Matakot ki Jehova​—Magin Maogma!

“Maogma an tawo na natatakot ki Jehova.”—SALMO 112:1.

1, 2. Ano an puedeng ibunga kan pagkatakot ki Jehova?

AN KAOGMAHAN bakong madaling kamtan. An tunay na kaogmahan nakadepende sa paggibo nin tamang mga pagpili, paggibo kan tama, asin pagrayo sa sala. An satong Kaggibo, si Jehova, nagtao sa sato kan saiyang Tataramon, an Biblia, tanganing tokdoan kita kun paano makakamtan an pinakamarahay na paagi nin pamumuhay. Paagi sa paghanap asin pagsunod sa paggiya ni Jehova, na paagi kaiyan ikinakapaheling niato an pagkatakot sa Dios, puede kitang magin tunay na naninigoan asin maogma.—Salmo 23:1; Talinhaga 14:26.

² Sa artikulong ini, eestudyaran niato an mga halimbawa sa Biblia asin sa presenteng aldaw na nagpapaheling kun paanong an tunay na pagkatakot sa Dios nagtatao nin kosog na labanan an pan-iimpluwensia na gibohon an sala asin nin kosog nin boot na gibohon an tama. Maheheling niato na an diosnon na takot puedeng magtao sa sato nin kaogmahan paagi sa pagpahiro sa sato na itanos an salang dalan, siring kan kinaipuhan na gibohon ni Hadeng David. Maheheling man niato na an pagkatakot ki Jehova mahalagang marhay nanggad na pamana na ikakatao kan mga magurang sa saindang mga aki. Tunay nanggad, an Tataramon nin Dios nag-aasegurar sa sato: “Maogma an tawo na natatakot ki Jehova.”—Salmo 112:1.

Pagbawi sa Nawarang Kaogmahan

3. Ano an nakatabang ki David na makabawi sa saiyang mga kasalan?

³ Siring kan tinokar sa naenot na artikulo, sa tolong lataw na pangyayari, si David dai nakapaheling nin tamang diosnon na takot asin nagkasala. Minsan siring, an saiyang reaksion sa disiplina ni Jehova nagpaheling na sia sa pangenot tawong matatakton sa Dios. An saiyang reberensia asin paggalang sa Dios nagpahiro sa saiya na admitiron na sia may sala, itanos an saiyang dalan, asin ibalik giraray an marahay na relasyon ki Jehova. Minsan ngani an saiyang mga sala nagbunga nin pagdusa sa saiya asin sa iba, huli sa saiyang tunay na pagsolsol nakua nia an padagos na suporta asin bendisyon ni Jehova. An halimbawa ni David siertong makakatao nin kosog  nin boot sa mga Kristiano ngonyan na tibaad makakomiter nin magabat na kasalan.

4. Paano makakatabang an pagkatakot sa Dios na mabawi nin sarong indibiduwal an kaogmahan?

⁴ Helingon niato an halimbawa ni Sonja. * Minsan ngani naglilingkod bilang bilog na panahon na ebanghelisador, si Sonja nagkaigwa nin maraot na pag-iriba, napalabot sa gawe-gawe na bakong sa Kristiano, asin kinaipuhan na itiwalag sa Kristianong kongregasyon. Kan makapag-isip-isip, ginibo ni Sonja an gabos na kinakaipuhan tanganing pakarhayon an saiyang relasyon ki Jehova. Pag-abot nin panahon, sia ibinalik sa kongregasyon. Sa ibong kan gabos na ini, dai noarin man binutasan ni Sonja an saiyang pagmawot na maglingkod ki Jehova. Pag-abot nin panahon, naglaog giraray sia sa bilog na panahon na ministeryo bilang payunir. Kan huri, naagom sia kan sarong arogan na Kristianong magurang sa kongregasyon, asin ngonyan sia maogmang naglilingkod kaiba nia sa kongregasyon. Minsan ngani pinagbabasolan ni Sonja na sia temporaryong naparayo sa Kristianong dalan, maogma sia na an saiyang pagkatakot sa Dios nakatabang sa saiya na makabalik.

Magdusa Imbes na Magkasala

5, 6. Ipaliwanag kun paano asin kun taano ta duwang beses na dai ginadan ni David si Saul.

