Iliniligtas ni Jehova an Nagsasakit nin Makuri
Iliniligtas ni Jehova an Nagsasakit nin Makuri
“Dakol an kalamidad kan matanos, alagad sa gabos na iyan iliniligtas sia ni Jehova.”—SALMO 34:19.
1, 2. Anong problema an napaatubang sa sarong maimbod na Kristiana, asin taano ta kita tibaad makamate man kaiyan?
AN SARONG hoben na babae na an ngaran Keiko * saro sa Mga Saksi ni Jehova sa laog nin labi nang 20 taon. Sa laog nin pirang panahon, sia naglingkod bilang regular payunir, o bilog na panahon na parabalangibog kan Kahadean. Minahal niang marhay an pribilehiong iyan. Minsan siring, dai pa sana nahahaloy, nangibabaw ki Keiko an mga pakamate nin kadaihan nin paglaom asin pagigin nagsosolo. “Nagpaparahibi na sana ako,” an sabi nia. Tanganing labanan an saiyang negatibong kaisipan, si Keiko nagdusay nin orog na panahon sa personal na pag-adal. “Dai ko man giraray nabago an sakong kaisipan,” an sabi nia. “Uminabot iyan sa punto na gusto ko nang magadan.”
2 Naeksperyensiahan na daw nindo an kaagid na mga pakamate nin pagkadesesperar? Bilang saro sa Mga Saksi ni Jehova, kamo may abundang dahelan na maggayagaya huli ta an diosnon na debosyon “may panuga sa buhay ngonyan asin sa madatong.” (1 Timoteo 4:8) Ngonyan mismo kamo nasa espirituwal na paraiso! Minsan siring, nangangahulogan daw iyan na protehido kamo sa gabos na makuring sakit? Dai nanggad! An Biblia nagsasabi: “Dakol an kalamidad kan matanos.” (Salmo 34:19) Dai ini nakakabigla, huli ta “an bilog na kinaban namumugtak sa kapangyarihan kan maraot,” si Satanas na Diablo. (1 Juan 5:19) Minsan paano, kita gabos nakakaeksperyensia kan mga epekto kan katunayan na iyan.—Efeso 6:12.
An mga Epekto nin Makuring Sakit
3. Magtao nin mga halimbawa sa Biblia dapit sa mga lingkod nin Dios na nakaeksperyensia nin grabeng pagkapurisaw.
3 An halawig na pagkapurisaw puedeng magpadiklom kan satong bilog na pananaw. (Talinhaga 15:15) Estudyare an tanos na tawong si Job. Sa tahaw nin grabeng sakit, si Job nagsabi: “An tawo, na namundag sa babae, halipot an buhay asin pano nin kasakitan.” (Job 14:1) Nawara an kagayagayahan ni Job. Sa halipot na panahon, inisip nia ngani na binayaan na sia ni Jehova. (Job 29:1-5) Bako sana si Job an lingkod nin Dios na nakaeksperyensia nin labi-labing kamondoan. An Biblia nagsasabi sa sato na si Ana ‘may kapaitan sa kalag’ huli ta mayo sia nin aki. (1 Samuel 1:9-11) Huling nasasakitan sa situwasyon kan saiyang pamilya, si Rebeca nagsabi: “Ikinakasurang ko na nin makuri an buhay kong ini.” (Genesis 27:46) Kan pinepensar an saiyang mga sala, si David nagsabi: “Sa bilog na aldaw naglakaw akong mamondo.” (Salmo 38:6) An pirang halimbawa na ini malinaw na nagpapaheling na an matatakton sa Dios na mga lalaki asin babae kaidtong mga panahon bago kan mga Kristiano nagtios nin mga peryodo nin grabeng pagkapurisaw.
4. Taano ta bakong makangangalas na igwa nin “mga kalag na nagmomondo nin makuri” sa tahaw kan mga Kristiano ngonyan?
4 Kumusta man an mga Kristiano? Kinaipuhan ni apostol Pablo na sabihan an mga taga Tesalonica na “magtaram na may pagranga sa mga kalag na nagmomondo nin makuri.” (1 Tesalonica 5:14) An sarong reperensia nagsasabi na an termino sa Griego na trinadusir na “mga kalag na nagmomondo nin makuri” puedeng nanonongod sa mga “temporaryong nalulunosan huli sa sakit nin buhay.” Ipinaparisa kan mga tataramon ni Pablo na pinanluluyahan nin boot an nagkapirang linahidan nin espiritu sa kongregasyon na iyan sa Tesalonica. Igwa man nin mga kalag na nagmomondo nin makuri sa tahaw kan mga Kristiano ngonyan. Alagad taano sinda ta nagmomondo nin makuri? Estudyaran niato an tolong komun na dahelan.
