Si Job—Sarong Tawo na May Pakatagal Asin Integridad
Si Job—Sarong Tawo na May Pakatagal Asin Integridad
“Isinentro mo daw an saimong puso sa sakong lingkod na si Job, na mayo nin siisay man na nakakaagid sa saiya sa daga, lalaking daing katuyawan asin tanos, na natatakot sa Dios asin naglilikay sa maraot?”—JOB 1:8.
1, 2. (a) Anong dai linalaoman na mga trahedya an naeksperyensiahan ni Job? (b) Iladawan an buhay ni Job bago uminabot an mga trahedya.
MAY sarong tawo kaidto na garo baga yaon na saiya an gabos na bagay—kayamanan, prestihio, marahay na salud, asin maogmang buhay pampamilya. Dangan tolong trahedya an uminabot na marikas an pagkasunodsunod. Biglang nawara an saiyang kayamanan. Sunod, nagadan an gabos niang aki sa sarong palaen na bagyo. Dai nahaloy pagkatapos kaiyan, nagkaigwa sia nin nakakapaluyang helang na pinano nin makolog na mga pigsa an bilog niang hawak. Aram na gayod nindo na an tawong iyan iyo si Job, sarong pangenot na personahe sa libro sa Biblia na inginaran sa saiya.—Job, kapitulo 1 asin 2.
2 “O kun ako kutana nasa mga bulan na lunar kan suanoy,” an agrangay nia. (Job 3:3; 29:2) Kun nangyayari an mga kalamidad, siisay an dai naghihidaw kan mga aldaw na marahay pa an kamugtakan? Kun dapit ki Job, marahay an nagin buhay nia, na garo baga protehido sa remalaso. Iginagalang sia kan prominenteng mga tawo asin naghahagad sinda sa saiya nin hatol. (Job 29:5-11) Mayaman sia, alagad timbang an saiyang pagmansay sa kuarta. (Job 31:24, 25, 28) Kun may natatagboan siang mga balo o ilo na nangangaipo, tinatabangan nia sinda. (Job 29:12-16) Asin sia nagdanay na maimbod sa saiyang agom.—Job 31:1, 9, 11.
3. Paano minansay ni Jehova si Job?
3 Si Job namuhay na daing katuyawan huli ta sinasamba nia an Dios. “Mayo nin siisay man na nakakaagid sa saiya sa daga,” an sabi ni Jehova, “lalaking daing katuyawan asin tanos, na natatakot sa Dios asin naglilikay sa maraot.” (Job 1:1, 8) Alagad sa ibong kan moral na integridad ni Job, tinapos kan mga trahedya an saiyang komportableng pamumuhay. Nawara an gabos na pinagpagalan nia, asin an saiyang tunay na pagkatawo nabalo paagi sa kolog, labi-labing kamondoan, asin pagkadesganar.
4. Taano ta makakatabang na konsideraron an masakiton na inagihan ni Job?
4 Siempre, bako sana nanggad si Job an lingkod nin Dios na nag-agi nin personal na kalamidad. Dakol na Kristiano ngonyan an madaling makakasabi na may pagkakaagid an saindang inaagihan sa inagihan ni Job. Sa dahelan na ini, duwang hapot an maninigo niatong konsideraron: Paano makakatabang sa sato an pagrepaso sa makatatakot na inagihan ni Job kun kita napapaatubang sa trahedya? Asin paano kita matotokdoan kaiyan na magkaigwa nin orog na empatiya sa iba na nagsasakit?
Sarong Isyu nin Kaimbodan Asin Pagbalo sa Integridad
5. Segun ki Satanas, taano ta pinaglilingkodan ni Job an Dios?
5 Pambihira an nangyari ki Job. Dai aram ni Job, kinuestion kan Diablo an mga motibo ni Job sa paglilingkod sa Dios. Kan darahon ni Jehova an atension sa marahayon na mga kualidad ni Job durante nin sarong pagtiripon sa langit, si Satanas nagsimbag: “Bako daw na ika mismo nagbugtak nin proteksion sa palibot nia asin sa palibot kan saiyang kamag-anakan asin sa palibot kan gabos niang sadiri?” Sa siring, si Satanas naghingako na kaimotan an nagmotibar ki Job—asin ipinapasentido nia na pati sa gabos na iba pang lingkod nin Dios. “Tabi unata an saimong kamot asin dotdota an gabos niang sadiri asin helinga kun baga dai ka nia sumpaon nin atubangan,” an sinabi ni Satanas ki Jehova.—Job 1:8-11.
