“Nadangog Nindo an Dapit sa Pakatagal ni Job”
“Nadangog Nindo an Dapit sa Pakatagal ni Job”
“Nadangog nindo an dapit sa pakatagal ni Job asin naheling an bunga na itinao ni Jehova, na si Jehova mamomoton na marhay sa kapadangatan asin maheherakon.”—SANTIAGO 5:11.
1, 2. Anong pagbalo an napaatubang sa sarong mag-agom sa Polandia?
SI Harald Abt mayo pang sarong taon na saro sa Mga Saksi ni Jehova kan sakopon kan hukbo ni Hitler an Danzig (ngonyan Gdańsk) sa amihanan na Polandia. An situwasyon kan panahon na idto nagin masakit, sa katunayan peligroso, para sa tunay na mga Kristiano duman. An mga Gestapo naghingoang piriton si Harald na pumirma sa sarong dokumento na nagsasabing tinatalikdan nia an saiyang pagtubod, alagad nagsayuma sia. Pakalihis nin nagkapirang semana sa bilanggoan, si Harald ipinadara sa kampo de konsentrasyon sa Sachsenhausen, na duman sia paorootrong hinuma asin binugbog. Itinokdo kan sarong opisyal an tsimenea kan krematoryo asin sinabihan si Harald, “Mapaitaas ka duman pasiring sa Jehova mo sa laog nin 14 aldaw kun ika magdadanay sa saimong pagtubod.”
2 Kan arestaron si Harald, nagpapasuso pa an saiyang agom na si Elsa sa saindang sampulong bulan na aking babae. Alagad si Elsa dai pinalibre kan mga Gestapo. Dai nahaloy kinua sa saiya an aking omboy, asin dinara sia sa kampo sa pagpoho sa Auschwitz. Pero, sia nagdanay na buhay sa laog nin dakol na taon, siring ki Harald. Sa The Watchtower na Abril 15, 1980, mababasa nindo an manongod sa kun paano sinda nakatagal. Si Harald nagsurat: “Gabos-gabos, 14 taon kan sakong buhay an ginamit ko sa mga kampo de konsentrasyon asin bilanggoan huli sa sakong pagtubod sa Dios. May naghapot sako: ‘Nakatabang daw sa saimo an saimong agom tanganing matagalan an gabos na ini?’ Iyo nanggad! Aram ko poon pa sa kapinonan na dai nia noarin man ikokompromiso an saiyang pagtubod, asin an pakaaram kaini nakatabang na makasustenir sa sako. Aram ko na mas gugustohon pa nia na maheling akong magadan na maimbod kisa maaraman niang talingkas ako huli sa pakikikompromiso. . . . Si Elsa nagtagal nin dakol na kasakitan durante kan dakol na taon nia sa mga kampo de konsentrasyon nin Alemania.”
3, 4. (a) Kiisay na mga halimbawa an makakaenkaminar sa mga Kristiano na magtagal? (b) Taano ta sinasadol kita kan Biblia na siyasaton an eksperyensia ni Job?
3 An pagtios nin karatan bako nanggad na basta-basta, siring kan puedeng patunayan kan dakol na Saksi. Sa dahelan na ini, hinahatolan kan Biblia an gabos na Kristiano: “Gibohon na arogan sa pagtios nin karatan asin sa pagpapasensia an mga propeta, na nagtaram sa ngaran ni Jehova.” (Santiago 5:10) Sa nag-aging mga siglo, dakol na lingkod nin Dios an daing katanosan na pinersegir. An mga halimbawa kan dakulang “panganoron [na ini] nin mga saksi” puedeng makaenkaminar sa sato na padagos na dumalagan na may pakatagal sa satong Kristianong paorumbasan.—Hebreo 11:32-38; 12:1.