⁵ Siempre, mas marahay kun an pagkatakot sa Dios nakakatabang sa saro na likayan na magkasala. Nagin totoo ini ki David. Sarong beses, kan linalapag si David kaiba an tolong ribong soldados, si Saul naglaog sa sarong kueba—an mismong kueba na pinagtatagoan ni David asin kan saiyang mga tawohan. Si David sinadol kan saiyang mga tawohan na gadanon si Saul. Bako daw na itinatao na ni Jehova sa kamot ni David an saiyang mortal na kaiwal? Silensiong hinikap ni David si Saul asin pinutol an gayad kan gubing kaini. Huling si David may pagkatakot sa Dios, dawa an aktong iyan na dai man ngani nakakadanyar nakapurisaw sa saiyang konsensia. Pinaharale ni David an saiyang nagkakariribok na mga tawohan, na sinasabi: “Dai ko lamang pepensaron, sa punto de vista ni Jehova, na gibohon ko an bagay na ini sa sakong kagurangnan, an linahidan ni Jehova.” *—1 Samuel 24:1-7.

⁶ Sa sarong pangyayari kan huri, si Saul nagkakampo tanganing magpalihis nin banggi, asin sia saka an gabos niang tawohan inabotan nin “nanok na torog hale ki Jehova.” Si David asin an saiyang pusoan na sobrinong si Abisai marikas na luminusot pasiring sa pinakatanga kan kampo asin tuminindog na kataed mismo kan natotorog na si Saul. Gusto na talaga ining gadanon ni Abisai. Pinogolan ni David si Abisai, na naghahapot: “Siisay an nagbikyaw kan saiyang kamot tumang sa linahidan ni Jehova asin nagdanay na daing kasalan?”—1 Samuel 26:9, 12.

7. Ano an nakapogol ki David na magkasala?

⁷ Taano ta dai ginadan ni David si Saul kan duwang beses siang nagkaoportunidad na gibohon ini? Huling may orog siang pagkatakot ki Jehova kisa pagkatakot ki Saul. Huli sa tamang pagkatakot sa Dios, si David andam na magdusa, kun kinakaipuhan, kisa magkasala. (Hebreo 11:25) Lubos an kompiansa nia sa pagmakolog ni Jehova sa Saiyang banwaan asin sa saiya mismo. Aram ni David na an pagkuyog asin pagtitiwala sa Dios magbubunga nin kaogmahan asin dakol na bendisyon, mantang an pag-ignoro sa Dios maresulta sa dai pag-oyon sa saiya nin Dios. (Salmo 65:4) Aram man nia na ootobon nin Dios an Saiyang panuga na gigibohon na hade si David asin hahaleon si Saul sa Saiya mismong itinalaan na panahon asin paagi.—1 Samuel 26:10.

An Pagkatakot sa Dios Nagbubunga nin Kaogmahan

8. Paano nagseserbing arogan an iginawe ni David mientras na nasa masakit na kamugtakan?

⁸ Bilang mga Kristiano, malalaoman niato an pag-olog-olog, persekusyon, asin iba pang pagbalo. (Mateo 24:9; 2 Pedro 3:3) Kun beses, tibaad makaeksperyensia pa ngani kita nin mga problema may koneksion sa mga kapwa parasamba. Minsan siring, aram niato na naheheling ni Jehova an gabos na bagay, nadadangog an satong mga pamibi asin, sa tamang panahon, itatanos nia an mga bagay-bagay segun sa saiyang kabotan. (Roma 12:17-21; Hebreo 4:16) Kun siring, imbes na matakot sa mga nagkokontra sa sato, natatakot kita sa Dios asin nag-aasa sa saiya na ililigtas kita. Arog ki David, dai kita nagbabalos, ni ikinokompromiso niato an matanos na mga prinsipyo tanganing makalikay sa pagdusa. Sa katapustapusi, nagbubunga ini nin kaogmahan. Alagad paano?