6. Anong mahalagang isyu an pinalataw ni Satanas?
6 Mahalaga an isyung ini. Inangat ni Satanas an paagi kan pagkapot ni Jehova kan saiyang soberaniya. Posible daw talaga para sa Dios na pamahalaan an uniberso paagi sa pagkamoot? O, siring kan ipinapasentido ni Satanas, an kaimotan daw pirmeng mangingibabaw sa katapustapusi? Tinogotan ni Jehova an Diablo na iimbuelto si Job bilang sarong halimbawa, na kompiado sa integridad asin kaimbodan kan Saiyang lingkod. Sa siring, si Satanas mismo an nagtao kan mga kalamidad na naeksperyensiahan ni Job nin sunod-sunod. Kan maprakaso si Satanas sa saiyang enot na mga pagsalakay, tinawan nia si Job nin makolog na helang. “Kublit para sa kublit, asin an gabos na sadiri nin tawo itatao nia para sa saiyang kalag,” an alegasyon kan Diablo.—Job 2:4.
7. Sa anong mga paagi na an mga lingkod nin Dios ngonyan apektado kan mga kasakitan na kaagid kan ki Job?
7 Minsan ngani an kadaklan na Kristiano ngonyan dai man nagsasakit na kapareho kan ki Job, may laen-laen na klase nin kahorasaan na nagpapasakit sa sainda. Dakol an napapaatubang sa persekusyon o mga problema sa pamilya. An kasakitan sa pagbuhay o maluyang salud puedeng nakakapanluya nin biyo. An nagkapira isinakripisyo an saindang buhay huli sa saindang pagtubod. Siempre, dai niato dapat ipamugtak na si Satanas an personalmenteng causa kan lambang trahedya na inaagihan niato. An totoo, may nagkapirang problema na an dahelan sadiri ngani niatong mga sala o sarong pisikal na erensia. (Galacia 6:7) Asin kita gabos apektado kan maraot na mga epekto nin pagkagurang asin natural na mga kalamidad. Klarong sinasabi kan Biblia na sa presenteng panahon, dai milagrosong pinoprotehiran ni Jehova sa makuring mga kasakitan na ini an saiyang mga lingkod.—Eclesiastes 9:11.
8. Paano puedeng hingoahon ni Satanas na gamiton an mga kahorasaan na inaagihan ta?
8 Minsan siring, tibaad gamiton ni Satanas an mga kahorasaan na inaagihan niato tanganing paluyahon an satong pagtubod. Nasambitan ni apostol Pablo na sia pinapasakitan nin “sarong tunok sa laman, sarong anghel ni Satanas,” na padagos na ‘nagtatampal’ sa saiya. (2 Corinto 12:7) Baga man ini sarong pisikal na problema, na siring baga nin maluyang pagheling, o iba pang bagay, nasabotan ni Pablo na puedeng gamiton ni Satanas an problemang ini asin an resultang pagkadesganar tanganing haleon ki Pablo an saiyang kagayagayahan asin integridad. (Talinhaga 24:10) Ngonyan, puedeng sutsutan ni Satanas an mga miembro kan pamilya, mga kaeskuela, o dawa an diktatoryal na mga gobyerno na persegiron an mga lingkod nin Dios sa ano man na paagi.
9. Taano ta dai kita maninigong magngalas nin labi-labi kun may kasakitan o persekusyon?
9 Paano niato mapangganang maaatubang an mga problemang ini? Paagi sa pagmansay dian bilang oportunidad na ipaheling na an satong pagkamoot ki Jehova asin an satong pagpapasakop sa saiyang soberaniya dai nagbabago. (Santiago 1:2-4) Ano man an dahelan kan satong kasakitan, an pakasabot sa kahalagahan kan kaimbodan sa Dios matabang sa sato na papagdanayon an satong espirituwal na pagkatimbang. Si apostol Pedro nagsurat sa mga Kristiano: “Mga namomotan, dai kamo magngalas sa naglalaad dian sa saindo, na nangyayari sa saindo bilang pagbalo, na garo baga pambihirang bagay an nangyayari sa saindo.” (1 Pedro 4:12) Asin nagpaliwanag si Pablo: “An gabos na nagmamawot na mamuhay na may diosnon na debosyon kaibahan ni Cristo Jesus pepersegiron man.” (2 Timoteo 3:12) Kinukuestion ni Satanas an integridad kan mga Saksi ni Jehova sagkod ngonyan, kapareho kan ginibo nia ki Job. Sa katunayan, ipinapaheling kan Biblia na dinugangan ni Satanas an saiyang mga pagsalakay sa banwaan nin Dios durante kan mga huring aldaw na ini.—Kapahayagan 12:9, 17.
