Mga Hoben, Pilion Nindo na Paglingkodan si Jehova
Mga Hoben, Pilion Nindo na Paglingkodan si Jehova
“Pumili kamo ngonyan kun siisay an saindong paglilingkodan.”—JOSUE 24:15.
1, 2. Anong salang mga klase nin pagbunyag an ginigibo sa Kakristianohan?
“PABAYAE nindo na magin Kristiano [an mga aki] kun may kakayahan na sindang mamidbid si Cristo.” Sarong parasurat na an ngaran Tertuliano an nagsurat kan mga tataramon na iyan sa paghinanapos kan ikaduwang siglo C.E. Ipinagpoprotesta nia an pagbunyag sa omboy, sarong kaugalean na nagpopoon na maestablisar sa apostatang Kristianismo kan saiyang kaaldawan. Sa pagkontra ki Tertuliano asin sa Biblia, an Ama kan Iglesia na si Agustin nagsabi na hinahale kan bunyag an digta kan orihinal na kasalan asin na an mga omboy na nagadan na dai nabunyagan mapapasa impierno. An paniniwalang iyan an nagpalakop kan kaugalean na pagbunyag sa mga omboy tolos-tolos sagkod sa mapupuede pagkamundag ninda.
2 An dakol na pangenot na iglesia kan Kakristianohan nagbubunyag pa nin bagong mamundag na mga omboy. Dugang pa, sa bilog na kasaysayan, an obligatoryong pagbunyag sa nakongkistar na “mga pagano” ginibo kan mga namamahala asin namomoon sa relihion kan Kristiano daang mga nasyon. Alagad an pagbunyag sa omboy asin puersahan na pagbunyag sa mga adulto mayo nin basehan sa Biblia.
Mayo nin Automatikong Pagdusay Ngonyan
3, 4. Ano an makakatabang sa mga aki kan nagdusay na mga magurang na gumibo nin boluntad na pagdusay?
3 Ipinapaheling kan Biblia na ibinibilang nin Dios na banal an saradit pang aki dawa kun saro sana sa saindang mga magurang an maimbod na Kristiano. (1 Corinto 7:14) Huli daw kaiyan nagigin nang nagdusay na lingkod ni Jehova an siring na mga aki? Dai. Minsan siring, an mga aki na pinadakula nin mga magurang na nagdusay ki Jehova nag-aako nin pagtotokdo na puedeng magmotibar sa mga aking iyan na gumibo nin boluntad na pagdusay ki Jehova. An madonong na si Hadeng Salomon nagsurat: “Kuyoga, O aki ko, an togon kan saimong ama, asin dai mo pagpabayaan an ley kan saimong ina. . . . Kun ika naglalakaw, iyan magiya sa saimo; kun ika humigda, iyan an magbabantay sa saimo; asin kun ika magmata na, aasikasohon ka kaiyan. Huli ta an togon ilawan, asin an ley liwanag, patin an mga pagsagwe nin disiplina iyo an dalan nin buhay.”—Talinhaga 6:20-23.
4 An paggiya kan Kristianong mga magurang puedeng magprotehir sa mga hoben, basta gikan sa boot nindang susunodon iyan. Sinabi man ni Salomon: “An aking madonong iyo an nagpapagayagaya sa sarong ama, asin an aking mangmang kamondoan kan saiyang ina.” “Ika, O aki ko, pagdangog asin magpakadonong, asin giyahe an saimong puso sa dalan.” (Talinhaga 10:1; 23:19) Iyo, tanganing makinabang sa pagtotokdo nin mga magurang, kamong mga hoben dapat na andam na umako nin sadol, konseho, asin disiplina. Kamo dai namundag na madonong, alagad puede kamong ‘magin madonong’ asin boluntad na sumunod sa “dalan nin buhay.”
Ano an Pagtatanos nin Isip?
5. Anong konseho an itinao ni Pablo sa mga aki asin sa mga ama?
5 Si apostol Pablo nagsurat: “Mga aki, magin makinuyog sa saindong mga magurang kasaro kan Kagurangnan, huli ta ini matanos: ‘Tawan mo nin onra an saimong ama asin an saimong ina’; na iyo an enot na pagboot na may panuga: ‘Tanganing iyan ikarahay mo asin ika magdanay nin haloy sa daga.’ Asin kamo, mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.”—Efeso 6:1-4.
