Estorya nin Buhay

Nagkasararo sa Katapustapusi an Samong Pamilya!

ISINAYSAY NI SUMIKO HIRANO

Nanompongan ko an pinakamarahay na pamumuhay, asin mawot ko man na maeksperyensiahan iyan kan sakong agom. Kuarenta y dos na taon an malihis bago iyan mangyari.

IKINASAL kami kan sakong agom kan 1951, kan ako 21 anyos. Sa laog nin apat na taon, may duwa kaming aking lalaki, asin an sakong buhay garo baga nagin maogma sa gabos na paagi.

Sarong aldaw kan 1957, sinabi kan sakong matuang tugang na babae na may nagbibisita saiyang misyonera nin Mga Saksi ni Jehova. Minsan ngani sarong Budista, nagpoon an tugang ko na makipag-adal kan Biblia sa misyonera asin inenkaminar ako na mag-adal man kan Biblia. Nagtogot ako. Nag-aatender ako sa iglesia Protestante, asin kaya kong ipaheling an mga sala kan Mga Saksi ni Jehova—iyan an paghona ko.

Nanompongan ko tolos kun gurano kadikit an sakong aram manongod sa Biblia. Kinaipuhan kong hapoton an misyonera, “Siisay si Jehova?” Nungka kong nadangog na ginamit an ngaran na iyan sa sakong iglesia. An misyonera, si Daphne Cooke (kan huri nagin Pettitt), itinokdo ako sa Isaias 42:8, na malinaw na nagsasabi na Jehova an ngaran kan Makakamhan sa Gabos na Dios. Sinimbag ni Daphne an gabos kong hapot paagi sa paggamit kan Biblia.

Ihinapot ko sa samong ministro an kaparehong mga hapot. Sinabi nia sako: “An paghapot sarong kasalan. Magtubod ka lang sa mga sinabi saimo.” Minsan ngani dai ko namatean na an paghapot sala, sa laog nin anom na bulan nagsimba ako kada Domingo sa aga asin nag-atender sa mga pagtiripon kan Mga Saksi ni Jehova sa hapon.

An Epekto sa Samong Relasyon Mag-agom

Napalukso an puso ko sa sakong mga nanodan sa Biblia, asin ihiniras ko iyan sa sakong agom, si Kazuhiko. Pakatapos kan kada pag-adal asin pagtiripon,  sinasabi ko sa saiya an sakong nanodan. Huli kaiyan bako nang arog kan dati katoninong an kamugtakan sa pag-oltanan niamo. Habo nia akong magin saro sa Mga Saksi ni Jehova. Pero, nakakakontentong marhay an pag-adal sa Biblia kaya ipinagpadagos ko an sakong pag-adal asin pakiasosyar sa mga Saksi.

Bago maghale sa harong para sa pagtiripon kun banggi, linuluto ko na an paboritong pagkakan ni Kazuhiko, alagad nagpoon siang magkakan sa restawran. Pagpuli ko sa harong pagkatapos kan mga pagtiripon, bakong marahay an timplada kan saiyang payo asin habo niang makipag-olay. Minarahay an timplada kan saiyang payo pakalihis nin duwa o tolong aldaw, alagad panahon na naman para sa sunod na pagtiripon.

Kan panahon man na idto, nagkahelang ako nin tisis, sarong helang na ikinagadan na nin nagkapira sa pamilya kan sakong agom. Naghadit na marhay si Kazuhiko asin nagsabi sako na kun ako magrahay, magigibo ko na ano man na gusto ko. An kahagadan ko lang iyo na may kabootan siang dai magkontra sa sakuyang pag-atender sa semanal na mga pagtiripon. Nag-oyon sia.

Inabot nin anom na bulan an sakong pagkaomay, asin kan panahon na iyan naggibo ako nin konsentradong marhay na pag-adal sa Biblia. Naghanap ako nin mga diperensia sa mga katokdoan kan mga Saksi, na kun makakua ako nin maski saro iniisip kong magpondo na sa sakong pag-adal. Mayo akong makua. Imbes, nagin risang-risa an mga sala kan Iglesia Protestante. Nanodan ko an pagkamoot asin hustisya ni Jehova saka naheling ko an pakinabang nin pamumuhay kaoyon sa saiyang mga ley.