An Natural Nang Pagigin Makasalan Niato Puedeng Makapurisaw sa Sato
5, 6. Anong karangahan an makukua sa Roma 7:22-25?
5 Bakong arog kan maraot na mga indibiduwal na “nawaran na kan gabos na pagmate sa moral,” an tunay na mga Kristiano nakokolgan sa saindang pagigin makasalan. (Efeso 4:19) Tibaad nakakamate sinda na arog ni Pablo, na nagsurat: “Tunay na ako naoogma sa ley nin Dios segun sa sakong pagkatawo sa laog, alagad nakakaheling ako sa mga kabtang kan sakong hawak nin saro pang ley na nakikilaban sa ley kan sakong isip asin dinadara akong bihag kan ley nin kasalan na yaon sa mga kabtang kan sakong hawak.” Dangan nagkagsing si Pablo: “Herak man sa sako!”—Roma 7:22-24.
6 Namatean na daw nindo an namatean ni Pablo? Bakong sala na biyo nindong mamatean an saindong mga pagkabakong sangkap, huli ta puede kaining ikadoon sa saindo an gabat nin kasalan asin puedeng pakosogon an saindong determinasyon na rayoan an karatan. Alagad dai nindo kaipuhan na ikapurisaw pirme an saindong mga pagkukulang. Sa saiyang mga tataramon nin pagkapurisaw na kakokotar pa sana, idinagdag ni Pablo: “Salamat sa Dios paagi ki Jesu-Cristo na satong Kagurangnan!” (Roma 7:25) Iyo, si Pablo nagkaigwa nin kompiansa na kaya siang balukaton kan pinabolos na dugo ni Jesus sa minanang kasalan.—Roma 5:18.
7. Ano an makakatabang sa saro na dai mapurisaw huli sa saiyang makasalan na mga tendensia?
7 Kun an pagmate nindo nagagabatan kamo sa saindong natural nang pagigin makasalan, mararanga kamo sa mga tataramon ni apostol Juan, na nagsurat: “Kun an siisay man makaginibo nin kasalan, igwa kita nin paratabang sa Ama, si Jesu-Cristo, sarong matanos. Asin sia sarong pampagian nin boot na atang para sa satong mga kasalan, pero bako sanang kan sa sato kundi siring man kan sa bilog na kinaban.” (1 Juan 2:1, 2) Kun kamo napupurisaw sa saindong makasalan na mga tendensia, pirme nindong girumdomon na si Jesus nagadan para sa mga makasalan, bakong para sa mga sangkap na tawo. An totoo, “an gabos nagkasala asin nagkulang sa kamurawayan nin Dios.”—Roma 3:23.
8, 9. Taano ta maninigo niatong isikwal an mga kaisipan na nagkokondenar sa sadiri?
8 Minsan siring, ipamugtak ta baga na kamo nakagibo nin magabat na kasalan kaidto. Daing duwa-duwa, ipinakipag-olay na nindo iyan ki Jehova paagi sa pamibi, tibaad nin parateng marhay. Nag-ako na kamo nin espirituwal na tabang hale sa Kristianong kamagurangan. (Santiago 5:14, 15) Talagang nagsolsol kamo asin kun siring nagdanay na kabtang kan kongregasyon. O tibaad naghale kamo sa organisasyon nin Dios sa halipot na panahon, alagad kan huri kamo nagsolsol asin nakabalik sa malinig na kamugtakan. Arin man sa duwang situwasyon, an saindong nakaaging kasalan tibaad magirumdoman nindo asin makapurisaw sa saindo. Kun iyan mangyari, girumdomon na si Jehova nagpapatawad nin “bulaos” sa mga totoong nagsosolsol. (Isaias 55:7) Dugang pa, habo nia na kamo magsaboot na kamo dai nang paglaom na kondenado. Iyan an gusto ni Satanas na magin saboot nindo. (2 Corinto 2:7, 10, 11) An Diablo lalaglagon huli ta iyan maninigo sa saiya, alagad gusto nia na kamo magsaboot na maninigo man kamo sa siring na paghokom. (Kapahayagan 20:10) Dai nindo togotan na magin mapanggana si Satanas sa pakanang ini na raoton an saindong pagtubod. (Efeso 6:11) Imbes, “tumangon sia nindo” sa bagay na ini, kun paanong ginigibo nindo iyan sa ibang paagi.—1 Pedro 5:9.
