“Poon Ngonyan, Naniniwala Na Ako na May Dios”

AN SARONG Ukranianang si Alexandra na nag-iistar sa Prague, Republika Checoslovaco, papuli na hale sa trabaho. Sa sarong pondohan nin trambia, nariparo nia an sarong sadit na bag sa daga, na sinisipasipa kan mga nag-aagi. Kan puroton nia an bag asin helingon an laog kaiyan, dai sia makapaniwala sa saiyang naheling. Igwa nin sarong bulto nin kuartang papel na tig-5,000 koruny an kantidad! Mayo nin siisay man sa palibot nia na garo baga naghahanap kan bag. Bilang dayohan na nag-eerok sa Republika Checoslovaco, si Alexandra nadedepisilan sa paghanap-buhay. Ano daw an saiyang gigibohon?

Kan sia nasa harong na, ipinaheling ni Alexandra an bag sa saiyang aking babae, si Victoria. Hinanap ninda sa bag an ngaran asin adres kan kagsadiri alagad mayo sindang nakua. Minsan siring, an bag igwa nin sarong pidaso nin papel na may mga numerong nakasurat dian. May nakasurat sa papel na sarong numero nin deposito sa bangko, asin sa ibong kaiyan, may iba pang numero. An bag igwa man nin direksion pasiring sa sarong lokal na bangko asin nin sarong nota na nagsasabing “330,000 koruny” (mga $10,000, U.S.). Iyan an eksaktong halaga kan kuarta na nasa bag.

Ginagamit an garo baga sarong numero sa telepono, daing nangyari sa mga paghihingoa ni Alexandra na apodan an bangko. Kaya sinda mag-ina nagduman sa bangko asin ipinaliwanag kun ano an nangyari. Ihinapot ninda an manongod sa numero kan deposito sa bangko na saindang nakua sa bag. Minsan siring, an bangko mayo nin rekord kan siring na deposito. Kan suminunod na aldaw, si Alexandra nagbalik dara an saro pang numero na nasa bag. Tunay nanggad, an bangko nagkaigwa nin sarong kliyente, sarong babae, na may siring na numero kan deposito. Kinontak ni Alexandra asin Victoria an babae, asin pinatunayan nia na sia an nawaran. Kan sinda gabos sa katapustapusi magherelingan, mainit sindang pinasalamatan kan babae asin ini naghapot, “Ano an mga kondisyon sa pag-uli kan kuarta?”

Si Victoria nagsimbag: “Mayo nin mga kondisyon. Kun ginusto niamo an kuarta, itinago mi na kutana iyan.” Sa saiyang limitadong Czech, sia nagpaliwanag: “Iinuuli niamo an kuarta sa saimo nin huli ta kami mga Saksi ni Jehova. An samuyang konsensia na sinanay sa Biblia dai minatogot sa samuya na itago an bakong samo.” (Hebreo 13:18) An babae magayagayang nagsabi, “Poon ngonyan, naniniwala na ako na may Dios.”