Nakakarepreskong Pag-oswag sa Sarong Magayon na Isla

DAI malikayan kan mga bisita sa Taiwan na mapahanga sa berdeng tropikal na mga tinanom na nakakatakop sa isla. An magayon asin berdeng lumbod pang mga tanom na paroy nagigin bulawan an kolor sa tig-anihan. An mga abaga kan bukid natatakopan nin mahibog asin marambong na mga kadlagan. Bakong arog sa matawong mga siudad, an matubang asin berdeng pananom sa mga langtad asin kabukidan talagang nakakarepresko. Sa katunayan, iyan an nagpahiro sa enot na taga Solnopan na nakaheling sa isla na pilion an ngaran na Ilha Formosa, o “Magayon na Isla.”

Iyo, an Taiwan sarong magayon alagad sadit na isla—na 390 kilometros sana an laba asin mga 160 kilometros an lakbang sa pinakamahiwas na parte kaini. Haralangkaw na bukid an kadaklan na parte kan isla. An Yu Shan (Bukid nin Morrison) mas halangkaw kisa sa Bukid nin Fuji sa Hapon o sa Bukid nin Cook sa Nueva Zelandia. Nakapalibot sa sentral na kabukidan asin minasagkod sa dagat an hayakpit na planodong mga baybayon, na pano nin sibot na populasyon nin Taiwan, na labing 22 milyones na ngonyan.

Sarong Bagong Klaseng Pag-oswag

Minsan siring, igwa nin ibang klaseng pag-oswag na paorog nang paorog na naririsa sa Taiwan—an espirituwal na pag-oswag. Maheheling ini sa kaigotan kan mga tawo, hoben asin gurang, sa oras na mamidbid ninda an tunay na Dios, si Jehova. Kahangahanga nanggad na masdan an pag-oswag sa kabilangan kan mga maigot na nagtatabang sa iba na makanood manongod ki Jehova asin sa saiyang katuyohan.

Kaipuhan an pagpahiwas huli sa pag-oswag. Kan Disyembre 1990, nagbakal nin propiedad para sa pinadakulang sangang opisina kan Mga Saksi ni Jehova. An dating pasilidad, na nasa Taipei, nagin sadit nang marhay para sa pag-asikaso sa mga aktibidad kan 1,777 parahayag kan Kahadean sa Taiwan kan panahon na idto. Pakalihis nin pirang taon nin mahigos na pagtrabaho kan internasyonal asin lokal na mga boluntaryo na laen-laen an edad, an marahayon na bagong mga pasilidad sa Hsinwu andam nang gamiton kan Agosto 1994. Kan panahon na iyan igwa nin 2,515 nakikikabtang sa pagpalakop kan maogmang bareta gikan  sa Tataramon nin Dios, an Biblia. Ngonyan, pakalihis nin labing sampulong taon, an kabilangan na ini nagin labi pa sa doble, na linampasan an 5,500 na parahayag, asin kada bulan mga un-kuarto kan kabilangan na iyan an nakikikabtang sa bilog na panahon na pag-eebanghelyo. Mahalagang mangnohon an hoben na mga lalaki asin babae na siring sa nakakarepreskong “mga tagdo kan ambon” sa maagahon.—Salmo 110:3.

Espirituwal na Pag-oswag kan mga Hoben

Medyo mga hoben an kadaklan sa maigot na mga parahayag kan maogmang bareta. An nagkapira estudyante sa elementarya. Halimbawa, sa sarong banwaan sa amihanan na Taiwan, an sarong mag-agom inimbitaran sa primerong beses na mag-atender sa Teokratikong Paadalan sa Pagmiministro, kun saen an mga Saksi ni Jehova nakakanood kun paano itokdo an mga katotoohan sa Biblia. An mag-agom napangalas nin labi-labi kan maheling an sarong sadit na aking lalaki, si Weijun, na nagbabasa kan Biblia sa plataporma asin mas matibay magbasa kisa sa dakol na adulto. Dangan sa iba pang mga pagtiripon na saindang inatenderan, sinda napahangang marhay huli ta dawa an dai pa nag-eeskuelang mga aki matitibay magsimbag. An mag-agom na ini nagkomento manongod sa pagigin toltol na marhay kan saradit na aki sa Kingdom Hall.

