Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Bueno, helingon kun masisimbag nindo an minasunod na mga hapot:

• Paano “ililigtas [ni Jesus] an dukha,” siring kan ihinula kan Salmo 72:12?

Durante kan saiyang paghade, magkakaigwa nin hustisya para sa gabos, na mayo nin karatan. An guerra parateng nagbubunga nin kadukhaan, alagad papangyayarihon ni Cristo an sangkap na katoninongan. Sia may empatiya sa mga tawo asin pagsasararoon nia an gabos, asin seseguradohon nia na igwa nin bastanteng kakanon para sa katawohan. (Salmo 72:4-16)—5/1, pahina 7.

• Bilang mga Kristiano, paano niato ikakapaheling an satong “katalingkasan sa pagtaram”? (1 Timoteo 3:13; Filemon 8; Hebreo 4:16)

Magigibo niato iyan paagi sa maigot na paghuhulit sa iba na may pagkapusoan, paagi sa tolos-tolos asin epektibong pagtotokdo asin pagtao nin hatol, asin paagi sa biyong pagpahayag sa Dios kan nasa puso niato sa pamibi, na kompiado na sia madangog asin masimbag.—5/15, pahina 14-16.

• Segun sa Ley, taano an nagkapirang natural na pagpunsionar nin sekso ta nagpapagin “maati” sa saro?

An mga ley may labot sa pagkamaati na resulta nin pagluwas nin kago, pagregla, asin pangangaki nakatabang na magkaigwa nin pisikal na kalinigan asin estilo nin pamumuhay na nakakarahay sa salud, nagdoon kan kabanalan nin dugo, asin nagpaheling kan pangangaipo nin pagbayad sa mga kasalan.—6/1, pahina 31.

• Kun gusto nin saro na magin maogma, taano ta kapakipakinabang na estudyaran nia an libro nin Salmo?

Aram kan mga kompositor kan Salmo na an kaogmahan resulta nin pagkaigwa nin marahay na relasyon sa Dios. (Salmo 112:1) Idinoon ninda na mayo nin relasyon sa tawo, mayo nin rogaring, asin mayo nin nagibo na makakatao kan kaogmahan na ibinubunga kan pagigin kabtang kan “banwaan na an Dios iyo si Jehova.” (Salmo 144:15)—6/15, pahina 12.

• May anong espesyal na relasyon ki Jehova an suanoy na mga Israelita?

Kan 1513 B.C.E., dinara ni Jehova an mga Israelita sa sarong bagong relasyon sa saiya, sa sarong pakipagtipan. (Exodo 19:5, 6; 24:7) Pakatapos kaiyan, an mga Israelita namundag bilang mga miembro kan pinili nin Dios na nasyon na nagdusay sa saiya. Pero, an balang indibiduwal kaipuhan na personal na magdesisyon na paglingkodan an Dios.—7/1, pahina 21-2.

• Taano ta maninigong gibohon niato an gabos na bagay na “mayo nin mga paggumodgumod”? (Filipos 2:14)

Dakol na halimbawa sa Kasuratan an nagpapaheling na an paggumodgumod nagbunga nin danyos sa tahaw kan banwaan nin Dios. Maninigo niatong seryosong pakaisipon an manongod sa nakakaraot na impluwensia kaiyan ngonyan. An bakong sangkap na mga tawo may tendensia na magreklamo, asin maninigo kitang magbantay tanganing marisa an ano man na senyal kaini asin likayan iyan.—7/15, pahina 16-17.

• Paano niato naaaraman na an kadonongan na ilinaladawan sa Talinhaga 8:22-31 bakong kadonongan na ideya?

An kadonongan na iyan “ginibo,” o linalang, bilang kapinonan kan dalan ni Jehova. An Dios nag-eeksister sa gabos na panahon asin madonong sa gabos na panahon; an saiyang kadonongan dai linalang. An kadonongan sa Talinhaga 8:22-31 nasa kataed nin Dios bilang “pangenot na trabahador,” na minaaplikar sa espiritung linalang na nagin si Jesus asin nagtrabaho nin dayupot na kaibanan nin Dios sa paglalang. (Colosas 1:17; Kapahayagan 3:14)—8/1, pahina 31.