“Ipahayag Nindo sa Dios an Saindong mga Kahagadan”
“Ipahayag Nindo sa Dios an Saindong mga Kahagadan”
“Sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.”—FILIPOS 4:6.
1. Kiisay kita igwa nin pribilehio na makikomunikar, asin taano ta makangangalas nanggad iyan?
KUN hagadon nindong pormal na makipag-olay sa namamahala sa saindong nasyon, ano daw an magigin simbag sa saindo? Tibaad makaresibi kamo nin magalang na simbag hale sa saiyang opisina, alagad harayong marhay an posibilidad na togotan kamong makaolay an namamahala mismo. Minsan siring, laen an situwasyon kun dapit sa kadarudakulaing Namamahala sa gabos, si Jehova Dios, an Soberano kan uniberso. Puede niato siang makaolay saen man kitang lugar asin sa ano man na oras na gustohon niato. Pirmeng makakaabot sa saiya an inaakong mga pamibi. (Talinhaga 15:29) Marahayon nanggad iyan! Bako daw na an pag-apresyar digdi maninigong magpahiro sa sato na regular na mamibi sa Saro na angay na apodon na “Paradangog nin pamibi”?—Salmo 65:2.
2. Ano an kaipuhan tanganing akoon nin Dios an mga pamibi?
2 Minsan siring, tibaad may maghapot, ‘Anong mga pamibi an inaako nin Dios?’ Ipinapaliwanag kan Biblia an sarong bagay na kaipuhan tanganing akoon an mga pamibi kan iyan magsabi: “Kun dai nin pagtubod imposible na sia mapanigoan na gayo, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Siring kan ipinaliwanag sa naenot na artikulo, an sarong mahalagang bagay sa pagdolok sa Dios iyo an pagtubod. Andam an Dios na akoon an mga pamibi kan mga minadolok sa saiya, alagad kaipuhan na gibohon ninda iyan na may pagtubod asin may tamang mga gibo na may kaibang sinseridad asin tamang kamugtakan nin puso.
3. (a) Siring kan ipinaheling kan mga pamibi kan maimbod na mga lingkod kan suanoy, anong klaseng mga kapahayagan an puedeng iiba sa mga pamibi? (b) Ano an laen-laen na klase nin pamibi?
3 Sinadol ni apostol Pablo an mga Kristiano kan panahon nia: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” (Filipos 4:6, 7) Sa Biblia igwa nin dakol na halimbawa kan mga namibi sa Dios manongod sa saindang mga kapurisawan. Kabilang sa sainda si Ana, Elias, Ezequias, asin Daniel. (1 Samuel 2:1-10; 1 Hade 18:36, 37; 2 Hade 19:15-19; Daniel 9:3-21) Maninigo niatong sunodon an saindang halimbawa. Mangnohon man na ipinapaheling kan mga tataramon ni Pablo na puedeng magin laen-laen na klase an satong pamibi. Nasambitan nia an pagpasalamat, an boot sabihon, pamibi na dian ipinapahayag niato an pag-apresyar sa ginigibo nin Dios para sa sato. Ini puedeng ibanan nin pag-omaw. An pagngayongayo nanonongod sa mapakumbaba asin odok na pakimaherak. Asin puede niatong sambiton an mga kahagadan para sa espesipikong bagay. (Lucas 11:2, 3) An satong langitnon na Ama maogmang aakoon an satong pagdolok sa saiya sa arin man na paaging ini.
4. Minsan ngani aram ni Jehova an satong mga pangangaipo, taano ta sinasabi ta pa man giraray sa saiya an satong mga kahagadan?
4 Tibaad may maghapot, ‘Bako daw na aram na ni Jehova an gabos na pangangaipo niato?’ Iyo, aram nia. (Mateo 6:8, 32) Kun siring, taano ta gusto pa man giraray niang dumolok kita sa saiya asin sabihon an satong mga kahagadan? Estudyare an halimbawang ini: An sarong kagsadiri nin tindahan tibaad mag-alok nin regalo sa nagkapira sa saiyang mga parokyano. Minsan siring, tanganing umako kan regalong ini, an mga parokyano dapat na dumolok sa kagsadiri asin hagadon iyan. An mga habong maghingoa na gibohon iyan mapaheling na dai talaga ninda inaapresyar an alok. Kaagid kaiyan, an dai niato pagpahayag kan satong mga kahagadan sa pamibi mapaheling nin kadaihan nin pag-apresyar sa probisyon ni Jehova. Si Jesus nagsabi: “Humagad kamo asin kamo mag-aako.” (Juan 16:24) Sa paaging ini, ipinapaheling niato an satong pagsarig sa Dios.