6, 7. Ano an kalabot sa pagpadakula sa mga aki sa “pagtatanos nin isip ni Jehova,” asin taano ta dai ini nangangahulogan na bakong makatanosan na iniimpluwensiahan kan mga magurang an saindang mga aki?
6 An Kristianong mga magurang daw bakong makatanosan na iniimpluwensiahan an saindang mga aki kun pinapadakula ninda an mga aki sa “disiplina asin pagtatanos nin isip ni Jehova”? Dai. Siisay an makakakritikar sa mga magurang sa pagtokdo ninda sa saindang mga aki kan ibinibilang nindang tama asin kapakipakinabang sa moral? An mga ateista dai kinikritikar sa pagtokdo ninda sa saindang mga aki na mayo nin Dios. An mga Romano Katoliko naniniwala na obligado sindang padakulaon an saindang mga aki sa paniniwalang Katoliko, asin bihira sindang kritikaron sa paghihingoa nindang gibohon iyan. Kaagid kaiyan, an Mga Saksi ni Jehova dai maninigong akusaran na minamanipular an isip kan saindang mga aki kun pinapadakula ninda an mga ini na akoon an kaisipan ni Jehova manongod sa pundamental na mga katotoohan asin moral na mga prinsipyo.
7 Segun sa Theological Dictionary of the New Testament, an orihinal na termino sa Griego na trinadusir na “pagtatanos nin isip” sa Efeso 6:4 nanonongod sa proseso na “naghihingoang itanos an isip, itama kun ano an sala, pakarhayon an espirituwal na aktitud.” Kumusta kun kontrahon nin sarong hoben an pagtotokdo nin magurang huli sa impluwensia nin kairiba, an pagmawot na gibohon kun ano an ginigibo kan kairiba. Siisay an masasabing may nakakaraot na impluwensia—an mga magurang o an mga kairiba kan hoben? Kun an kairiba an nan-iimpluwensia sa hoben na magdroga, makosog na mag-inom nin inomon na de alkohol, o gumibo nin inmoral na gawe-gawe, maninigo daw na kritikaron an mga magurang sa paghihingoa nindang pakarhayon an kaisipan kan saindang aki asin tabangan ining marealisar an mga resulta kan siring na peligrosong gawe-gawe?
8. Ano an kalabot sa pagigin ‘nakombensir na maniwala’ ni Timoteo?
8 Si apostol Pablo nagsurat sa hoben na lalaking si Timoteo: “Ika magpadagos sa mga bagay na saimong nanodan asin nakombensir na paniwalaan, mantang aram mo kun kiisay mo iyan nanodan asin na poon sa pagkaomboy naaraman mo na an banal na mga kasuratan, na nakakapagpadonong sa saimo para sa kaligtasan paagi sa pagtubod mapadapit ki Cristo Jesus.” (2 Timoteo 3:14, 15) Poon kan amay na kabtang kan pagkaniaki ni Timoteo, an saiyang ina asin lola nagbugtak nin marigon na pundasyon para sa saiyang pagtubod sa Dios basado sa kaaraman sa Banal na Kasuratan. (Gibo 16:1; 2 Timoteo 1:5) Kan huri, kan sinda nagin mga Kristiano, dai ninda pinuersa si Timoteo na maniwala kundi “nakombensir” sia paagi sa marahay na pangangatanosan na basado sa kaaraman sa Kasuratan.
Iniimbitaran Ka ni Jehova na Pumili
9. (a) Paano tinawan nin dignidad ni Jehova an saiyang mga linalang, asin sa anong dahelan? (b) Paano ginamit kan bugtong na Aki nin Dios an saiyang libreng kabotan?
9 Puede kutanang ginibo ni Jehova na mga robot an saiyang mga linalang, na nakaprogramang gibohon an saiyang kabotan asin dai puedeng sumuway. Imbes, tinawan nia sinda nin dignidad paagi sa pagtao sa sainda nin libreng kabotan. An gusto kan satong Dios boluntad na mga sakop. Naoogma siang maheling an saiyang mga linalang, gurang asin hoben, na naglilingkod sa saiya huli sa pagkamoot. An pinakamarahay na halimbawa nin may pagkamoot na pagpasakop sa kabotan nin Dios iyo an saiyang bugtong na Aki, na manongod sa saiya si Jehova nagsabi: “Ini an sakong Aki, an namomotan, na sakong inoyonan.” (Mateo 3:17) An panganay na Aking ini nagsabi sa saiyang Ama: “An paggibo kan boot mo, O Dios ko, iyo an ikinakaogma kong marhay, asin an saimong ley nasa kairaroman kan sakong nasa laog na mga kabtang.”—Salmo 40:8; Hebreo 10:9, 10.
