“An Pinakamarahay na Pagtatapos na Maiimahinar Ko”

AN SARONG maestro sa haiskul sa España nagsurat: “Sa laog nin labi nang sanggatos na taon, an Mga Saksi ni Jehova nagpaheling nin tunay na pagkasararo, daing katatsaran na pagkaonesto asin, orog sa gabos, dai mararaot na pagtubod.” Ano an nagpahiro sa maestrong ini—sarong naghihingakong ateista—na magpahayag nin arog kaiyan?

Nagpoon an gabos kan si Noemi, sarong estudyante sa haiskul asin saro sa Mga Saksi ni Jehova, inasignaran na sumurat nin sarong komposisyon bilang kabtang kan pangultimong eksaminasyon sa saiyang mga leksion sa eskuelahan. Nagdesisyon sia na magsurat dapit sa temang “An Lilang mga Triangulo sa Irarom kan Pamamahalang Nazi.”

Taano ta pinili nia an temang iyan? Si Noemi nagpaliwanag: “Mantang mamarkahan nin sarong maestro an sakong isinurat, naisip kong aprobetsaran an oportunidad na ini na magpatotoo sa saiya. Napahiro an sakong puso kan estorya kun paano pinanindogan kan mga Saksi ni Jehova sa Nazi Alemania an saindang mga prinsipyo. Naniniwala ako na makakapahiro man iyan sa iba.”

An isinurat ni Noemi nagkaigwa nin epekto sa dakol pang tawo kisa sa posibleng naimahinar nia. Kan Oktubre 5, 2002, an saiyang komposisyon nagkapremyo sa sarong nasyonal na kompetisyon para sa pagsiyasat sa siensia asin sa humanities. An mga premyo sa kompetisyon na iyan itinao nin hurado na kompuesto nin 20 propesor hale sa prominenteng mga unibersidad sa España.

An nagtao ki Noemi kan saiyang premyo iyo si Pilar del Castillo, an ministro kan edukasyon sa España. Inaprobetsaran ni Noemi an oportunidad na tawan an ministro nin kopya kan videocassette na Jehovah’s Witnesses Stand Firm Against Nazi Assault. Gikan sa boot na inako kan ministro an regalo.

Sa ginikanan na banwaan ni Noemi sa Manresa, itinampok kan lokal na peryodiko an saiyang akademikong nagibo asin rinepaso an laog kan saiyang komposisyon. Mientras tanto, an prinsipal sa saiyang eskuelahan naghagad nin kopya kan saiyang isinurat tanganing iiba iyan sa programa sa pagselebrar kan ika-75 anibersaryo kan haiskul na iyan.

“Ini an pinakamarahay na pagtatapos na maiimahinar ko para sa sakong pag-adal sa haiskul,” an sabi ni Noemi. “Labi-labi an sakong kagayagayahan kan mabasa ko an mga tataramon na isinurat kan sakong maestro, si Mr. Jorge Tomas Calot, bilang kabtang kan introduksion nia sa sakong report:

“‘Saro akong ateista, alagad gusto ko na biyong makombensir sa pag-eksister kan Supremong Persona na ini, na nagmomotibar sa saiyang mga parasamba na magpaheling kan pinakatunay na “pagkamoot sa kapwa.”’”