Paano Kita Maninigong Dumolok sa Dios?
5. Taano ta kaipuhan niatong mamibi sa ngaran ni Jesus?
5 Si Jehova dai nagtatao nin dakol na estriktong reglamento kun paano mamimibi. Minsan siring, kaipuhan niatong manodan an tamang pagdolok sa Dios, na ipinapaliwanag sa Biblia. Halimbawa, tinokdoan ni Jesus an saiyang mga parasunod: “Kun humagad kamo sa Ama nin ano man iyan itatao nia sa saindo sa ngaran ko.” (Juan 16:23) Huli kaini, kita hinahagadan na mamibi sa ngaran ni Jesus, na rinerekonoser na si Jesus an solamenteng pinakapaagihan sa pagtao nin Dios nin mga bendisyon sa bilog na katawohan.
6. Kun namimibi, ano an maninigong posisyon niato?
6 Ano an maninigong posisyon niato kun namimibi? Sa Biblia, mayo nin partikular na posisyon na espesipikong sinasabi tanganing dangogon an satong mga pamibi. (1 Hade 8:22; Nehemias 8:6; Marcos 11:25; Lucas 22:41) An mahalaga iyo na mamibi sa Dios nin sinsero asin may tamang kamugtakan nin puso.—Joel 2:12, 13.
7. (a) Ano an kahulogan kan “amen”? (b) Paano iyan tamang ginagamit sa mga pamibi?
7 Kumusta man an paggamit kan terminong “amen”? Ipinaparisa kan Kasuratan na ini sa parate sarong angay na pantapos sa satong mga pamibi, nangorogna kun kita namimibi sa publiko. (Salmo 72:19; 89:52) An termino sa Hebreo na ʼa·menʹ sa pundamental nangangahulogan na “iyo nanggad.” Ipinapaliwanag kan Cyclopedia ni McClintock asin Strong na an pagsabi nin “Amen” sa katapusan nin mga pamibi nangangahulogan nin “pagkompirmar sa mga tataramon na sinambit, asin pag-arang na logod maotob iyan.” Sa siring, paagi sa pagsabi nin sinserong “Amen” bilang pantapos, ipinaparisa kan namimibi an saiyang odok na saboot manongod sa sinabi pa sana nia. Kun an sarong Kristiano na nagrerepresentar kan kongregasyon sa pamibi magtapos paagi sa tataramon na ini, an mga naghihinanyog puede man na magsabing “Amen” sa boot sana o nin makosog tanganing iparisa an saindang odok sa puso na pag-oyon sa sinabi pa sana.—1 Corinto 14:16.
8. Paano puedeng magin kapareho kan mga pamibi ni Jacob o Abraham an nagkapira sa satong mga pamibi, asin ano an ipapaheling kaini manongod sa sato?
8 May mga panahon na tibaad itogot nin Dios na ipaheling niato kun gurano kita kainteresado sa mga bagay na ipinapamibi niato. Tibaad kaipuhan niatong magin siring ki Jacob kan suanoy, na magdamlag na nakigumolan sa sarong anghel tanganing makamtan an bendisyon. (Genesis 32:24-26) O huli sa nagkapirang kamugtakan tibaad kaipuhanon na kita magin siring ki Abraham, na paorootrong nakimaherak ki Jehova para ki Lot asin para sa siisay man na iba pang matanos na tawo na tibaad yaon sa Sodoma. (Genesis 18:22-33) Tibaad kita man makimaherak ki Jehova manongod sa mga bagay na mahalagang marhay sa sato, na nakikiolay sa saiya basado sa saiyang hustisya, mamomoton na kabootan, asin pagkaherak.
Ano an Puede Niatong Hagadon?
