‘Magpadagos Kamong Mayo nin mga Paggumodgumod’
‘Magpadagos Kamong Mayo nin mga Paggumodgumod’
“Padagos nindong gibohon an gabos na bagay na mayo nin mga paggumodgumod.”—FILIPOS 2:14.
1, 2. Anong konseho an itinao ni apostol Pablo sa mga Kristiano sa Filipos asin Corinto, asin taano?
SA SAIYANG ipinasabong nin Dios na surat sa Kristianong kongregasyon sa Filipos kan enot na siglo, si apostol Pablo nagtao nin dakol na komendasyon. Sia nagtao nin komendasyon sa saiyang mga kapagtubod sa siudad na iyan huli sa saindang espiritu nin pagkamatinao asin kaigotan, asin ipinahayag nia an saiyang kagayagayahan huli sa saindang marahay na mga gibo. Minsan siring, ipinagirumdom sa sainda ni Pablo na ‘padagos na gibohon an gabos na bagay na mayo nin mga paggumodgumod.’ (Filipos 2:14) Taano ta itinao kan apostol an konsehong ini?
2 Aram ni Pablo kun ano an puedeng ibunga kan paggumodgumod. Pirang taon bago kaini, ipinagirumdom nia sa kongregasyon sa Corinto na peligroso an paggumodgumod. Sinabi ni Pablo na mantang an mga Israelita nasa kaawagan, paorootro nindang pinaanggot si Jehova. Paano? Paagi sa pagmawot nin nakakaraot na mga bagay, paagi sa paggibo nin idolatriya asin pakikisaro, paagi sa pagbalo ki Jehova, asin paagi sa paggumodgumod. Inenkaminar ni Pablo an mga taga Corinto na makanood sa mga halimbawang ini. Sia nagsurat: “Ni magin kamong paragumodgumod, arog kan nagkapira sa sainda na naggumodgumod, tangani sanang mapara paagi sa paralaglag.”—1 Corinto 10:6-11.
3. Taano ta interesante ngonyan na pag-olayan an paggumodgumod?
3 Bilang mga lingkod ni Jehova sa presenteng panahon, kita nagpapaheling nin sarong espiritu na kaagid kan sa kongregasyon sa Filipos. Kita maigot sa marahay na mga gibo, asin kita nagkakaminorootmootan. (Juan 13:34, 35) Minsan siring, huli sa danyos na ibinunga kan paggumodgumod sa tahaw kan banwaan nin Dios kaidto, kita may marahay na dahelan na isapuso an konseho: “Padagos nindong gibohon an gabos na bagay na mayo nin mga paggumodgumod.” Estudyaran nguna niato an mga halimbawa nin paggumodgumod na nasambitan sa Kasuratan. Dangan totokaron niato an nagkapirang bagay na magigibo niato tanganing maprebentaran an paggumodgumod na makadanyar ngonyan.
Naggumodgumod Tumang ki Jehova an Sarong Maraot na Kasararoan
4. Sa anong paagi naggumodgumod an mga Israelita sa kaawagan?
4 An termino sa Hebreo na nangangahulogan na ‘paggumodgumod, pagreklamo, o pagngurobngurob’ ginagamit sa Biblia may koneksion sa mga pangyayari durante kan 40 taon kan Israel sa kaawagan. Sa sarong pangyayari, an mga Israelita nagin diskontento sa saindang situwasyon sa buhay asin ipinahayag ninda ini paagi sa paggumodgumod. Halimbawa, pirang semana sana pagkakalda sa sainda sa kaoripnan sa Egipto, “an bilog na kasararoan kan mga aki ni Israel nagpoon na maggumodgumod tumang ki Moises asin Aaron.” An mga Israelita nagreklamo manongod sa kakanon, na nagsasabi: “Marahay pang nagadan na kami sa kamot ni Jehova sa daga nin Egipto mientras na nakatukaw kami kataed kan kaldero nin karne, mientras na nagkakakan kami nin tinapay sagkod na mabasog, huli ta dinara nindo kami sa kaawagan na ini tanganing gadanon an bilog na kasararoan na ini sa gutom.”—Exodo 16:1-3.
