Sinda Namundag sa Piniling Nasyon nin Dios

“Ika an pinili ni Jehova na saimong Dios na magin saiyang banwaan.”—DEUTERONOMIO 7:6.

1, 2. Ano an makakamhan na mga ginibo ni Jehova para sa saiyang banwaan, asin ano an ginibo kan mga Israelita dai nahaloy pagkahale ninda sa Egipto?

KAN 1513 B.C.E., an mga lingkod ni Jehova digdi sa daga dinara nia sa sarong bagong relasyon sa saiya. Kan taon na iyan, sinupog nia an sarong kapangyarihan pankinaban asin kinalda sa kaoripnan an mga Israelita. Sa paggibo kaiyan, sia nagin saindang Paraligtas asin Kagsadiri. Bago naghiro, sinabihan nin Dios si Moises: “Sabihan mo an mga aki ni Israel, ‘Ako si Jehova, asin kukuanon ko kamo sa irarom kan mga pagabat kan mga Egipcio asin kakaldahon ko kamo sa pangongoripon ninda, asin tutuboson ko kamo paagi sa unat na takyag asin sa darakulang paghokom. Asin ibibilang ko nanggad kamo na sakuyang banwaan, asin ako nanggad an magigin Dios nindo.’”—Exodo 6:6, 7, mga nota sa ibaba; 15:1-7, 11.

² Dai nahaloy pakatapos kan saindang Lagdoan na Pagharale sa Egipto, an mga Israelita nakipagtipan sa saindang Dios, si Jehova. Imbes na makipagtratar sa mga indibiduwal, pamilya, o magparyente, poon sa panahon na idto si Jehova magkakaigwa nin sarong organisadong banwaan, sarong nasyon, sa daga. (Exodo 19:5, 6; 24:7) Nagtao sia sa saiyang banwaan nin mga ley na naggiya sa saindang pangaroaldaw na buhay asin, orog na mahalaga, sa saindang pagsamba. Si Moises nagsabi sa sainda: “Arin na dakulang nasyon an may mga dios na harani dian siring kan pagigin yaon ni Jehova na satuyang Dios sa gabos niatong pag-apod sa saiya? Asin arin na dakulang nasyon an igwa nin matanos na mga pagkukuyogon asin hudisyal na mga desisyon na arog kaining gabos na ley na ibinubugtak ko sa saindong atubangan ngonyan?”—Deuteronomio 4:7, 8.

Namundag sa Sarong Nasyon nin mga Saksi

3, 4. Ano an sarong mahalagang dahelan kan pag-eksister kan Israel bilang sarong nasyon?

³ Pakalihis nin dakol na siglo, ipinagirumdom ni Jehova sa mga Israelita, paagi sa saiyang propetang si Isaias, an sarong mahalagang dahelan kan saindang pag-eksister bilang sarong nasyon. Sinabi ni Isaias: “Ini an isinabi ni Jehova, an saimong Kaglalang, O Jacob, asin an saimong Kaggibo, O Israel: ‘Dai ka matakot, huli ta ika binalukat ko. Inapod taka sa saimong ngaran. Sadiri taka. Huli ta ako si Jehova na saimong Dios, an Banal kan Israel na saimong Paraligtas. . . . Daraha an sakuyang mga aking lalaki hale sa harayo, asin an sakuyang mga aking babae hale sa poro kan daga, an gabos na inaapod sa ngaran ko asin na linalang ko para sa sakong sadiring kamurawayan, na hinaman ko, iyo, na ginibo ko. Kamo an sakong mga saksi,’ an sabi ni Jehova, ‘an sakong lingkod na sakong pinili, . . . an banwaan na ginibo ko para sa sakuyang sadiri, tanganing isaysay ninda  an sakong kaomawan.’”—Isaias 43:1, 3, 6, 7, 10, 21.

⁴ Bilang banwaan na inapod sa ngaran ni Jehova, an mga Israelita magseserbing mga saksi sa saiyang soberaniya sa atubangan kan mga nasyon. Sinda magigin sarong banwaan na ‘linalang para sa kamurawayan ni Jehova.’ ‘Isasaysay ninda an kaomawan ni Jehova,’ isasabi an saiyang makangangalas na mga gibo nin pagliligtas asin sa siring papamurawayon an saiyang banal na ngaran. Sa halipot, sinda magigin sarong nasyon nin mga saksi para ki Jehova.