9. Ano an maninigo na pangenot sa sato kun kita namimibi?
9 Girumdomon na si Pablo nagsabi: “Sa gabos na bagay . . . ipahayag nindo sa Dios an saindong mga kahagadan.” (Filipos 4:6) Huli kaini, puedeng kaiba sa personal na mga pamibi an haros gabos na aspekto nin buhay. Minsan siring, an pangenot sa satong mga pamibi maninigo na an intereses ni Jehova. Si Daniel nagtao nin marahayon na halimbawa sa bagay na ini. Kan an Israel pinadusahan huli sa saindang mga kasalan, si Daniel nakimaherak ki Jehova na magpaheling nin pagkaherak, na nagsasabi: “Dai ka mag-atraso, para sa sadiri mong kapakanan, O Dios ko, huli [sa] saimong sadiring ngaran.” (Daniel 9:15-19) An mga pamibi daw niato nagpapaheling man na an santipikasyon kan ngaran ni Jehova asin an kaotoban kan saiyang kabotan iyo an pangenot na mga bagay para sa sato?
10. Paano niato naaaraman na angay na mamibi manongod sa personal na mga bagay?
10 Minsan siring, angay man na hagadon an may koneksion sa personal na mga bagay. Halimbawa, arog kan salmista, puede kitang mamibi para sa mas hararom na espirituwal na pakasabot. Sia namibi: “Papangyarihon mong ako makasabot, tanganing maotob ko an saimong ley asin maotob ko iyan sa bilog na puso.” (Salmo 119:33, 34; Colosas 1:9, 10) Si Jesus “nagdolot nin mga pagngayongayo patin nin mga kahagadan man sa Saro na makakapagligtas sa saiya hale sa kagadanan.” (Hebreo 5:7) Sa paggibo kaiyan, ipinaheling nia an pagigin angay kan paghagad nin kosog kun an saro napapaatubang sa peligro o mga pagbalo. Kan itinotokdo an modelong pamibi sa saiyang mga disipulo, iiniba ni Jesus an personal na mga bagay, arog baga nin pagpatawad sa mga sala asin pagkaigwa nin kakanon sa aroaldaw.
11. Paano kita matatabangan nin pamibi na dai magpadaog sa mga sugot?
11 Sa modelong pamibi na iyan, iiniba ni Jesus an kahagadan na: “Dai mo kami darahon sa sugot, kundi iligtas mo kami sa maraot.” (Mateo 6:9-13) Kan huri, sia nagkonseho: “Magdanay kamong mapagbantay asin padagos na mamibi, tanganing dai kamo makalaog sa sugot.” (Mateo 26:41) Kaipuhan an pamibi kun kita napapaatubang sa mga sugot. Tibaad masugotan kita na ignorohon an mga prinsipyo sa Biblia sa trabaho o sa eskuelahan. Tibaad agdahon kita kan mga bakong Saksi na makiayon sa sainda sa kuestionableng mga aktibidad. Tibaad hagadon sa sato na gibohon an sarong bagay na minalapas sa matanos na mga prinsipyo. Sa siring na mga panahon, marahay na sunodon niato an konseho ni Jesus na mamibi—antes pa saka kun napapaatubang na mismo sa sugot—na hinahagad sa Dios na tabangan kita tanganing dai kita madara.
12. Anong mga dahelan nin kahaditan an tibaad magpahiro sa sato na mamibi, asin ano an malalaoman niato ki Jehova?
12 Manlaenlaen na kagipitan asin kahaditan an nagpapasakit sa buhay nin mga lingkod nin Dios ngonyan. An helang asin emosyonal na tension iyo an pangenot na ginigikanan nin kahaditan para sa dakol. An madahas na mga kamugtakan sa palibot niato nagtatao nin tension sa satong buhay. An mga kasakitan sa pagbuhay nagpapadepisil na makua an mga pangangaipo sa buhay. Nakakaranga nanggad na maaraman na si Jehova naghihinanyog sa saiyang mga lingkod na ipinapakipag-olay sa saiya an mga bagay na ini! An Salmo 102:17 nagsasabi manongod ki Jehova: “Tunay na hihinanyogon nia an pamibi kan mga hinalean kan gabos, asin dai nia isisikwal an saindang pamibi.”