Salang Pakasabot Asin Salang Hatol
10. Ano an nagin disbentaha ni Job?
10 Si Job may disbentaha kaidto na dai na niato kaipuhan na maeksperyensiahan. Dai nia aram kun taano ta nangyari sa saiya an mga kalamidad na ini. Si Job salang nagkonklusyon na minsan paano “si Jehova an nagtao, asin si Jehova an buminawe.” (Job 1:21) Posible na tuyong prinobaran ni Satanas na magkaigwa nin impresyon si Job na an Dios an dahelan kan saiyang makuring sakit.
11. Ipaliwanag an reaksion ni Job sa mga kalamidad na naeksperyensiahan nia.
11 Si Job biyong pinanluyahan nin boot, minsan ngani nagsayuma siang sumpaon an Dios, na isinasadol sa saiya kan saiyang agom. (Job 2:9, 10) ‘Garo baga mas marahay an kamugtakan kan mga maraot kisa sa sako,’ an sabi nia. (Job 21:7-9) ‘Taano ta pinapadusahan ako nin Dios?’ an siertong inisip-isip nia. May mga panahon kaidto na gusto na niang magadan. “O marahay pang ako tagoon mo sa Sheol, na ako tahoban mo sagkod na umontok an saimong kaanggotan!” an ikinagsing nia.—Job 14:13.
12, 13. Paano nakaapektar ki Job an mga komento kan saiyang tolong kaibaiba?
12 Si Job may tolong kaibaiba na nagdalaw sa saiya, na garo baga tanganing “damayan sia saka rangahon sia.” (Job 2:11) Minsan siring, sinda sa katunayan nagin “mga pararangang nakakaparibok.” (Job 16:2) Si Job puede kutanang nakinabang sa mga katood na puede niang pagsabihan kan saiyang mga problema, alagad an tolong ini nakadugang pa sa karibarawan ni Job asin nagpagrabe pa sa saiyang mga pakamate nin pagkadesganar.—Job 19:2; 26:2.
13 Natural sana, si Job tibaad naghapot sa saiyang sadiri: ‘Taano ta ako pa? Ano an nagibo ko na maninigo sa gabos na kalamidad na ini?’ An saiyang mga kaibaiba nagtao nin mga paliwanag na biyong nakakadaya. Nagsuponer sinda na si Job an dahelan kan sadiri niang pagsakit huli sa pakakomiter nin magabat na kasalan. “Siisay na daing sala an nagadan?” an hapot ni Elifaz. “Sono sa sakong naheling, an mga nagpapakana nin maraot asin an mga nagsasabwag nin ribok iyo mismo an mag-aani kaiyan.”—Job 4:7, 8.
14. Taano ta dai niato maninigong ikonektar tolos an pagsakit sa salang paggawe?
14 Totoo, puedeng maglataw an mga problema kun kita magtatanom segun sa laman imbes na sa espiritu. (Galacia 6:7, 8) Pero, sa presenteng sistemang ini, puedeng lumataw an mga problema ano man an satong paggawe. Apuera kaini, dai nanggad puedeng sabihon na an mga daing kasalan ligtas sa gabos na kalamidad. Si Jesu-Cristo, na “dai nin digta, siblag sa mga parakasala,” nag-agi nin makolog na kagadanan sa sarong hariging pasakitan, asin si apostol Santiago nagadan bilang martir. (Hebreo 7:26; Gibo 12:1, 2) An salang pangangatanosan ni Elifaz asin kan saiyang duwang kaibaiba nagpahiro ki Job na depensahan an saiyang marahay na ngaran asin iinsistir na mayo siang ginibong sala. Pero, tibaad nakaapektar sa saiyang pagmansay sa hustisya nin Dios an saindang matagas na mga alegasyon na nagsasakit si Job dahel sa salang gibo.—Job 34:5; 35:2.