4 Sa rekord kan Biblia, si Job lataw na marhay na arogan sa pakatagal. “Uya! Inaapod tang maogma idtong mga nakatagal,” an isinurat ni Santiago. “Nadangog nindo an dapit sa pakatagal ni Job asin naheling an bunga na itinao ni Jehova, na si Jehova mamomoton na marhay sa kapadangatan asin maheherakon.” (Santiago 5:11) Paagi sa eksperyensia ni Job nagkakaigwa kita nin ideya manongod sa balos na naghahalat sa mga maimbod, na binebendisyonan ni Jehova. Orog na mahalaga, ihinahayag kaiyan an mga katotoohan na pakikinabangan niato durante kan mga panahon nin kasakitan. An libro nin Job nagtatabang sa sato na simbagon an mga hapot na ini: Kun kita nag-aagi nin pagbalo, taano ta dapat niatong hingoahon na masabotan an pangenot na mga isyung kalabot? Anong mga kualidad asin aktitud an makakatabang sa sato na makatagal? Paano niato mapapasarig an mga kapwa Kristiano na nag-aagi nin makuring sakit?
Pagsabot sa Gabos na Isyung Kalabot
5. Ano an pangenot na isyu na dapat niatong girumdomon kun kita napapaatubang sa mga pagbalo o sugot?
5 Tanganing mapagdanay an espirituwal na pagkatimbang sa atubangan nin kasakitan, kaipuhan niatong masabotan an gabos na isyung kalabot. Ta kun dai, tibaad palibogon kan personal na mga problema an satong espirituwal na pagheling. An isyu nin kaimbodan sa Dios iyo an pinakamahalaga. An satong langitnon na Ama may pakiolay na puede niatong isapuso personalmente: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” (Talinhaga 27:11) Daing kaagid nanggad na pribilehio iyan! Sa ibong kan satong mga kaluyahan asin pagkabakong sangkap, mapapagayagaya niato an satong Kaglalang. Nagigibo niato iyan kun natatagalan niato an mga pagbalo asin sugot huli sa satong pagkamoot ki Jehova. An tunay na Kristianong pagkamoot nagtatagal kan gabos na bagay. Iyan nungka na nasusudya.—1 Corinto 13:7, 8.
6. Paano dinuduhagi ni Satanas si Jehova, asin sagkod saen an saiyang pagduhagi?
6 Malinaw na sinasabi kan libro nin Job na si Satanas an saro na nagduduhagi ki Jehova. Ihinahayag man kaiyan an maraot na ugale kan dai naheheling na kaiwal na ini asin an saiyang pagmawot na raoton an satong relasyon sa Dios. Siring kan iiniilustrar kan nangyari ki Job, sa pundamental inaakusaran ni Satanas nin maimot na mga motibo an gabos na lingkod ni Jehova asin sia naghihingoang patunayan na an saindang pagkamoot sa Dios puedeng lumipot. Dinuduhagi nia an Dios sa laog nin rinibo nang taon. Kan si Satanas palayason sa langit, an sarong tingog hale sa langit ilinadawan sia bilang “an paraakusar sa satong mga tugang” asin nagsabi na ginigibo nia an siring na mga akusasyon “aldaw asin banggi sa atubangan kan satong Dios.” (Kapahayagan 12:10) Paagi sa satong maimbod na pakatagal, ikakapaheling niato na daing basehan an saiyang mga akusasyon.
7. Ano an pinakamarahay na magigibo niato kun igwa nin pisikal na kaluyahan?
7 Dapat niatong girumdomon na aaprobetsaran kan Diablo an ano man na kahorasaan na tibaad mapaatubang sa sato tanganing hingoahon na irayo kita ki Jehova. Kasuarin nia sinugotan si Jesus? Kan gutom si Jesus pakatapos mag-ayuno sa laog nin dakol na aldaw. (Lucas 4:1-3) Minsan siring, paagi sa espirituwal na kosog ni Jesus, nahimo niang marigon na sayumahan an mga sugot kan Diablo. Mahalaga nanggad na labanan nin espirituwal na kakosogan an ano man na pisikal na kaluyahan—na tibaad dahelan sa helang o pagkagurang! Minsan ngani ‘an satong pagkatawo sa luwas nalalapa,’ dai kita minasuko huli ta ‘an satong pagkatawo sa laog nababago aroaldaw.’—2 Corinto 4:16.
