Magkonsentrar sa Karahayan kan Organisasyon ni Jehova

“Kami maninigoan nanggad sa karahayan kan saimong harong.”—SALMO 65:4.

1, 2. (a) May anong epekto sa banwaan nin Dios an mga areglo may koneksion sa templo? (b) Anong tabang an itinao ni David para sa pagtogdok kan templo?

SI David kan suanoy na Israel saro sa pinakalataw na mga tawo na isinaysay sa Hebreong Kasuratan. An pastor, musikero, propeta, asin hade na ini lubos na nagtiwala ki Jehova Dios. An hararom na personal na relasyon ni David ki Jehova nakapukaw sa saiya nin pagmawot na magtogdok nin harong para sa Dios. An siring na harong, o templo, magigin sentro kan tunay na pagsamba sa Israel. Aram ni David na an mga areglo may koneksion sa templo matao nin kagayagayahan asin mga bendisyon sa banwaan nin Dios. Kun siring, si David nag-awit: “Maogma an saro na . . . pinili asin pinadolok mo [ni Jehova], tanganing sia mag-erok sa saimong mga patyo. Kami maninigoan nanggad sa karahayan kan saimong harong, an banal na lugar kan saimong templo.”—Salmo 65:4.

² Si David dai tinogotan na mamahala sa pagtogdok kan harong ni Jehova. Imbes, an pribilehiong iyan irineserba para sa saiyang aking si Salomon. Si David dai naggumodgumod huli ta sa iba itinao an pribilehio na gustong-gusto nia mismo. An pinakaimportante sa saiya iyo na ikatogdok an templo. Bilog na puso niang sinuportaran an proyekto paagi sa pagtao ki Salomon kan arkitektural na mga plano na inako nia hale ki Jehova. Dugang pa, inorganisar ni David an rinibong Levita sa mga grupo nin paglilingkod asin nagdonar nin dakulang kantidad nin bulawan asin pirak para sa pagtogdok kan templo.—1 Cronica 17:1, 4, 11, 12; 23:3-6; 28:11, 12; 29:1-5.

3. Ano an aktitud kan mga lingkod nin Dios mapadapit sa mga areglo para sa tunay na pagsamba?

³ Sinuportaran kan maimbod na mga Israelita an mga areglo na ginibo para sa tunay na pagsamba sa harong nin Dios. Bilang mga lingkod ni Jehova sa presenteng panahon, sinusuportaran ta man an mga areglo para sa pagsamba sa laog kan daganon na kabtang kan organisasyon ni Jehova. Paagi kaiyan, ipinapaheling niato na igwa kita nin kaisipan na kapareho kan ki David. Mayo kita nin espiritu nin pagrereklamo. Imbes, nagkokonsentrar kita sa karahayan kan organisasyon nin Dios. Napag-isip-isip na daw nindo an manongod sa dakol na marahay na bagay na talagang puede niatong  ipagpasalamat? Estudyaran niato an nagkapira sa mga iyan.

Nagpapasalamat Para sa mga Nangengenot

4, 5. (a) Paano inootob kan “maimbod asin mapagmansay na oripon” an isinugo sa saiya? (b) Ano an saboot kan nagkapirang Saksi manongod sa espirituwal na kakanon na inaako ninda?

⁴ Kita may marahay na mga dahelan na magpasalamat para sa “maimbod asin mapagmansay na oripon” na ninombrahan ni Jesu-Cristo na mamahala sa saiyang mga rogaring sa daga. An grupong oripon nin linahidan na mga Kristiano an nangengenot sa paghuhulit kan maogmang bareta, nag-aareglo nin mga pagtiripon para sa pagsamba, asin nagpupublikar nin mga babasahon na basado sa Biblia sa labing 400 na lenguahe. Minilyon na tawo sa bilog na daga an mapagpasalamat na nagkakakan kan espirituwal na “kakanon [na ini] sa tamang panahon.” (Mateo 24:45-47) Mayo nanggad nin dahelan na maggumodgumod manongod dian.

