Pakanompong sa Tunay na Kaliwanagan

DISYEMBRE 18, 1810 kaidto. Pabanggi na. Sa mabagyong dagat sa may timog-sirangan na baybayon nin Scotland, nawaran nin direksion an barkong HMS Pallas kan Hukbong-Dagat nin Britania. Huli ta nagdidiklom na asin nagniniebe paorog nang paorog na nagin depisil para sa mga tripulante na maheling an naggigiyang mga ilaw na kaipuhan ninda tanganing giyahan an saindang barko pasiring sa ligtas na lugar. Imahinara an saindang pakaginhawa kan sa katapustapusi nakaheling sinda nin mga ilaw asin minaniobra ninda an saindang barko pasiring duman! Pero, makamomondo ta an mga ini bakong an naggigiyang mga ilaw na kaipuhan ninda. An totoo, idto naglalaad na mga sulo kan mga trabahador harani sa baybayon. An Pallas suminadsad sa darakulang gapo asin biyong naraot. Onseng marinero an nalamos. Kanigoan na trahedya!

Sa nangyari sa Pallas, an sarong sala nagbunga nin grabeng kapahamakan. Minsan siring, may beses na an mga marinero napapaatubang sa mas dakula pa nganing peligro—an bakong totoong naggigiyang mga ilaw. Ibinubugtak an arog kaiyan na mga ilaw bilang paon sa mga barko tanganing mabagbag iyan sa magapong mga baybayon dangan sasalakaton an nabagbag na mga barko, oyon sa librong Wrecks, Wreckers and Rescuers.

‘Sagradong mga Isinurat na Puedeng Maggiya Saindo sa Kaligtasan’

Sa paghanap nindo sa kaliwanagan, napapaatubang kamo sa mga peligro na kaagid kan napaatubang sa mga marinerong idto. Tibaad magsunod kamo sa mapandayang impormasyon, o tibaad kamo magin biktima pa ngani nin tuyong panloloko. An arin man sa duwang iyan puedeng magbunga nin trahedya. Ano an magigibo nindo tanganing maprotehiran an saindong sadiri? Seguradohon na tunay asin mapagtitiwalaan an saindong gikanan nin kaliwanagan. Sa laog nin labi nang 125 taon, sinuportaran kan magasin na ini an ipinasabong na Tataramon nin Dios, an Biblia, bilang an pinakamasasarigan na gikanan nin kaliwanagan huli ta yaon dian an “sagradong mga isinurat na may puersang magpadonong sa saindo asin maggiya saindo sa kaligtasan.”—2 Timoteo 3:15-17, New English Bible.

Siempre, tanganing magkaigwa kamo nin kompiansa sa Biblia bilang mapagtitiwalaan na naggigiyang  ilaw, rasonable sana na berepikaron nindo an pagkamasasarigan kaiyan. (Salmo 119:105; Talinhaga 14:15) Dai kamo mag-alangan na sumurat sa mga kagpublikar kan magasin na ini tanganing makakua nin impormasyon na nakatabang sa pagkombensir sa minilyon na an Biblia talagang ipinasabong nin Dios. Halimbawa, basahon an brosyur na may titulong Sarong Libro Para sa Gabos na Tawo. * Ipinepresentar kaiyan an dakol na impormasyon na nagpapaheling na an Biblia eksakto, masasarigan, asin ipinasabong.

Pundamental na mga Katotoohan

Kun siring, ano an nagkapira sa pundamental na mga katotoohan na yaon sa “sagradong mga isinurat” na ini? Estudyare an minasunod na mga halimbawa.

Igwa nin sarong Makakamhan sa Gabos na Dios asin Kaglalang na naggibo kan gabos na bagay. (Genesis 1:1) Kita nag-eeksister sana “huli ta linalang [nin Dios] an gabos na bagay” asin tinawan nia kita nin buhay. (Kapahayagan 4:11) Iyan an dahelan kaya sia sana an maninigo niatong sambahon. An Kaglalang iyo an Pinakagikanan kan gabos na kaliwanagan. (Salmo 36:9; Isaias 30:20, 21; 48:17, 18) Igwa sia nin personal na ngaran na gusto niang gamiton niato. (Exodo 3:15) An ngaran na iyan, na isinurat sa mga letrang Hebreo asin trinansliterar na YHWH, minalataw nin mga 7,000 na beses sa Biblia. Sa laog nin dakol na siglo, ginagamit iyan sa Ingles sa pormang “Jehovah” (sa Bicol, “Jehova”).—Salmo 83:18.