Paghanap nin Tabang Kun Napapaatubang sa Kahorasaan
15. Anong pangangatanosan an makakatabang sa sato kun napapaatubang sa pagsakit?
15 May makukua daw kitang leksion digdi? An mga trahedya, helang, o persekusyon tibaad garo baga bakong makatanosan. An ibang tawo garo baga nakakalikay sa dakol na siring na problema. (Salmo 73:3-12) Kun beses, tibaad kaipuhan niatong ihapot sa satong sadiri an pundamental na mga hapot na ini: ‘An sako daw na pagkamoot sa Dios nagpapahiro sa sako na paglingkodan sia ano man an mangyari? Hinihimuyawot ko daw na makatao ki Jehova nin “ikakasimbag sa saro na nagduduhagi sa Saiya?”’ (Talinhaga 27:11; Mateo 22:37) Dai niato noarin man dapat na togotan an dai inisip na mga komento kan iba na pagdudahan niato an satong langitnon na Ama. Sarong beses, sinabi nin sarong maimbod na Kristiana na nagkaigwa nin pabalikbalik na helang sa laog nin dakol na taon: “Aram ko na ano man an itogot ni Jehova, iyan kayang tagalan. Aram ko na tatawan nia ako kan kinakaipuhan na kosog. Pirme niang ginigibo iyan.”
16. Paano nagtatao nin tabang an Tataramon nin Dios sa mga napapaatubang sa mga kasakitan?
16 Kun dapit sa mga taktika ni Satanas, igwa kita nin pakasabot na mayo kaidto ki Job. “Bako kitang ignorante sa saiyang mga pakana,” o maraot na mga plano. (2 Corinto 2:11) Dugang pa, may makukuanan kita nin nagsosopay na praktikal na kadonongan. Sa Biblia, manonompongan niato an mga salaysay manongod sa maimbod na mga lalaki asin babae na nagtagal nin gabos na klase nin kasakitan. Si apostol Pablo, na nagsakit nin labi kisa kadaklan na Kristiano, nagsurat: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” (Roma 15:4) An sarong Saksi sa Europa na nabilanggo huli sa saiyang pagtubod durante kan ikaduwang guerra mundial irinibay an tolong aldaw na rasyon nin kakanon para sa sarong Biblia. “Nagin kapakipakinabang nanggad an pagribayan na idto!” an sabi nia. “Sa ibong kan sakong pagkagutom sa pisikal, nag-ako ako kan espirituwal na kakanon na nakatabang na susteniran ako saka an iba pa sa pagbalo sa samo durante kan masakit na mga panahon na idto. Yaon pa sa sako an Bibliang iyan sagkod ngonyan.”
17. Anong mga probisyon nin Dios an makakatabang sa sato na makatagal?
17 Apuera sa karangahan hale sa Kasuratan, igwa kita nin dakol na pantabang sa pag-adal kan Biblia na nagtatao nin kapakipakinabang na paggiya sa pag-atubang sa mga problema. Kun hehelingon nindo an Watch Tower Publications Index, posibleng marhay na makanompong kamo nin eksperyensia nin sarong kapwa Kristiano na nag-agi nin pagbalo na kaagid kan saindo. (1 Pedro 5:9) Tibaad makatabang man na ipakipag-olay an saindong mga kamugtakan sa mapagsabot na kamagurangan o iba pang maygurang na mga Kristiano. Orog sa gabos, paagi sa pamibi, makakaasa kamo sa tabang ni Jehova asin kan saiyang banal na espiritu. Paano linabanan ni Pablo an ‘mga tampal’ ni Satanas? Paagi sa pakanood na magsarig sa kapangyarihan nin Dios. (2 Corinto 12:9, 10) “Igwa ako kan kosog para sa gabos na bagay huli sa saiya na nagtatao nin puersa sa sako,” an isinurat nia.—Filipos 4:13.