10. Ano an basehan kan paglilingkod na inaako ni Jehova?
10 Linalaoman ni Jehova na magpaheling kan iyo man sanang gikan sa boot na pagpasakop sa Saiyang kabotan an mga naglilingkod sa saiya segun sa paggiya kan saiyang Aki. Makahulang nag-awit an salmista: “An saimong banwaan gikan sa boot na magpepresentar kan saindang sadiri sa aldaw kan saimong puersa militar. Sa kagayonan nin kabanalan, poon sa kaagahon, ika igwa kan saimong grupo nin hoben na mga lalaki siring kan tagdo kan ambon.” (Salmo 110:3) An bilog na organisasyon ni Jehova, langitnon sagkod daganon na kabtang, nagpupunsionar basado sa may pagkamoot na pagpapasakop sa kabotan nin Dios.
11. Anong pagpili an ibinubugtak kan nagdusay na mga magurang sa atubangan kan mga hoben?
11 Kaya maninigo nindong masabotan mga hoben na dai kamo pupuersahon na magpabautismo kan saindong mga magurang ni kan Kristianong kamagurangan sa kongregasyon. An pagmawot na paglingkodan si Jehova dapat na hale sa saindo. Si Josue kan suanoy nagsabi sa mga Israelita: ‘Paglingkodan nindo si Jehova nin daing sala asin sa katotoohan. Pumili kamo ngonyan kun siisay an saindong paglilingkodan.’ (Josue 24:14-22) Kaagid kaiyan, dapat na gikan sa sadiring boot nindo an pagpili nindong idusay an saindong sadiri ki Jehova asin idusay an saindong buhay sa paggibo kan saiyang kabotan.
Pag-ako kan Saindong Paninimbagan
12. (a) Minsan ngani puedeng tokdoan kan mga magurang an saindang mga aki, ano an dai ninda puedeng gibohon para sa sainda? (b) Noarin nagigin responsable an sarong hoben sa saiyang pinipili sa atubangan ni Jehova?
12 Maabot an panahon na kamong mga hoben bako nang protehido kan kaimbodan kan saindong mga magurang. (1 Corinto 7:14) An disipulong si Santiago nagsurat: “Kun naaaraman nin saro kun paano gigibohon an tama alagad ta dai nia iyan ginigibo, iyan kasalan para sa saiya.” (Santiago 4:17) An mga magurang dai puedeng iyo an maglingkod sa Dios para sa saindang mga aki kun paanong an mga aki dai puedeng iyo an maglingkod sa Dios para sa saindang mga magurang. (Ezequiel 18:20) Nakanood na daw kamo manongod ki Jehova asin sa saiyang mga katuyohan? Kamo daw nasa edad na tanganing masabotan an saindong nanodan asin magpoon na magkaigwa nin personal na relasyon sa saiya? Kun siring, bako daw na makatanosan na isipon na ibinibilang kamo nin Dios na kaya nang magdesisyon na paglingkodan sia?
13. Anong mga hapot an marahay na ihapot kan dai pa bautisadong mga hoben sa saindang sadiri?
13 Kamo daw dai pa bautisadong hoben na pinapadakula nin diosnon na mga magurang, nag-aatender sa Kristianong mga pagtiripon, asin nakikikabtang pa ngani sa paghuhulit kan maogmang bareta kan Kahadean? Kun iyo, sadiosan na hapoton an saindong sadiri: ‘Taano ta ginigibo ko ini? Nag-aatender daw ako sa mga pagtiripon asin nakikikabtang sa paghuhulit huli ta iyan an gusto kan sakong mga magurang na gibohon ko o huli ta gusto kong paogmahon si Jehova?’ Napatunayan na daw nindo sa saindong sadiri “an marahay asin inaako patin sangkap na kabotan nin Dios”?—Roma 12:2.
Taano ta Mag-aatraso Pa na Magpabautismo?