⁵ Sa laog nin dakol na taon, an sarong may edad nang Saksi ni Jehova na an ngaran Elfi nakaeksperyensia nin karangahan asin suporta paagi sa pagsapuso kan sono sa Kasuratan na konseho na yaon sa mga publikasyon kan grupong oripon. An hararom na pag-apresyar an nakapahiro ki Elfi na magsurat: “Ano an mangyayari sa sako kun mayo an organisasyon ni Jehova?” Si Peter asin Irmgard mga lingkod nin Dios sa laog na man nin dakol na taon. Si Irmgard nagpapahayag nin pagpasalamat para sa gabos na probisyon na itinatao kan “mamomoton asin may pagmakolog na organisasyon ni Jehova.” Kaiba sa mga publikasyon na ini an mga dinisenyo para sa mga tawo na may espesyal na mga pangangaipo, siring kan mga indibiduwal na may diperensia sa pagheling o pagdangog.

6, 7. (a) Paano pinapadalagan an mga aktibidad kan mga kongregasyon sa bilog na daga? (b) Ano an mga ipinahayag manongod sa daganon na kabtang kan organisasyon ni Jehova?

⁶ An ‘maimbod na oripon’ irinerepresentar kan Namamahalang Grupo kan Mga Saksi ni Jehova, sarong sadit na grupo nin mga lalaking linahidan nin espiritu na naglilingkod sa opisina prinsipal kan Mga Saksi ni Jehova sa Brooklyn, Nueva York. An Namamahalang Grupo nagnonombra nin may kabatidan na mga lingkod ni Jehova tangani na maglingkod sa mga sangang opisina na nagpapadalagan sa mga aktibidad kan labing 98,000 na kongregasyon sa bilog na daga. An mga lalaking nakakaabot sa mga kahagadan kan Biblia ninonombrahan bilang kamagurangan asin ministeryal na mga lingkod sa mga kongregasyon na ini. (1 Timoteo 3:1-9, 12, 13) An kamagurangan an nangengenot asin mamomoton na nagpapastor sa aripompon nin Dios na nasa pangangataman ninda. Kanigoan na bendisyon na magin kabtang kan aripompon na iyan asin maeksperyensiahan an pagkamoot asin pagkasararo na yaon sa “bilog na kasararoan nin mga tugang”!—1 Pedro 2:17; 5:2, 3.

⁷ Imbes na magreklamo, an mga indibiduwal sa parate nagpapahayag nin pag-apresyar sa mamomoton  na espirituwal na paggiya na inaako ninda hale sa kamagurangan. Halimbawa, estudyare si Birgit, sarong Kristianang agom na labi nang 30 anyos. Kan tinedyer pa, nagkaigwa sia nin maraot na pag-iriba asin dikit pang makagibo nin sala. Alagad an malinaw asin basado sa Biblia na konseho kan kamagurangan asin an suporta kan mga kapagtubod nakatabang sa saiya na makahale sa sarong peligrosong situwasyon. Ano an saboot ni Birgit ngonyan? Sia nagsasabi: “Ako lubos na nagpapasalamat na kabilang pa ako sa marahayon na organisasyon ni Jehova.” An sarong 17 anyos na an ngaran Andreas nagsasabi: “Organisasyon talaga ini ni Jehova, an pinakamarahay na organisasyon sa kinaban.” Bako daw na maninigo kitang magpasalamat sa karahayan kan daganon na kabtang kan organisasyon ni Jehova?

An mga Nangengenot Bakong Sangkap

8, 9. Paano guminawe an nagkapirang katemporanyo ni David, asin ano an nagin reaksion ni David sa siring na gawe-gawe?

⁸ Siempre, an mga ninombrahan na mangenot sa tunay na pagsamba bakong sangkap. Gabos sinda nasasala, asin an nagkapira may dai nawawarang mga kaluyahan na pinagmamaigotan nindang marhay na makontrol. Dapat daw niatong ikaaburido ini? Dai. Dawa an mga indibiduwal na pinaniwalaan nin dakulang paninimbagan sa suanoy na Israel nakagibo nin grabeng mga sala. Halimbawa, kan hoben pa si David, inapod sia na maglingkod bilang musikero tanganing pakalmahon an napupurisaw na si Hadeng Saul. Kan huri, prinobaran ni Saul na gadanon si David, na sa katapustapusi kinaipuhan na dumulag tanganing iligtas an saiyang buhay.—1 Samuel 16:14-23; 18:10-12; 19:18; 20:32, 33; 22:1-5.

