Kun Paano Madolok sa “Paradangog nin Pamibi”

“O Paradangog nin pamibi, sa saimo an mga tawo nin gabos na laman madorolok.”—SALMO 65:2.

1. Ano an kalaenan kan mga tawo sa ibang linalang sa daga, asin anong oportunidad an itinatao kaini sa sato?

SA GABOS na rinibong nabubuhay na linalang sa daga, mga tawo sana an may kakayahan na sumamba sa Kaglalang. An mga tawo sana an nakakamate nin espirituwal na pangangaipo asin nakakamate na kaipuhan na panigoan an pagmawot na iyan. Nagtatao ini sa sato nin makangangalas na oportunidad na magkaigwa nin personal na relasyon sa satong langitnon na Ama.

2. Ano an bakong paborableng epekto nin kasalan sa relasyon nin tawo sa saiyang Kaglalang?

² Linalang nin Dios an tawo na may kakayahan na dumolok sa saiyang Kaggibo. Si Adan asin Eva linalang na mayo nin kasalan. Huli kaini, puede sindang dumolok sa Dios siring sa sarong aki na sueltong minadolok sa saiyang ama. Minsan siring, nawara an dakulang pribilehiong iyan huli sa kasalan. Si Adan asin Eva nakisuway sa Dios asin iwinara an dayupot na relasyon ninda sa saiya. (Genesis 3:8-13, 17-24) Nangangahulogan daw iyan na an bakong sangkap na mga gikan ni Adan dai na puedeng makipagkomunikar sa Dios? Dai man, tinotogotan pa man giraray sinda ni Jehova na dumolok sa saiya basta sunodon sana ninda an nagkapirang kondisyon. Ano an mga kondisyon na iyan?

Mga Kahagadan sa Pagdolok sa Dios

3. Paano maninigong dumolok sa Dios an makasalan na mga tawo, asin anong halimbawa an nagpapaheling kaini?

³ An sarong pangyayari na kalabot an duwang aki ni Adan nakakatabang sa sato na maheling kun ano an kahagadan nin Dios sa bakong sangkap na tawo na nagmamawot na dumolok sa Saiya. Si Cain sagkod si Abel naghingoang dumolok sa Dios paagi sa pag-atang sa saiya. Inako an dolot ni Abel, mantang an ki Cain dai. (Genesis 4:3-5) Ano an pagkakalaen? An Hebreo 11:4 nagsasabi: “Huli sa pagtubod si Abel nagdolot sa Dios nin atang na orog na mahalaga kisa ki Cain, na paagi sa pagtubod na iyan nag-ako sia nin patotoo na sia matanos.” Kun siring, malinaw nanggad na sarong kahagadan an pagtubod tanganing makadolok sa Dios. An saro pang kahagadan maheheling sa mga tataramon ni Jehova ki Cain: “Kun ika magibo nin marahay, dai daw magkakaigwa nin pag-omaw?” Iyo, inako kutana an pagdolok ni Cain sa Dios kun si Cain naggibo nin marahay. Minsan siring, hinaboan ni Cain an hatol nin Dios, ginadan si Abel, asin sa katapustapusi nagin isinikwal. (Genesis 4:7-12) Huli kaini, sa kapinonan pa sana, idinoon na an kahalagahan kan pagdolok sa Dios na may pagtubod kaiba an paggibo nin marahay.

4. Ano an maninigong rekonoseron niato mapadapit sa satong pagdolok sa Dios?

⁴ Kaipuhan an pagrekonoser sa satong makasalan na kamugtakan kun nagmamawot kitang dumolok sa Dios. An gabos na tawo makasalan, asin an kasalan olang sa pagdolok sa Dios. Si propeta Jeremias nagsurat may koneksion sa Israel: “Kami naglapas . . . Inolang mo nin panganoron an pagdolok sa saimo, tanganing dai makaagi an pamibi.” (Lamentacion 3:42, 44) Dawa siring, sa bilog na kasaysayan nin tawo ipinaheling nin Dios na andam sia na akoon an mga pamibi kan mga minadolok sa saiya na may pagtubod asin may tamang kamugtakan nin puso, na nag-ootob kan saiyang mga togon. (Salmo 119:145) Sairisay an nagkapira sa mga indibiduwal na ini, asin ano an manonodan niato sa mga pamibi ninda?