13. (a) Anong personal na mga bagay an angay na ipamibi? (b) Isaysay an sarong halimbawa nin siring na pamibi.
13 An totoo, ano man na bagay na nakakaapektar sa satong paglilingkod ki Jehova o sa satong relasyon sa saiya angay na ipamibi. (1 Juan 5:14) Kun kamo kaipuhan na gumibo nin mga desisyon manongod sa pag-agom o trabaho o manongod sa pagpahiwas kan saindong ministeryo, dai mag-alangan na ipakipag-olay ini sa Dios, na hinahagad an saiyang paggiya. Halimbawa, gusto nin sarong hoben na babae sa Pilipinas na makikabtang sa bilog na panahon na ministeryo. Minsan siring, mayo sia nin trabaho tanganing suportaran an saiyang sadiri. Sia nagsabi: “Sarong Sabado, namibi ako ki Jehova nin espesipiko manongod sa pagpapayunir. Pagtaodtaod kan aldaw man sanang idto, mantang naghuhulit, nag-alok ako nin libro sa sarong tinedyer. Bigla na sana, an daragita nagsabi: ‘Maninigo kang magduman sa eskuelahan mi nin amay sa Lunes na aga.’ Naghapot ako, ‘Taano?’ Ipinaliwanag nia na may bakanteng trabaho na kaipuhan na laogan tolos-tolos. Nagduman ako, asin inako tolos ako sa trabaho. Marikason an mga pangyayari.” Dakol na Saksi sa bilog na kinaban an may kaagid na mga eksperyensia. Kaya dai mag-alangan na ipakipag-olay sa Dios sa pamibi an saindong odok sa pusong mga kahagadan!
Kumusta Kun Kita Nagkasala?
14, 15. (a) Taano an saro ta dai maninigong pumondo sa pamimibi dawa pa kun sia nagkasala? (b) Apuera sa personal na mga pamibi, ano pa an makakatabang sa saro na maomayan sa saiyang kasalan?
14 Paano makakatabang an pamibi kun an saro nagkasala? Huli sa pagkasupog, an nagkapirang nagkasala habo nang mamibi. Minsan siring, bako iyan an madonong na gibohon. Sa pag-ilustrar: Aram kan mga piloto nin eroplano na kun sinda malagalag, puede sindang makikomunikar sa mga nagdidirehir sa trapiko nin mga eroplano tanganing humagad nin tabang. Pero, kumusta kun an sarong nalalagalag na piloto mag-alangan na kontakon an mga nagdidirehir sa trapiko nin mga eroplano huli ta sia nasusupog na sia nalagalag? Iyan puedeng magbunga nin grabeng kapahamakan! Kaagid kaiyan, an tawong nagkasala asin nasusupog na mamibi sa Dios puedeng lalo pang mapahamak. An pagkasupog huli sa kasalan dai maninigong makapugol sa saro na makipag-olay ki Jehova. An totoo, iniimbitaran nin Dios an mga nakagibo nin magabat na mga sala na mamibi sa saiya. Sinadol ni propeta Isaias an mga nagkasala kaidtong panahon nia na mag-apod ki Jehova, “huli ta sia bulaos na magpapatawad.” (Isaias 55:6, 7) Siempre, tibaad kaipuhan na ‘palumoyon nin saro an lalauogon ni Jehova’ paagi sa pagpalumoy nguna kan sadiri niang puso, na binabayaan an paggibo nin kasalan, asin sinserong nagsosolsol.—Salmo 119:58; Daniel 9:13.
15 Kun may kasalan na kalabot, nagigin mahalaga an pamibi huli sa saro pang dahelan. Si disipulo Santiago nagsasabi mapadapit sa saro na nangangaipo nin espirituwal na tabang: “Apodon nia an kamagurangan na lalaki kan kongregasyon, asin sinda mamibi para sa saiya, . . . asin babangonon sia ni Jehova.” (Santiago 5:14, 15) Iyo, maninigo na personal na ibuyboy nin sarong indibiduwal an saiyang kasalan ki Jehova sa pamibi, alagad puede man niang hagadon sa kamagurangan na ipamibi sia. Makakatabang iyan sa saiya na maomayan sa espirituwal.