5. Kan magreklamo an mga Israelita, tumang kiisay talaga an saindang mga paggumodgumod?
5 An totoo, itinao ni Jehova sa mga Israelita an pangangaipo ninda sa kaawagan, na mamomoton na tinatawan sinda nin kakanon asin tubig. Dai noarin man nameligrong magadan sa gutom sa kaawagan an banwaan nin Israel. Pero huli sa espiritu nin pagkadiskontento, pinasobrahan ninda an saindang situwasyon asin nagpoon na maggumodgumod. Minsan ngani nagrereklamo sinda tumang ki Moises asin Aaron, sa pagheling ni Jehova an tunay na pinapatamaan kan saindang pagkadiskontento iyo an Dios mismo. Sinabihan ni Moises an mga Israelita: “Nadangog ni Jehova an saindong mga paggumodgumod na ipinaggugumodgumod nindo tumang sa saiya. Asin ano kami? An mga paggumodgumod nindo bakong tumang sa samuya, kundi tumang ki Jehova.”—Exodo 16:4-8.
6, 7. Siring kan ipinaheling sa Bilang 14:1-3, paano nagbago an aktitud kan mga Israelita?
6 Dai nahaloy pakatapos kaiyan, naggumodgumod giraray an mga Israelita. Si Moises nagsugo nin 12 lalaki tanganing espiyahan an Dagang Panuga. An sampulo sa sainda nagbalik dara an bakong paborableng bareta. An resulta? “An gabos na aki ni Israel nagpoon na maggurumodgumod tumang ki Moises asin ki Aaron, asin an bilog na kasararoan nagpoon na magsabi tumang sa sainda: ‘Marahay pang nagadan na kami sa daga nin Egipto, o marahay pang nagadan na kami sa kaawagan na ini! Asin taano ta dinara pa kami ni Jehova sa dagang ini [Canaan] tanganing mapukan paagi sa espada? An satong mga agom na babae asin an satong saradit na aki magigin samsam. Bako daw na mas marahay pa para sa sato na bumalik sa Egipto?’”—Bilang 14:1-3.
7 Nagbago nanggad an aktitud kan Israel! Kan enot, an pagtanaw nin utang na boot sa pagkakalda ninda sa Egipto asin pagkaligtas ninda sa Dagat na Pula nagpahiro sa sainda na umawit nin mga pag-omaw ki Jehova. (Exodo 15:1-21) Minsan siring, huling napaatubang sa mga kadepisilan sa kaawagan asin natakot sa mga Cananeo, an pagtanaw nin utang na boot kan banwaan nin Dios nasalidahan nin espiritu nin pagkadiskontento. Imbes na pasalamatan an Dios para sa saindang katalingkasan, binasol ninda sia sa salang hinohona ninda na kadaihon ninda. Sa siring, an paggumodgumod kapahayagan nin kawaran nin tamang pag-apresyar sa mga probisyon ni Jehova. Bakong makangangalas na sinabi nia: “Sagkod noarin an maraot na kasararoan na ini maggugurumodgumod tumang sa sako?”—Bilang 14:27; 21:5.
Paggumodgumod kan Enot na Siglo
8, 9. Magtao nin mga halimbawa nin paggumodgumod na nakasurat sa Kristianong Griegong Kasuratan.
8 Kalabot sa nasambitan na mga halimbawa nin paggumodgumod an grupo-grupo nin mga tawo na minalataw na hayagan na nagpapahayag kan saindang pagkadiskontento. Minsan siring, kan si Jesu-Cristo nasa Jerusalem kaidto para sa Kapiestahan nin mga Payag-Payag kan 32 C.E., “nagkaigwa nin kanigoan na hiringhingan an mga kadaklan manongod sa saiya.” (Juan 7:12, 13, 32) Sinda naghiringhingan manongod sa saiya, na an nagkapira nagsasabing sia marahay na tawo, an iba man nagsasabing bako.
9 Sa saro pang okasyon, si Jesus asin an saiyang mga disipulo bisita sa harong ni Levi, o Mateo, na parasingil nin buhis. “An mga Fariseo asin an saindang mga eskriba nagpoon na maggumodgumod sa saiyang mga disipulo, na sinasabi: ‘Taano ta nagkakakan asin nag-iinom kamo kaiba nin mga parasingil nin buhis asin mga parakasala?’” (Lucas 5:27-30) Sa Galilea, paghaloyhaloy, “an mga Judio nagpoon na maggurumodgumod [ki Jesus] huli ta sinabi nia: ‘Ako an tinapay na naghilig hale sa langit.’” May nagkapira pa ngani sa mga parasunod ni Jesus an naanggot sa saiyang sinabi asin nagpoon na maggurumodgumod.—Juan 6:41, 60, 61.