8. (a) Paano puedeng magkaigwa nin nakakapaluyang epekto an negatibong mga emosyon? (b) Anong kaisipan an yaon ki Jesus?
8 Dugang pa, an negatibong mga emosyon puedeng makaraot sa espirituwalidad nin saro. ‘Taano ta tinotogotan ini ni Jehova?’ an tibaad isipon nin saro. ‘Paano magigibo nin sarong tugang na trataron ako nin arog kaiyan?’ an tibaad ihapot nin iba pa pakatapos na trataron nin daing kabootan. An siring na mga saboot tibaad magin dahelan na malingawan niato an pangenot na mga isyu asin magparakonsentrar na kita sa personal na mga kamugtakan. An pagkadesganar ni Job sa saiyang tolong napasalang kaibaiba garo baga nakadanyar sa saiyang emosyon na kapareho kagrabe kan nagin pisikal na danyos kan saiyang kamatean. (Job 16:20; 19:2) Kaagid kaiyan, ipinarisa ni apostol Pablo na an haloy na pagkaanggot puedeng ‘magtao nin lugar [o, oportunidad] sa Diablo.’ (Efeso 4:26, 27) Imbes na iluwas an pagkadesganar o kaanggotan sa mga indibiduwal o magkonsentrar nin labi-labi sa inhustisya nin sarong situwasyon, mas makikinabang an mga Kristiano kun aarogon ninda si Jesus na ‘ipinagkakatiwala an saindang sadiri sa saro na naghohokom nin matanos,’ si Jehova Dios. (1 Pedro 2:21-23) An pagkaigwa kan “kaisipan” ni Jesus puedeng magin mayor na depensa tumang sa mga pagsalakay ni Satanas.—1 Pedro 4:1.
9. Anong pag-asegurar an itinatao nin Dios sa sato mapadapit sa mga pagabat na kaipuhan niatong pasanon o mga sugot na napapaatubang sa sato?
9 Orog sa gabos, nungka niatong isipon na an satong mga problema siertong ebidensia nin kaanggotan nin Dios. An siring na salang pakasabot nakakolog sa boot ni Job kan panahon na sia inaatake nin maringis na mga tataramon kan saiyang mga pararanga daa. (Job 19:21, 22) Inaasegurar kita kan Biblia paagi sa mga tataramon na ini: “Paagi sa maraot na mga bagay an Dios dai puedeng baloon ni binabalo man nia an siisay man.” (Santiago 1:13) Al kontraryo, si Jehova nanunuga na tatabangan nia kitang makaya an ano man na pagabat na dumatong sato asin matao nin dudulagan sa ano man na sugot na napapaatubang sa sato. (Salmo 55:22; 1 Corinto 10:13) Paagi sa pagdayupot sa Dios sa mga panahon nin kasakitan, mapapagdanay niato an tamang pagmansay sa mga bagay-bagay asin mapangganang malalabanan an Diablo.—Santiago 4:7, 8.
Mga Tabang Tanganing Makatagal
10, 11. (a) Ano an nakatabang ki Job na makatagal? (b) Paano nakatabang ki Job an pagkaigwa nin marahay na konsensia?