Kan ako maomayan na, inotob kan sakong agom an saiyang panuga asin dai na kinontra an sakong pag-atender sa mga pagtiripon. Padagos akong nagtalubo sa espirituwal, asin kan May 1958, nabautismohan ako bilang saro sa Mga Saksi ni Jehova. Hinimuyawot kong makaiba an sakong pamilya sa pagsamba sa tunay na Dios.

Pagtabang sa Sakong mga Aki sa Espirituwal

Pirme kong kaibanan an sakong mga aking lalaki sa mga pagtiripon asin sa paghuhulit, alagad may mga nangyari na nagpaheling sa sako na sinda nagtatalubo sa kaaraman sa Biblia. Sarong aldaw si Masahiko, an aki kong sais anyos, nagkakawat sa luwas kan harong. Nakadangog ako nin makosog na ribok asin may nagkakagsing. An sarong kataed biglang nagbutwa sa samong harong, na nagkukurahaw na an sakong aki nabunggo nin auto. Ano, gadan sia? Pinipirit kong magin kalmado mantang naghihidali paluwas. Nagtakig ako kan maheling ko an raraot niang bisikleta, alagad ta naheling ko sia na naglalakaw pasiring sa sako, na daing gayo nakolgan. Sa pagkapot nia sako, sia nagsabi, “Nanay, tinabangan po ako ni Jehova, bako daw?” Napahibi ako kan maheling siang buhay asin madangog an magagayon na mga tataramon na iyan.

Saro pang aldaw, nanompongan niamo sa ministeryo an sarong gurang na lalaki na nagkurahaw: “Ano sa paghona mo an saimong ginigibo na guyod-guyod nin siring kaiyan maski saen an saday pang aki? Naheherak ako saiya.” Bago ako makasimbag, an otso anyos na si Tomoyoshi nagsabi: “Lolo, dai po ako pinipirit kan sakong ina na maghulit. Naghuhulit po ako huli ta gusto kong paglingkodan si Jehova.” Napaheling na sana an gurang na lalaki asin mayo nin nasabi.

Sa espirituwal, an sakong mga aki ilo sa ama. Nasa sako na, na tokdoan sinda nin mga katotoohan sa  Biblia, minsan ngani ako mismo dakolon pang dapat manodan. Kinultibar ko an sakong pagkamoot, pagtubod, asin kaigotan patin naghingoang magtao nin marahay na halimbawa. Aroaldaw nagpapasalamat ako ki Jehova sa atubangan kan mga aki. Iiniestorya ko sa sainda an sakong mga eksperyensia sa paghuhulit. Nakaenkaminar ini sa sainda. Kan hinapot kan huri kun taano ta sinda nagin mga payunir, o bilog na panahon na mga ministro kan Mga Saksi ni Jehova, sinda nagsimbag, “Naheling niamo na an samong ina maogmang naglilingkod bilang payunir, asin gusto man niamong magin maogma.”

Nag-iingat ako nin marhay na dai magtaram nin may pagkritika dapit sa saindang ama o sa kiisay man sa kongregasyon. Aram ko na an negatibong orolay puedeng makadanyar sa sakong mga aki. Puedeng mawara an saindang respeto bako sanang sa kinikritika kundi siring man sa nagkikritika.

Pagdaog sa mga Balakid sa Pag-oswag

Kan 1963 buminalyo an samong pamilya sa Taiwan huli sa trabaho kan sakong agom. Sinabihan nia ako na kun maghulit ako sa komunidad kan mga Hapon duman, puede akong magin dahelan nin mga problema. Papabalikon kami sa Hapon, asin magbubunga iyan nin mga problema sa saiyang kompanya. Gusto niang irayo kami sa mga Saksi.

Nagin mainit an pag-ako sa samo kan mga Saksi sa Taiwan, kun saen an gabos na pagtiripon ginigibo sa lenguaheng Intsik. Nagdesisyon akong mag-adal nin Intsik tanganing makapatotoo ako sa mga taga duman imbes na sa mga Hapon. Sa siring na paagi, malilikayan ko an mga problema na sinambit kan sakong agom.