14. Anong mga halimbawa sa Biblia an nagpapaheling na dai maninigong mag-atraso sa pagpabautismo na mayo nin makatanosan na dahelan?
14 “Ano an nakakaolang sako na mabautismohan?” An Etiopeng naghapot kaiyan sa ebanghelisador na si Felipe nakanood pa sana kaidto na si Jesus an Mesiyas. Alagad an Etiope may igo nang kaaraman sa Kasuratan tangani na marealisar nia na dai sia maninigong mag-atraso sa hayag na pagpapatotoo na poon sa panahon na idto paglilingkodan nia si Jehova bilang kabtang kan Kristianong kongregasyon, asin iyan nagtao sa saiya nin dakulang kaogmahan. (Gibo 8:26-39) Kaagid kaiyan, an sarong babae na an ngaran Lidia, na an puso nabukasan na ‘gayo tanganing magtao nin atension sa mga bagay na itinataram ni Pablo,’ tolos-tolos na ‘nagpabautismo,’ sia asin an saiyang kasararo sa harong. (Gibo 16:14, 15) Siring man, an bantay sa bilanggoan sa Filipos naghinanyog ki Pablo asin Silas kan “itinaram ninda an tataramon ni Jehova sa saiya,” asin “sia asin an saiyang kasararo sa harong tolos na nabautismohan.” (Gibo 16:25-34) Kun siring, kun igwa kamo nin pundamental na kaaraman manongod ki Jehova asin sa saiyang mga katuyohan, nin sinserong pagmawot na gibohon an saiyang kabotan, asin nin marahay na reputasyon sa kongregasyon asin kamo maimbod na nag-aatender sa mga pagtiripon asin nakikikabtang sa paghuhulit kan maogmang bareta kan Kahadean, taano ta mag-aatraso pa kamo na magpabautismo?—Mateo 28:19, 20.
15, 16. (a) Anong salang pangangatanosan an tibaad makapogol sa nagkapirang hoben na magpabautismo? (b) Paano puedeng magserbing proteksion sa mga hoben an pagdusay asin bautismo?
15 Posible daw na nag-aalangan kamong gibohon an mahalagang lakdang na ini huli sa takot na maninimbag kamo kun makagibo nin salang gawe-gawe? Kun iyo, isip-isipon ini: Habo daw nindong mag-aplay nin lisensia sa pagmaneho huli sana ta kamo natatakot na tibaad pag-abot nin panahon maaksidente kamo? Siempre dai! Dai man kamo maninigong mag-alangan na magpabautismo kun kamo kualipikado na. Sa katunayan, mamomotibar nanggad kamo na gibohon an pinakamakakaya nindo na labanan an paggibo nin sala kun idinusay na nindo an saindong buhay ki Jehova asin nag-oyon nang gibohon an saiyang kabotan. (Filipos 4:13) Mga hoben, dai tabi nindo pag-isipon na makakalikay kamo sa paninimbagan paagi sa pag-atraso na magpabautismo. Kun kamo nakaabot na sa edad nin pagkaresponsable, maninimbag na kamo ki Jehova sa saindong paggawe baga man kamo bautisado o bako.—Roma 14:11, 12.
16 Kadakol na Saksi sa bilog na kinaban an naniniwala na nakatabang na marhay sa sainda an saindang desisyon na magpabautismo kan sinda hoben pa. Kuanon niatong halimbawa an 23 anyos na Saksi sa Solnopan na Europa. Nagigirumdoman nia na an pagpabautismo nia sa edad na 13 an nagmotibar sa saiya na mag-ingat na dai magpadara sa “mga mawot na konektado sa pagkahoben.” (2 Timoteo 2:22) Hoben pa, nagdesisyon na siang maglingkod bilang bilog na panahon na ministro. Ngonyan, naglilingkod sia sa sangang opisina kan Mga Saksi ni Jehova. Abundang bendisyon an naghahalat sa gabos na hoben, kaiba kamo, na piniling paglingkodan si Jehova.