9. Magtao nin halimbawa kun paanong an pagkatakot sa Dios puedeng magbunga nin kaogmahan sa ibong nin persekusyon.

 ⁹ “Iniisip ko an manongod sa sarong ina asin sa saiyang tinedyer na aking babae na nagsayumang bumakal nin mga kard nin partido politikal huli sa saindang Kristianong neutralidad,” an isinasaysay nin sarong haloyan nang misyonero sa Aprika. “Sinda maringis na kinolgan nin sarong grupo nin mga lalaki dangan sinabihan sindang pumuli. Kan sinda naglalakaw papuli, hiningoa kan ina na rangahon an saiyang naghihibing aking babae, na nadedepisilan na saboton kun taano ta nangyari ini. Bako sindang magayagaya kan panahon na idto, alagad malinig an saindang konsensia. Kan huri, ogmahon sindang marhay na kinuyog ninda an Dios. Kun binakal ninda an mga kard nin partido, labi-labi kutana an kaogmahan kan grupong idto. Tibaad an mga lalaking idto nagtao kutana sa sainda nin mga soft drink asin nagbarayle sa palibot ninda sagkod na makapuli sinda. Alagad an daragita asin an saiyang ina, sa pakaaram na sinda nagkompromiso, magigin kutana an pinakamamondong tawo sa kinaban.” An saindang pagkatakot sa Dios nakaprotehir na mangyari iyan sa sainda.

10, 11. Ano an marahay na mga ibinunga nin pagkatakot sa Dios nin sarong babae?

¹⁰ An pagpaheling nin diosnon na takot nagbubunga man nin kaogmahan kun napapaatubang sa mga pagbalo na kalabot an paggalang sa pagigin sagrado nin buhay. Kan ipinagbabados ni Mary an saiyang ikatolong aki, sinadol sia kan doktor na ipakua an aki. “Peligroso an saimong kamugtakan,” an sabi nia. “Ano man na oras puede kang magkaigwa nin mga komplikasyon asin magadan sa laog nin 24 oras. Dangan an omboy magagadan man. Ano man an situwasyon, mayo nin garantiya na magigin normal an omboy.” Si Mary haloy nang nakikipag-adal sa Biblia sa mga Saksi ni Jehova alagad dai pa bautisado. “Pero,” an sabi ni Mary, “nagdesisyon na akong paglingkodan si Jehova, asin determinado akong magdanay na makinuyog sa saiya, ano man an mangyari.”—Exodo 21:22, 23.

¹¹ Durante kan saiyang pagbabados, si Mary nagdanay na sibot sa pag-adal sa Biblia asin pag-asikaso sa saiyang pamilya. Sa katapustapusi namundag an omboy. “Medyo mas depisil an pangangaki kisa sa naenot na duwa, alagad mayo man nin mayor na mga komplikasyon,” an isinaysay ni Mary. An pagkatakot sa Dios nakatabang ki Mary na papagdanayon an sarong malinig na konsensia, asin dai nahaloy sia nabautismohan. Mantang nagdadakula an omboy, nanodan man nia na matakot ki Jehova, asin sa presente sia naglilingkod sa saro kan mga sangang opisina kan Mga Saksi ni Jehova.

‘Pakosogon Nindo an Saindong Sadiri Paagi ki Jehova’

12. Paano nakapakosog ki David an pagkatakot sa Dios?

¹² An pagkatakot ni David ki Jehova bako sanang nakapogol sa saiya sa paggibo nin sala. Pinakosog sia kaiyan na humiro na may pagkadesidido asin kadonongan sa masakit na mga kamugtakan. Sa laog nin sarong taon asin apat na bulan, si David asin an saiyang mga tawohan nagpaili tumang ki Saul sa Ziklag sa puerang lugar kan mga Filisteo. (1 Samuel 27:5-7) Sarong beses kan mayo an mga lalaki, an nananalakat na mga Amalequita sinolo an siudad asin dinarang bihag an gabos na agom na babae, aki, asin aripompon. Kan bumalik asin maheling an nangyari, nagtangis si David asin an saiyang mga tawohan. An kamondoan madaling nasalidahan nin kaanggotan, asin an mga tawohan ni David nagtaram na gapoon sia. Minsan ngani napurisaw, si David dai nadesesperar. (Talinhaga 24:10) An saiyang pagkatakot sa Dios nagpahiro sa saiya na dumolok ki Jehova, asin “pinakosog [nia] an saiyang sadiri paagi ki Jehova.” Sa tabang nin Dios, inabotan ni David asin kan saiyang mga tawohan an mga Amalequita asin nabawi an gabos.—1 Samuel 30:1-20.

13, 14. Paano an pagkatakot sa Dios nakatabang sa sarong Kristiana na makagibo nin tamang mga desisyon?

