Sinda Naoogmang Marhay na Gibohon an Kabotan nin Dios

SI Jesus nagtao nin arogan para sa gabos na Kristiano paagi sa pagpamibi sa saiyang Ama: “Mangyari logod, bakong an boot ko, kundi an boot mo.” (Lucas 22:42) An mapakumbabang kapahayagan na iyan nin pagpasakop ki Jehova nababanaag ngonyan sa minilyon na lingkod nin Dios. Kabilang sa sainda an 52 na estudyante kan ika-120 klase kan Paadalan sa Biblia kan Watchtower sa Gilead. Kan Marso 11, 2006, an naggradwar na klase naogmang marhay sa oportunidad na gibohon an kabotan nin Dios sa manlaenlaen na nasyon, dawa sa atubangan nin masakit na mga kamugtakan.

Ano an nagmomotibar sa mga naggradwar na ini na togotan an kabotan ni Jehova na iyo an gumiya sa saindang buhay? Si Chris asin Leslie, sarong mag-agom na idinestinong maglingkod bilang mga misyonero sa Bolivia, arog kaini an sabi: “Huling pinaindahan mi na an samong sadiri, andam kami na gamiton sa paggibo nin ano man na bagay na may koneksion sa organisasyon ni Jehova.” (Marcos 8:34) Idinugang ni Jason asin Chere, na idinestino sa Albania: “An lambang asignasyon na naresibi mi hale sa organisasyon ni Jehova igwa nin mga kadepisilan. Minsan siring, nanompongan mi na maninigo si Jehova sa lubos na pagtitiwala niamo.”

Pagparigon sa Boot na Magpasakop sa Kabotan ni Jehova

Si George Smith, sarong miembro kan pamilyang Bethel na naglilingkod sa Departamento sa Arte, an nagbukas kan programa sa gradwasyon paagi sa pamibi. Si Stephen Lett, na miembro kan Namamahalang Grupo kan Mga Saksi ni Jehova asin tsirman kan programa sa gradwasyon, an maogmang nag-ako sa gabos na nag-atender. An mga bisita hale sa 23 na nasyon nagbiahe pasiring sa Sentro nin Edukasyon kan Watchtower sa Patterson, Nueva York, tanganing magin presente sa magayagayang okasyon na ini. Sinabihan ni Tugang na Lett an naggradwar na klase na gigibohon ninda an “sarong bagay na makapangyarihan na marhay.” Dinara nia an atension sa “mga bagay na marigonon an pundasyon”—arog kan falsong mga doktrina—na mapapatumba kan bagong mga misyonero paagi sa kapangyarihan kan Kasuratan. (2 Corinto 10:4, 5) Sia nagkonklusyon: “Kanigoan na kagayagayahan an kakamtan nindo huli sa paggamit sa saindo ni Jehova tanganing tumbahon an mga bagay na marigonon an pundasyon sa mga tawong sadiosan an puso sa saindong mga destino!”

Si Harold Jackson, na miembro kan mga tawohan sa opisina prinsipal, nagpahayag sa temang “Nagkapirang Bagay na Dapat Girumdomon.” Nasambitan nia na dai noarin man maninigong paglingawan kan bagong mga misyonero na ‘hanapon nguna an kahadean asin an katanosan nin Dios.’ (Mateo 6:33) Maninigo nindang girumdomon na “an pagkamoot nagpaparigon” asin seguradong liabe sa kapangganahan. (1 Corinto 8:1) Sia nagsabi: “Togotan an pagkamoot na magin an naggigiyang impluwensia sa pagtratar nindo sa iba.”

Sunod, si Geoffrey Jackson, sarong miembro kan Namamahalang Grupo na naglingkod bilang misyonero poon 1979 sagkod 2003, hinapot an mga naggradwar, “Kamo daw May Paninimbagan?” Idinoon nia  an pangangaipo na magkaigwa nin balanseng pagmansay sa sadiri asin sa ministeryo. May paninimbagan an mga Kristiano na magmaigot sa pagtatanom asin pagbaribi sa mga banhi nin katotoohan. Minsan siring, si Jehova an may paninimbagan sa espirituwal na pagpatubo, huli ta “an Dios [an] nagpapatubo kaiyan.” (1 Corinto 3:6-9) Idinugang ni Tugang na Jackson: “Pinapaninimbag kamo ni Jehova na magdanay na makosog sa espirituwal. Alagad ano an pinakadakulang paninimbagan nindo? An kamotan si Jehova asin kamotan an mga tawo na paglilingkodan nindo.”

Tinokar kan instruktor sa Gilead na si Lawrence Bowen an temang “Aramon Kun Paano Kamo Maninigong Gumawe.” Ipinagirumdom nia sa mga estudyante na milagrosong giniyahan asin prinotehiran ni Jehova an mga Israelita sa kaawagan. (Exodo 13:21, 22) Ginigiyahan asin pinoprotehiran nia kita ngonyan, sa sarong kabtang paagi sa linahidan na Kristianong kongregasyon, na “sarong harigi  asin sulay kan katotoohan.” (1 Timoteo 3:14, 15) Kaipuhan na suportaran kan bagong mga misyonero an katotoohan, na iyo an nagtatao nin paggiya asin proteksion sa mga mapakumbaba.