9 Sa Kapahayagan 12:10, si Satanas inapod na “an paraakusar sa satong mga tugang”—sa mga linahidan na Kristiano. Sia “nag-aakusar sa sainda aldaw asin banggi” sa atubangan nin Dios. An paghorophorop sa bersikulong iyan puedeng makatabang sa saindo na masabotan na si Satanas, an falsong paraakusar, maoogma kun aakusaron asin kokondenaron nindo an saindong sadiri, minsan ngani dai man iyan ginigibo sa saindo ni Jehova. (1 Juan 3:19-22) Taano ta padagos nindong papasakitan an saindong sadiri huli sa mga sala nindo sagkod na gusto na logod nindong sumuko? Dai nindo togotan si Satanas na raoton an saindong relasyon sa Dios. Dai nindo noarin man togotan an Diablo na butahon kamo sa katunayan na si Jehova “maheherakon asin maugayon, maluway sa pagkaanggot asin abunda sa mamomoton na kabootan.”—Exodo 34:6.
An Satong mga Limitasyon Puedeng Makapadesganar sa Sato
10. Sa anong mga paagi tibaad makadesganar sa sato an satong mga limitasyon?
10 An nagkapirang Kristiano nadedesganar huli ta naaapektaran kan saindang mga limitasyon an saindang paglilingkod sa Dios. Totoo daw iyan sa saindo? Tibaad an grabeng helang, halangkaw na edad, o iba pang mga kamugtakan nakakaolang sa saindo sa pagdusay nin dakol na panahon sa ministeryo na kapareho kan ikinakadusay nindo kaidto. Totoo, an mga Kristiano ineenkaminar na tuboson an panahon para sa paglilingkod sa Dios. (Efeso 5:15, 16) Alagad kumusta kun an totoong mga limitasyon nakakaolang sa saindo na makagibo nin mas dakol sa ministeryo asin ini ikinakadesganar nindo?
11. Paano kita makikinabang sa konseho ni Pablo na nakasurat sa Galacia 6:4?
11 Sinasadol kita kan Biblia na dai maghinugak kundi magin “mga paraarog kan mga nagmamana sa mga panuga paagi sa pagtubod asin pasensia.” (Hebreo 6:12) Magigibo niato ini solamente kun sisiyasaton niato an saindang marahayon na mga halimbawa asin maghingoang arogon an saindang pagtubod. Minsan siring, dai kita makikinabang kun ikokomparar niato an satong sadiri sa iba sa bakong paborableng paagi asin magkonklusyon na dai igo an ginigibo niato. Kun siring, maninigo niatong iaplikar an konseho ni Pablo: “Patunayan nin lambang saro an saiyang gibo, dangan may dahelan na siang mag-ogma dapit sa saiya sana, asin bakong sa pagkomparar sa ibang tawo.”—Galacia 6:4.
12. Taano ta makakapaggayagaya kita nin labi-labi sa paglilingkod niato ki Jehova?
12 An mga Kristiano may marahay na dahelan na maggayagaya nin labi-labi, dawa pa sinda nalilimitaran huli sa grabeng mga problema sa salud. Inaasegurar kita kan Biblia: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Tibaad dahel sa mga kamugtakan na bako nindong kontrolado nagin masakit na para sa saindo na magibo an mga aktibidad na dati nagigibo nindo. Minsan siring, sa tabang ni Jehova, tibaad makapakikabtang kamo nin mas lubos sa nagkapirang aspekto kan Kristianong ministeryo, arog baga kan pagpapatotoo paagi sa telepono asin pagsurat. Makakasierto kamo na bebendisyonan kamo ni Jehova Dios sa saindong bilog na kalag na paglilingkod asin sa pagkamoot na ipinapaheling nindo para sa saiya asin para sa mga kapwa tawo.—Mateo 22:36-40.
Puede Kitang Panluyahan nin Boot Huli sa “Delikadong mga Panahon”
13, 14. (a) Sa anong mga paagi puedeng magtao sa sato nin makuring sakit an “delikadong mga panahon” na ini? (b) Paano risang-risa ngonyan an kawaran nin natural na kapadangatan?