5. Sa anong mga paagi na an Israel sarong nagdusay na nasyon?

⁵ Kan ika-11 siglo B.C.E., ipinarisa ni Hadeng Salomon na isiniblag ni Jehova an Israel bilang sarong nasyon. Sa pamibi ki Jehova, sinabi nia: “Ika mismo an nagsiblag sa sainda bilang saimong mana hale sa gabos na banwaan sa daga.” (1 Hade 8:53) Nagkaigwa man nin espesyal na relasyon ki Jehova an indibiduwal na mga Israelita. Bago kaidto, sinabihan sinda ni Moises: “Mga aki kamo ni Jehova na saindong Dios. . . . Huli ta ika sarong banal na banwaan ki Jehova na saimong Dios.” (Deuteronomio 14:1, 2) Kun siring, dai kaipuhan kan mga aking Israelita na idusay an saindang buhay ki Jehova. Namundag sinda bilang mga miembro kan nagdusay na banwaan nin Dios. (Salmo 79:13; 95:7) An kada bagong kapag-arakian tinotokdoan sa mga ley ni Jehova asin obligadong otobon iyan huli sa pakipagtipan kan Israel ki Jehova.—Deuteronomio 11:18, 19.

Libreng Pumili

6. Anong pagpili an kinaipuhan na gibohon kan indibiduwal na mga Israelita?

⁶ Minsan ngani an mga Israelita namundag sa sarong nagdusay na nasyon, kinaipuhan kan balang indibiduwal na personal na magdesisyon na paglingkodan an Dios. Bago sinda maglaog sa Dagang Panuga, sinabihan sinda ni Moises: “Kinukua ko an kalangitan asin an daga bilang mga saksi tumang sa saindo ngonyan, na ibinugtak ko an buhay asin kagadanan sa atubangan mo, an bendisyon asin an maldisyon; asin dapat na pilion mo an buhay tanganing makapagpadagos kang mabuhay, ika asin an saimong aki, paagi sa pagkamoot ki Jehova na saimong Dios, paagi sa paghinanyog sa saiyang tingog asin paagi sa pagdadanay sa saiya; huli ta sia an saimong buhay asin an kahalawigan kan saimong mga aldaw, tanganing makaerok ka sa daga na isinumpa ni Jehova sa saimong mga apoon na si Abraham, Isaac asin Jacob na itatao nia sa sainda.” (Deuteronomio 30:19, 20) Huli kaini, bilang mga indibiduwal, kinaipuhan kan mga Israelita na pilion na kamotan si Jehova, maghinanyog sa saiyang tingog, asin magdanay sa saiya. Huling an mga Israelita may libreng kabotan, sinda an kaipuhan na manimbag sa mga resulta kan saindang pagpili.—Deuteronomio 30:16-18.

7. Ano an nangyari pagkagadan kan kapag-arakian ni Josue?

⁷ An panahon kan mga Hokom malinaw na nag-iilustrar kan mga resulta nin kaimbodan asin pagigin bakong maimbod. Bago mismo magpoon an panahon na iyan, an mga Israelita nagsunod sa marahay na halimbawa ni Josue asin sinda binendisyonan. “An banwaan padagos na naglingkod ki Jehova sa gabos na aldaw ni Josue asin sa gabos na aldaw kan kamagurangan na lalaki na naglawig pa an mga aldaw pakatapos ni Josue asin na nakaheling kan gabos na dakulang gibo ni Jehova na ginibo nia para sa Israel.” Minsan siring, pakalihis nin pirang panahon pagkagadan ni Josue, “saro naman na kapag-arakian an nagpoon na lumataw kasunod ninda na dai nakakamidbid ki Jehova o nakakaaram kan ginibo nia para sa Israel. Asin an mga aki ni Israel naggiribo kan maraot sa mga mata ni Jehova.” (Hokom 2:7, 10, 11) Minalataw na dai pinahalagahan na marhay kan aki pa asin daing eksperyensiang kapag-arakian an saindang mana bilang mga miembro nin sarong nagdusay na banwaan, na para sa sainda an saindang Dios, si Jehova, naggibo nin makakamhan na mga gibo kan nakaagi.—Salmo 78:3-7, 10, 11.

Pag-otob kan Saindang Pagdusay

8, 9. (a) Anong areglo an nagpangyari sa mga Israelita na patunayan an saindang pagdusay ki Jehova? (b) Ano an nakamtan kan mga nagtao nin boluntaryong mga dolot?