Mga Simbag sa mga Pamibi
16, 17. (a) Paano sinisimbag ni Jehova an mga pamibi? (b) Anong mga eksperyensia an nagpapaheling na magkakonektar na marhay an pamibi asin an paghuhulit?
16 Paano sinisimbag an mga pamibi? An nagkapira tibaad simbagon tolos asin sa risang-risang paagi. (2 Hade 20:1-6) An iba tibaad haloy-haloy, asin an mga simbag tibaad mas masakit marisa. Siring kan ipinapaheling sa ilustrasyon ni Jesus manongod sa balo na nagparabalikbalik sa hokom, tibaad kaipuhan an paorootrong pagdolok sa Dios. (Lucas 18:1-8) Minsan siring, makakasegurado kita na kun kita namimibi kaoyon kan kabotan nin Dios, dai noarin man sasabihon sato ni Jehova: “Dai mo ako pagdisturbohon.”—Lucas 11:5-9.
17 Dakol na beses nang naeeksperyensiahan kan banwaan ni Jehova na sinisimbag an mga pamibi. Ini parateng risang-risa sa satong pampublikong ministeryo. Halimbawa, duwang tugang na Kristiana sa Pilipinas an nagwawaras nin mga babasahon sa Biblia sa sarong puerang lugar sa nasyon. Kan tawan ninda nin pulyeto an sarong babae, sia napaluha. Sia nagsabi: “Kasubanggi namibi ako sa Dios na magsugo nin matokdo sa sako sa Biblia, asin sa heling ko ini an simbag sa sakong pamibi.” Dai nahaloy pakatapos kaiyan, an babae nagpoon na mag-atender sa mga pagtiripon sa Kingdom Hall. Sa saro pang parte kan Timog-Sirangan na Asia, ninenerbios an sarong Kristianong tugang na lalaki na maghulit sa sarong guardiadong marhay na residensial na edipisyo. Minsan siring, namibi sia ki Jehova, kinosogan an boot, asin naglaog sa edipisyo. Nagtuktok sia sa pinto nin sarong apartment, asin nagluwas an sarong hoben na babae. Kan ipaliwanag kan tugang an dahelan kan saiyang pagsongko, nagpoon ining maghibi. Sinabi nia na haloy na niang hinahanap an mga Saksi ni Jehova asin namibi sia para sa tabang na manompongan sinda. Maogma siang tinabangan kan tugang na makikomunikar sa lokal na kongregasyon kan Mga Saksi ni Jehova.
18. (a) Kun sinisimbag an satong mga pamibi, ano an maninigong magin reaksion niato? (b) Sa ano kita makakasegurado kun kita mamimibi sa lambang oportunidad?
18 An pamibi tunay nanggad na sarong makangangalas na probisyon. Si Jehova andam na maghinanyog asin magsimbag. (Isaias 30:18, 19) Pero, kaipuhan niatong magin mapagrisa sa kun paano sinisimbag ni Jehova an satong mga pamibi. Tibaad iyan bako pirmeng sa paagi na linalaoman niato. Pero, kun marisa niato an saiyang paggiya, dai niato maninigong paglingawan na pasalamatan asin omawon sia. (1 Tesalonica 5:18) Dugang pa, pirmeng girumdomon an konseho ni apostol Pablo: “Sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan.” Iyo, aprobetsaran an lambang oportunidad na makipag-olay sa Dios. Sa paaging iyan, padagos nindong maeeksperyensiahan an pagigin totoo kan sinasabi ni Pablo mapadapit sa mga indibiduwal na an mga pamibi sinimbag: “An katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip.”—Filipos 4:6, 7.
Masisimbag daw Nindo?
• Ano an laen-laen na klase nin pamibi?
• Paano kita maninigong mamibi?
• Anong mga bagay an puede niatong iiba sa satong mga pamibi?
• Ano an kabtang kan pamibi kun an saro nagkasala?
[Mga Hapot Para sa Pag-adal]
[Mga Ritrato sa pahina 29]
An odok sa pusong pamibi nagtatabang sa sato na dai magpadaog sa mga sugot
[Mga Ritrato sa pahina 31]
Paagi sa pamibi, ipinapahayag niato sa Dios an satong pagpasalamat, mga kapurisawan, asin kahagadan