⁹ An ibang mga Israelita guminawe sa traydor na paagi. Halimbawa, ginadan kan komandante militar ni David na si Joab an paryente ni Saul na si Abner. Si Absalon nakipagkasapakat tumang sa saiyang ama, si David, tanganing makua an pagkahade. Asin an pinagtitiwalaan na konsehero ni David na si Ahitofel nagpasaloib sa saiya. (2 Samuel 3:22-30; 15:1-17, 31; 16:15, 21) Pero, si David dai nagin parareklamo na naghihinanakit; ni tinalikdan nia an tunay na pagsamba. An totoo, kabaliktaran an nangyari. An kasakitan nagpahiro ki David na mangapot ki Jehova asin papagdanayon an marahayon na aktitud nia kan sia duminulag huli ki Saul. Kan panahon na idto, si David nag-awit: “Kaherakan mo ako, O Dios, kaherakan mo ako, huli ta sa saimo nagpaili an sakuyang kalag; asin dian sa limpoy nin saimong mga pakpak ako magpapaili sagkod na makaagi an mga kasakitan.”—Salmo 57:1.

10, 11. Ano an naeksperyensiahan nin sarong Kristiana na an ngaran Gertrud kan sia hoben pa, asin ano an sinabi nia manongod sa mga pagkukulang kan mga kapagtubod?

¹⁰ Mayo kita nin dahelan na magreklamo dapit sa pagtraydor sa laog kan organisasyon nin Dios ngonyan. Dai tinotogotan ni Jehova ni kan saiyang mga anghel ni kan espirituwal na mga pastor an presensia nin traydor, maraot na mga tawo sa Kristianong kongregasyon. Minsan siring, kita gabos napapaatubang sa pagkabakong sangkap nin tawo—niato mismo asin kan ibang mga lingkod nin Dios.

¹¹ Kaidtong hoben pa si Gertrud, sarong haloyan nang parasamba ki Jehova, sia may kaputikan na sinahotan na sarong impostor asin bakong bilog na panahon na parabalangibog kan Kahadean. Ano an nagin reaksion nia? Naggumodgumod daw si Gertrud manongod sa siring na tratamiento? Dai. Dai nahaloy bago sia magadan kan 2003 sa edad na 91, sinalingoy nia an saiyang nagin buhay asin nagpaliwanag: “An mga eksperyensiang ini asin an iba pa kan huri nagtokdo sa sako na sa ibong kan mga sala na nagigibo kan mga indibiduwal, ginigiyahan ni Jehova an saiyang dakulang gibohon, kun saen ginagamit nia kita na bakong sangkap na mga tawo.” Kan napaatubang kaidto sa mga pagkabakong sangkap kan ibang mga lingkod nin Dios, si Gertrud nagdolok ki Jehova paagi sa odok sa pusong pamibi.

12. (a) Anong mandatang halimbawa an itinao kan nagkapirang Kristiano kan enot na siglo? (b) Sa ano niato maninigong ipokus an satong isip?

¹² Huling bakong sangkap dawa an pinakamaimbod asin pinakadedikadong mga Kristiano, kun masala an sarong nombradong lingkod, padagos niatong gibohon “an gabos na bagay na mayo nin mga paggumodgumod.” (Filipos 2:14) Makamomondo nanggad kun susunodon niato an mandatang halimbawa nin nagkapira sa Kristianong kongregasyon kan enot na siglo! Segun sa disipulong si Judas, an falsong mga paratokdo kan aldaw  na idto “nagbabasangbasang sa pagkakagurangnan patin nagtataram na may panlilibak sa mga mamuraway.” Dugang pa, an mga paragibo nin maraot na idto “mga paragumodgumod, mga parareklamo manongod sa saindang kamugtakan sa buhay.” (Judas 8, 16) Logod na isikwal niato an iginagawe kan naggugumodgumod na mga parareklamo asin ipokus niato an satong isip sa marahayon na mga bagay na inaako niato paagi sa ‘maimbod na oripon.’ Pahalagahan niato an karahayan kan organisasyon ni Jehova asin ‘padagos na gibohon an gabos na bagay na mayo nin mga paggumodgumod.’