Sinadol ni Wallace Liverance, saro pang instruktor sa Gilead, an mga naggradwar na dai paglingawan an tataramon nin Dios na nasa “likod” ninda. An tataramon nin Dios nasa likod niato sa sentido na an Biblia natapos kaidtong dakol na siglo na an nakaagi. Siring sa sarong pastor na nag-aapod sa likod kan aripompon nin mga karnero, si Jehova nasa likod kan saiyang banwaan, na nagtatao sa sainda nin instruksion paagi sa “maimbod asin mapagmansay na oripon.” (Isaias 30:21; Mateo 24:45-47) An Paadalan sa Gilead nagtabang sa mga naggradwar na tumalubo an pag-apresyar sa grupong oripon na iyan. Itinao ngani kan “oripon” an New World Translation of the Holy Scriptures. Inenkaminar kan ispiker an mga naggradwar: “Kuanon nindo an nakasaray na kayamanan na ini nin impormasyon, asin gamiton iyan sa pagtokdo sa iba.”—Mateo 13:52.

Paggibo kan Kabotan ni Jehova sa Ministeryo sa Langtad

Sa kabtang kan programa na “Galagang Magpahayag kan Maogmang Bareta,” itinampok kan instruktor sa Gilead na si Mark Noumair an nagkapira sa mga eksperyensia kan mga naggradwar sa pampublikong ministeryo mantang nag-eeskuela sa Paadalan sa Gilead. (Roma 1:15) Ihinayag kan interbio sa mga naggradwar na sinda nagpaheling nanggad nin pambihirang pagkagalaga sa paghuhulit sa gabos na okasyon.

An mga magradwar orog pang naparigon an boot kan pag-interbio ni Kenneth Flodin sa tolong nagbibiaheng paraataman na naglilingkod na ngonyan sa Estados Unidos. Si Richard Keller asin Alejandro Lacayo, na kan nakaagi naglingkod sa Amerika del Sur asin Sentral, nagpaliwanag kun paano ninda inatubang an manlaenlaen na pagbalo asin isinaysay an nagkapira sa mga bendisyon na inako ninda mantang naglilingkod bilang mga misyonero. Isinaysay ni Moacir Felisbino an pagsasanay na inako nia mantang pirmeng kaibaiba an mga misyonero sa Brazil, kun saen sia nagdakula.

Tolong eksperyensiadong misyonero, si Robert Jones, Woodworth Mills, asin Christopher Slay, an ininterbio ni David Schafer. Isinaysay kan tolong tugang kun paano sinda nakanood na humirong may kompiansa ki Jehova kun nakakaeksperyensia nin kasakitan. Inasegurar ninda an klase na an pagsasanay na inako ninda sa organisasyon ni Jehova iinandam sindang marhay para sa mga asignasyon ninda sa pagmimisyonero. Arog kaini an pagkasumaryo kaiyan ni Tugang na Mills: “Bako an intelektuwal na kabtang kan Gilead an nakatabang na marhay sa sako, kundi an itinokdo sa sako kan paadalan manongod sa kapakumbabaan asin pagkamoot.”

Itinao kan miembro kan Namamahalang Grupo na si Guy Pierce an pangenot na pahayag, na may titulong “Si Jehova Nungkang Masusudya.” Si Adan nasudya, alagad nangahulogan daw iyan nin kasudyaan sa kabtang nin Dios? Nasudya daw an Dios na lalangon si Adan sa sangkap na paagi, arog kan sinasabi kan nagkapira? Dai nanggad, huli ta “linalang na tanos kan tunay na Dios an katawohan.” (Eclesiastes 7:29) An pagpaheling ni Jesus nin integridad sa irarom kan pinakamasakit na pagbalo sa daga nagpatunay na si “Adan mayo nin sarahotan, mayo nin dahelan na masudya,” an sabi kan ispiker. An pagbalo sa pagkuyog ni Adan sa hardin nin Eden bakong gayong masakit kisa sa pagbalo na mapangganang inatubang ni Jesus. Pero, nasudya si Adan. Minsan siring, si Jehova nungkang masusudya. An saiyang katuyohan maootob. (Isaias 55:11) Sinabihan ni Tugang na Pierce an bagong mga misyonero: “Igwa kamo nin pribilehio na magtaong onra ki Jehova paagi sa saindong espiritu nin pagsasakripisyo. Logod na si Jehova masakaibanan kan lambang saro sa saindo saen man kamo maglingkod sa saiya bilang mga misyonero.”

Pagkatapos na ipaabot an mga pataratara hale sa manlaenlaen na sangang opisina kan Mga Saksi ni Jehova, iprinesentar kan tsirman, si Tugang na Lett, sa mga naggradwar an saindang mga diploma asin destino. Si Vernon Wisegarver, sarong haloy nang miembro kan pamilyang Bethel, an nagrepresentar sa mga nagdadangog sa pantapos na pamibi.

Namatean kan 6,872 na nag-atender na an programa sa gradwasyon nakapakosog giraray kan saindang kaigotan na gibohon an kabotan nin Dios. (Salmo 40:8) An naggradwar na si Andrew asin Anna nagsabi: “Idinusay mi an samong buhay ki Jehova. Nanuga kami ki Jehova na gigibohon mi an ano man na hahagadon nia sa samo. Nangyari sana na pinaduman kami ni Jehova sa Camerun, Aprika.” Sinda asin an iba pang miembro kan naggradwar na klase galagang ponan an sarong karera na matao sa sainda nin pagkakontento asin satispaksion. Iyo, sinda naoogmang marhay na gibohon an kabotan nin Dios.

[Kahon sa pahina 17]

ESTADISTIKA KAN KLASE

Bilang nin mga nasyon na irinepresentar: 6

Bilang nin mga nasyon na inasignaran: 20

Total na bilang nin mga estudyante: 52

Promedyong edad: 35.7

Promedyong taon sa katotoohan: 18.3

Promedyong taon sa bilog na panahon na ministeryo: 14.5

[Ritrato sa pahina 18]

Ika-120 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.