Taano ta an saradit na aking ini nakakonsentrar na marhay sa pagtotokdo sa Biblia sa nasyon na ini na an kadaklan Budista asin Taoista? Iyan huli ta inaplikar kan saindang Kristianong mga magurang an mga prinsipyo sa Biblia asin nagtogdok nin maogmang buhay pampamilya na nakasentro sa relasyon ki Jehova. Huling an mga magurang ni Weijun naghihingoa na magin kawiliwili an pampamilyang pag-adal sa Biblia asin ministeryo sa langtad, bautisado nang mga Saksi an matuang tugang na lalaki asin babae kan aking lalaking ini. Kan makiolay si Weijun kasuarin pa sana na makikabtang sa pampublikong paghuhulit, an saiyang ina nagsabi na an ikinapasakamot ni Weijun na mga magasin kan bulan na idto mas dakol kisa sa total na ikinapasakamot kan ibang miembro kan pamilya. Malinaw na naoogma sia na makipag-olay manongod sa katotoohan, magkomento sa mga pagtiripon, asin sabihon sa iba an saiyang nanodan.

Mantang Sinda Nagdadakula

Ano an ginigibo kan siring na mga hoben mantang sinda nagdadakula? An kadaklan padagos na nagpapaheling nin tunay na pagkamoot ki Jehova asin sa ministeryo. Halimbawa, si Huiping sarong estudyante. Sarong aldaw nasambitan kan saiyang maestro na an mga miembro nin sarong relihion dai nagpapaineksion nin dugo alagad dai nia aram kun sairisay sinda. Pagkatapos kan klase, ipinaliwanag kan hoben na Kristianang ini sa saiyang maestro na sinda mga Saksi ni Jehova asin kun taano ta siring kaiyan an saindang paninindogan.

An saro pang paratokdo nagpadalan nin sarong video manongod sa mga helang na ikinakaolakit paagi sa pagdodorog. Nasambitan sa video an 1 Corinto 6:9, alagad sinabi nia na dai kinokondenar kan Biblia an homoseksuwalidad. Sa giraray nahimong ipresentar ni Huiping sa paratokdo an pagmansay nin Dios sa bagay na iyan.

Kan an kaklaseng si Shuxia nag-aandam nin report manongod sa kadahasan sa pamilya, tinawan sia ni Huiping nin kopya kan Awake! na Nobyembre 8, 2001, na may titulo sa tutob na “Help for Battered Women” asin ipinaliwanag nia na igwa iyan nin dakol na impormasyon na basado sa Biblia manongod sa temang iyan. Pag-abot nin panahon, si Shuxia nagin dai pa bautisadong parahayag. Ipinapaabot nindang duwa ni Huiping ngonyan an maogmang bareta sa iba.

Nanompongan kan dakol na Kristiano sa eskuelahan na bakong pasil na mamidbid bilang mga tawo na namumuhay sono sa mga prinsipyo sa Biblia. Ini nangorognang totoo sa sadit na mga banwaan sa probinsia. Kinaipuhan na atubangon ni Zhihao an pangigipit nin kairiba huli sa saiyang pagtubod asin paghuhulit. Sabi nia: “Nadesganar akong marhay huli ta natatakot ako na masabatan an sakong mga kaklase mantang nakikikabtang ako sa ministeryo. Kun beses, mga sampulo sa sainda an nagduduhagi sa sako!” Sarong aldaw, inasignaran si Zhihao kan maestro na ipresentar sa klase an manongod sa saiyang relihion. “Nagdesisyon ako na ponan an sakong presentasyon sa Genesis kapitulo 1 dangan ipakipag-olay an mga hapot na arog kan: Siisay an naggibo kan daga asin  kan gabos na bagay na yaon dian? Asin paano nagkaigwa nin tawo? Kan magbasa ako sa Kasuratan, an nagkapira nagpoon na pagngisihan ako, na sinasabing superstisyoso ako. Minsan siring, ako nagpadagos asin tinapos an sakong presentasyon. Pagkatapos, nagkaigwa ako nin oportunidad na makipag-olay nin personal sa nagkapira sa mga kaklase ko manongod sa satong gibohon asin sa satong pagtubod. Ngonyan, kun naheheling ninda ako sa ministeryo, dai na ninda ako pinagngingisihan!”

