An Tataramon ni Jehova Buhay

Tampok na mga Kabtang sa Ikatolo Asin Ikaapat na Libro nin Salmo

SA SARONG pamibi sa Dios, an salmista naghapot: “Ipapahayag daw an saimong mamomoton na kabootan sa lugar nin lolobngan mismo, an saimong kaimbodan sa lugar nin kalaglagan?” (Salmo 88:11) Siempre, an simbag dai. Kun mayo nin buhay, dai niato maoomaw si Jehova. An pag-omaw ki Jehova igo nang dahelan na kita padagos na mabuhay, asin an pagkaigwa nin buhay igo nang dahelan na omawon sia.

An Ikatolo asin Ikaapat na Libro nin Salmo, na kompuesto kan Salmo 73 sagkod 106, nagtatao sa sato nin dakol na dahelan tanganing omawon an Kaglalang asin pamurawayon an saiyang ngaran. An paghorophorop sa mga salmong ini dapat na magpararom kan satong pag-apresyar sa “tataramon nin Dios” asin magpahiro sa sato na pahiwason asin paoswagon an satong kapahayagan nin pag-omaw sa saiya. (Hebreo 4:12) May makosog na interes, estudyaran nguna niato an Ikatolong Libro nin Salmo.

“AN PAGRANI SA DIOS MARAHAY PARA SA SAKO”

(Salmo 73:1–89:52)

An enot na 11 salmo kan ikatolong koleksion kinomponer ni Asaf o kan mga miembro kan pamilya ni Asaf. An pambukas na awit nagpapaliwanag kun ano an nagligtas ki Asaf sa pagkalagalag parayo huli sa salang kaisipan. Nakaabot sia sa tamang konklusyon. “Kun para sa sako,” an awit nia, “an pagrani sa Dios marahay para sa sako.” (Salmo 73:28) Sarong panangis huli sa pagkalaglag kan Jerusalem an suminunod sa Salmo 74. An Salmo 75, 76, asin 77 ilinaladawan si Jehova bilang matanos na Hokom, Paraligtas kan mga mahoyo, asin Paradangog nin pamibi. Rinerepaso kan Salmo 78 an nakaagi kan Israel poon sa panahon ni Moises sagkod sa panahon ni David. An ika-79 Salmo panangis sa pagkagaba kan templo. Suminunod an sarong pamibi para sa pagbabalik sa dati kan banwaan nin Dios. An Salmo 81 sarong sadol na kuyogon si Jehova. An Salmo 82 asin 83 mga pamibi na logod hokoman nin Dios an maraot na mga hokom asin an mga kaiwal nin Dios.

“An sakong kalag naghidaw asin nagmawot man para sa mga patyo ni Jehova,” an sabi sa sarong melodiya kan mga aki ni Core. (Salmo 84:2) An Salmo 85 sarong kahagadan para sa bendisyon nin Dios sa mga nagbaralik hale sa pagkadistiero. Idinodoon kan salmong ini na mas mahalagang marhay an espirituwal na mga bendisyon kisa sa pisikal na mga bendisyon. Sa Salmo 86, hinagad ni David na ingatan asin tokdoan sia nin Dios. Sa Salmo 87, an sarong melodiya manongod sa Sion asin sa mga namundag duman sinusundan nin sarong pamibi ki Jehova sa Salmo 88. An mamomoton na kabootan ni Jehova na ihinayag sa tipan ki David idinodoon sa Salmo 89, na kinomponer ni Etan, tibaad saro sa apat na madonong na tawo kaidtong panahon ni Salomon.—1 Hade 4:31.

Mga Hapot sa Kasuratan na Sinimbag:

73:9—Sa anong paagi na “ibinugtak [kan mga maraot] an saindang ngoso sa mismong kalangitan, asin an saindang dila mismo naglalakawlakaw  sa daga”? Mantang an mga maraot mayo nin pakiaram sa siisay man sa langit o sa daga, dai sinda nag-aalangan na langhadan an Dios paagi sa saindang ngoso. Binabalobagi man ninda an mga tawo paagi sa saindang dila.

74:13, 14—Kasuarin ‘pinasa ni Jehova an payo kan higanteng mga hayop sa dagat na yaon sa katubigan asin rinonot an mga payo kan Leviatan’? Si ‘Faraon, hade kan Egipto,’ inaapod na “higanteng hayop sa dagat na naghihigdang nakaunat sa tahaw kan saiyang mga kanal kan Nilo.” (Ezequiel 29:3) An Leviatan puedeng nagrerepresentar sa “makokosog ni Faraon.” (Salmo 74:14, nota sa ibaba) An pagronot sa saindang payo posibleng nanonongod sa grabeng pagkadaog ni Faraon asin kan saiyang hukbo kan ilinigtas ni Jehova an mga Israelita sa pagkaoripon sa Egipto.