An samong pakikikatood sa mga Saksi sa Taiwan nagpakosog sa samuya. An sarong mag-agom na misyonero, si Harvey asin Kathy Logan, dakulaon an nagin tabang sa samo. Si Tugang na Logan nagin sarong espirituwal na ama sa sakong mga aki. Ipinaheling nia sa sainda na an paglilingkod ki Jehova bakong sarong dai nin kagayagayahan asin estriktong buhay. Nagtutubod ako na nagdesisyon an sakong mga aki na maglingkod ki Jehova kaidtong sinda nasa Taiwan.

Si Tomoyoshi asin Masahiko nag-eskuela sa sarong Amerikanong eskuelahan sa Taiwan, kun saen nakanood sinda nin Ingles saka Intsik. Sinangkapan sinda kan edukasyon na iyan para sa paglilingkod sa ngapit bilang mga ministro kan tunay na Dios, si Jehova. Nagpapasalamat akong marhay ki Jehova sa pagbago kan sarong depisil kutanang panahon para sa samo na magin sarong panahon nin nagdadanay na mga bendisyon. Pakatapos nin tolo may kabangang memorableng taon sa Taiwan, an samong pamilya nagbalik sa Hapon.

An mga aki mi ngonyan mga tinedyer na asin nagpoon nang magmawot na magin independiente. Dakol na oras akong nakipagrasonan sa sainda basado sa mga prinsipyo sa Kasuratan, asin tinabangan sinda ni Jehova sa depisil na panahon na iyan. Pakatapos nin haiskul, si Tomoyoshi nagpoon na magpayunir. May natabangan siang apat katawo na magdusay asin magpabautismo durante kan enot na pirang taon nia sa pagpapayunir. Sinunod ni  Masahiko an halimbawa kan saiyang tugang asin nagpoon na magpayunir pakatapos mismo kan pag-eskuela sa sekondarya. May natabangan siang apat na hoben na magin Saksi sa saiyang enot na apat na taon na pagpapayunir.

Dangan binendisyonan nin orog pa ni Jehova an mga aki mi. Kinonduktahan nin pag-adal ni Tomoyoshi an agom nin sarong babae na tinabangan kong makanood kan mga katotoohan sa Biblia. An saindang duwang aking babae nagin man mga Saksi. Kan huri, naagom ni Tomoyoshi an matuang babae, si Nobuko, asin si Masahiko naagom man an nguhod, si Masako. Si Tomoyoshi asin Nobuko naglilingkod ngonyan sa opisina prinsipal kan Mga Saksi ni Jehova sa Brooklyn, Nueva York. Asin si Masahiko asin Masako mga misyonero sa Paraguay.

Luway-Luway na mga Pagbabago sa Sakong Agom

An sakong agom garo baga indiperente sa samong pagtubod kan mga taon na idto, alagad may naheling kaming mga nagpaparisa na sia nagbabago. Kun an iba nagkokontra sa sako, idinedepensa nia an sakong mga tinutubod asin sa katunayan sinusuportaran an mga katotoohan sa Biblia nin dai nia naririsa. Nagtatao sia nin materyal na tabang sa mga Saksi na nangangaipo. Sa sarong halipot na pagtaram sa kasal kan saro kan samong mga aki, sia nagsabi: “An pagtokdo sa mga tawo kan tamang pamumuhay iyo an pinakamarahay na gibohon, asin iyan an pinakadepisil. Pinili kan sakong mga aki asin kan saindang agom an pinakadepisil na dalan na ini bilang saindang karera. Tabangi tabi nindo sinda.” Ini gabos nakapagpaisip sa sako na seguradong maiba sia samo sa paglilingkod ki Jehova.

Iinareglo ko na makaasosyar nia sa samong harong an mga kapwa Saksi. Iniimbitaran ko si Kazuhiko sa Kristianong mga pagtiripon asin mga asamblea saka sa Memorial kan kagadanan ni Cristo. Inaatenderan nia an mga ini kun itinotogot kan saiyang trabaho, minsan ngani napipiritan sana. Dakol na beses, namatean ko na tibaad mag-ako sia nin pag-adal sa Biblia, kaya iniimbitaran ko sa harong an Kristianong kamagurangan. Alagad nagsasayuma siang mag-adal. Iniisip-isip ko kun ano an problema.

