Magin Madonong​—Matakot sa Dios!

“An pagkatakot ki Jehova iyo an kapinonan nin kadonongan.”—TALINHAGA 9:10.

1. Taano ta masakit para sa dakol na saboton an ideya nin pagkatakot sa Dios?

MAY panahon kaidto na ibinibilang na pag-omaw an pagsabi sa saro na sia matatakton sa Dios. Para sa dakol ngonyan, an ideya nin pagkatakot sa Dios medyo lihis na sa uso asin masakit saboton. ‘Kun an Dios pagkamoot,’ tibaad ihapot ninda, ‘taano ta maninigo akong matakot sa saiya?’ Para sa sainda, an takot sarong negatibo, nakakaparalisar pa nganing emosyon. Minsan siring, an tunay na pagkatakot sa Dios may mas mahiwas na kahulogan asin, siring kan maheheling niato, bako sanang pagmate o emosyon.

2, 3. Ano an kabale sa tunay na pagkatakot sa Dios?

² Sa pagkagamit sa Biblia, an pagkatakot sa Dios sarong positibong ideya. (Isaias 11:3) Iyan sarong odok nanggad na reberensia asin hararom na paggalang sa Dios, sarong makosog na pagmawot na dai sia mapaanggot. (Salmo 115:11) Kaiba dian an pag-ako asin estriktong pagsusog sa moral na mga pamantayan nin Dios asin pagmawot na mamuhay sono sa sinasabi nin Dios na tama o sala. An sarong reperensia nagsasabi na an siring na nakakarahay na takot nagpapahayag “nin pundamental na aktitud sa Dios na nagbubunga nin madonong na gawe-gawe asin paglikay sa gabos na klase nin karatan.” Angay sana, sinasabi sa sato kan Tataramon nin Dios: “An pagkatakot ki Jehova iyo an kapinonan nin kadonongan.”—Talinhaga 9:10.

³ Tunay nanggad, kabale sa pagkatakot sa Dios an dakol na aspekto kan mga aktibidad nin tawo. Iyan konektado bako sanang sa kadonongan kundi siring man sa kagayagayahan, katoninongan, prosperidad, halawig na buhay, paglaom, pagtitiwala, asin kompiansa. (Salmo 2:11; Talinhaga 1:7; 10:27; 14:26; 22:4; 23:17, 18; Gibo 9:31) Iyan konektadong marhay sa pagtubod asin pagkamoot. Sa katunayan, kalabot dian an satong bilog na relasyon sa Dios asin kapwa tawo. (Deuteronomio 10:12; Job 6:14; Hebreo 11:7) Kaiba sa pagkatakot sa Dios an makosog na kombiksion na an satong langitnon na Ama personal na nagmamakolog sa sato asin andam na magpatawad sa satong mga paglapas. (Salmo 130:4) An mga maraot sana na habong magsolsol an may dahelan na masindak sa Dios. *—Hebreo 10:26-31.

Pakanood na Matakot ki Jehova

4. Ano an makakatabang sa sato na “makanood na matakot ki Jehova”?

⁴ Huling an pagkatakot sa Dios kaipuhan sa paggibo nin madonong na mga desisyon asin pag-ako kan mga bendisyon nin Dios, paano kita ‘makakanood na matakot ki Jehova’ sa tamang paagi? (Deuteronomio 17:19) Dakol na halimbawa nin matatakton sa Dios na mga lalaki asin babae an nakarekord sa Kasuratan “sa pagtokdo sa sato.” (Roma 15:4) Tanganing tabangan kitang masabotan kun ano talaga an boot sabihon kan matakot sa Dios, pensaron niato an buhay kan saro sa mga halimbawang iyan, si Hadeng David kan suanoy na Israel.

5. Paano nakatabang an pagpapastor na matokdoan si David manongod sa pagkatakot ki Jehova?

⁵ Isinikwal ni Jehova an enot na hade kan Israel, si Saul, huli sa saiyang pagkatakot sa banwaan asin sa saiyang kadaihan nin diosnon na takot. (1 Samuel 15:24-26) Sa ibong na lado, an paagi nin pamumuhay ni David asin an saiyang dayupot na relasyon ki Jehova nagpapamidbid sa saiya bilang sarong tawo na talagang matatakton sa Dios. Poon kan sia hoben pa, si David parateng nasa luwas na pinapastoran an mga karnero kan saiyang ama. (1 Samuel 16:11) An pagpastor kun banggi na natatangadan an mga bitoon siertong nakatabang ki David na masabotan an pagkatakot ki Jehova. Minsan ngani sadit sanang kabtang kan mahiwason na uniberso an naaaninaw ni David, nakaabot sia sa tamang konklusyon—an Dios maninigo sa satong paggalang asin pagsamba. “Kun naheheling ko an saimong kalangitan, an mga  gibo kan saimong mga moro, an bulan asin mga bitoon na saimong hinaman,” an isinurat nia kan huri, “ano an magagadanon na tawo ta sia ginigirumdom mo, asin an aki nin daganon na tawo ta sia inaataman mo?”—Salmo 8:3, 4.