75:4, 5, 10—Ano an kahulogan kan terminong “sungay”? An mga sungay nin hayop mapuersang armas. Huli kaini, an terminong “sungay” piguratibong nangangahulogan nin puersa, o kosog. Iiniitaas ni Jehova an mga sungay kan saiyang banwaan, na huli kaiyan sinda ilinalangkaw, mantang ‘pinuputol nia an mga sungay kan mga maraot.’ Pinapatanidan kita na dai niato ‘ilangkaw an satong sungay sa kaitaasan,’ na an boot sabihon dai kita maninigong magkaigwa nin orgolyoso o aroganteng aktitud. Mantang si Jehova an naglalangkaw, an mga asignasyon na may paninimbagan sa kongregasyon kaipuhan na mansayon na hale sa saiya.—Salmo 75:7.

76:10—Paanong oomawon si Jehova kan “mismong kabangisan nin tawo”? Kun tinotogotan nin Dios an mga tawo na iluwas an saindang kabangisan tumang sa sato huli ta kita mga lingkod nia, puedeng magkaigwa iyan nin positibong resulta. An ano man na kasakitan na tibaad maeksperyensiahan niato puedeng magdisiplina sa sato minsan paano. Itinotogot ni Jehova an pagsakit sagkod sana sa punto na magtatao iyan nin siring kaiyan na pagpatuod. (1 Pedro 5:10) ‘An natatadang kabangisan nin tawo, ihahagkos nin Dios sa saiya.’ Paano kun magsakit kita sagkod sa kagadanan? Ini makakapagtao man nin kaomawan ki Jehova huli ta an mga nakakaheling kan satong maimbod na pagtagal tibaad magpoon man na magpamuraway sa Dios.

78:24, 25; nota sa ibaba—Taano an manna ta inapod na “an trigo nin langit” asin ‘an mismong tinapay kan mga anghel’? An arin man sa duwang ekspresyon na iyan dai nangangahulogan na an manna kakanon kan mga anghel. Iyan an “trigo nin langit” sa dahelan na iyan naggikan sa langit. (Salmo 105:40) Mantang an mga anghel, o an “mga makapangyarihan,” nag-eerok sa langit, an fraseng ‘an mismong tinapay kan mga anghel’ tibaad nangangahulogan sana na itinao iyan nin Dios, na nag-eerok sa langit. (Salmo 11:4) Tibaad ginamit man ni Jehova an mga anghel tanganing magtao nin manna sa mga Israelita.

82:1, 6—Sairisay an inaapod na “mga dios” asin “mga aki kan Kaharohalangkawe”? An duwang ekspresyon na iyan nanonongod sa mga hokom na tawo sa Israel. Angay ini, huling sinda maglilingkod bilang mga parataram asin representante nin Dios.—Juan 10:33-36.

83:2—Ano an kahulogan kan ‘pag-itaas kan payo nin saro’? An mustrang ini nangangahulogan nin pagigin andam na gamiton an kapangyarihan o humiro, na sa parate tanganing magtumang, makilaban, o man-api.

Mga Leksion Para sa Sato:

73:2-5, 18-20, 25, 28. Dai kita maninigong mauri sa prosperidad kan mga maraot asin arogon an saindang bakong diosnon na mga dalan. An mga maraot yaon sa dagang mahalnas. Sinda seguradong ‘mahuhulog sa kalaglagan.’ Dugang pa,  mantang an karatan dai mahahale sa irarom kan bakong sangkap na pamamahala nin tawo, magigin daing kamanungdanan an satong paghihingoa na pohoon iyan. Arog ni Asaf, madonong kita kun aatubangon niato an karatan paagi sa “pagrani sa Dios” asin pagkaogmang marhay sa sarong dayupot na relasyon sa Saiya.

73:3, 6, 8, 27. Dapat na magmaan kita tumang sa kahambogan, kaabhawan, pag-olog-olog, asin pandadaya. Totoo ini minsan ngani an pagkaigwa nin siring na mga ugale tibaad garo baga may bentaha.

73:15-17. Kun nariribaraw kita sa satong iniisip, maninigong likayan niato na ihayag sa publiko an satong nakakaribong na mga kaisipan. An pagsaysay nin “estoryang arog kaiyan” makakapaluya sana sa boot kan iba. Kaipuhan niatong horophoropon nin matoninong an satong mga ikinakapurisaw asin resolberan an mga iyan paagi sa pakikiasosyar sa mga kapagtubod.—Talinhaga 18:1.