10 Sa ibong kan makamomondong situwasyon ni Job—kaiba an berbal na pag-abuso kan saiyang “mga pararanga” asin an saiya mismong pagkaribaraw sa tunay na dahelan kan saiyang kalamidad—pinapagdanay pa man giraray ni Job an saiyang integridad. Ano an manonodan niato sa saiyang pakatagal? Daing duwa-duwa, an pundamental na dahelan kan saiyang kapangganahan iyo an saiyang kaimbodan ki Jehova. ‘Natakot sia sa Dios asin naglikay sa maraot.’ (Job 1:1) Iyan an saiyang paagi nin pamumuhay. Nagsayuma si Job na talikdan si Jehova, dawa kan dai nia nasasabotan kun taano ta biglang nagin maraot an situwasyon. Nagtutubod si Job na maninigo siang maglingkod sa Dios sa marahay asin sa maraot na mga panahon.—Job 1:21; 2:10.
11 An pagkaigwa nin marahay na konsensia nakaranga man ki Job. Sa panahon na an saiyang buhay garo baga matatapos na, naranga sia kan pakaaram na ginibo nia an pinakamakakaya nia tanganing tabangan an iba, na pinangaptan nia an matanos na mga pamantayan ni Jehova, asin na linikayan nia an ano man na klase nin falsong pagsamba.—Job 31:4-11.
12. Paano hinimate ni Job an tabang na inako nia hale ki Eliu?
12 Siempre, totoo na kinaipuhan ni Job an tabang tanganing mabago an saiyang punto de vista sa nagkapirang bagay. Asin mapakumbaba niang inako an tabang na iyan—saro pang dahelan kan saiyang mapangganang pakatagal. Si Job magalang na naghinanyog sa madonong na hatol ni Eliu, asin sia positibong naghimate sa pagtatanos ni Jehova. “Ako nagtaram, alagad dai ko nasasabotan,” an inadmitir nia. “Binabawi ko an sakuyang isinabi, asin ako nagsosolsol sa kabokabo asin abo.” (Job 42:3, 6) Sa ibong kan helang na nagpapasakit pa sa saiya, si Job naggayagaya na an pagbabagong ini sa saiyang kaisipan orog na nagpadayupot sa saiya sa Dios. ‘Namidbid ko na kaya mo [Jehova] na gibohon an gabos,’ an sabi ni Job. (Job 42:2) Sa tabang kan deskripsion ni Jehova sa Saiyang kadakulaan, nasabotan ni Job nin mas malinaw nanggad an saiyang kamugtakan kun ikokomparar sa Kaglalang.
13. Paanong an pagpaheling nin pagkaherak nagin kapakipakinabang ki Job?
13 Ultimo, si Job nagtatao nin pambihirang halimbawa nin pagkaherak. An saiyang falsong mga pararanga nakakolog na marhay sa saiyang boot, pero kan hagadon ni Jehova ki Job na ipamibi sinda, ginibo nia iyan. Pakatapos kaiyan, ibinalik ni Jehova an marahay na salud ni Job. (Job 42:8, 10) Malinaw nanggad, an paghinanakit dai makakatabang sa sato na makatagal, alagad an pagkamoot asin pagkaherak makakatabang. An paghale niato sa hinanakit nakakarepresko sa sato sa espirituwal, asin an paggibo kaiyan binebendisyonan ni Jehova.—Marcos 11:25.
Madonong na mga Parahatol na Nagtatabang sa Sato na Makatagal
14, 15. (a) Anong mga kualidad an makakatabang sa mga parahatol na mapaginhawa an iba? (b) Ipaliwanag kun taano ta mapanggana si Eliu sa pagtabang ki Job.
14 An dugang pang leksion na puede niatong manodan sa salaysay dapit ki Job iyo an kahalagahan nin madonong na mga parahatol. An siring na mga parahatol mga tugang na “namundag manongod sa panahon nin kasakitan.” (Talinhaga 17:17) Minsan siring, arog kan ipinapaheling kan eksperyensia ni Job, an nagkapirang parahatol puedeng makakolog imbes na makapaginhawa. An sarong marahay na parahatol kaipuhan na magpaheling nin empatiya, paggalang, asin kabootan, siring kan ginibo ni Eliu. Tibaad kaipuhan na liwaton kan kamagurangan asin kan iba pang maygurang na mga Kristiano an kaisipan nin mga tugang na nagagabatan sa mga problema, asin sa bagay na ini, dakol an manonodan kan mga parahatol na iyan sa libro nin Job.—Galacia 6:1; Hebreo 12:12, 13.