6. Ano an namatean ni David kan masabotan nia an kadakulaan ni Jehova?

⁶ Angay sana, napahanga si David kan ikomparar nia an saiyang kasaditan sa mahiwason asin mabitoon na kalangitan. Imbes na makasindak sa saiya, an kaaraman na ini nagpahiro sa saiya na omawon si Jehova asin magsabi: “An kalangitan nagpapahayag kan kamurawayan nin Dios; asin an gibo kan saiyang mga kamot ipinagsasaysay kan kahiwasan.” (Salmo 19:1) An reberensiang ini ni David sa Dios orog pang nagpadayupot sa saiya ki Jehova asin nagin dahelan na gustohon ni David na manodan asin sunodon an Saiyang sangkap na mga dalan. Isip-isipa an namatean ni David kan sia umawit ki Jehova: “Ika dakula asin naggigibo nin mga ngangalasan; ika an Dios, ika sana. Tokdoi ako, O Jehova, dapit sa saimong dalan. Ako maglalakaw sa saimong katotoohan. Gibohang saro an sakong puso na matakot sa saimong ngaran.”—Salmo 86:10, 11.

7. Paano nakatabang ki David an pagkatakot sa Dios na labanan si Goliat?

⁷ Kan sakyadahon kan mga Filisteo an daga nin Israel, an saindang kampeon na may langkaw na mga tolong metro, si Goliat, dinuhagi an mga Israelita, na garo man sana nagsasabi: ‘Pumili kamo nin sarong lalaki na malaban sako nin solo! Kun sia manggana, maglilingkod kami sa saindo.’ (1 Samuel 17:4-10) Si Saul asin an bilog niang hukbo nagkasirindak—alagad si David dai. Aram nia na si Jehova an saro na dapat katakotan, bakong an siisay man na tawo, dawa gurano pa ini kamakapangyarihan. “Ako minadolok sa saimo sa ngaran ni Jehova nin mga hukbo,” an sabi ni David ki Goliat, “asin an bilog na kasararoan na ini makakaisi na si Jehova dai nagliligtas paagi sa espada o budyak, huli ta ki Jehova an ralaban.” Paagi sa saiyang lagpitaw asin sarong gapo—asin sa tabang ni Jehova—ginadan ni David an higante.—1 Samuel 17:45-47.

8. Ano an itinotokdo sa sato kan mga halimbawa sa Biblia nin mga matatakton sa Dios?

⁸ Tibaad mapaatubang kita sa mga kaolangan o kaiwal na siring kadakula kan mga napaatubang ki David. Ano an magigibo niato? Puede niatong atubangon iyan na siring kan pag-atubang dian ni David asin kan iba pang mga maimbod kan suanoy—atubangon iyan na may diosnon na takot. Kayang daogon kan pagkatakot sa Dios an pagkatakot sa tawo. Sinadol kan maimbod na lingkod nin Dios na si Nehemias an saiyang mga kapwa Israelita, na pinapasakitan kan mga paratumang: “Dai kamo matakot huli sa sainda. Papagdanaya nindo sa isip si Jehova na dakula asin makangingirhat na Saro.” (Nehemias 4:14) Huli sa pagsuportar ni Jehova, si David, Nehemias, asin an iba pang maimbod na mga lingkod nin Dios nagin mapanggana sa pag-otob kan saindang mga asignasyon na tao nin Dios. Kun kita may diosnon na takot, magigin mapanggana man kita.