73:21-24. An ‘pagpait kan puso’ huli sa garo baga marahay na kamugtakan kan mga maraot iinaagid sa reaksion kan daing isip na mga hayop. An reaksion na ini pusokpusokan, nakabasar sana sa emosyon. Imbes, maninigong gumiya sa sato an hatol ni Jehova, na biyong kompiado na ‘kakapotan nia kita sa toong kamot’ asin susuportaran nia kita. Saro pa, ‘dadarahon kita ni Jehova sa kamurawayan,’ an boot sabihon, sa dayupot na relasyon sa saiya.

77:6. An pagpaheling nin odok sa pusong interes sa espirituwal na mga katotoohan asin maingat na pagsiyasat kaiyan nangangaipo nin panahon para sa pag-adal asin paghorophorop. Mahalagang marhay nanggad na magkaigwa kita nin panahon na magsolo sa paggibo kaiyan!

79:9. Si Jehova naghihinanyog sa satong mga pamibi, espesyalmente kun may labot iyan sa pagsantipikar sa saiyang ngaran.

81:13, 16. An paghinanyog sa tingog ni Jehova asin paglakaw sa saiyang mga dalan nagbubunga nin nagsosopay na mga bendisyon.—Talinhaga 10:22.

82:2, 5. An mga inhustisya an nagpapakonogkonog sa “pasisikadan kan daga.” An daing hustisyang mga gibo an nakakaraot sa estabilidad kan sosyedad nin tawo.

84:1-4, 10-12. Mga halimbawa para sa sato an pagpahalaga kan mga salmista sa lugar nin pagsamba ki Jehova asin an pakamate ninda nin pagkakontento sa saindang mga pribilehio sa paglilingkod.

86:5. Nagpapasalamat nanggad kita na si Jehova “andam na magpatawad”! Naghahanap sia nin ano man na ebidensia na matao sa saiya nin basehan tanganing magpaheling nin pagkaherak sa sarong nagsosolsol na nagkasala.

87:5, 6. Maaaraman daw lamang kan mga maako nin buhay sa daganon na Paraiso an mga ngaran kan mga bubuhayon liwat sa langitnon na buhay? An mga bersikulong ini nagpaparisa na posible ini.

88:13, 14. An atrasadong simbag sa satong mga pamibi manongod sa sarong problema posibleng marhay na nangangahulogan na gusto ni Jehova na ipaheling niato an pagigin tunay kan satong debosyon sa saiya.

“MAGPASALAMAT KAMO SA SAIYA, OMAWA NINDO AN SAIYANG NGARAN”

(Salmo 90:1–106:48)

Isipon an manlaenlaen na dahelan sa pagrukyaw ki Jehova na nasambitan sa ikaapat na koleksion nin salmo. Sa Salmo 90, ikinomparar ni Moises an kalaenan kan pag-eksister kan “Hade sa panahon na daing sagkod” asin kan buhay nin tawo na madaling mawara. (1 Timoteo 1:17) Segun sa Salmo 91:2, inaapod ni Moises si Jehova bilang an ‘saiyang pailihan asin an saiyang kuta’—an saiyang Gikanan nin katiwasayan. An suminunod na pirang salmo nagtataram manongod sa magagayon na kualidad, nakakalabing mga kaisipan, asin makangangalas na mga gibo nin Dios. Tolong awit an nagpopoon sa ekspresyon na “si Jehova mismo nagin hade.” (Salmo 93:1; 97:1; 99:1) Nagtataram manongod ki Jehova bilang an satong Kaggibo, an salmista nag-iimbitar sa sato na ‘magpasalamat sa saiya, omawon an saiyang ngaran.’—Salmo 100:4.

Paano maninigong gibohon nin sarong namamahala na natatakot ki Jehova an saiyang mga aktibidad? An Salmo 101, na kinomponer ni Hadeng David, nagtatao kan simbag. An sunod na salmo nagsasabi sa sato na “tunay na hihinanyogon [ni Jehova] an pamibi kan mga hinalean kan gabos, asin dai nia isisikwal an saindang pamibi.” (Salmo 102:17) An ika-103 na Salmo nag-aapod nin atension sa mamomoton na kabootan asin pagkaherak  ni Jehova. Nasasambitan an dakol na ginibo nin Dios sa daga, an salmista nagkagsing: “Kanigoan kadakol kan saimong mga gibo, O Jehova! Gabos iyan ginibo mo sa kadonongan.” (Salmo 104:24) An ultimong duwang awit sa Ikaapat na Libro nag-oomaw ki Jehova huli sa saiyang makangangalas na mga gibo.—Salmo 105:2, 5; 106:7, 22.