13 Minsan ngani linalaoman niato an buhay sa matanos na bagong kinaban nin Dios, kita nabubuhay mismo ngonyan sa “delikadong mga panahon na masakit pakibagayan.” (2 Timoteo 3:1) Nararanga kita sa pakaaram na an makamomondong mga pangyayari nagpapaheling kan kaharanihan kan satong kaligtasan. Pero, kita naaapektaran kan mga kamugtakan sa palibot niato. Halimbawa, kumusta kun kamo mayong trabaho? Tibaad kadikit an makukuang trabaho, asin mientras na minalihis an mga bulan, puedeng iniisip-isip nindo kun baga naheheling ni Jehova an saindong masakit na kamugtakan o nadadangog nia an saindong mga pamibi. O tibaad kamo nagin biktima nin diskriminasyon o iba pang klase nin inhustisya. Maski an pagbasa kan pangenot na mga bareta sa peryodiko puedeng magin dahelan na kamo makamate na arog kan matanos na tawong si Lot, na ‘napurisaw na gayo’ (“pinanluyahan nin boot,” Young’s Literal Translation of the Holy Bible) sa malaswang gawe-gawe kan mga nakapalibot sa saiya.—2 Pedro 2:7.
14 May sarong partikular na aspekto kan huring mga aldaw na dai niato puedeng lipasan. Ihinula kan Biblia na dakol an magigin “dai nin natural na kapadangatan.” (2 Timoteo 3:3) Mayo talaga nin kapadangatan sa dakol na pamilya. Tunay nanggad, “ipinapaheling kan mga ebidensia na an mga tawo mas posibleng gadanon, kolgan sa pisikal, o abusohon sa emosyon o sa seksuwal na paagi kan ibang mga miembro kan pamilya kisa kan ibang tawo,” an sabi kan librong Family Violence. “An lugar na dian an mga tawo maninigong kamotan asin makamateng ligtas, para sa nagkapirang adulto asin mga aki, iyo an pinakapeligrosong lugar.” An mga nakaeksperyensia nin nakakaraot na mga kamugtakan sa pamilya tibaad pag-abot nin panahon atakehon nin mga paghadit asin pagkadesesperar. Kumusta kun ini totoo sa saindo?
15. Paano nakakalabi an pagkamoot ni Jehova kisa sa pagkamoot kan siisay man na tawo?
15 An salmistang si David nag-awit: “Enkaso bayaan ako kan sakong sadiring ama asin kan sakong sadiring ina, si Jehova mismo an maampon sa sako.” (Salmo 27:10) Kanigoan kanakakarangang maaraman na an pagkamoot ni Jehova nakakalabi kisa pagkamoot kan siisay man na magurang na tawo! Gurano man kakolog sa boot an pagsikwal, pagmaltrato, o pag-abandonar nin magurang, iyan mayo nin epekto sa kun gurano kadakula kan pagmakolog ni Jehova sa saindo. (Roma 8:38, 39) Girumdomon na dinadagka nin Dios an mga namomotan nia. (Juan 3:16; 6:44) Ano man an nagin pagtratar sa saindo kan mga tawo, namomotan kamo kan saindong langitnon na Ama!
Praktikal na mga Paagi Tanganing Mahale an Kadaihan nin Paglaom
16, 17. Kun nakakamate nin kadaihan nin paglaom, ano an magigibo nin saro tanganing mapagdanay an saiyang espirituwal na kosog?
16 Puede kamong gumibo nin praktikal na mga paagi tanganing mapangganahan an kadaihan nin paglaom. Halimbawa, sunodon nindo an sarong nakakarahay na programa nin Kristianong aktibidad. Maghorophorop sa Tataramon nin Dios, nangorogna kun an pagkadesganar garo baga nakakalunos. An salmista nag-awit: “Kan ako magsabi: ‘An sakong bitis mapapadalinas nanggad,’ an saimong mamomoton na kabootan, O Jehova, padagos na nangataman sa sako. Kan an sakuyang nakakaribok na mga kaisipan duminakol sa sakong boot, an saimong mga panranga naghapiyap sa sakong kalag.” (Salmo 94:18, 19) An regular na pagbasa kan Biblia matabang tanganing panoon an saindong isip nin nakakarangang mga tataramon asin nakakaparigon sa boot na mga kaisipan.
17 Mahalaga man na marhay an pamibi. Dawa kun dai nindo lubos na ikinakasabi an saindong kairairaroming mga saboot, aram ni Jehova an gusto nindong sabihon. (Roma 8:26, 27) An salmista nagtao kan pag-asegurar na ini: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.”—Salmo 55:22.