5, 6. Ano an manonodan niato sa pagdolok ni Abraham sa Dios?

 ⁵ Saro sa siring na mga indibiduwal si Abraham. Inako nin Dios an saiyang pagdolok, huli ta inapod nin Dios si Abraham na “sakuyang katood.” (Isaias 41:8) Ano an manonodan niato sa pagdolok ni Abraham sa Dios? An maimbod na patriarkang ini naghapot ki Jehova manongod sa sarong paramana, na nagsasabi: “Ano an itatao mo sa sakuya, mantang ako mayong aki?” (Genesis 15:2, 3; 17:18) Sa saro pang pangyayari, ipinahayag nia an saiyang pagmalasakit sa kun siisay an maliligtas kun hokoman na nin Dios an mga maraot sa Sodoma asin Gomorra. (Genesis 18:23-33) Si Abraham nagngayongayo man para sa iba. (Genesis 20:7, 17) Asin, arog sa kamugtakan ni Abel, kun beses an pagdolok ni Abraham sa Dios may kaibang dolot ki Jehova.—Genesis 22:9-14.

⁶ Sa gabos na okasyon na ini, si Abraham dai nag-alangan na makipag-olay ki Jehova. Minsan siring, an saiyang katalingkasan sa pagtaram may kaibang mapakumbabang pagmidbid sa saiyang kamugtakan sa atubangan kan saiyang Kaglalang. Mangnohon an saiyang magalang na mga tataramon, na manonompongan sa Genesis 18:27: “Uya tabi, ako nangahas na makiolay ki Jehova, mantang ako kabokabo asin abo.” Kanigoan karahay na aktitud na maninigong arogon!

7. Anong mga bagay an ipinamibi ki Jehova kan mga patriarka?

⁷ An mga patriarka namibi manongod sa laen-laen na bagay, asin sinda may pag-oyon na dinangog ni Jehova. Si Jacob namibi manongod sa sarong promesa. Pagkatapos na hagadon an suporta nin Dios, sia solemneng nanuga: “Kun manongod sa gabos na itatao mo sa sako daing salto na itatao ko sa saimo an ikasampulong kabtang kaiyan.” (Genesis 28:20-22) Paghaloyhaloy, kan madali na niang tagboon an saiyang tugang, si Jacob nakimaherak ki Jehova para sa proteksion, na nagsasabi: “Ligtasan ako, nakikimaherak ako sa saimo, sa kamot kan sakong tugang, sa kamot ni Esau, huli ta natatakot ako sa saiya.” (Genesis 32:9-12) An patriarkang si Job nagdolok ki Jehova para sa saiyang pamilya, asin nagdolot sia nin mga atang para sa sainda. Kan an tolong kairiba ni Job magkasala paagi sa saindang pagtaram, si Job namibi para sa sainda, asin “inako ni Jehova an lalauogon ni Job.” (Job 1:5; 42:7-9) An mga pagkasaysay na ini nakakatabang sa sato na maaraman kun anong mga bagay an puede niatong ipamibi ki Jehova. Naheling man niato na andam si Jehova na akoon an mga pamibi kan mga minadolok sa saiya sa tamang paagi.

Segun sa Tipan nin Ley

8. Segun sa tipan nin Ley, paano ipinapaabot an mga bagay ki Jehova para sa banwaan?

⁸ Pagkatapos na iligtas ni Jehova an nasyon nin Israel sa Egipto, itinao nia sainda an tipan nin Ley. Ipinagboot kan Ley an areglo sa pagdolok sa Dios paagi sa sarong nombradong kabilogan na grupo nin mga saserdote. An nagkapirang Levita inasignaran na magserbing saserdote para  sa banwaan. Kun lumataw an mga bagay na kalabot an bilog na nasyon, ipinapaabot nin sarong representante kan banwaan—kun beses sarong hade o propeta—an bagay na iyan sa Dios sa pamibi. (1 Samuel 8:21, 22; 14:36-41; Jeremias 42:1-3) Halimbawa, sa dedikasyon kan templo, si Hadeng Salomon nagdolok ki Jehova sa odok sa pusong pamibi. Bilang simbag, ipinarisa ni Jehova an saiyang pag-ako kan pamibi ni Salomon paagi sa pagpano sa templo kan Saiyang kamurawayan asin pagsabi: “An sakong talinga maatento sa pamibi sa lugar na ini.”—2 Cronica 6:12–7:3, 15.