Pag-atubang sa mga Problema na May Diosnon na Takot

9. Sa anong mga kamugtakan ipinaheling ni David an pagkatakot sa Dios?

⁹ Pakatapos na gadanon ni David si Goliat, tinawan sia ni Jehova nin dakol pang kapangganahan. Minsan siring, an nag-iimon na si Saul nagprobar—kan primero may pagkapusokpusokan, dangan may katusohan, asin sa katapustapusi kaiba an sarong hukbo—na gadanon si David. Minsan ngani inasegurar ni Jehova si David na sia magigin hade, sa laog nin dakol na taon kinaipuhan ni David na dumulag, lumaban, asin halaton an itinalaan na panahon ni Jehova na gibohon siang hade. Sa ibong kan gabos na ini, ipinaheling ni David na sia may takot sa tunay na Dios.—1 Samuel 18:9, 11, 17; 24:2.

10. Paano ipinaheling ni David an pagkatakot sa Dios sa atubangan nin peligro?

¹⁰ Sa sarong okasyon, si David nagpaili ki Aquis, na hade kan Filisteong siudad nin Gat, an pinaghalean ni Goliat. (1 Samuel 21:10-15) An mga lingkod kan hade idinenunsiar si David bilang kaiwal kan saindang nasyon. Ano an nagin reaksion ni David sa siring na peligrosong situwasyon? Sia odok sa pusong namibi ki Jehova. (Salmo 56:1-4, 11-13) Minsan ngani kinaipuhan niang magsagin nabubua tanganing makadulag, aram ni David na si Jehova talaga an nagligtas sa saiya paagi sa pagbendisyon sa saiyang mga paghihingoa. An bilog na pusong pagsarig ni David ki Jehova asin kompiansa sa saiya nagpaheling na si David talagang matatakton sa Dios.—Salmo 34:4-6, 9-11.

11. Paano niato ipapaheling an diosnon na takot sa irarom nin pagbalo, siring kan ginibo ni David?

¹¹ Arog ki David, puede niatong ipaheling an pagkatakot sa Dios paagi sa pagtitiwala sa saiyang panuga na tatabangan nia kita na makayanan an satong mga problema. “Idolot mo ki Jehova an saimong dalan,  asin manarig ka sa saiya, asin sia mismo mahiro,” an sabi ni David. (Salmo 37:5) Dai ini nangangahulogan na basta sana niato itatao ki Jehova an satong mga problema na dai ginigibo an ano man na makakaya niato tanganing maresolberan iyan asin aasahan siang humiro para sa sato. Si David dai namibi sa Dios para sa tabang dangan mayo nang ginibo. Ginamit nia an pisikal asin intelektuwal na mga abilidad na itinao sa saiya ni Jehova asin inatubang an problema. Pero, aram ni David na dai magigin mapanggana kun mga paghihingoa sana nin tawo an aasahan. Kaya maninigo na arog man kaiyan an gibohon niato. Kun nagibo na niato an gabos na makakaya niato, dapat na itao niato ki Jehova an iba pa. An totoo, sa parate mayo na kitang ibang magigibo kundi manarig ki Jehova. Digdi niato ikakapaheling an pagkatakot sa Dios sa personal na gayong paagi. Makakakua kita nin karangahan sa odok sa pusong kapahayagan ni David: “An pakikidayupot ki Jehova para sa mga natatakot sa saiya.”—Salmo 25:14.

12. Taano ta kaipuhan niatong seryosohon an satong mga pamibi, asin dai kita noarin man maninigo na magkaigwa nin anong aktitud?

¹² Kun siring, maninigo niatong seryosohon an satong mga pamibi asin an satong relasyon sa Dios. Kun kita minadolok ki Jehova, dapat na “magtubod [kita] na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6; Santiago 1:5-8) Asin kun tinatabangan nia kita, maninigo niatong ‘ipaheling na kita nagpapasalamat,’ siring kan hatol sa sato ni apostol Pablo. (Colosas 3:15, 17) Kita dai noarin man dapat na magin arog kan ilinadawan nin sarong may kabatidan na Kristianong linahidan: “Iniisip ninda na an Dios garo sarong langitnon na weyter,” an sabi nia. “Kun sinda nangangaipo nin ano man, gusto nindang magsenyas paagi sa pagpatanog kan saindang mga moro asin paranihon sia. Asin kun nakua na ninda an saindang gusto, gusto na ninda siang humale.” An siring na aktitud nagpapaheling nin kadaihan nin diosnon na takot.

