oportunidad sa ngapit na makua an pag-oyon nin Dios.

Saen mangyayari an pagkabuhay liwat na ini? An Salmo 37:29 nagsasabi: “An mga matanos mismo makakasadiri kan daga, asin sinda mag-eerok dian sagkod lamang.” Isip-isipa an kahulogan kaiyan! An mga magkakapamilya asin magkakatood na pinagsuruhay nin kagadanan magkakaherelingan giraray digdi sa daga. Mantang iniisip-isip nindo an maogmang pakikiasosyar sa mga dating kairiba nindo, rasonable sana na an saindong puso mapano nin kaogmahan.

Gusto ni Jehova na Magin Maogma Kamo

Tinokar niato an duwang paagi na puedeng dugangan ni Jehova an saindong kaogmahan sa ibong kan saindong mga problema. Enot, paagi sa Biblia, sia nagtatao nin kaaraman asin giya tanganing tabangan kamo na mapangganang atubangon an mga problema. Apuera sa pagtabang sa sato na makaya an kapungawan huli sa kagadanan, an hatol sa Biblia makakatabang man sa sato na makaya an mga problema sa pagbuhay asin salud. Makakatao iyan sa saindo nin kosog tangani na matagalan an inhustisya sosyal asin grabeng kariribokan sa politika. Asin kun iaaplikar nindo an paggiya kaiyan sa saindong buhay, makakatabang iyan sa saindo na makaya an iba pang personal na problema.

Ikaduwa, paagi sa pag-adal kan Biblia, nagkakaigwa kamo nin paglaom na nakakalabing marhay sa ano man na ikakaalok kan sosyedad nin tawo. An pagbuhay liwat sa mga katood asin kapamilya kabtang kan paglaom na sinasabi kan Biblia. An Kapahayagan 21:3, 4 nagtatao nin dugang pang detalye: “An Dios mismo masasakaibanan [nin katawohan]. Asin papahidon nia an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog. An enot na mga bagay nakalihis na.” Nangangahulogan ini na an ano man na dahelan nin kamondoan sa buhay nindo mawawara sa dai na mahahaloy sagkod lamang. An panuga kan Biblia magigin totoo, asin puede nindong kamtan an kaotoban kaiyan. An pakaaram sana na may orog karahay na mga panahon na maabot nagtatao na nin pakaginhawa. An pakaaram na dai kamo magdudusa nin daing talaan  pagkagadan saro nang dahelan na magin maogma.

Sa pag-ilustrar: Nagkapirang taon na an nakaagi naheling ni Maria an makolog na pagkagadan kan saiyang agom huli sa kanser. Dai nahaloy pagkatapos kaiyan, napiritan sia asin an tolo niang aking babae na maghale sa saindang harong huli sa mga problema sa pinansial. Pakalihis nin duwang taon, naaraman ni Maria na igwa sia nin kanser. Nag-agi sia nin duwang grabeng operasyon asin tinatagalan an grabeng kolog aroaldaw. Sa ibong kan mga problemang ini, sia positibong marhay kaya napapahiro sia na parigonon an ibang tawo. Paano nia napapagdanay an saiyang kaogmahan?

Si Maria nagsabi: “Kun igwa ako nin problema, pinagmamaigotan ko na dai iyan pagparaisipon nin sobra. Linilikayan ko an paghapot nin arog kaini: ‘Taano ta nangyari ini sa sako? Taano ta kaipuhan kong magsakit nin arog kaini? Taano ta kaipuhan na magkahelang ako?’ An negatibong kaisipan nakakaubos nin kosog. Imbes, ginamit ko an sakong kosog sa paglilingkod ki Jehova asin sa pagtabang sa iba. Nagtao iyan sa sako nin kaogmahan.”

Ano an nagin kabtang kan paglaom sa buhay ni Maria? Ibinugtak nia an saiyang paglaom sa ngapit sa panahon na hahaleon na ni Jehova an helang asin an iba pang problema kan katawohan. Kun minapasiring sia sa ospital tanganing magpabolong, ihinihiras nia an paglaom na iyan sa ibang pasyente na may kanser, na tibaad nawawaran na nin paglaom. Gurano kaimportante ki Maria an paglaom? An sabi nia: “Parate kong iniisip an sinasabi kan Biblia sa Hebreo 6:19, na dian ilinaladawan ni Pablo an paglaom bilang sarong angkla para sa kalag. Kun mayo an angklang iyan, iaanod kamo na siring sa sarong baroto na naparayo huli sa bagyo. Alagad kun nakatakod kamo sa angklang iyan, kamo ligtas sa ibong kan garo bagyong mga problema na inaatubang nindo.” An “paglaom [na iyan] sa buhay na daing katapusan na ipinanuga nin Dios, na dai makakapagputik” nakatabang ki Maria na magdanay na maogma. Arog man kaiyan an magigibo sa saindo kan paglaom.—Tito 1:2.

Paagi sa pag-adal kan Biblia, makakanompong kamo nin tunay na kaogmahan sa ibong kan saindong mga problema. Pero, tibaad may mga hapot kamo kun gurano kapraktikal ini. Maoogma an mga Saksi ni Jehova na ipaheling sa saindo an mga simbag na sono sa Kasuratan na kaipuhan nindong maaraman tanganing kamo magin maogma talaga. Mantang hinahalat nindo an kaotoban kan paglaom na iinaalok ni Jehova, puede kamong mapabilang sa mga ilinaladawan sa paaging ini: “Makakamtan ninda an kagayagayahan asin kaogmahan, asin madulag an kamondoan asin pag-agagha.”—Isaias 35:10, King James Version.

[Nota sa Ibaba]

[Ritrato sa pahina 7]

An paglaom sa Biblia na pagkabuhay liwat puedeng makakontribwir sa kaogmahan