Mga Hapot Hale sa mga Parabasa

Pagkatapos kan pangultimong pagbalo sa katapusan kan Milenyo, posible daw na an mga tawo magkasala asin magadan?

Duwang teksto na yaon sa Kapahayagan an konektado digdi: “An kagadanan asin Hades iinapon sa danaw nin kalayo. Ini iyo an ikaduwang kagadanan, an danaw nin kalayo.” (Kapahayagan 20:14) “Papahidon nia an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog. An enot na mga bagay nakalihis na.”—Kapahayagan 21:4.

Mangnoha kun noarin ini mangyayari. An pag-apon sa “kagadanan asin Hades” sa danaw nin kalayo gigibohon pagkatapos na an mga nakaligtas sa Armagedon, an binuhay liwat na mga gadan, asin an siisay man na mga namundag pagkatapos kan Armagedon hinokoman sono sa “mga bagay na nasusurat sa mga rolyo,” o sa detalyadong mga kahagadan ni Jehova para sa katawohan durante kan sangribong taon. (Kapahayagan 20:12, 13) Isinurat ni apostol Juan an saro pang bisyon, na yaon sa Kapahayagan kapitulo 21, na maootob durante kan Milenyal na Paghade ni Cristo Jesus. Minsan siring, an lubos na kaotoban kan bisyon na iyan sa katapusan pa kan sangribong taon na Aldaw nin Paghokom. Sa panahon na iyan, si Jehova mag-eerok sa kaibanan nin katawohan sa pinakalubos na sentido na mayo nin siisay man na parapangoltanan, ta ikinatao na ni Jesus an Kahadean sa saiyang Ama. Sa espirituwal na paagi, si Jehova permanente asin direkta nang mag-eerok sa kaibanan kan “saiyang mga banwaan.” “Dai na magkakaigwa nin kagadanan” sa lubos na sentido kun makamtan na kan katawohan an pagkasangkap bilang resulta kan lubos na pag-aplikar kan merito kan atang na pantubos ni Cristo.—Kapahayagan 21:3, 4.

Sa siring, an kagadanan na sinambit sa mga teksto na kinotar sa enotan iyo an Adanikong kagadanan, na kakanselaron na kan pantubos ni Cristo. (Roma 5:12-21) Pagkinanselar na an kagadanan na minana kan katawohan sa enot na tawo, an mga tawo magigin kapareho nanggad ni Adan kan sia lalangon. Si Adan sangkap, alagad dai iyan nangangahulogan na mayo nin posibilidad na sia magadan. Sinabihan ni Jehova si Adan na dai magkakan hale “sa kahoy kan pakamidbid sa marahay asin maraot” asin nagsabi: “Sa aldaw na kumakan ka dian ika siertong magagadan.” (Genesis 2:17) Iyan kagadanan huli sa tuyong kasalan. Pagkatapos kan pangultimong pagbalo sa katapusan kan Sangribong Taon na Paghade, an mga tawo libre ahente moral pa man giraray. (Kapahayagan 20:7-10) Puede pa man giraray sindang pumili sa saindang sadiring kabotan kun baga mapadagos na maglilingkod ki Jehova o dai. Dai puedeng sabihon na mayo na nin tawo na matalikod pa sa Dios, siring kan ginibo ni Adan.

Ano daw an mangyayari sa saro na pinili an magrebelde pagkatapos kan pangultimong pagbalo kun saen mayo na nin kagadanan o Hades? Sa panahon na iyan, mayo na an Adanikong kagadanan. Asin mayo na an Hades, an pankagabsan na lolobngan nin katawohan na may paglaom na pagkabuhay liwat. Minsan siring, puedeng pohoon ni Jehova an siisay man na rebelde sa danaw nin kalayo, na dai ini tinatawan nin ano man na paglaom na pagkabuhay liwat. An kagadanan na iyan magigin kapareho kan kagadanan na inagihan ni Adan asin Eva, bakong an kagadanan na minana kan mga tawo ki Adan.

Minsan siring, mayo kita nin rason na asahan na iyan mangyayari pa. An mga makakapasar sa pangultimong pagbalo magigin laen ki Adan sa sarong importanteng sentido. Lubos na sindang nabalo. Makakakompiar kita sa pagigin lubos kan pangultimong pagbalo huli ta aram ni Jehova kun paano lubos na sisiyasaton an mga tawo. Makakaseguro kita na paagi sa pangultimong pagbalo mawawara na an siisay man na mag-aabuso sa saindang katalingkasan sa pagpili. Sa siring, maski ngani posible na an mga makakapasar sa pangultimong pagbalo magrebelde sa Dios asin huli kaini malaglag, harayo nanggad an posibilidad na mangyayari an siring na bagay.

[Ritrato sa pahina 31]

Pagkatapos kan pangultimong pagbalo, sa anong sentido na an katawohan makakaagid ki Adan?