⁸ Si Jehova nagtao nin mga oportunidad sa saiyang banwaan na otobon an saindang pagdusay bilang nasyon. Halimbawa, an saiyang Ley nag-areglo nin sarong sistema nin mga atang, o dolot,  na an nagkapira kaiyan obligatoryo, mantang an iba boluntaryo. (Hebreo 8:3) Kaiba sa siring na mga atang an mga dolot na tinotong, dolot na harina, asin dolot para sa pakikikabtang na gabos iyan boluntaryo—mga balaog na itinatao ki Jehova tanganing makamtan an saiyang pabor asin ipahayag an pagpasalamat.—Levitico 7:11-13.

⁹ An boluntaryong mga atang na idto nakapaogma ki Jehova. An dolot na tinotong asin an dolot na harina sinasabi na “nakakaginhawang parong para ki Jehova.” (Levitico 1:9; 2:2) Sa atang para sa pakikikabtang, an dugo asin an taba kan hayop idinodolot ki Jehova, mantang an mga kabtang kan karne kinakakan kan mga saserdote asin kan nagdodolot. Sa siring, iyan simbolikong pagkakan na nangangahulogan nin matoninong na relasyon ki Jehova. An Ley nagsasabi: “Ngonyan kun kamo maatang nin atang para sa pakikikabtang ki Jehova, iaatang nindo iyan tanganing magkamit kamo nin pag-oyon.” (Levitico 19:5) Minsan ngani an gabos na Israelita nagdusay ki Jehova paagi sa pagkamundag, idtong mga ginibong makahulogan an saindang pagdusay paagi sa pagtao nin boluntaryong mga dolot ‘nagkamit nin pag-oyon’ asin binendisyonan nin igo.—Malaquias 3:10.

10. Paano ipinahayag ni Jehova an saiyang dai pagkawili kaidtong mga aldaw ni Isaias asin ni Malaquias?

¹⁰ Minsan siring, sa parate nagin bakong maimbod ki Jehova an nagdusay na nasyon nin Israel. Paagi sa saiyang propetang si Isaias, si Jehova nagsabi sa sainda: “Dai mo dinara sa sako an mga karnero kan bilog na mga dolot na tinotong, asin paagi sa saimong mga atang dai mo ako pinamuraway. Dai ko ika pinirit na maglingkod sa sako na may darang balaog.” (Isaias 43:23) Dugang pa, mayo nin halaga sa pagheling ni Jehova an mga dolot na itinao nin bakong gikan sa boot asin bakong huli sa pagkamoot. Halimbawa, tolong siglo pakalihis ni Isaias, kaidtong mga aldaw kan propetang si Malaquias, an mga Israelita nagdolot nin mga hayop na may kaninan. Huli kaini, si Malaquias nagsabi sa sainda: “‘Dai ko kamo nawiwilihan,’ an sabi ni Jehova nin mga hukbo, ‘asin dai ko ikinakaogma an balaog na dolot hale sa saindong kamot.’ . . . ‘Nagdara kamo nin bagay na inagaw, asin kan pilay, asin kan may helang; iyo, dinara nindo iyan bilang balaog. Ikawiwili ko daw iyan sa saindong kamot?’ an sabi ni Jehova.”—Malaquias 1:10, 13; Amos 5:22.

 Isinikwal Bilang Sarong Nagdusay na Nasyon

11. Anong oportunidad an itinao sa Israel?

¹¹ Kan panahon na an mga Israelita nagin sarong nasyon na nagdusay ki Jehova, nanuga sia sa sainda: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin sakong espesyal na sadiri hale sa gabos na ibang banwaan, huli ta sadiri ko an bilog na daga. Asin kamo mismo magigin kahadean nin mga saserdote asin banal na nasyon para sa sako.” (Exodo 19:5, 6) An ipinanugang Mesiyas malataw sa tahaw ninda asin matao sa sainda kan enot na oportunidad na magin mga miembro kan Kahadean na gobyerno nin Dios. (Genesis 22:17, 18; 49:10; 2 Samuel 7:12, 16; Lucas 1:31-33; Roma 9:4, 5) Alagad an dakulang mayoriya kan nasyon nin Israel dai inotob an saindang pagdusay. (Mateo 22:14) Isinikwal ninda an Mesiyas asin sa kahurihurihi ginadan ninda sia.—Gibo 7:51-53.