18. Anong praktikal na mga paagi an puedeng gibohon nin sarong may depresyon?
18 An iba nakakaeksperyensia nin pagkadesesperar huli sa klinikal na depresyon. * Kun ini totoo sa saindo, maghingoang ipokus an saindong atension sa bagong kinaban nin Dios asin sa panahon na “mayo nin nag-eerok na masabi: ‘Naghehelang ako.’” (Isaias 33:24) Kun an saindong negatibong mga pagmate garo baga bako sanang temporaryong depresyon, tibaad madonong na magpaheling sa doktor. (Mateo 9:12) Mahalaga man na atamanon nindo an saindong hawak. Tibaad makatabang an mga kakanon na marahay sa salud asin ehersisyo. Siertohon na nakakapahingalo kamo nin igo. Dai magpamatanga sa pagdalan nin telebisyon, asin likayan an mga klase nin pag-aling-aling na biyong nakakapagal sa hawak asin emosyon. Orog sa gabos, padagos na makikabtang sa diosnon na mga gibo! Minsan ngani dai pa panahon tanganing ‘pahidon ni Jehova an gabos na luha,’ tatabangan nia kamo na makatagal.—Kapahayagan 21:4; 1 Corinto 10:13.
Nabubuhay sa “Irarom kan Poderosong Kamot nin Dios”
19. Ano an ipinapanuga ni Jehova sa mga nagsasakit nin makuri?
19 Inaasegurar kita kan Biblia na minsan ngani dakol an kalamidad kan matanos, “sa gabos na iyan iliniligtas sia ni Jehova.” (Salmo 34:19) Paano daw ini ginigibo nin Dios? Kan si apostol Pablo paorootrong namibi na makalda sa saiyang “tunok sa laman,” sinabihan sia ni Jehova: “An sakuyang puersa sinasangkap sa kaluyahan.” (2 Corinto 12:7-9) Ano an ipinanuga ni Jehova ki Pablo, asin ano an ipinapanuga nia sa saindo? Bakong pagpaomay sa presenteng panahon, kundi an puersa na makatagal.
20. Sa ibong nin mga pagbalo sa sato, ano an inaasegurar sa sato sa 1 Pedro 5:6, 7?
20 Si apostol Pedro nagsurat: “Magpakumbaba kamo sa irarom kan poderosong kamot nin Dios, tanganing ilangkaw nia kamo sa itinalaan na panahon; mantang ibinubugtak nindo an gabos nindong kahaditan sa saiya, huli ta sia may pagmakolog sa saindo.” (1 Pedro 5:6, 7) Huling si Jehova may pagmakolog sa saindo, dai nia kamo babayaan. Susuportaran nia kamo sa ibong nin mga pagbalo na inaagihan nindo. Girumdomon na an maimbod na mga Kristiano nasa “irarom kan poderosong kamot nin Dios.” Mantang pinaglilingkodan niato si Jehova, tinatawan nia kita nin kosog na makatagal. Kun kita maimbod sa saiya, mayo nin ano man an makakatao sa sato nin permanenteng danyos sa espirituwal. Kun siring, papagdanayon logod niato an integridad ki Jehova tanganing makamtan niato an buhay na daing katapusan sa saiyang ipinanugang bagong kinaban asin maheling an aldaw na talagang permanente na niang kakaldahon an nagsasakit nin makuri!
[Mga Nota sa Ibaba]
^ par. 1 Sinalidahan an ngaran.
^ par. 18 An klinikal na depresyon bako sanang pagkadesganar kundi sarong kamugtakan na naaaraman paagi sa diagnosis, kun saen an kamondoan grabe asin nagpapadagos. Para sa dugang pang impormasyon, helingon The Watchtower na Oktubre 15, 1988, pahina 25-9; Nobyembre 15, 1988, pahina 21-4; asin An Torrengbantayan na Setyembre 1, 1996, pahina 30-1.
Nagigirumdoman daw Nindo?
• Taano an makuring sakit ta nakakaapektar dawa sa mga lingkod ni Jehova?
• Ano an nagkapirang dahelan na puedeng magpangyari na mawaran nin paglaom an nagkapira na kabilang sa banwaan nin Dios?
• Paano kita tinatabangan ni Jehova na makayang atubangon an satong mga kahaditan?
• Sa anong paagi na kita nasa “irarom kan poderosong kamot nin Dios”?
[Mga Hapot Para sa Pag-adal]
[Mga Ritrato sa pahina 25]
Sa ibong nin mga pagbalo, an banwaan ni Jehova may dahelan na maggayagaya
[Ritrato sa pahina 28]
An pagpapatotoo paagi sa telepono sarong paagi tanganing itao nindo ki Jehova an pinakamakakaya nindo