¹³ An mga lingkod nin Dios ngonyan napapaatubang man sa mga situwasyon na naghahagad nin pagtitiwala ki Jehova asin kosog nin boot na humiro nin desidido. Kuanon niatong halimbawa si Kristina. Kan aki pa, si Kristina nakipag-adal sa Biblia sa mga Saksi ni Jehova. Alagad gusto nia kaidtong magin pianista sa konsierto, asin nag-oswag siang marhay sa langtad na iyan. Dugang pa, nasusupog pa siang maghulit asin kun siring natatakot na akoon an mga paninimbagan na konektado sa bautismo. Mantang ipinagpapadagos ni Kristina an pag-adal kan Tataramon nin Dios, nagpoon na mamatean nia an puersa kaiyan. Nanonodan na nia an pagkatakot ki Jehova, asin narealisar nia na linalaoman ni Jehova an saiyang mga lingkod na kamotan sia sa bilog nindang puso, isip, kalag, asin kosog. (Marcos 12:30) Nagpahiro ini sa saiya na idusay an saiyang sadiri ki Jehova asin magpabautismo.

 ¹⁴ Si Kristina naghagad nin tabang ki Jehova na umoswag sa espirituwal. “Aram ko na kalabot sa buhay nin pianista sa konsierto an daing ontok na pagparabiahe asin mga kontrata na tumugtog nin sagkod sa 400 na konsierto kada taon,” an paliwanag ni Kristina. “Kaya imbes kaiyan nagdesisyon ako na magin maestra tanganing suportaran an sakong sadiri sa pinansial asin maglingkod bilang bilog na panahon na ebanghelisador.” Kan panahon na idto, si Kristina nakaiskedyul nang ipaheling an primero niang pagtugtog sa publiko sa pinakabantog na teatro sa konsierto sa saiyang nasyon. “An sakuyang primerong konsierto iyo man an nagin ultimong konsierto ko,” an isinaysay nia. Pakatapos kaiyan si Kristina naagom nin sarong Kristianong magurang sa kongregasyon. Magkaiba sinda ngonyan na naglilingkod sa saro sa mga sangang opisina kan Mga Saksi ni Jehova. Naoogma sia na si Jehova nagtao sa saiya kan kosog na makagibo nin tamang mga desisyon asin na nagagamit na nia ngonyan an saiyang panahon asin kosog sa paglilingkod sa saiya.

Sarong Mahalagang Marhay na Mana

15. Ano an gustong ipamana ni David sa saiyang mga aki, asin paano nia iyan ginibo?

¹⁵ “Madia kamo, mga aki, hinanyoga ako nindo,” an isinurat ni David. “An pagkatakot ki Jehova iyo an itotokdo ko sa saindo.” (Salmo 34:11) Bilang sarong ama, si David determinadong ipamana sa saiyang mga aki an mahalagang marhay na mana—an tunay, timbang, nakakarahay na pagkatakot ki Jehova. Paagi sa mga tataramon asin gibo, ilinadawan ni David si Jehova, bakong bilang depisil manigoan asin makatatakot na Dios, na binabantayan an ano man na paglapas sa Saiyang mga ley, kundi bilang sarong mamomoton, may pagmakolog, asin mapagpatawad na Ama kan Saiyang daganon na mga aki. “Mga salang hiro siisay an makakasubaybay?” an hapot ni David. Dangan ipinaparisa an saiyang kompiansa na dai pirepirmeng sinisiyasat ni Jehova an satong mga sala, idinugang nia: “Ibilang mo akong daing sala sa mga bagay na dai naririsa!” Nakakasierto si David na kun hihingoahon niang gibohon an saiyang pinakamakakaya, maaako ni Jehova an saiyang mga tataramon asin kaisipan.—Salmo 19:12, 14, Byington.

16, 17. Paano ikakatokdo kan mga magurang sa mga aki an pagkatakot ki Jehova?

 ¹⁶ Si David nagseserbing halimbawa sa mga magurang ngonyan. “Pinadakula kami kan samong mga magurang sa paagi na nakakagayagaya an pagigin nasa katotoohan,” an sabi ni Ralph, na naglilingkod kaiba an saiyang tugang na lalaki sa sangang opisina nin Mga Saksi ni Jehova. “Kan kami hoben pa, iinaayon ninda kami sa saindang mga pag-oolay manongod sa mga aktibidad sa kongregasyon, asin kami nagin entusiastiko manongod sa katotoohan na kapareho ninda. Pinadakula ninda kami na maniwala na may mararahay kaming magigibo sa paglilingkod ki Jehova. Sa katunayan, sa laog nin nagkapirang taon an samong pamilya nag-istar sa sarong nasyon na may dakulang pangangaipo para sa mga parahayag kan Kahadean asin nagtabang na mag-establisar nin bagong mga kongregasyon.