9. Ano an kahagadan sa tamang pagdolok ki Jehova sa santuaryo?

⁹ Sa Ley na itinao sa Israel, iiniba ni Jehova an sarong kahagadan para sa inaakong pagdolok sa saiya sa santuaryo. Ano daw iyan? Kada aga asin banggi, apuera sa pagdolot nin mga atang na hayop, an halangkaw na saserdote kaipuhan na magtotong nin mahamot na insenso sa atubangan ni Jehova. Kan huri, an mga katabang na saserdote nagtatao man kan paglilingkod na ini, apuera sa Aldaw nin Pagbayad sa Kasalan. Kun an mga saserdote dai magtao nin siring na magalang na reberensia, si Jehova dai maoogma sa saindang paglilingkod.—Exodo 30:7, 8; 2 Cronica 13:11.

10, 11. Ano an ebidensia niato na inako ni Jehova an mga pamibi kan mga indibiduwal?

¹⁰ Sa suanoy na Israel, an pagdolok daw sa Dios posible sana paagi sa designadong mga representante? Dai man, ta ipinapaheling kan Kasuratan na si Jehova naoogmang akoon an personal na mga pamibi nin mga indibiduwal. Sa pamibi ni Salomon sa pagdedikar sa templo, sia nakimaherak ki Jehova na nagsasabi: “An ano man na pamibi, an ano man na kahagadan para sa pabor na tibaad gibohon nin siisay man na tawo o kan bilog mong banwaan na Israel, . . . kun bukahon nanggad nia an saiyang mga palad paatubang sa harong na ini, magdangog ka man logod dian sa kalangitan.” (2 Cronica 6:29, 30) An pagkasaysay ni Lucas nagsasabi sa sato na kan si Zacarias, an ama ni Juan na Bautisador, nagdodolot nin insenso sa santuaryo, sarong kaburunyogan nin bakong saserdoteng mga parasamba ki Jehova an “namimibi sa luwas.” Minalataw na nagin kostumbre na kan mga tawo na magtiripon na namimibi sa luwas kan santuaryo mantang an insenso ipinepresentar ki Jehova sa bulawan na altar.—Lucas 1:8-10.

¹¹ Sa siring, kun minadolok ki Jehova sa tamang paagi, naoogma siang akoon an mga kahagadan kan mga nagrerepresentar sa nasyon sa kabilogan asin kan mga indibiduwal na naghihingoang dumolok sa saiya nin personal. Ngonyan, mayo na kita sa irarom kan tipan nin Ley. Alagad ta makakanood kita nin nagkapirang mahalagang marhay na leksion manongod sa pamibi sa paagi kan pagdolok kan suanoy na mga Israelita sa Dios.

Sa Irarom kan Kristianong Areglo

12. Ano an ginibong areglo para sa pagdolok ki Jehova kan mga Kristiano?

¹² Kita nabubuhay na ngonyan sa irarom kan Kristianong areglo. Mayo na an pisikal na templo kun saen an mga saserdote nagrerepresentar sa bilog na banwaan nin Dios o na dian puede kitang mamibi sa Dios. Minsan siring, si Jehova igwa pa man giraray nin ginibong areglo sa pagdolok niato sa saiya. Ano daw iyan? Kan 29 C.E., kan si Cristo lahidan kan asin nombrahan bilang Halangkaw na Saserdote, nagpunsionar an sarong  espirituwal na templo. * An espirituwal na templong ini iyo an bagong areglo sa pagdolok ki Jehova sa pagsamba basado sa pampagian nin boot na atang ni Jesu-Cristo.—Hebreo 9:11, 12.

