Mga Hapot Hale sa mga Parabasa
Mga Hapot Hale sa mga Parabasa
Paano niato naaaraman na an paglaladawan sa kadonongan sa Talinhaga 8:22-31 aplikado ki Jesu-Cristo sa saiyang buhay bago sia nagin tawo?
An ipinasabong na paglaladawan sa kadonongan na manonompongan sa libro nin Talinhaga nagsasabi: “Si Jehova mismo an guminibo sa sako bilang kapinonan kan saiyang dalan, an pinakaenot sa saiyang mga nagibo kan suanoy na mga panahon. . . . Bago pa namugtak an kabukidan, antes pa an kabubuldan, ako ipinangaki na garo pinagporosan . . . Kan andamon nia an kalangitan yaon ako duman; . . . yaon ako kaidto sa kataed nia bilang pangenot na trabahador, asin ako an nangongorog niang kinakaogmahan sa aroaldaw, mantang ako maogma sa atubangan nia sa gabos na panahon, . . . asin an mga bagay na sakong kinakaogmahan yaon sa mga aki nin mga tawo.”
An tekstong ini dai puedeng nagtataram sana manongod sa kadonongan nin Dios o sa kadonongan na ideya. Taano ta dai? Huli ta an kadonongan na ilinaladawan digdi “ginibo,” o linalang, bilang kapinonan kan dalan ni Jehova. Si Jehova Dios nag-eeksister sa gabos na panahon asin madonong sa gabos na panahon. (Salmo 90:1, 2) An saiyang kadonongan mayo nin kapinonan; iyan dai linalang ni ginibo. Dai iyan “ipinangaki na garo pinagporosan.” Apuera kaini, an kadonongan na ini sinasabing nagtataram asin naghihiro, na nagrerepresentar sa sarong persona.—Talinhaga 8:1.
An libro nin Talinhaga nagsasabi na kan suanoy na panahon an kadonongan nasa kataed ni Jehova, an Kaglalang, bilang “pangenot na trabahador.” Minaaplikar nanggad iyan ki Jesus. Haloy pa bago sia nagdigdi sa daga, si Jesus nagtrabaho na kaibanan nin dayupot ni Jehova kaya an Tataramon nin Dios nagsasabi: “Enot sia sa gabos na ibang bagay asin paagi sa saiya ginibo an gabos na ibang bagay.”—Colosas 1:17; Kapahayagan 3:14.
Angay sanang iladawan an Aki nin Dios bilang kadonongan, huli ta sia an Saro na naghayag kan madonong na mga katuyohan asin dekreto ni Jehova. Durante kan saiyang buhay bago sia nagin tawo, si Jesus an Tataramon nin Dios, o Representante sa Pagtaram. (Juan 1:1) Ilinaladawan sia bilang “an kapangyarihan nin Dios asin an kadonongan nin Dios.” (1 Corinto 1:24, 30) Magayon na paglaladawan nanggad kan Aki nin Dios, na an kaogmahan sa katawohan nagpahiro sa saiya na itao an saiyang buhay bilang pantubos para sa sainda!—Juan 3:16.
[Ritrato sa pahina 31]
“Bago pa . . . an kabukidan . . . ako ipinangaki na”