Si Zhihao nagpadagos: “Huling mga Saksi an sakong mga magurang, pinag-oolayan niamo an pan-aroaldaw na teksto kada aga. Pinag-aadalan man niamo an Biblia asin regular na nag-aatender sa mga pagtiripon. Iyan an dahelan kun taano ta kaya kong atubangon an siisay man na gusto pa man giraray na duhagion ako kun hinihingoa kong ipaabot sa iba an nakakarepreskong mga katotoohan sa Biblia.”

Si Tingmei sarong estudyante sa sarong teknikal na eskuelahan para sa mga babae. Sarong beses inimbitaran sia na umiba sa piknik kaiba an nagkapira sa mga kaklase nia asin mga solteritong hale sa sarong eskuelahan para sa mga lalaki. Naheling nia an moral na peligro sa siring na asosasyon asin sia nagsayumang umiba. Inimbitaran sia nin nagkapirang beses, dawa ngani sinasabi nia sa saiyang mga kaklase an marahayon na laog kan librong Questions Young People Ask—Answers That Work. * Inolog-olog sia kan mga daragita, na sinasabing lihis na sia sa uso. Minsan siring, dai nahaloy napatunayan an kadonongan kan pagsunod sa mga prinsipyo sa Biblia kan an saro sa mga daragita nagbados asin nagpaaborsion. Si Tingmei nagsabi: “Nagtao sa sako nin malinig na konsensia an pagsunod sa paggiya ni Jehova. Bilang resulta, igwa ako nin panlaog na kagayagayahan asin pakamate nin hararom na satispaksion.”

Pagdaog sa mga Balakid sa Pag-oswag

An saro sa dayupot na mga kaamigo ni Tingmei iyo si Ruiwen. Kan sia aki pa, namatean ni Ruiwen na an pag-atender sa mga pagtiripon asin pakikikabtang sa pampublikong ministeryo nakakapagal sanang rutina. Minsan siring, pakaheling sa pagkakalaen kan tunay na pagkamoot kan mga kakongregasyon nia asin kan hababaw na pakikikatood kan saiyang mga kaklase, sia nagin kombensido na kaipuhan niang gumibo nin mga pagliliwat sa saiyang buhay. Si Ruiwen nagpoon na maghulit sa saiyang mga kaeskuela asin dai nahaloy narealisar nia nin mas malinaw kun ano an maninigo niang gibohon. Nagpoon siang maglingkod bilang auxiliary payunir, na naggagamit nin labing 50 oras kada bulan sa ministeryo. Dangan nagpoon siang magregular payunir, na naggagamit nin labing 70 oras kada bulan sa paglilingkod. Si Ruiwen nagsabi: “Dakulaon an sakong  pagpasalamat ki Jehova. Dai sia noarin man suminuko sa sako. Dawa ngani nakagibo ako nin mga bagay na nakadesganar sa saiya, namomotan pa man giraray nia ako. An sakong ina asin an iba pa sa kongregasyon nagpaheling nin kaparehong mamomoton na aktitud. Huling nagkokondukta na ako ngonyan nin limang pag-adal sa Biblia, namamatean ko na kalabot ako sa pinakanakakakontentong gibohon.”

Sa sarong haiskul sa probinsia, duwang aking Saksi an inasignaran na irepresentar an eskuelahan sa sarong kompetisyon nin tradisyonal na bayle. Kan maaraman ninda kun anong klase an kompetisyon, namatean kan duwang hoben na Saksi na an pag-entra dian malapas kan saindang Kristianong konsensia. Kan probaran nindang ipaliwanag an saindang punto de vista asin nakiolay na togotan sindang dai na magbale, sinayumahan an saindang kahagadan. Imbes, sinabihan sinda kan mga maestro na huling inasignaran sinda, maninigong idagos ninda iyan. Huling habong magkompromiso, an mga hoben na Saksi nagkonektar sa Web site kan departamento sa edukasyon asin nagpadara nin surat na ipinapaliwanag an saindang problema. Minsan ngani an mga hoben dai nakakua nin personal na simbag, nakaresibi tolos an eskuelahan nin instruksion na dai pagpiriton an siisay man na umentra sa siring na kompetisyon. Kanigoan an kaogmahan kan duwang solteritong ini na maheling na an pagsasanay sa Biblia na inako ninda bako sanang nagmolde kan saindang konsensia kundi nagtao man sa sainda kan kosog na manindogan sa kun ano an tama!

