‘Huli sa Nuebe Anyos na Aking Lalaki’

KADA umabot an mga Saksi ni Jehova sa saiyang pinto, si Wiesława, na nag-iistar sa timog kan Polandia, magalang na pinapasalamatan sinda dangan pinapahale na sinda. Sarong aldaw, an nuebe anyos na si Samuel uminabot sa saiyang pinto kaiba an ina kaini. Sa panahon na ini, nagdesisyon si Wiesława na maghinanyog sa mensahe asin akoon an sarong magasin manongod sa paraiso digdi sa daga.

Huling nagdadangadang na an Memorial kan kagadanan ni Jesu-Cristo, gusto ni Samuel na imbitaran si Wiesława sa espesyal na okasyon na ini. Kaya, kaibanan kan saiyang ina, binisita giraray kan aking lalaki si Wiesława, na sa panahon na iyan dara-dara an sarong imprentadong imbitasyon. Kan maheling na marahayon an bulos kan aking lalaki, si Wiesława nagpaaram nguna sa sainda asin nagbalik sa laog kan harong tanganing magsangli nin mas angay na bado. Kan sia magbalik, sia naghinanyog ki Samuel, inako an imbitasyon, asin naghapot: “Maduman akong solo o kaiba ko an agom ko?” Dangan idinugang nia: “Dawa dai mag-iba an sakong agom, maduman ako. Gigibohon ko iyan para saimo, Samuel.” Sa kaogmahan ni Samuel, inotob ni Wiesława an saiyang panuga.

Durante kan pahayag sa Memorial, nagtukaw si Samuel sa kataed ni Wiesława asin ipinaheling sa saiya an mga teksto na tinotokar. Napahanga si Wiesława. Ikinaogma nia an pag-atender sa Memorial asin nagpasalamat sia na an harararom na kaisipan ipinaliwanag sa simpleng pananaram. Napahiro man an boot nia kan maogmang pag-ako asin kabootan na ipinaheling kan kongregasyon. Poon kaidto, nagpaheling si Wiesława nin paorog pang paorog na pag-apresyar sa espirituwal na mga bagay asin nagpoon na regular na makiasosyar sa mga Saksi ni Jehova. Kasuarin pa sana, sia nagsabi: “Nasusupog ako huling dati dai ako naghinanyog sa saindo kun kamo minaabot sa sakong pinto. Asin kaipuhan kong admitiron na ako naghinanyog sa saindong mensahe huli sana sa nuebe anyos na aking lalaki, huli ki Samuel.”

Arog ni Samuel kan Polandia, dakol pang hoben na Saksi ni Jehova an nag-oomaw sa Dios paagi sa tataramon asin paagi sa saindang marahay na ugale. Kun ika sarong hoben, tibaad magigibo mo man na tabangan an sinserong mga tawo na apresyaron an marahay na pagpapahalaga sa espirituwal na mga bagay.