15 Dakol an marahayon na leksion mapadapit sa kun paano inasikaso ni Eliu an mga bagay-bagay. Sia naghinanyog nin halawig bago sumimbag sa salang mga sinabi kan tolong kaibaiba ni Job. (Job 32:11; Talinhaga 18:13) Ginamit ni Eliu an ngaran ni Job asin nakiolay sa saiya bilang sarong katood. (Job 33:1) Bakong arog kan tolong falsong pararanga, dai ibinilang ni Eliu an saiyang sadiri na mas halangkaw ki Job. “Gikan sa kabokabo ako pinorma, ako man,” an sabi nia. Habo niang dagdagan an pagsakit ni Job paagi sa daing konsiderasyon na mga tataramon. (Job 33:6, 7; Talinhaga 12:18) Imbes na kritikaron an dating iginawe ni Job, tinawan sia ni Eliu nin komendasyon sa saiyang katanosan. (Job 33:32) Pinakamahalaga, hineling ni Eliu an mga bagay-bagay sono sa punto de vista nin Dios, asin tinabangan nia si Job na magkonsentrar sa bagay na si Jehova dai noarin man mahiro nin bakong makatanosan. (Job 34:10-12) Inenkaminar nia si Job na maghalat ki Jehova, imbes na maghingoang ipaheling an sadiri niang katanosan. (Job 35:2; 37:14, 23) Siertong makikinabang sa siring na mga leksion an Kristianong kamagurangan asin iba pa.
16. Paano nagin instrumento ni Satanas an tolong falsong pararanga ni Job?
16 An madonong na hatol ni Eliu kabaliktaran kan makolog na mga tataramon ni Elifaz, Bildad, asin Zofar. “Kamo dai nagtaram kan katotoohan may labot sa sako,” an sinabi ni Jehova sa sainda. (Job 42:7) Dawa pa maghingako sinda na marahay an saindang mga intension, sinda naghiro bilang mga instrumento ni Satanas imbes na maimbod na mga kaibaiba. Sindang tolo gabos nagsuponer poon sa kapinonan na si Job an dapat basolon sa mga kalamidad na nangyari sa saiya. (Job 4:7, 8; 8:6; 20:22, 29) Segun ki Elifaz, an Dios mayo nin kompiansa sa saiyang mga lingkod, asin bakong mahalaga sa Saiya kun kita matanos o bako. (Job 15:15; 22:2, 3) Sinahotan pa ngani ni Elifaz si Job nin mga sala na dai man kaini ginibo. (Job 22:5, 9) Sa ibong na kampi, tinabangan ni Eliu si Job sa espirituwal, na iyo an pirmeng pasohan nin sarong mamomoton na parahatol.
17. Ano an maninigo niatong girumdomon kun kita nag-aagi nin pagbalo?
17 May saro pang leksion manongod sa pakatagal na makukua niato sa libro nin Job. Naheheling kan satong mamomoton na Dios an satong situwasyon asin gusto sagkod kaya nia kitang tabangan sa manlaenlaen na paagi. Nabasa niato kasubago an eksperyensia ni Elsa Abt. Horophoropon nindo an konklusyon nia: “Bago ako arestaron, nabasa ko an surat nin sarong tugang na babae na nagsabi na kun nasa grabeng pagbalo, an espiritu ni Jehova nagpapangyari na magkaigwa ka nin pagkakalmado. Inisip ko na medyo sobra man an sinasabi nia. Alagad kan ako na mismo an nag-aagi nin mga pagbalo, naaraman ko na totoo an sinabi nia. Iyan talaga an nangyayari. Masakit iyan na imahinaron, kun dai nindo iyan naeksperyensiahan. Pero iyan talagang nangyari sa sako. Si Jehova nagtatabang.” Si Elsa dai nagtataram manongod sa puedeng gibohon kaidto ni Jehova o sa ginibo nia kaidtong rinibong taon na an nakaagi kan panahon ni Job. Sia nagtataram manongod sa satong panahon. Iyo, “si Jehova nagtatabang”!