Nagsabong sa sakong isip an mga tataramon ni apostol Pedro: “Kamong mga agom na babae, magpasakop kamo sa saindong agom na lalaki, tangani na, kun an siisay man dai nagkukuyog sa tataramon, sinda madara minsan daing tataramon paagi sa gawe-gawe kan saindang agom na babae, huli sa pakaheling mismo sa saindong mabining gawe-gawe na may hararom na paggalang.” (1 Pedro 3:1, 2) Narealisar ko na dai ko pirmeng nasusunod an hatol na iyan. Tanganing lubos na masunod iyan, kinaipuhan kong paoswagon an sakong espirituwalidad.

Kan 1970, nagpoon akong magpayunir na an pasohan iyo na magin orog na espirituwal na tawo. Nag-agi an 10 taon, dangan 20. Sa giraray, mayo akong naheling na espirituwal na pagbago sa sakong agom. May inaadalan sa Biblia na sarong beses nagkomento: “Segurado na depisil tumabang sa ibang tawo kun dai mo ngani matabangan an saimong sadiring agom.” Nakakapanluya nanggad iyan sa boot, alagad dai ako nawaran nin paglaom.

Sa huring kabtang kan dekada nin 1980, an samong mga magurang naghaharani na sa katapusan kan saindang buhay. An pag-ataman sa sainda asin an pag-otob sa iba ko pang mga obligasyon mapagalon asin nakakatension. Sa laog nin dakol na taon, sinda gabos kontra sa sakong pagtubod ki Jehova, alagad hiningoa kong ipamate sainda an pagkamoot sagkod sa pinakamakakaya ko. Kan madali na siang magadan, an sakong 96 anyos na ina nagsabi sa sako, “Sumiko, kun ako buhayon liwat, maentra ako sa saimong relihion.” Narealisar ko na an sakong mga paghihingoa dai nasayang.

Narisa kan sakong agom an gabos na ginibo ko para sa samong mga magurang. Tanganing ipaheling an saiyang pag-apresyar, nagpoon siang regular na mag-atender sa mga pagtiripon. Dakol na taon nia iyan na ginibo alagad mayo nin tunay na espirituwal na pag-oswag. Nagpadagos akong maghingoa na paogmahon sia. Iniimbitaran kong magkakan sa samong harong an saiyang mga kaamigo pati na an mga taga ibang nasyon na kairiba nia sa negosyo. Iniibanan ko sia sa pag-aling-aling. Kan binawasan an kahagadan na oras sa paglilingkod bilang payunir na magin 70 oras kada bulan, ginamit ko an mas dakol na panahon na makaiba sia.

An Pagretiro Nagbunga nin Pagbago

Nagretiro an sakong agom kan 1993. Ngonyan, an nasa isip ko, sa katapustapusi magkakaigwa na sia nin panahon na mag-adal sa Biblia. Alagad nagsabi sia na an pagsamba sa Dios huli sana ta igwa na  sia nin panahon magigin paglanghad. Imbes, sinabi nia na sasambahon nia an Dios kun pahiroon sia kan saiyang puso na gibohon iyan asin na dai ko sia pagpiriton.

Sarong aldaw hinapot ako ni Kazuhiko kun gagamiton ko na ngonyan an natatada pa kan sakong buhay para saiya. Nakolgan kaini an sakong boot, huli ta ginigibo ko na an gabos na makakaya ko para sa saiya poon pa kan ako magpakasal sa saiya. Naghingoa akong marhay tanganing mapaogma sia, alagad sa pagmate nia ginagamit ko an sakong buhay nin orog para ki Jehova kisa para saiya. Pagkatapos na pag-isipan nguna iyan, sinabi ko sa saiya na ginigibo ko na an gabos kong magigibo para sa saiya. Alagad kun maayon sia sa sakong ginigibo, puede kaming makapoon nin sarong marahayon na bagong buhay na magkaibanan na magdadanay, bako lang sa laog nin nagkapira pang taon, kundi sa panahon na daing sagkod. Sa laog nin pirang aldaw, an sakong agom mayo nin simbag. Sa katapustapusi sia naghapot, “Ano puede mo akong adalan sa Biblia?” Kada iniisip ko an mga tataramon na iyan, nagkukutab an sakong puso.

