An Saiyang Pagtubod Nakakaparigon sa Boot kan Iba

KAN mamundag si Silvia kan Disyembre 1992, sia sarong omboy na babae na garo biyong may marahay na salud. Alagad sa edad na dos anyos, nadiskobre na si Silvia igwa nin cystic fibrosis, sarong dai na mabobolong na helang na nagigin dahelan nin pagrabe nang pagrabeng problema sa paghangos asin panunaw. Tanganing makaya an saiyang helang, si Silvia nagtotomar nin 36 na tableta aroaldaw, naggagamit nin mga inhaler, asin pinipisikal terapi. Mantang an kapasidad kan saiyang baga 25 porsiento sana kan normal, kaipuhan na danay siang nakatakod sa sarong tangke nin oksiheno, dawa kun sia minaluwas.

“Pero, makangangalas kun paano kinakaya ni Silvia an helang na ini,” an sabi ni Teresa, na saiyang ina. “Sa tabang kan saiyang kaaraman sa Kasuratan, igwa sia nin makosog na pagtubod. An pagtubod na ini nakakatabang sa saiya na atubangon an saiyang kamondoan asin kadepisilan. Ginigirumdom nia pirme an panuga ni Jehova na bagong kinaban, kun saen an gabos na may helang maoomayan.” (Kapahayagan 21:4) Kun beses kun an saiyang pamilya pinanluluyahan nin boot, an kompiadong huyom ni Silvia an nagpaparigon kan saindang boot. Sinasabihan nia an saiyang mga magurang asin saiyang tugang na lalaki: “An buhay sa bagong kinaban an mahipno sa gabos na kasakitan niato sa presente.”

Regular na sinasabi ni Silvia sa iba an maogmang bareta sa Tataramon nin Dios, asin naririsa kan mga tawong kinakaolay nia an kaogmahan asin kagayagayahan sa saiyang lalauogon. An mga miembro kan Kristianong kongregasyon kun saen sia nag-aatender nin mga pagtiripon sa Canary Islands naoogma man na marhay na maghinanyog sa saiyang mga komento asin na maheling siang nagpapartisipar. Asin pagkatapos kan kada pagtiripon, gusto ni Silvia na dai nguna maghale tanganing makipag-olay sa saiyang Kristianong mga tugang. An saiyang makikatood asin masinggayang personalidad an nagpahiro sa bilog na kongregasyon na mamotan sia.

“Si Silvia nagtotokdo sa samo nin mahalagang marhay na leksion,” an komento kan saiyang ama na si Antonio. “Dawa kun may mga problema kita, an buhay sarong regalo hale sa Dios, asin maninigong apresyaron niato iyan.” Arog ni Silvia, an gabos na lingkod nin Dios—hoben asin gurang—galagang hinahalat an panahon na “mayo nin nag-eerok na masabi: ‘Naghehelang ako.’”—Isaias 33:24.

[Ritrato sa pahina 31]

Binabasa ni Silvia an sarong bersikulo sa Biblia mantang dara-dara kan saiyang ina an tangke nin oksiheno