Mga Hapot sa Kasuratan na Sinimbag:

91:1, 2—Ano an “hilom na lugar kan Kaharohalangkawe,” asin paano kita ‘makakaerok’ dian? Ini sarong piguratibong lugar nin espirituwal na kaligtasan asin katiwasayan—sarong kamugtakan na protektado sa espirituwal na danyos. An lugar na iyan hilom huli ta iyan dai aram kan mga dai nagtitiwala sa Dios. Ginigibo niato si Jehova na magin satong erokan paagi sa pagsarig sa saiya bilang satong pailihan asin kuta, paagi sa pag-omaw sa saiya bilang an Soberanong Namamahala sa uniberso, asin paagi sa paghuhulit kan maogmang bareta kan Kahadean. Kita nakakamateng tiwasay sa espirituwal huli ta aram niato na si Jehova pirmeng andam na magtabang sa sato.—Salmo 90:1.

92:12—Sa anong paagi na an mga matanos “mamumurak arog kan poon nin palma”? An poon nin palma midbid sa pagigin mabunga. An matanos na tawo kapareho nin sarong poon nin palma sa dahelan na sia tanos sa pagheling ni Jehova asin padagos na namumunga nin “marahay,” na kaiba an marahay na mga gibo.—Mateo 7:17-20.

Mga Leksion Para sa Sato:

90:7, 8, 13, 14. An salang gibo niato pirmeng nakakadanyar sa satong relasyon sa tunay na Dios. Asin an itinatagong mga kasalan dai puedeng itago sa saiya. Minsan siring, kun talagang nagsosolsol kita asin binabayaan an satong salang dalan, ibabalik kita ni Jehova sa saiyang pabor, na ‘binabasog kita kan saiyang mamomoton na kabootan.’

90:10, 12. Mantang an buhay halipot, maninigo na ‘bilangon niato an satuyang mga aldaw.’ Paano? Paagi sa pagkamit nin “puso na may kadonongan,” o paagi sa pagigin madonong tanganing an natatada pa niatong mga aldaw dai masayang kundi magamit sa paagi na nakakapaogma ki Jehova. Kaipuhan digdi an pagbugtak nin espirituwal na mga prioridad asin paggamit kan satong panahon sa madonong na paagi.—Efeso 5:15, 16; Filipos 1:10.

90:17. Angay na ipamibi na logod ‘parigonon ni Jehova an gibo kan satong mga kamot’ asin bendisyonan an satong mga paghihingoa sa ministeryo.

92:14, 15. Paagi sa pagigin mahigos na mga estudyante kan Tataramon nin Dios asin paagi sa regular na pakikiasosyar sa banwaan ni Jehova, an mga may edad na padagos na nagigin “mataba asin presko”—makosog sa espirituwal—asin nagigin kapakipakinabang sa kongregasyon.

94:19. Ano man an tibaad dahelan kan satong “nakakaribok na mga kaisipan,” mararanga kita sa pagbasa asin paghorophorop sa “mga panranga” na yaon sa Biblia.

95:7, 8. Malilikayan niato na magin matagas an puso paagi sa paghinanyog sa hatol na sono sa Kasuratan, pagtao nin atension dian, asin tolos na pagkuyog dian.—Salmo 95:7, 8.

106:36, 37. Sa mga bersikulong ini, an pagsamba sa mga idolo ikinokonektar sa mga pag-atang sa mga demonyo. Ipinaparisa kaini na an tawong naggagamit nin mga idolo puedeng mapasairarom kan impluwensia nin demonyo. Sinasadol kita kan Biblia: “Lumikay kamo sa mga idolo.”—1 Juan 5:21.

“Omawa Nindo si Jah!”

An huring tolong awit sa Ikaapat na Libro nin Salmo nagtatapos paagi sa konseho na: “Omawa nindo si Jah!” An huring salmo nagpopoon man paagi sa mga tataramon na iyan. (Salmo 104:35; 105:45; 106:1, 48) Sa katunayan, an ekspresyon na “Omawa nindo si Jah!” minalataw nin parate sa Ikaapat na Libro nin salmo.

Igwa nanggad kita nin dahelan na omawon si Jehova. An Salmo 73 sagkod 106 nagtatao sa sato nin dakol na pepensaron, na pinapano an satong puso nin pagpasalamat sa satong langitnon na Ama. Kun iniisip niato an gabos na ginibo na nia para sa sato asin gigibohon pa para sa sato sa ngapit, bako daw na napapahiro kita na ‘omawon si Jah’ sa bilog na makakaya niato?

[Ritrato sa pahina 10]

Arog ni Asaf, makakaya niatong atubangon an karatan paagi sa “pagrani sa Dios”

[Ritrato sa pahina 11]

Si Faraon nadaog sa Dagat na Pula

[Ritrato sa pahina 11]

Aram daw nindo kun taano an manna ta inaapod na “an mismong tinapay kan mga makapangyarihan”?

[Ritrato sa pahina 13]

Ano an makakatabang na mahale an satong “nakakaribok na mga kaisipan”?