18. Paano puedeng makatao nin mahalagang pamparigon sa boot an mga kapwa Kristiano?
18 Kaya may makukuang tabang, asin dai kamo maninigong mag-alangan na hanapon iyan. “Ika daw nanluya an boot sa aldaw nin kasakitan? An saimong kosog magigin kadikit,” an sabi kan talinhaga. (Talinhaga 24:10) Kun paanong an mga anay puedeng magpabagsak nin sarong harong na gibo sa kahoy, an pagkadesganar puede man na makaraot sa Kristianong integridad. Tanganing olangon an peligrong ini, si Jehova nagtatao sa sato nin suporta paagi sa satong mga kapwa lingkod nin Dios. Nagpaheling an sarong anghel ki Jesus asin pinakosog sia kan banggi na sia arestaron. (Lucas 22:43) Mantang pasiring sa Roma bilang sarong bilanggo, si Pablo “nagpasalamat sa Dios asin nagkosog an boot” kan matagboan nia an mga tugang sa Sadan nin Apio asin Tolong Taberna. (Gibo 28:15) Nagigirumdoman pa nin sarong Saksing Aleman an tabang na inako nia paglaog nia sa kampo de konsentrasyon sa Ravensbrück bilang sarong nahahandal na tinedyer. “Nanompongan tolos ako nin sarong kapwa Kristiano asin ipinamate nia sako an mamomoton na pag-ako,” an nagigirumdoman nia. “Saro pang maimbod na tugang na babae an nag-ataman sa sako, asin sia nagin garo espirituwal na ina para sa sako.”
“Magmaimbod Ka”
19. Ano an nakatabang ki Job na labanan an mga paghihingoa ni Satanas?
19 Ilinadawan ni Jehova si Job bilang sarong tawo na ‘nangangapot nin higot sa saiyang integridad.’ (Job 2:3) Sa ibong nin pagkadesganar asin dai pakasabot kun taano ta sia nagsasakit, si Job dai noarin man nag-urong-sulong sa mahalagang marhay na isyu nin kaimbodan. Si Job nagsayumang deharan an pinakadahelan na sia nabubuhay. Sia nag-insistir: “Sagkod na ako magadan dai ko hahaleon sa sakuyang sadiri an sakuyang integridad!”—Job 27:5.
20. Taano ta may halaga an pakatagal?
20 An kaparehong determinasyon matabang sa sato na papagdanayon an satong integridad sa irarom nin ano man na situwasyon—sa atubangan nin mga sugot, pagkontra, o kasakitan. “Dai ka matakot sa mga bagay na madali mo nang tioson,” an sinabi ni Jesus sa kongregasyon nin Smirna. “Uya! Padagos na ibibilanggo kan Diablo an nagkapira sa saindo tanganing kamo lubos na mabalo, asin tanganing magkaigwa kamo nin kahorasaan [problema, kasakitan, o pan-aapi] sa laog nin sampulong aldaw. Magmaimbod ka dawa sagkod sa kagadanan, asin ta itatao ko sa saimo an korona nin buhay.”—Kapahayagan 2:10.
21, 22. Kun nagtatagal nin kahorasaan, mararanga kita nin anong kaaraman?
21 Sa sistemang ini na pinapamahalaan ni Satanas, mababalo an satong pakatagal asin integridad. Minsan siring, inaasegurar kita ni Jesus na mantang tinatanaw niato an ngapit, mayo kita nin dahelan na matakot. An mahalaga iyo na kita magmaimbod. “An kahorasaan naagi sana,” an sabi ni Pablo, mantang an “kamurawayan,” o balos na ipinapanuga ni Jehova sa sato, “paorog nang paorog an gabat asin daing katapusan.” (2 Corinto 4:17, 18) Maski an kahorasaan ni Job naagi sana kun ikokomparar sa dakol na maogmang taon nia bago asin pakatapos kan pagbalo sa saiya.—Job 42:16.
22 Pero, tibaad may mga panahon sa satong buhay na an mga pagbalo sa sato garo baga daing katapusan asin an satong pagsakit garo baga haros dai makayanan. Sa sunod na artikulo, eestudyaran niato kun paanong an eksperyensia ni Job puedeng magtokdo sa sato nin dugang pang mga leksion mapadapit sa pakatagal. Hehelingon man niato an mga paagi na mapapakosog niato an iba na napapaatubang sa kasakitan.
Ano an Isisimbag Nindo?
• Anong pundamental na isyu an pinalataw ni Satanas may koneksion sa integridad ni Job?
• Taano ta dai kita maninigong magngalas nin labi-labi kun may kasakitan?
• Paano kita tinatabangan ni Jehova na makatagal?
[Mga Hapot Para sa Pag-adal]
[Mga Ritrato sa pahina 23]
Makakatabang sa sato na makatagal an pagsiyasat, pakikipag-olay sa maygurang na mga Kristiano, asin an biyong pagpahayag kan nasa puso niato sa pamibi