Ginibo ni Jehova an mga lalaki asin babae tanganing mabuhay sagkod lamang sa Paraisong mga kamugtakan digdi mismo sa daga. Tinawan nia an mga tawo nin espirituwal na mga kualidad na nagpapabanaag kan saiya mismong mga kualidad. Tinawan nia sinda nin mga talento asin abilidad tanganing ikaogma ninda an daing katapusan asin nakakakontentong buhay bilang tawo digdi sa daga. (Genesis 1:26-28) Dai nia noarin man katuyohan na an daga magin sarong klaseng lugar na dian binabalo an mga lalaki asin babae—na dian iinaandam an mga tawo para sa buhay sa langit bilang espiritu, na garo baga duman sana sinda magkakaigwa nin relasyon sa Dios.

Mayo nin maraot sa tawong linalang nin Dios. An maraot luminataw sana kan an nagkapira sa mga linalang nin Dios—tawo sagkod espiritu—ginamit sa salang paagi an saindang katalingkasan nin pagpili asin nagrebelde sa Dios. (Deuteronomio 32:5) Kinua kan enot niatong mga magurang an deretso na sinda na mismo an magdeterminar kun ano an marahay asin kun ano an maraot. (Genesis 2:17; 3:1-5) Nagbunga iyan nin kagadanan sa pamilya nin tawo. (Genesis 3:19; Roma 5:12) Tanganing resolberan an mga isyu na naglataw sa pagrebelde, nagdesisyon si Jehova na temporaryong togotan an karatan. Alagad an saiyang katuyohan para sa daga asin para sa pamilya nin tawo dai pa man giraray nagbabago. (Isaias 45:18) An mga lalaki asin babae sa ngapit pa mabubuhay sagkod lamang sa Paraisong mga kamugtakan sa lininig na daga.—Mateo 6:10; Kapahayagan 21:1-5.

Bako si Jesu-Cristo an Makakamhan sa Gabos na Dios, kundi sia an Aki nin Dios. Si Jesu-Cristo mismo an nagtokdo sa saiyang mga parasunod na mamibi: “Ama niamo na nasa langit, santipikaron logod an saimong ngaran.” (Mateo 6:9) Nungka siang naghingako na kapantay nia an Dios. Imbes, sia nagsabi: “An Ama orog na dakula kisa sako.”—Juan 14:28.

Si Jesus may mahalagang marhay na kabtang sa pagkaotob kan katuyohan nin Dios. Isinugo sia nin  Dios “bilang liwanag sa kinaban, tanganing an lambang saro na minatubod sa [saiya] dai magdanay sa kadikloman.” (Juan 12:46) Oyon ki apostol Pedro, “mayo nin kaligtasan sa siisay pa man na iba.” (Gibo 4:12) Totoo ini huli ta an satong kaligtasan nakadepende sa mahal na marhay na dugo ni Cristo. (1 Pedro 1:18, 19) Itinao ni Jesu-Cristo an saiyang buhay bilang atang na pantubos tanganing balukaton an katawohan sa kasalan na ilinaog sa pamilya nin tawo kan enot niatong mga magurang, si Adan asin Eva. (Mateo 20:28; 1 Timoteo 2:6) Siring man, ginamit nin Dios si Jesus tanganing ihayag an Saiyang kabotan asin katuyohan.—Juan 8:12, 32, 46, 47; 14:6; Gibo 26:23.

An Dios nagpatindog nin sarong langitnon na Kahadean, o gobyerno, na kompuesto ni Jesu-Cristo asin kan mga pinili hale sa katawohan. An paorootrong temang ini manonompongan sa bilog na Biblia. Ipinagkatiwala nin Dios sa gobyernong ini an trabaho na siertohon na an saiyang kabotan ginigibo digdi sa daga kun paano sa langit. (Mateo 6:10) Bakong kabtang kan orihinal na katuyohan nin Dios na an siisay man sa katawohan magpasiring sa langit. An saindang magigin erokan iyo an daga. Alagad kasunod kan pagkahulog kan tawo sa kasalan, may ginibong bagong katuyohan an Dios. Iinareglo nia na pumili nin mga tawo ‘hale sa lambang tribo asin tataramon asin banwaan patin nasyon tanganing mamahala bilang mga hade’ kaiba ni Cristo sa langitnon na gobyerno. (Kapahayagan 5:9, 10) Sa dai na mahahaloy ‘roronoton asin tataposon’ kan gobyernong Kahadean na iyan an gabos na porma nin pamamahala nin tawo, na nagtao nin kadakol na kasakitan asin kolog sa pamilya nin tawo.—Daniel 2:44.

An kalag nagagadan. An pundamental na katotoohan na ini sa Biblia igwa nin dakol na linilinaw manongod sa tawo asin sa saiyang oportunidad na mabuhay. Hinahale man kaiyan an salang pakasabot asin salang impormasyon na nakaribaraw sa mga tawo manongod sa kamugtakan kan mga gadan.