10, 11. Taano ta naggumodgumod an mga Judio na Griego an tataramon, asin paano makikinabang an Kristianong kamagurangan sa ginibong paagi nin pag-asikaso sa reklamo?
10 Mas positibo an nagin resulta nin paggumodgumod na nangyari dai nahaloy pakatapos kan Pentecostes 33 C.E. Dakol na bagong makombertir na disipulo hale sa luwas kan Israel an nag-aako kaidto nin pagkamapag-istimar nin mga kapagtubod sa Judea, alagad luminataw an mga problema may koneksion sa paghiras kan makukuang probisyon. An salaysay nagsasabi: “Nagkaigwa nin paggurumodgumod kan mga Judiong Griego an tataramon tumang sa mga Judiong Hebreo an tataramon, huli ta an saindang mga balong babae napapabayaan sa aroaldaw na pagwaras.”—Gibo 6:1.
11 An mga naggugumodgumod na ini bakong kapareho kan mga Israelita sa kaawagan. An mga Judio na Griego an tataramon daing kaimotan na nagpahayag nin pagkadiskontento manongod sa sadiri nindang kamugtakan sa buhay. Dinara ninda sa atension an dai pakatao kan mga pangangaipo nin nagkapira sa mga balo. Dugang pa, an mga naggugumodgumod dai guminawe bilang mga paraparibok asin dai sinda naglangkaw nin boses tumang ki Jehova. Ipinaabot ninda an saindang reklamo sa mga apostol, na nag-areglo para sa listong paghiro huli ta may katanosan an reklamo. Marahayon na halimbawa nanggad an itinao kan mga apostol para sa Kristianong kamagurangan ngonyan! An espirituwal na mga pastor na ini nag-iingat na dai ‘tahoban an saindang talinga sa inagrangay kan dukha.’—Talinhaga 21:13; Gibo 6:2-6.
Magmaan sa Nakakaraot na Impluwensia nin Paggumodgumod
12, 13. (a) Iilustrar an mga epekto nin paggumodgumod. (b) Ano an puedeng magin dahelan na an saro maggumodgumod?
12 An kadaklan kan mga halimbawa sa Kasuratan na tinokar niato nagpapaheling na an paggumodgumod nagbunga nin dakulang danyos sa tahaw kan banwaan nin Dios kan nakaagi. Kun siring, maninigo niatong seryosong pakaisipon an nakakaraot na impluwensia kaiyan ngonyan. Tibaad makatabang an sarong ilustrasyon. Dakol na klase nin metal an may natural na tendensiang taklaon. Kun dai iintindihon an enot na mga senyal nin takla, an metal tibaad taklaon sagkod na dai na iyan puedeng gamiton. Dai mabilang na auto an nakatambak na sana, bakong huli sa pagkaraot kan makina, kundi huli ta taklaon nang marhay an metal kaya bako nang ligtas na gamiton iyan. Paano niato ikakaaplikar sa paggumodgumod an ilustrasyon na ini?
13 Kun paanong may mga metal na madaling taklaon, an bakong sangkap na mga tawo may tendensia man na magreklamo. Maninigo kitang magbantay tanganing marisa an ano man na senyal kaini. Kun paanong pinaparikas kan alumaad asin maasgad na aire an pagtakla, an problema nagpapaorog sa tendensia na kita maggumodgumod. Huli sa tension, an sadit na pagkauyam puedeng magin dakulang reklamo. Mantang naggagrabe an mga kamugtakan sa huring mga aldaw kan sistemang ini, an potensial na mga dahelan nin pagreklamo posibleng marhay na dumakol. (2 Timoteo 3:1-5) Huli kaini, an sarong lingkod ni Jehova tibaad magpoon na maggumodgumod tumang sa iba. An dahelan tibaad sadit na isyu, na siring baga kan pagkadiskontento sa mga kaluyahan, abilidad, o pribilehio nin paglilingkod kan iba.
14, 15. Taano ta maninigo niatong kontrolon an tendensiang magreklamo?
