“Dapat na Kuyogon Niamo an Dios Bilang Namamahala Imbes na mga Tawo”

“Kaya Kaming Iligtas kan Samong Dios”

AN OKASYON na idto plinano na magin nakakagulat. An sarong grabe kadakulang imahen na bulawan ipinatindog sa kaplanodohan nin Dura, na minalataw na harani sa siudad nin Babilonya. An imahen magkakaigwa nin inagurasyon durante nin sarong espesyal na seremonya na aatenderan nin haralangkaw na opisyal na linalaoman na mahuruhod sa atubangan kan imahen pagtugtog kan kadakol na manlaenlaen na instrumento sa musika. Si Hadeng Nabucodonosor kan Babilonya may dekreto na an siisay man na dai magsamba sa imahen magagadan sa sarong horno na pinainit na marhay. Siisay daw an mangangahas na maglapas sa pagboot na ini?

Sa pagngalas kan mga nagmamasid, tolong matatakton sa Dios na parasamba ni Jehova—si Sadrac, Mesac, asin Abednego—an dai naghuruhod. Aram ninda na an paggibo kaiyan sarong pagbalga sa saindang dai nababangang debosyon ki Jehova Dios. (Deuteronomio 5:8-10) Kan hagadon na ipaliwanag an saindang marigon na paninindogan, daing takot na sinabi ninda ki Nabucodonosor: “Kun mangyari man, kaya kaming iligtas kan samong Dios na pinaglilingkodan niamo. Hale sa nagkakalayong horno asin hale sa saimong kamot, O hade, ililigtas nia kami. Alagad kun dai, maisihan mo logod, O hade, na an saimong mga dios bakong iyo an samong pinaglilingkodan, asin an imahen na bulawan na saimong ipinatindog dai mi sasambahon.”—Daniel 3:17, 18.

Kan an tolong Hebreo iapon sa nagkakalayong horno, an saindang buhay naligtas sana paagi sa sarong milagro. Isinugo nin Dios an sarong anghel tanganing protehiran an Saiyang maimbod na mga lingkod. Alagad pinili na nindang atubangon an peligrong magadan imbes na makisuway ki Jehova. * An saindang paninindogan kaagid kan sa mga apostol ni Jesu-Cristo, na pakalihis nin labing anom na siglo nagpahayag sa atubangan kan korte suprema kan mga Judio: “Dapat na kuyogon niamo an Dios bilang namamahala imbes na mga tawo.”—Gibo 5:29.

Mahalagang Marhay na mga Leksion Para sa Sato

Si Sadrac, Mesac, asin Abednego marahay na mga halimbawa nin pagtubod, pagkuyog, asin kaimbodan. An tolong Hebreo igwa nin pagtubod ki Jehova. An saindang konsensia na sinanay sa Kasuratan dai nagtogot sa sainda na magpartisipar sa ano man na akto nin falsong pagsamba o nasyonalistikong debosyon. An mga Kristiano sa presenteng aldaw may kaagid man na lubos na pagtitiwala sa tunay na Dios. Sinda ginigiyahan kan saindang konsensia na sinanay sa Biblia asin nagsasayuma na magpartisipar sa mga akto nin falsong pagsamba o mga seremonya na naglalapas sa mga ley asin prinsipyo nin Dios.

An tolong maimbod na Hebreo nagtiwala ki Jehova asin nagsayumang iribay an saindang pagkuyog sa saiya sa ano man na pagrekonoser, posisyon, o kamurawayan na alok kan Imperyo nin Babilonya. An hoben na mga lalaking idto andam na magsakit asin magadan imbes na raoton an saindang relasyon sa Dios. Arog ni Moises kaidto, sinda “nagpadagos na marigon na garo baga nakakaheling kan Saro na dai naheheling.” (Hebreo 11:27) Baga man pinili ni Jehova na iligtas sinda sa kagadanan o dai, an tolo determinado na magdanay  na may integridad sa saiya imbes na makikompromiso tanganing iligtas an saindang buhay. Minalataw na halimbawa ninda an boot sabihon ni apostol Pablo kan masambitan nia an mga maimbod na “nakasigbo kan puersa nin kalayo.” (Hebreo 11:34) An siring na pagtubod asin pagkuyog ipinapaheling kan mga lingkod ni Jehova mantang sinda napapaatubang sa mga pagbalo sa integridad sa satong kaaldawan.

Gikan sa eksperyensia ni Sadrac, Mesac, asin Abednego, nanodan man niato na binabalosan nin Dios an kaimbodan sa saiya. An salmista nag-awit: ‘Dai papabayaan ni Jehova an saiyang mga maimbod.’ (Awit 37:28) Ngonyan, dai niato malalaoman an Dios na kita milagrosong iligtas, siring kan ginibo nia sa tolong Hebreo. Pero, makakapagkompiar kita na ano man na problema an inaatubang niato, an satong langitnon na Ama magtatao nin tabang. Puedeng haleon nin Dios an problema, tawan kita nin kosog na makatagal, o buhayon kita liwat kun papagdanayon niato an integridad sagkod sa kagadanan. (Awit 37:10, 11, 29; Juan 5:28, 29) An pagtubod, pagkuyog, asin kaimbodan nanggagana sa kada panahon na an satong integridad binabalo asin pinipili niatong magkuyog sa Dios imbes na sa mga tawo.

[Nota sa Ibaba]

[Kahon/Ritrato sa pahina 9]

ARAM DAW NINDO?

• An tolong Hebreo madali nang magtreinta anyos kan atubangon ninda an pagbalong ini sa integridad.

• An horno malinaw na pinainit nin todo.—Daniel 3:19.