Kan Magluya an Pagkatakot sa Dios

13. Kasuarin dai ikinapaheling ni David an paggalang sa Ley nin Dios?

¹³ An pakaeksperyensia kan tabang ni Jehova sa panahon nin kasakitan nagpararom sa pagkatakot ni David sa Dios asin nagpakosog kan kompiansa nia sa saiya. (Salmo 31:22-24) Minsan siring, sa tolong lataw na pangyayari, nagluya an pagkatakot ni David sa Dios, na grabe an nagin mga resulta. An enot may koneksion sa saiyang pag-areglo na darahon an kaban kan tipan ni Jehova pasiring sa Jerusalem na sakay nin kareta imbes na pasan kan mga Levita, siring kan ipinagboot kan Ley nin Dios. Kan kapotan ni Uza, na iyong naggigiya sa kareta, an  Kaban tanganing alalayan iyan, sia nagadan ora mismo huli sa saiyang “gaweng dai nin kagalangan.” Iyo, si Uza nagkasala nin magabat, pero an dai pakapagpadanay ni David nin tamang paggalang sa Ley nin Dios an pinakadahelan kan makaturotristeng resultang iyan. An pagkatakot sa Dios nangangahulogan nin paggibo kan mga bagay-bagay segun sa saiyang areglo.—2 Samuel 6:2-9; Bilang 4:15; 7:9.

14. Ano an nagin resulta kan pagbilang ni David kan Israel?

¹⁴ Kan huri, sa pag-agyat ni Satanas, binilang ni David an mga parapakilaban na lalaki kan Israel. (1 Cronica 21:1) Sa paggibo kaiyan, ipinaheling ni David na nagluya an saiyang pagkatakot sa Dios, na nagresulta sa pagkagadan nin 70,000 na Israelita. Minsan ngani si David nagsolsol sa atubangan ni Jehova, sia asin an mga nasa palibot nia nagdusa nin grabe.—2 Samuel 24:1-16.

15. Ano an dahelan kan pagkahulog ni David sa seksuwal na kasalan?

¹⁵ An saro pang temporaryong pagluya nin pagkatakot sa Dios nagin dahelan na si David magkaigwa nin inmoral na relasyon ki Bat-seba, an agom ni Urias. Aram ni David na sala an pagsambay o dawa ngani an pagmawot sa agom nin iba. (Exodo 20:14, 17) An problema nagpoon kan maheling ni David si Bat-seba mantang ini nagkakarigos. An tamang pagkatakot sa Dios maninigo kutanang nagpahiro ki David na tolos-tolos na ikiling an saiyang mga mata asin an saiyang isip sa ibang bagay. Imbes kaiyan, minalataw na si David ‘nagparaheling’ sa saiya sagkod na an horot nangibabaw sa saiyang pagkatakot sa Dios. (Mateo 5:28; 2 Samuel 11:1-4) Nalingawan ni David na si Jehova kalabot sa gabos na aspekto kan saiyang buhay.—Salmo 139:1-7.

16. Anong mga resulta an pinagdusahan ni David huli sa saiyang pakaginibo nin sala?

¹⁶ An inmoral na relasyon ni David ki Bat-seba nagbunga nin sarong aki. Dai nahaloy pagkatapos kaiyan, sinugo ni Jehova an saiyang propetang si Natan tanganing ibuyagyag an kasalan ni David. Kan makapag-isip-isip, nabawi ni David an saiyang pagkatakot sa Dios asin nagsolsol. Nakimaherak sia ki Jehova na dai sia isikwal o haleon an Saiyang banal  na espiritu sa saiya. (Salmo 51:7, 11) Pinatawad ni Jehova si David asin pinagian an padusa, alagad dai Nia prinotehiran si David sa gabos na maraot na resulta kan saiyang mga ginibo. Nagadan an aki ni David, asin poon kaidto nagsapar nin kamondoan asin trahedya an saiyang pamilya. Kanigoan kamakamomondong resulta nin pagluya nin pagkatakot sa Dios!—2 Samuel 12:10-14; 13:10-14; 15:14.

17. Iilustrar an kamondoan na ibinubunga nin pagkakasala.

¹⁷ Ngonyan, an dai pagpaheling nin takot sa Dios sa mga bagay na may koneksion sa moral puede man na magkaigwa nin grabe asin naghahaloy na mga epekto. Imahinara an kolog sa boot nin sarong hoben pang agom na babae kan maaraman nia na an saiyang Kristianong agom dai nagin maimbod sa saiya mantang nagtatrabaho sa ibang nasyon. Napahukro sa pagkabigla asin kamondoan, isinubsob nia an saiyang lalauogon sa saiyang mga kamot asin nagparahibi. Gurano kalawig na panahon an kakaipuhanon bago mabawi kan saiyang agom an saiyang pagtitiwala asin paggalang? An siring na makaturotristeng mga resulta puedeng malikayan paagi sa tunay na pagkatakot sa Dios.—1 Corinto 6:18.