An pinakaenot na libro kan Biblia nagsasabi sa sato: “Pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hinangos nin buhay, asin an tawo nagin buhay na kalag.” (Genesis 2:7) Nasasabotan daw nindo an kahulogan kaiyan? An kalag bakong garo sana sarong anino na nag-eeksister sa laog kan hawak nin tawo. An tawo mayo nin kalag. Sia an kalag—kombinasyon nin mga elemento na makukua sa “kabokabo kan daga” asin puersa nin buhay na hale sa Dios. An kalag bakong inmortal. Kun magadan an tawo, magagadan man an kalag.—Genesis 3:19; Eclesiastes 9:5, 10.

Ikakabalik an buhay kan mga nagadan paagi sa pagkabuhay liwat. Kun matapos na an panahon na temporaryong tinogotan nin Dios an karatan, “an gabos na nasa mga lolobngan na girumdoman makakadangog kan . . . tingog [ni Jesus] asin maruluwas, idtong naggiribo nin marahay sa pagkabuhay liwat sa buhay, idtong naggiribo nin maraot sa pagkabuhay liwat sa paghokom.” (Juan 5:28, 29;  Gibo 24:15) Paagi sa pagkabuhay liwat, an mga tawo mabubuhay giraray sa sarong paraisong daga, an klase nin buhay na orihinal na katuyohan nin Dios para sa saiyang pamilya nin tawo.

Maingat na Siyasaton an Kasuratan Aroaldaw

Naheheling daw nindo kun paano puedeng makatabang sa saindo an kaaraman dapit sa siring kaiyan na pundamental na mga katotoohan? Sa delikado asin maribok na mga panahon na ini, an siring kaiyan na kaaraman makakaprotehir sa saindo tumang sa “falsong inaapod na ‘kaaraman’” na pinapalakop ni Satanas na Diablo. Sia nagsasaginsagin na “anghel nin liwanag,” asin an saiyang mga representante nagsasaginsagin man na “mga ministro nin katanosan.” (1 Timoteo 6:20; 2 Corinto 11:13-15) An tamang kaaraman sa Biblia makakaprotehir sa saindo tumang sa kaliwanagan daa na basado sa mga pilosopiya kan “mga madonong asin may inadalan” sa kinaban, na ‘nagsikwal sa mismong tataramon ni Jehova.’—Mateo 11:25; Jeremias 8:9.

Huli ta kadakol nin nakakadayang katokdoan asin pilosopiya kan kaaldawan nia, si apostol Juan nagpatanid sa mga Kristiano kan enot na siglo: “Dai kamo tumubod sa gabos na ipinasabong na tataramon.” Sia nagsabi: “Baloon an ipinasabong na mga tataramon kun baga iyan gikan sa Dios.” (1 Juan 4:1) Isipon an ilustrasyon na ini. Kun makaresibi kamo nin mensahe na puedeng magkaigwa nin dakulang epekto sa buhay nindo, basta-basta na sana daw nindong aakoon iyan huli sana ta garo baga masasarigan an pinaghalean kaiyan? Siempre dai. Beberepikaron nindo an pinaghalean kaiyan asin sisiyasaton an laog kaiyan bago kamo humiro.

Paagi sa pagtao nin ipinasabong na nasusurat na rekord na igwa nin pundamental na mga katotoohan, pinagin posible nin Dios na magibo nindo mismo iyan—tanganing ‘masierto’ na totoo an naggigiyang mga ilaw na sinusunod nindo. (1 Tesalonica 5:21) Tinawan nin komendasyon an mga tawong noble an isip kan enot na siglo huli sa “maingat na [pagsiyasat kan] Kasuratan aroaldaw” tanganing masierto ninda na talagang katotoohan an nanonodan ninda. (Gibo 17:11) Puede man nindong gibohon iyan. Magpagiya kamo sa Biblia, siring sa “sarong ilawan na nagliliwanag sa madiklom na lugar,” pasiring sa kaligtasan. (2 Pedro 1:19-21) Kun gigibohon nindo iyan, ‘makukua nindo an mismong kaaraman nin Dios,’ na nagtatao nin tunay na kaliwanagan.—Talinhaga 2:5.

[Nota sa Ibaba]

[Ritrato sa pahina 4]

An Tataramon nin Dios garo sarong ilawan

[Ritrato sa pahina 5]

Ano an ngaran nin Dios?

[Ritrato sa pahina 5]

Ano an ngapit nin katawohan?

[Ritrato sa pahina 6]

Si Jesus daw an Makakamhan sa Gabos na Dios?

[Ritrato sa pahina 6]

Haen an mga gadan?

[Ritrato sa pahina 7]

An pagkabuhay liwat kan mga gadan an saro sa pundamental na mga katotoohan na itinotokdo sa Biblia