“Labi-Labi Kanakakakubhan an mga Tataramon na Ini”

13. Ano an nagin reaksion nin nagkapira mapadapit sa nagkapirang katokdoan ni Jesu-Cristo?

¹³ Mantang an nagkapira kan enot na siglo naggumodgumod tumang sa nombradong mga lingkod, an iba mga paragumodgumod tumang sa mga katokdoan ni Jesus. Siring kan nakasurat sa Juan 6:48-69, si Jesus nagsabi: “An minakakan kan sakong laman asin minainom kan sakong dugo igwa nin buhay na daing katapusan.” Kan madangog an mga tataramon na ini, “an kadaklan sa saiyang mga disipulo . . . nagsabi: ‘Labi-labi kanakakakubhan an mga tataramon na ini; siisay an maghihinanyog kaiyan?’” Aram ni Jesus na “an saiyang mga disipulo naggugurumodgumod dapit kaini.” Dugang pa, “huli kaini an dakol sa [sainda] nagduman sa mga bagay na tinalikdan asin habo nang maglakaw kaiba nia.” Alagad bakong gabos na disipulo naggumodgumod. Mangnohon kun ano an nangyari kan hapoton ni Jesus an 12 apostol: “Ano maharale man kamo?” Si apostol Pedro nagsimbag: “Kagurangnan, siisay pa an samong dudumanan? Yaon sa saimo an mga tataramon nin buhay na daing katapusan; asin kami nagtubod asin nakaaram na ika iyo an Banal nin Dios.”

14, 15. (a) Taano ta may nagkapirang nagigin diskontento sa nagkapirang aspekto kan Kristianong mga katokdoan? (b) Ano an manonodan niato sa nangyari sa sarong lalaki na an ngaran Emanuel?

¹⁴ Sa presenteng mga panahon, pipira sana sa tahaw kan banwaan nin Dios an nagin diskontento sa nagkapirang aspekto kan Kristianong katokdoan asin naggumodgumod tumang sa daganon na kabtang kan organisasyon ni Jehova. Taano ta nangyayari ini? Sa parate an dahelan kan paggumodgumod na iyan iyo an kakulangan nin pakasabot sa paagi nin paghiro nin Dios. Gradwal na ihinahayag kan Kaglalang an katotoohan sa saiyang banwaan. Huli kaini, an satong pakasabot sa Kasuratan dadalisayon sa panapanahon. An dakulang mayoriya kan banwaan ni Jehova naggagayagaya sa siring na mga pagdalisay. May pira sana na nagigin “labi-labi kamatanos” asin ikinakaanggot an mga pagbabago. (Eclesiastes 7:16) Tibaad amor propio an sarong dahelan, asin an nagkapira nasisilo nin independienteng kaisipan. Ano man an dahelan, an siring na paggumodgumod peligroso, huli ta puede kita kaiyan na pabalikon sa kinaban asin sa mga dalan kaiyan.

¹⁵ Halimbawa, si Emanuel sarong Saksi na nagin kritiko sa nagkapirang bagay na nabasa nia sa mga publikasyon kan “maimbod asin mapagmansay na oripon.” (Mateo 24:45) Puminondo sia sa pagbasa kan satong Kristianong literatura asin sa kahurihurihi sinabihan an kamagurangan kan lokal na kongregasyon na habo na niang magin saro sa Mga Saksi ni Jehova. Minsan siring, sa laog nin halipot na panahon, narealisar ni Emanuel na tama talaga an mga katokdoan kan organisasyon ni Jehova. Kinontak nia an mga Saksi, inadmitir an saiyang sala, asin sia ibinalik bilang saro sa Mga Saksi ni Jehova. Bilang resulta, sia nagin maogma giraray na tawo.

16. Ano an makakatabang sa sato na mahale an mga pagduda manongod sa nagkapirang Kristianong katokdoan?

¹⁶ Paano kun kita masugotan na maggumodgumod huli sa pagduda sa nagkapirang katokdoan kan banwaan ni Jehova? Kun siring, dai kita malangkag. Pag-abot nin panahon an ‘maimbod na oripon’ tibaad magpublikar nin sarong bagay na masimbag sa satong mga hapot asin mahale sa satong mga pagduda. Madonong na maghagad nin tabang sa Kristianong kamagurangan. (Judas 22, 23) An pamibi, personal na pag-adal, asin pakikiasosyar sa mga kapagtubod na espirituwal an kaisipan puede man na makatabang na mahale an mga pagduda asin puedeng magpararom kan satong pag-apresyar sa nakakapakosog sa pagtubod na mga katotoohan sa Biblia na nanodan niato paagi sa pinakapaagihan nin pagkomunikar ni Jehova.