Pinopogolan Kita kan Pagkatakot sa Dios na Magkasala

18. Ano an obheto asin paagi nin paghiro ni Satanas?

¹⁸ Marikason na rinaraot ni Satanas an moral na mga prinsipyo sa buhay kan kinaban, asin nangorognang gusto niang raoton an tunay na mga Kristiano. Tanganing magibo iyan, inaaprobetsaran nia an pinakadirektang agihan pasiring sa satong puso asin isip—paagi sa satong mga sentido, partikularmente an satong mga mata asin talinga. (Efeso 4:17-19) Paano kamo mahiro kun dai nindo tinutuyong mapaatubang sa inmoral na mga ladawan, tataramon, o mga tawo?

19. Paano nakatabang an diosnon na takot sa sarong Kristiano na paglabanan an sugot?

¹⁹ Estudyare an halimbawa ni Andre *, sarong Kristianong magurang sa kongregasyon, ama, asin doktor sa Europa. Kan magdamlag an laog ni Andre sa ospital, an mga babaeng katrabaho nia paorootrong nagtatadik nin mga mensahe—na may dekorasyon na puso—sa saiyang ulunan, na inaagda siang magkaigwa nin seksuwal na relasyon sa sainda. Si Andre marigon na dai nagtao nin atension sa saindang mga pan-aakit. Dugang pa, tanganing irayo an saiyang sadiri sa maraot na kamugtakan, naghanap sia nin trabaho sa ibang lugar. An pagkatakot sa Dios madonong nanggad asin nagbunga nin mga bendisyon, huli ta ngonyan si Andre naglilingkod nin part-time sa sangang opisina kan Mga Saksi ni Jehova sa saiyang nasyon.

20, 21. (a) Paano kita matatabangan kan pagkatakot sa Dios na makalikay na magkasala? (b) Ano an totokaron sa sunod na artikulo?

²⁰ An pagparaisip nin maraot puedeng gumiya sa sarong kamugtakan nin isip na an sarong tawo andam na bayaan an saiyang mahalagang marhay na relasyon ki Jehova karibay nin sarong bagay na mayo sia nin deretso. (Santiago 1:14, 15) Sa ibong na lado, kun kita natatakot ki Jehova, rarayoan niato—dudulagan pa ngani niato—an mga tawo, lugar, aktibidad, asin aling-alingan na puedeng magpaluya sa satong pag-iingat sa moral. (Talinhaga 22:3) Ano man na pagkasupog o sakripisyo an tibaad kalabot, iyan sadit sana kun ikokomparar sa pagkawara kan pabor nin Dios. (Mateo 5:29, 30) Kaiba nanggad sa pagkatakot sa Dios an dai noarin man tuyong pagrani niato sa ano man na bagay na inmoral, kaiba an ano man na klase nin pornograpiya, kundi imbes, ‘pagrayo kan satong mga mata sa pakaheling kan daing halaga.’ Kun gigibohon niato iyan, makakapagtiwala kita na ‘papagdadanayon kitang buhay’ ni Jehova asin itatao nia sa sato an gabos na kaipuhan talaga niato.—Salmo 84:11; 119:37.

²¹ Tunay nanggad, an paghiro na may tunay na pagkatakot sa Dios iyo an pirmeng madonong na gibohon. Iyan man an ginigikanan nin tunay na kaogmahan. (Salmo 34:9) Lilinawon ini sa sunod na artikulo.

[Mga Nota sa Ibaba]

Ikakapaliwanag daw Nindo?

• Anong Kristianong mga kualidad an kaiba sa pagkatakot sa Dios?

• Paano linalabanan kan pagkatakot sa Dios an pagkatakot sa tawo?

• Paano niato ikakapaheling na kita may tamang pagmansay sa pamibi?

• Paano kita mapopogolan kan pagkatakot sa Dios na magkasala?

[Mga Hapot Para sa Pag-adal]

[Ritrato sa pahina 23]

Nanodan ni David an pagkatakot sa Dios kan pinagmamasdan nia an mga ginibo ni Jehova

[Mga Ritrato sa pahina 24]

Ano an gigibohon nindo kun dai tinutuyong mapaatubang kamo sa sarong situwasyon na nakakatentar?