12. Anong mga tataramon ni Jesus an nagpapaheling na an Israel isinikwal na bilang nagdusay na nasyon ni Jehova?

¹² Pirang aldaw na sana bago sia magadan, sinabihan ni Jesus an Judiong mga namomoon sa relihion: “Ano nungka nindong nabasa sa Kasuratan, ‘An gapo na hinaboan kan mga paratogdok iyo an nagin pangenot na gapong pangeskina. Ini nangyari gikan ki Jehova, asin iyan makangangalas sa satong mga mata’? Kaya ngani ako nagsasabi sa saindo, An kahadean nin Dios hahaleon sa saindo asin itatao sa nasyon na nagpapaluwas kan mga bunga kaiyan.” (Mateo 21:42, 43) Ipinapaheling na isinikwal sinda ni Jehova bilang sarong nasyon na nagdusay sa Saiya, sinabi ni Jesus: “Jerusalem, Jerusalem, an paragadan sa mga propeta asin paragapo sa mga isinugo sa saiya,—makapirang binoot kong tiriponon an saimong mga aki, siring kan pagtipon kan guna sa saiyang mga siyo sa irarom kan saiyang mga pakpak! Alagad ta kamo huminabo kaiyan. Uya! An saindong harong pinabayaan na sa saindo.”—Mateo 23:37, 38.

Sarong Bagong Nagdusay na Nasyon

13. Anong makahulang tataramon an sinabi ni Jehova kan mga aldaw ni Jeremias?

¹³ Kan panahon kan propetang si Jeremias, si Jehova naghula nin sarong bagong bagay mapadapit sa saiyang banwaan. Mababasa niato: “‘Uya! May maabot na mga aldaw,’ an sabi ni Jehova, ‘asin magibo ako nin bagong tipan sa kamag-anakan nin Israel asin sa kamag-anakan ni Juda; bakong arog kan tipan na ginibo ko sa saindang mga apoon kan aldaw na kaptan ko an saindang kamot sa pagkua sa sainda sa daga nin Egipto, “sakong tipan na linapas mismo ninda, minsan ngani ako may pagkasadiri sa sainda bilang agom na lalaki,” sabi ni Jehova.’ ‘Huli ta iyo ini an tipan na gigibohon ko sa kamag-anakan nin Israel pakalihis kan mga aldaw na idto,’ an sabi ni Jehova. ‘Ibubugtak ko sa laog ninda an sakong ley, asin sa saindang puso iyan isusurat ko. Asin ako magigin saindang Dios, asin sinda magigin sakong banwaan.’”—Jeremias 31:31-33.

14. Kasuarin asin sa anong basehan nagpoon na mag-eksister an bagong nagdusay na nasyon ni Jehova? Sabihon kun arin an bagong nasyon na iyan.

¹⁴ Ibinugtak an basehan kan bagong tipan na ini kan si Jesus magadan asin kan huri ipresentar nia sa saiyang Ama an halaga kan saiyang pinabolos na dugo, kan 33 C.E. (Lucas 22:20; Hebreo 9:15, 24-26) Minsan siring, nagpoon na magpunsionar an bagong tipan kan ibubo an banal na espiritu kaidtong Pentecostes 33 C.E. asin kan mamundag an sarong bagong nasyon, an “Israel nin Dios.” (Galacia 6:16; Roma 2:28, 29; 9:6; 11:25, 26) Sa saiyang surat sa linahidan na mga Kristiano,  si apostol Pedro nagsabi: “Kamo ‘rasang pinili, sarong makahadeng kabilogan na grupo nin mga saserdote, banal na nasyon, banwaan para sa espesyal na pagkasadiri, tanganing ipahayag nindo nin mahiwas an mga kamurawayan’ kan saro na nag-apod sa saindo hale sa kadikloman pasiring sa saiyang makangangalas na liwanag. Huli ta kamo kaidto bakong banwaan, alagad ngonyan banwaan na nin Dios.” (1 Pedro 2:9, 10) Natapos na an espesyal na relasyon sa pag-oltanan ni Jehova asin kan Israel sa laman. Kan 33 C.E., an pabor ni Jehova ibinalyo hale sa daganon na Israel pasiring sa espirituwal na Israel, an Kristianong kongregasyon, an “nasyon na nagpapaluwas kan mga bunga” kan Mesiyanikong Kahadean.—Mateo 21:43.