¹⁷ “An nagpadanay sa samo sa tamang dalan bakong an kadakol na estriktong reglamento kundi an bagay na para sa mga magurang niamo, si Jehova tunay asin mabooton patin marahayon. Hiningoa ninda na orog pang mamidbid si Jehova asin paogmahon sia, asin nakanood kami sa saindang tunay na pagkatakot sa Dios asin pagkamoot sa saiya. Dawa kun nakagibo kami nin sala, dai ipinapamate sa samo kan mga magurang niamo na dai na kami namomotan ni Jehova; ni sinda anggot na nagtatao sa samo nin dai kinakaipuhan na mga restriksion. Sa parate, pinapatukaw ninda kami asin kinakaolay sana kami, na si Nanay kun beses may luha sa saiyang mga mata, na hinihingoang aboton an samong puso. Asin epektibo iyan. Nanodan niamo paagi sa mga tataramon asin gibo kan samong mga magurang na marahayon an pagkatakot ki Jehova asin na an pagigin saro sa saiyang mga Saksi nakakagayagaya asin kawiliwili, bakong pagabat.”—1 Juan 5:3.

18. Ano an makakamtan niato huli sa pagkatakot sa tunay na Dios?

¹⁸ Kabilang sa “huring mga tataramon ni David,” mababasa niato: “Kun an namamahala sa katawohan matanos, na namamahala na may takot sa Dios, kun siring iyan siring sa liwanag kan kaagahan, kun minasubang an aldaw.” (2 Samuel 23:1, 3, 4) Minalataw na nasabotan iyan ni Salomon, na aki asin kasalihid ni David, huli ta hinagad nia na logod tawan sia ni Jehova nin “pusong makinuyog” asin kan kakayahan na “mabatid kun ano an marahay asin an maraot.” (1 Hade 3:9) Rinekonoser ni Salomon na an pagkatakot ki Jehova nagbubunga nin kadonongan asin kaogmahan. Kan huri, sinumaryo nia an libro nin Eclesiastes sa mga tataramon na: “An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo. Huli ta an tunay na Dios mismo dadarahon an lambang klase nin gibo sa paghokom mapadapit sa lambang hilom na bagay, kun baga iyan marahay o maraot.” (Eclesiastes 12:13, 14) Kun hihimateon niato an konsehong iyan, manonompongan nanggad niato na “an bunga nin kapakumbabaan asin pagkatakot ki Jehova” bako sanang kadonongan asin kaogmahan kundi siring man “kayamanan asin kamurawayan patin buhay.”—Talinhaga 22:4.

19. Ano an makakatabang sa sato na masabotan “an pagkatakot ki Jehova”?

¹⁹ Base sa mga halimbawa sa Biblia asin mga eksperyensia sa presenteng aldaw, naheheling niato na an tamang pagkatakot sa Dios may positibong kabtang sa buhay nin tunay na mga lingkod ni Jehova. An siring na pagkatakot bako sanang nag-oolang sa sato na gibohon an ikinakaanggot kan satong langitnon na Ama kundi makakatao man iyan sa sato kan kosog nin boot na atubangon an satong mga kaiwal asin kan kosog na tagalan an mga pagbalo asin kasakitan na napapaatubang sa sato. Kun siring, hoben man asin gurang, magmahigos kita sa pag-adal kan Tataramon nin Dios, na hinohorophorop an satong nanonodan, asin minadayupot ki Jehova paagi sa regular asin odok sa pusong mga pamibi. Paagi sa paggibo kaiyan, bako sanang makukua niato “an mismong kaaraman nin Dios” kundi masasabotan man niato “an pagkatakot ki Jehova.”—Talinhaga 2:1-5.

[Mga Nota sa Ibaba]

Ikakapaliwanag daw Nindo?

Paano an pagkatakot sa Dios

• makakatabang sa saro na makabawi sa magabat na kasalan?

• makakapagtao nin kaogmahan sa ibong nin mga pagbalo asin persekusyon?

• makakapakosog sa sato na gibohon an kabotan nin Dios?

• puedeng magin mahalagang marhay na pamana para sa satong mga aki?

[Mga Hapot Para sa Pag-adal]

[Ritrato sa pahina 26]

Pinogolan si David kan pagkatakot ki Jehova na kolgan si Hadeng Saul

[Mga Ritrato sa pahina 29]

An pagkatakot sa Dios sarong mahalagang marhay na pamana na ikakatao kan mga magurang sa saindang mga aki