14 Ano man an dahelan kan satong kaanggotan, kun dai niato kokontrolon an tendensiang magreklamo, tibaad pataluboon kaiyan sa sato an espiritu nin pagkadiskontento asin magin ugale na niato an pagparagumodgumod. Iyo, an nakakaraot sa espirituwal na epekto kan paggumodgumod puedeng biyong makadanyar sa sato. Kan an mga Israelita maggumodgumod manongod sa buhay sa kaawagan, nagibo pa ngani nindang basolon si Jehova. (Exodo 16:8) Dai man logod iyan mangyari sa sato!
15 An tendensia na taklaon an metal puedeng mainaan paagi sa pagpinta dian nin pintang pangontra sa takla asin tolos-tolos na pagremedyo sa mga parte na tinatakla. Sa kaagid na paagi, kun marisa niato na igwa kita nin tendensiang magreklamo, ini puedeng makontrol kun iyan tatawan niato nin listo asin mapagngayongayong paghihingoa na itanos. Paano?
Mansayon an mga Bagay sa Punto de Vista ni Jehova
16. Paano mapapaglabanan an tendensiang magreklamo?
16 Pinapangyayari kan paggumodgumod na an satong isip magpokus sa satong sadiri saka sa satong mga problema asin nalilingawan an mga bendisyon na nakakamtan niato bilang mga Saksi ni Jehova. Tanganing mapaglabanan an tendensia na magreklamo, kaipuhan niato na pirmeng ipagirumdom sa satong sadiri an mga bendisyon na ini. Halimbawa, an lambang saro sa sato may makangangalas na pribilehio na magdara kan personal na ngaran ni Jehova. (Isaias 43:10) Puede niatong kultibaron an sarong dayupot na relasyon sa saiya, asin puede kitang makipag-olay sa “Paradangog nin pamibi” sa ano man na oras. (Salmo 65:2; Santiago 4:8) An satong buhay may tunay na kahulogan huli ta nasasabotan niato an isyu manongod sa unibersal na soberaniya asin nagigirumdoman niato na pribilehio niato na papagdanayon an integridad sa Dios. (Talinhaga 27:11) Puede kitang makikabtang nin regular sa paghuhulit kan maogmang bareta kan Kahadean. (Mateo 24:14) An pagtubod sa atang na pantubos ni Jesu-Cristo nagpapangyari na kita magkaigwa nin malinig na konsensia. (Juan 3:16) Mga bendisyon ini na nasa sato ano man an kaipuhan niatong tagalan.
17. Taano ta maninigo niatong hingoahon na mansayon an mga bagay sa punto de vista ni Jehova, dawa pa kita may balidong dahelan na magreklamo?
17 Hingoahon niato na mansayon an mga bagay sa punto de vista ni Jehova, bako sanang sa punto de vista niato. “Paaraman sa sako an saimong mga dalan, O Jehova; tokdoi ako kan saimong mga dana,” an inawit kan salmistang si David. (Salmo 25:4) Kun kita may balidong dahelan na magreklamo, dai ini nakakalampas sa pagmangno ni Jehova. Puede niang itanos tolos-tolos an mga bagay-bagay. Kaya taano ta kun beses tinotogotan nia na magpadagos an problema? Ini tibaad tanganing tabangan kitang pataluboon an marahayon na mga kualidad, na siring baga kan pasensia, pakatagal, pagtubod, asin pakatios.—Santiago 1:2-4.
18, 19. Iilustrar an posibleng mga epekto kun tinitios niato an mga kadepisilan na dai nagrereklamo.
18 Kun tinitios niato an mga kadepisilan na dai nagrereklamo bako sanang nakakatabang sa sato na mapakarhay an satong personalidad kundi puede man na magtao nin marahay na impresyon sa mga nag-oobserbar sa satong gawe-gawe. Kan 2003 sarong grupo nin mga Saksi ni Jehova an nagbiahe na sakay nin bus hale sa Alemania tanganing mag-atender nin sarong kombension sa Hungaria. An tsuper kan bus bakong Saksi, asin habo talaga niang makaibanan an mga Saksi sa laog nin sampulong aldaw. Minsan siring, kan matatapos na an biahe biyong nabago an saiyang isip. Taano?
19 Durante kan biahe, nagkaigwa nin nagkapirang aberiya. Alagad dai noarin man nagreklamo an mga Saksi. Sinabi kan tsuper na ini an pinakamarahay na grupo na nagin mga pasahero nia kasuarin man! Sa katunayan, nanuga sia na sa masunod na may magsongko na mga Saksi sa saiyang harong, papadagoson nia sinda asin maingat na mahinanyog sa sainda. Kanigoan karahay na impresyon an ikinatao kan mga pasahero paagi sa ‘paggibo kan gabos na bagay na mayo nin mga paggumodgumod’!