Pagdusay nin Indibiduwal

15. Kan aldaw nin Pentecostes 33 C.E., anong pagpabautismo an isinadol ni Pedro sa mga naghihinanyog sa saiya?

¹⁵ Pakatapos kan Pentecostes 33 C.E., an lambang indibiduwal, Judio o Hentil, kinaipuhan na personal na magdusay sa Dios asin mabautismohan “sa ngaran kan Ama asin kan Aki patin kan banal na espiritu.” * (Mateo 28:19) Kan Pentecostes, sinabihan ni apostol Pedro an mapaghimateng mga Judio asin proselito: “Magsorolsol kamo, asin an lambang saro logod sa saindo mabautismohan sa ngaran ni Jesu-Cristo para sa kapatawadan kan saindong mga kasalan, asin aakoon nindo an daing bayad na balaog kan banal na espiritu.” (Gibo 2:38) Kaipuhan na ipaheling kan mga Judio asin proselitong idto paagi sa saindang bautismo na bako sanang idinusay ninda an saindang buhay ki Jehova kundi na inako man ninda si Jesus bilang paagi tanganing patawadon ni Jehova an saindang mga kasalan. Kinaipuhan nindang rekonoseron sia bilang an Halangkaw na Saserdote ni Jehova asin bilang saindang Poon, an Payo kan Kristianong kongregasyon.—Colosas 1:13, 14, 18.

16. Kan kaaldawan ni Pablo, paano nagin kabtang kan espirituwal na Israel an mga tawong tama an inklinasyon—mga Judio asin Hentil?

¹⁶ Pakalihis nin dakol na taon, sinabi ni apostol Pablo: “Enot sa mga nasa Damasco sagkod sa mga nasa Jerusalem, asin sa bilog na daga nin Judea, asin sa mga nasyon dinara ko an mensahe na sinda maninigong magsorolsol asin bumalik sa Dios paagi sa mga gibo na angay sa pagsolsol.” (Gibo 26:20) Pakatapos kombensiron an mga tawo—mga Judio asin Hentil—na si Jesus an Cristo, an Mesiyas, tinabangan sinda ni Pablo na magdusay asin magpabautismo. (Gibo 16:14, 15, 31-33; 17:3, 4; 18:8) Paagi sa pagrani sa Dios, an bagong mga disipulong idto nagin mga miembro kan espirituwal na Israel.

17. Anong pagtatak an madali nang matapos, asin ano pang gibohon an marikas na nagpapadagos?

¹⁷ Ngonyan, madali na an pangultimong pagtatak sa natatadang espirituwal na mga Israelita. Kun iyan matapos na, an “apat na anghel” na nagpopogol sa mga doros nin paglaglag sa “dakulang kahorasaan” aautorisaran na butasan iyan. Mientras tanto, marikas na nagpapadagos an pagtipon sa “dakulang kadaklan,” na may paglaom na mabuhay sagkod lamang sa daga. Gikan sa boot na pinipili kan “ibang karnero” na ini na magtubod sa “dugo kan Kordero” asin nagpapabautismo sinda bilang simbolo kan saindang pagdusay ki Jehova. (Kapahayagan 7:1-4, 9-15; 22:17; Juan 10:16; Mateo 28:19, 20) Kabilang sa sainda an dakol na hoben na pinadakula nin Kristianong mga magurang. Kun saro kamo sa mga hoben na iyan, magigin interesado kamong basahon an sunod na artikulo.

[Nota sa Ibaba]

Bilang Repaso

• Taano ta dai kinaipuhan kan mga aking Israelita na personal na magdusay ki Jehova?

• Paano ipapaheling kan mga Israelita na inotob ninda an saindang pagdusay?

• Taano ta isinikwal ni Jehova an Israel bilang saiyang nagdusay na nasyon, asin paano iyan sinalidahan?

• Poon kan Pentecostes 33 C.E., ano an kinaipuhan na gibohon kan mga Judio sagkod kan mga Hentil tanganing magin miembro kan espirituwal na Israel?

[Mga Hapot Para sa Pag-adal]

[Ritrato sa pahina 21]

An mga aking Israelita namundag bilang mga miembro kan piniling nasyon nin Dios

[Ritrato sa pahina 23]

An lambang Israelita kinaipuhan na personal na magdesisyon na paglingkodan an Dios

[Ritrato sa pahina 23]

An boluntaryong mga dolot nagtao kan oportunidad sa mga Israelita na ipaheling an saindang pagkamoot ki Jehova

[Ritrato sa pahina 25]

Pakatapos kan Pentecostes 33 C.E., kinaipuhan kan mga parasunod ni Cristo na personal na magdusay sa Dios asin simbolisaran ini paagi sa bautismo