 Papagdanayon an Pagigin Positibo

17, 18. Imbes na maggumodgumod, maninigo kitang magkaigwa nin anong aktitud, asin taano?

¹⁷ Totoo, an bakong sangkap na mga tawo natural nang may tendensiang magkasala, asin an nagkapira tibaad may makosog na inklinasyon na hayag na isabi an bakong makatanosan na mga reklamo. (Genesis 8:21; Roma 5:12) Alagad kun magin ugale na niato na magparagumodgumod, isasapeligro niato an satong relasyon ki Jehova Dios. Huli kaini, kaipuhan niatong kontrolon an ano man na posibleng inklinasyon na maggumodgumod.

¹⁸ Imbes na maggumodgumod manongod sa mga bagay-bagay sa kongregasyon, maninigo niatong papagdanayon an pagigin positibo asin sunodon an sarong rutina na nagpapadanay sa sato na sibot, magayagaya, may paggalang, timbang, asin makosog an pagtubod. (1 Corinto 15:58; Tito 2:1-5) Kontrolado ni Jehova an gabos na bagay sa laog kan saiyang organisasyon, asin aram ni Jesus an mga nangyayari sa lambang kongregasyon, arog kaidtong enot sa siglo. (Kapahayagan 1:10, 11) Mapasensiang maghalat sa Dios asin ki Cristo, an Payo kan kongregasyon. An nasa katongdan na mga pastor puedeng gamiton tanganing itanos an mga bagay-bagay na tibaad kaipuhan na pakarhayon giraray.—Salmo 43:5; Colosas 1:18; Tito 1:5.

19. Sagkod na an Kahadean na an may lubos na kontrol sa mga aktibidad nin katawohan, sa ano niato maninigong ikonsentrar an satong atension?

¹⁹ Sa dai na mahahaloy, matatapos an maraot na sistemang ini nin mga bagay, asin an Mesiyanikong Kahadean lubos na makontrol sa mga aktibidad nin katawohan. Sagkod sa panahon na iyan, mahalaga nanggad na papagdanayon kan lambang saro sa sato an pagigin positibo! Matabang ini sa sato na rekonoseron an mga karahayan kan satong mga kapagtubod, imbes na magkonsentrar sa saindang mga sala. Makakapaogma sa sato an pagkonsentrar sa marahay na mga aspekto kan saindang personalidad. Sa siring, imbes na papanluyahan kita nin boot huli sa paggumodgumod, kita mapaparigon asin mapapakosog sa espirituwal.

20. An positibong aktitud mapangyari sa sato na kamtan an anong mga bendisyon?

²⁰ An pagigin positibo magpapangyari man sa sato na girumdomon an dakol na bendisyon na nakakamtan niato huli sa pagigin kaasosyar kan daganon na kabtang kan organisasyon ni Jehova. Ini an solamenteng organisasyon sa kinaban na maimbod sa Soberano kan uniberso. Ano an saboot nindo manongod sa bagay na iyan asin sa pribilehio na makikabtang sa pagsamba sa iyo sanang tunay na Dios, si Jehova? An saindo logod na aktitud magin kapareho kan ki David, na nag-awit: “O Paradangog nin pamibi, sa saimo an mga tawo nin gabos na laman madorolok. Maogma an saro na saimong pinili asin pinadolok mo, tanganing sia mag-erok sa saimong mga patyo. Kami maninigoan nanggad sa karahayan kan saimong harong.”—Salmo 65:2, 4.

Nagigirumdoman daw Nindo?

• Taano ta maninigo kitang magin mapagpasalamat para sa mga nangengenot sa kongregasyon?

• Ano an maninigong magin reaksion niato kun nasasala an mga tugang na may katongdan?

• Paano niato maninigong mansayon an mga pagdalisay sa pakasabot sa Kasuratan?

• Ano an makakatabang sa sarong Kristiano na mahale an mga pagduda?

[Mga Hapot Para sa Pag-adal]

[Ritrato sa pahina 20]

Itinao ni David ki Salomon an mga plano kan templo asin bilog na pusong sinuportaran an tunay na pagsamba

[Ritrato sa pahina 23]

An Kristianong kamagurangan maogmang nagtatao nin espirituwal na tabang