Dawa an mga may pisikal na mga limitasyon naoogmang marhay sa pagpapaabot sa iba kan saindang paglaom sa Biblia. Si Minyu naparalisar poon pa kan pagkamundag. Huling dai nagagamit an saiyang mga kamot, binubuklat nia an mga pahina kan Biblia paagi sa saiyang dila asin hinahanap an teksto na gusto niang basahon. Durante kan saiyang mga kabtang sa Teokratikong Paadalan sa Pagmiministro sa Kingdom Hall, sia nakasandig sa sarong hababang sopa, asin an saiyang kapadis nakatukaw sa hababang bangkito mantang kinakapotan an mikropono para sa saiya. Kanigoan kanakakaogma na maheling an paghihingoa ni Minyu sa pag-andam sa mga kabtang na ini!

Kan gusto na ni Minyu na magin parahayag kan Kahadean, an nagkapirang tugang na babae sa kongregasyon nag-adal kun paano magpatotoo paagi sa telepono tanganing tabangan sia. Dinodoonan nia an mga numero kan telepono paagi sa saiyang dila mantang an mga tugang na babae tinatabangan sia sa pagsurat kan mga inaapodan nia. Ikinakaogma nia an gibohon kaya sia nagin auxiliary payunir, na nakikipag-olay sa iba manongod sa Kahadean nin Dios nin 50 sagkod 60 oras kada bulan paagi sa telepono. Nakanompong sia nin nagkapirang nag-ako nin literatura sa Biblia asin uminoyon na apodan nia liwat. Sia nagkokondukta na ngonyan nin tolong pag-adal sa Biblia sa mga indibiduwal na saiyang nakaolay sa paaging ini.

Iyo, siring kan mga tagdo kan ambon, an hoben na mga lalaki—asin mga babae—sa 78 kongregasyon kan Mga Saksi ni Jehova sa Taiwan gikan sa boot asin may kaigotan na ipinapaabot an nagsusustenir sa buhay na marahay na bareta kan Kahadean sa minilyon sa matawong islang ini. Sadit sana ining kabtang kan pambilog na kinaban na kaotoban kan minasunod na hula sa Biblia: “An saimong banwaan gikan sa boot na magpepresentar kan saindang sadiri sa aldaw kan saimong puersa militar. Sa kagayonan nin kabanalan, poon sa kaagahon, ika igwa kan saimong grupo nin hoben na mga lalaki siring kan mga tagdo kan ambon.” (Salmo 110:3) An mga hoben na ini gikanan nanggad nin pagparigon sa boot kan mga mas may edad na sa tahaw kan saindang mga kapwa trabahador, asin orog sa gabos, sinda gikanan nanggad nin kagayagayahan kan saindang langitnon na Ama, si Jehova Dios!—Talinhaga 27:11.

[Nota sa Ibaba]

[Kahon/Ritrato sa pahina 10]

KAIPUHAN AN DAKOL PANG KINGDOM HALL

Huli sa pag-oswag sa Taiwan, nagin dakulang problema an pangangaipo para sa dakol pang Kingdom Hall. Taano? Huli ta apuera sa nagkapirang lugar sa probinsia, haros mayo nang makuang daga na angay na togdokan nin mga Kingdom Hall. Apuera kaiyan, sobra kalangkaw an mga presyo kan daga, asin estrikto an mga ley sa pagsona. Sa mas dakulang mga banwaan asin siudad, an solamenteng remedyo iyo an magbakal nin mga espasyong pan-opisina asin gibohon iyan na Kingdom Hall. Dawa siring, an kadaklan na opisina hababang marhay an mga kisame, mahal an bayad para sa mantension, limitado an puedeng maglaog, o iba pang bagay na nagigin dahelan na bakong angay an mga iyan na gamiton na Kingdom Hall.

Sa ibong kaiyan, kan nakaagi pa sanang mga taon, an mga Saksi ni Jehova sa Taiwan nagkaigwa nin nagkapirang bagong Kingdom Hall. Nagpapadagos an paghanap nin bagong propiedad mantang ipinapaheling kan mga Saksi na andam sindang isaabaga an pinansial na paninimbagan saka paoswagon an kinakaipuhan na mga abilidad sa pagtogdok.