Kan primero, inareglo ko na sarong Kristianong magurang sa kongregasyon an mag-adal sa sakong agom, alagad sia nagsabi sa sako, “Sa saimo sana ako makikipag-adal.” Kaya pinonan niamo an aroaldaw na pag-adal sa Biblia. Huling ako nasa kongregasyon na Intsik an lenguahe asin an sakong agom tataong marhay kan lenguaheng iyan, nag-adal kami sa lenguaheng Intsik. Binasa man niamo na magkaibanan an bilog na Biblia sa laog nin mayo pang sangtaon.

Durante kan panahon na ini, an sarong magurang sa kongregasyon na Intsik an lenguahe, kaiba an saiyang agom, nagpaheling nin interes sa samuya bilang mag-agom. Minsan ngani mas hoben sa samong mga aki, nagin tunay niamo sindang katood. Dakol pang ibang Saksi an nagpaheling man nin espesyal na interes sa sakong agom. Nagin mapagpasakat sinda sa samo asin nakikipag-olay ki Kazuhiko na garo man sana sia saindang ama. Nagpaogma iyan na marhay sa saiya.

Sarong aldaw may imbitasyon sa kasal sa kongregasyon na uminabot sa harong, na nakaadres sa sakong agom. An pagrekonoser na iyan bilang payo kan pamilya nakapahirong marhay sa boot nia, asin nagdesisyon siang mag-atender. Dai nahaloy nagin makikatood sia sa mga Saksi asin nagpoon na makipag-adal sa Biblia sa sarong Kristianong magurang sa kongregasyon. An saiyang pag-adal sa Biblia, pag-atender sa mga pagtiripon, asin an pagkamoot kan kongregasyon nakatabang saiya na umoswag na marhay sa espirituwal.

Sararong Pamilya sa Katapustapusi

Kan Disyembre 2000, nabautismohan an sakong agom bilang simbolo kan saiyang pagdusay ki Jehova. An sakong mga aki asin an saindang agom nagbiahe hale sa harayo tanganing maheling an “milagrong” ini sa presenteng aldaw. Uminabot nin 42 na taon, alagad sa katapustapusi kami sararo nang pamilya.

Ngonyan kada aga, tinotokar niamong duwa an teksto kan aldaw asin binabasa an Biblia na magkaibanan. Kada aldaw, ikinakaogma niamo an pag-oolay sa espirituwal asin magkaibanan kami sa espirituwal na mga aktibidad. An sakong agom saro na ngonyan na ministeryal na lingkod sa kongregasyon, asin nagtao sia kaini lang na nakaagi nin sarong pampublikong diskurso sa Biblia sa lenguaheng Intsik. Pinapasalamatan ko si Jehova na pinagkasararo nia kami. Kaibanan kan gabos na kadayupot asin mahal ko, nakatanaw ako sa ngapit sa pagsuportar sa saiyang ngaran asin soberaniya sa panahon na daing sagkod.

[Mapa sa pahina 13]

(Para sa aktuwal na format, hilingon an publikasyon)

TSINA

DEMOCRATIC PEOPLE’S REPUBLIC OF KOREA

REPUBLIC OF KOREA

Dagat nin Hapon

HAPON

Tokyo

Dagat nin Sirangan na Tsina

TAIWAN

Taipei

[Ritrato sa pahina 12]

Kaiba kan sakong pamilya kan 1958, an taon na ako nabautismohan

[Mga Ritrato sa pahina 13]

Napakosog kami sa espirituwal kan mga katood na siring ki Harvey asin Kathy Logan kan kami bumalyo sa Taipei hale sa Tokyo

[Ritrato sa pahina 15]

Ngonyan an sakong pamilya sararo na sa tunay na pagsamba