An Pagpapatawad Nagpapaoswag sa Pagkasararo
20. Taano ta maninigo kitang magpatarawadtawadan?
20 Paano kun kita may reklamo tumang sa sarong kapagtubod? Kun iyan seryosong bagay, maninigo niatong iaplikar an mga prinsipyo na yaon sa sinabi ni Jesus na nakasurat sa Mateo 18:15-17. Pero dai man ini pirmeng kaipuhan huling an kadaklan na reklamo saradit man sana. Taano ta dai na sana mansayon an situwasyon bilang oportunidad na ipaheling an pagpapatawad? Si Pablo nagsurat: “Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro. Kun paanong kamo sueltong pinatawad ni Jehova, siring man an gibohon nindo. Alagad, laen pa sa gabos na bagay na ini, isulog nindo an pagkamoot, huli ta iyan sangkap na bogkos nin pagkasararo.” (Colosas 3:13, 14) Puede daw niatong tawan nin lugar sa satong puso an pagpatawad? Bako daw na si Jehova may dahelan na magreklamo manongod sa sato? Pero, sia paorootrong nagpapaheling nin pagmalasakit asin pagpatawad.
21. Paano puedeng maapektaran an mga nakakadangog sa paggumodgumod?
21 Ano man an tibaad magin reklamo, an paggumodgumod dai makakaresolber kan bagay-bagay. An termino sa Griego na nangangahulogan na “paggumodgumod” puede man na mangahulogan nin “pagngurobngurob.” Posibleng marhay na bako kitang komportable kun may kaibahan kitang ugale nang maggumodgumod asin maghihingoa kitang rayoan sia. Tibaad arog man kaiyan an mamatean sa sato kan mga nakakadangog sa sato kun kita maggugumodgumod, o magngungurobngurob. Sa katunayan, tibaad mauyam sindang marhay kaya gusto na logod ninda kitang rayoan! An pagngurobngurob tibaad makua an atension nin iba, alagad seguradong dai kaiyan maaakit an puso nin siisay man.
22. Ano an sinabi nin sarong daragita manongod sa Mga Saksi ni Jehova?
22 An pagigin mapagpatawad nagpapaoswag sa pagkasararo—bagay na pinapahalagahan na marhay kan banwaan ni Jehova. (Salmo 133:1-3) Sa sarong nasyon sa Europa, nagsurat an sarong 17 anyos na daragitang Katoliko sa sangang opisina kan Mga Saksi ni Jehova tanganing ipahayag an saiyang paghanga sa sainda. Sinabi nia: “Iyan an solamenteng organisasyon na aram kong an mga miembro dai nababanga nin pagkaongis, kahanaban, dai pagpahunod, kaimotan, o dai pagkasararo.”
23. Ano an totokaron niato sa sunod na artikulo?
23 An pag-apresyar sa gabos na espirituwal na bendisyon na inaako niato bilang mga nagsasamba sa tunay na Dios, si Jehova, matabang sa sato na paoswagon an pagkasararo asin likayan an paggumodgumod tumang sa iba may koneksion sa personal na mga bagay. Ipapaheling kan sunod na artikulo kun paanong an diosnon na mga kualidad maolang sa sato sa mas peligroso pa nganing klase nin paggumodgumod—an boot sabihon, an paggumodgumod tumang sa daganon na kabtang kan organisasyon ni Jehova.
Nagigirumdoman daw Nindo?
• Ano an kalabot sa paggumodgumod?
• Paano ikakailustrar an mga epekto nin paggumodgumod?
• Ano an makakatabang sa sato na daogon an tendensiang maggumodgumod?
• Paano an pagigin andam na magpatawad makakatabang sa sato na likayan an paggumodgumod?
[Mga Hapot Para sa Pag-adal]
[Ritrato sa pahina 14]
An totoo, an mga Israelita naggumodgumod tumang ki Jehova!
[Ritrato sa pahina 17]
Hinihingoa daw nindong mansayon an mga bagay na siring kan pagmansay dian ni Jehova?
[Ritrato sa pahina 18]
An pagpatawad nagpapaoswag sa Kristianong pagkasararo