17. Sa anong mga bagay kaipuhan na padagos na saboton kun ano an “kabotan ni Jehova”?
17 An pagdusay asin bautismo kapinonan nin buhay na kinokonsiderar niato an kabotan ni Jehova sa gabos niatong aktibidad. An pag-otob sa satong pagdusay may kalabot na ‘pagtubos nin panahon.’ Paano niato iyan ginigibo? Paagi sa pagkua nin panahon na gagamiton niato kutana sa daing kamanungdanan na mga aktibidad asin paggamit kaiyan sa seryosong pag-adal sa Biblia, regular na pag-atender sa mga pagtiripon, asin pinakalubos na magigibong pakikikabtang sa paghuhulit kan ‘maogmang bareta kan kahadean.’ (Efeso 5:15, 16; Mateo 24:14) An satong pagdusay ki Jehova asin an satong pagmawot na gibohon an saiyang kabotan may marahay na epekto sa gabos na aspekto kan satong buhay, kaiba an paagi nin satong pagrelaks, an ugale niato sa pagkakan asin pag-inom, asin an klase nin musika na dinadangog niato. Taano ta dai pilion an klase nin pagrelaks na puede nindong ikaogma sa bilog na panahon na daing sagkod? Ribo-ribong maogmang hoben na Saksi an makakapagsabi sa saindo na igwa nin dakol na kapakipakinabang na paagi nin pag-ogma na dai linalapas “an kabotan ni Jehova.”—Efeso 5:17-19.
“Maiba Kami sa Saindo”
18. Anong hapot an maninigong ihapot kan mga hoben sa saindang sadiri?
18 Poon kan 1513 B.C.E. sagkod Pentecostes 33 C.E., si Jehova igwa sa daga nin sarong organisadong banwaan na pinili nia tanganing sumamba sa saiya asin magin mga saksi nia. (Isaias 43:12) An hoben na mga Israelita namundag sa nasyon na iyan. Poon kan Pentecostes, si Jehova nagkaigwa nin bagong “nasyon” sa daga, an espirituwal na Israel, “sarong banwaan para sa saiyang ngaran.” (1 Pedro 2:9, 10; Gibo 15:14; Galacia 6:16) Sinabi ni apostol Pablo na lininig ni Cristo para sa saiya man sana an “sarong banwaan na magigin saiya sana nanggad, maigot sa marahay na mga gibo.” (Tito 2:14) Libre kamong mga hoben na aramon nindo mismo kun saen manonompongan an banwaan na iyan. Siisay ngonyan an minakompuesto kan “matanos na nasyon na nagpapadanay sa maimbod na gawe,” na namumuhay kaoyon kan mga prinsipyo sa Biblia, na minagawe bilang maimbod na mga Saksi ni Jehova, asin nagbabalangibog kan saiyang Kahadean bilang an solamenteng paglaom para sa katawohan? (Isaias 26:2-4) Helingon nindo an mga iglesia kan Kakristianohan asin an iba pang mga relihion, asin ikomparar nindo an saindang paggawe sa kun ano an hinahagad kan Biblia sa tunay na mga lingkod nin Dios.
19. Sa ano nakombensir an minilyon na tawo sa bilog na daga?
19 Minilyon na tawo sa bilog na kinaban, kaiba an dakol na hoben, an nakombensir na an linahidan na natatada kan Mga Saksi ni Jehova an minakompuesto kan “matanos na nasyon.” Sinasabi ninda sa espirituwal na mga Israelitang ini: “Maiba kami sa saindo, huli ta nabaretaan niamo na an Dios yaon dian sa saindo.” (Zacarias 8:23) Kita talagang naglalaom asin namimibi na an mga hoben madesisyon na magin kabilang sa banwaan nin Dios asin sa siring ‘pilion an buhay’—buhay na daing katapusan sa bagong kinaban ni Jehova.—Deuteronomio 30:15-20; 2 Pedro 3:11-13.
Bilang Repaso
• Ano an kalabot sa pagtatanos nin isip?
• Anong klaseng paglilingkod an inaako ni Jehova?
• Anong pagpili an ibinubugtak sa atubangan kan gabos na hoben na pinadakula nin nagdusay na mga magurang?
• Taano ta dai maninigong mag-atraso sa pagpabautismo na mayo nin makatanosan na dahelan?
[Mga Hapot Para sa Pag-adal]
[Mga Ritrato sa pahina 26]
Kiisay kamo mahinanyog?
[Ritrato sa pahina 28]
Paano magseserbing proteksion sa saindo an pagdusay asin bautismo?
[Ritrato sa pahina 29]
Ano an nakakaolang sa saindo na magpabautismo?