Maogma an Tawong Nagtatagal
18. Anong mga pakinabang an nakamtan ni Job sa pagkaigwa nin pakatagal?
18 Dikit sana sa sato an kaipuhan na mapaatubang sa kahorasaan na siring kagrabe kan ki Job. Alagad ano man na pagbalo an tibaad itao sa sato kan sistemang ini nin mga bagay, kita may marahay na mga dahelan na papagdanayon an satong integridad, siring kan ginibo ni Job. Sa katunayan, an pakatagal nagpaoswag sa kualidad nin buhay ni Job. Sinangkap sia kaiyan, na ginibo siang lubos. (Santiago 1:2-4) Pinakosog kaiyan an saiyang relasyon sa Dios. “Gikan sa iba nabaretaan taka, alagad ngonyan naheheling ka kan sako mismong mata,” an pinatunayan ni Job. (Job 42:5) Si Satanas napatunayan na putikon huli ta dai nia nabari an integridad ni Job. Pakalihis nin ginatos na taon, nasambitan pa ni Jehova an saiyang lingkod na si Job bilang halimbawa nin katanosan. (Ezequiel 14:14) An saiyang rekord nin integridad asin pakatagal nakakamotibar sa banwaan nin Dios dawa ngonyan.
19. Taano ta sa pagmate nindo kapakipakinabang an pakatagal?
19 Kan si Santiago magsurat sa mga Kristiano kan enot na siglo manongod sa pakatagal, nasambitan nia an satispaksion na ibinubunga nin pakatagal. Asin ginamit nia an halimbawa ni Job tanganing ipagirumdom sa sainda na abundang binabalosan ni Jehova an saiyang maimbod na mga lingkod. (Santiago 5:11) Mababasa niato sa Job 42:12: “Kun manongod ki Jehova, binendisyonan nia an kasagkodan ni Job nin labi pa sa saiyang kapinonan.” Tinawan nin Dios si Job nin doble kan nawara sa saiya, asin sia nabuhay nin halawig asin maogma. (Job 42:16, 17) Kaagid kaiyan, an ano man na kolog, pagsakit, o kamondoan na tibaad tagalan niato durante kan katapusan kan sistemang ini nin mga bagay mawawara asin malilingawan na sa bagong kinaban nin Dios. (Isaias 65:17; Kapahayagan 21:4) Nadangog niato an dapit sa pakatagal ni Job, asin kita determinado, sa tabang ni Jehova, na arogon an halimbawa ni Job. An Biblia nanunuga: “Maogma an tawo na padagos na nagtatagal sa pagbalo, huli ta sa pagigin inooyonan aakoon nia an korona nin buhay, na ipinanuga ni Jehova sa mga padagos na namomoot sa saiya.”—Santiago 1:12.
Ano an Isisimbag Nindo?
• Paano niato mapapagayagaya an puso ni Jehova?
• Taano ta dai kita maninigong magkonklusyon na an satong mga problema ebidensia nin pagkaanggot nin Dios?
• Anong mga bagay an nakatabang ki Job na makatagal?
• Paano niato maaarog si Eliu sa pagpakosog sa satong mga kapagtubod?
[Mga Hapot Para sa Pag-adal]
[Ritrato sa pahina 28]
An marahay na parahatol nagpapaheling nin empatiya, paggalang, asin kabootan
[Mga Ritrato sa pahina 29]
Si Elsa asin Harald Abt