An Gubing na Gibo sa Garapgasapon na Balukag nin Hayop Asin an Espirituwalidad

SI Hadeng Luis IX nin Pransia nagsulot nin saro kaiyan. Kan nag-aadal nin abogasiya kan sia hoben pa, si Sir Thomas More nagdadanay na mata sa laog nin 19 o 20 oras kada aldaw sa laog nin nagkapirang bulan sa tabang kaini. Sa katunayan, si More midbid na nagsulot nin saro kaini sa haros bilog niang buhay. Asin kan si Thomas Becket, an Arsobispo nin Canterbury, ginadan sa Katedral nin Canterbury, saro kaini an dai linalaoman na nakua sa irarom kan saiyang gubing. Ano an pagkakapareho kan mga personaheng ini sa kasaysayan? Ginibo ninda an pangongolog sa sadiri nindang laman paagi sa gubing na gibo sa garapgasapon na balukag nin hayop.

An gubing gibo sa garapgasapon na balukag nin kanding na isinusulot na nakadukot sa kublit tangani na mairitar kaiyan an laman asin magasgas an kublit, na nagigin dahelan nin grabeng kolog. Iyan madali man na istaran nin mga kuto. May nagsasabing si Thomas Becket nagsulot kan saiyang gubing na gibo sa garapgasapon na balukag nin hayop, kaiba kan saiyang pantalon na may kaparehong materyal, sagkod na “iyan napano nin kuto.” Pakalihis kan ika-16 na siglo, an balukag nin kanding kun beses sinasalidahan nin pinong alambre na may mga tarom sa poro na nakaatubang sa hawak. An paggibo kan gubing sa paaging ini nagtatao nin mas grabe pa nganing kolog sa nagsusulot kaini.

Oyon sa sarong reperensia, an katuyohan kan gubing na gibo sa garapgasapon na balukag nin hayop, arog kan iba pang porma nin pangongolog sa sadiri, iyo an “kontrolon an makasalan na laman asin sa siring enkaminaron an pagpatalubo nin mas espirituwal na disposisyon asin pamumuhay.” Bako sanang mga ascetiko an nagsusulot kan gubing na ini; an ordinaryong mga lego, kaiba an mga nasa katongdan sa gobyerno, midbid na naggagamit man kaiyan. Dawa ngonyan may nagkapirang orden nin relihion na nagsusunod kan kaugalean na ini.

Nagigin espirituwal na tawo daw an saro paagi sa pagsulot nin gubing na gibo sa garapgasapon na balukag nin hayop o pagtios nin mga porma nin pagpainda sa sadiri kan pisikal na mga pangangaipo? Dai, an espirituwalidad dai nakadepende sa arog kaiyan na mga kaugalean. Sa katunayan, si apostol Pablo nagtaram tumang sa “estriktong pagtratar sa hawak.” (Colosas 2:23) * Imbes, an tunay na espirituwalidad naggigikan sa paghanap kan kaaraman dapit sa Dios paagi sa mahigos na pag-adal kan saiyang Tataramon asin pag-aplikar kan kaaraman na iyan sa buhay nin saro.

[Nota sa Ibaba]

[Picture Credit Lines sa pahina 32]

Si Hadeng Luis IX, sa itaas: Hale sa librong Great Men and Famous Women; Si Thomas Becket, sa tahaw: Hale sa librong Ridpath’s History of the World (Tomo IV); Si Thomas More, sa ibaba: Hale sa librong Heroes of the Reformation, 1904