13. Kun mapadapit sa pamibi, ano an sarong pagkakaagid kan templo sa Jerusalem asin kan espirituwal na templo?

¹³ Dakol na aspekto kan templo sa Jerusalem an angay na naglaladawan sa mga probisyon kan espirituwal na templo, kaiba an mga probisyon may koneksion sa pamibi. (Hebreo 9:1-10) Halimbawa, sa ano nagrerepresentar an insenso na idinodolot, aga asin banggi, sa altar nin insenso sa Banal na kuarto kan templo? Segun sa libro nin Kapahayagan, “an insenso nangangahulogan kan mga pamibi kan mga banal.” (Kapahayagan 5:8; 8:3, 4) Si David pinasabngan na magsurat: “An pamibi ko logod andamon na siring sa insenso sa atubangan mo.” (Salmo 141:2) Sa siring, sa Kristianong areglo, an mahamot na insenso tamang-tama na nagrerepresentar sa inaakong mga pamibi asin pag-omaw ki Jehova.—1 Tesalonica 3:10.

14, 15. Ano an masasabi manongod sa pagdolok ki Jehova kan (a) linahidan na mga Kristiano? (b) “ibang karnero”?

¹⁴ Siisay an puedeng dumolok sa Dios sa espirituwal na templong ini? Sa pisikal na templo, an mga saserdote asin Levita an may pribilehiong maglingkod sa patyong nasa laog, alagad mga saserdote sana an nakakalaog sa Banal. An linahidan na mga Kristiano na may langitnon na paglaom yaon sa sarong daing kaagid na espirituwal na kamugtakan na ipinapanganino kan patyong nasa laog asin kan Banal, na nagpapangyari sa sainda na makapamibi asin makapag-omaw sa Dios.

¹⁵ Kumusta man an mga may daganon na paglaom, an “ibang karnero”? (Juan 10:16) Ipinarisa ni propeta Isaias na an mga tawo hale sa dakol na nasyon masamba ki Jehova “sa huring kabtang kan mga aldaw.” (Isaias 2:2, 3) Isinurat man nia na an “mga taga ibang daga” madorolok ki Jehova. Ipinaparisa an saiyang pagigin andam na akoon an pagdolok ninda, an Dios nagsabi: “Pagagayagayahon ko sinda sa laog kan sakong harong nin pamibi.” (Isaias 56:6, 7) An Kapahayagan 7:9-15 nagtatao nin dugang pang mga detalye, na nagtataram manongod sa “sarong dakulang kadaklan” hale sa “gabos na nasyon” na nagtitiripon tanganing magsamba asin mamibi sa Dios “aldaw asin banggi” mantang sinda nagtitindog sa patyong nasa luwas kan espirituwal na templo. Kanigoan kanakakarangang isip-isipon na an gabos na lingkod nin Dios ngonyan sueltong makakadolok sa Dios na may lubos na kompiansa na sinda dinadangog nia!

Anong mga Pamibi an Inaako?

16. Ano an manonodan niato manongod sa pamibi kan enot na mga Kristiano?

¹⁶ An enot na mga Kristiano mga tawong parapamibi. May labot sa anong mga bagay an ipinamibi ninda? An Kristianong kamagurangan naghagad nin paggiya sa pagpili nin mga lalaki para sa mga paninimbagan sa organisasyon. (Gibo 1:24, 25; 6:5, 6) Si Epafras namibi para sa mga kapagtubod. (Colosas 4:12) An mga miembro kan kongregasyon sa Jerusalem namibi para ki Pedro kan sia mabilanggo. (Gibo 12:5) An enot na mga Kristiano namibi sa Dios na logod tawan sinda nin pagkapusoan sa atubangan nin pagtumang, na nagsasabi: “Jehova, risaha an saindang mga patakot, asin itogot mo sa saimong mga oripon  na padagos na magtaram kan saimong tataramon sa bilog na pagkapusoan.” (Gibo 4:23-30) Sinadol ni disipulo Santiago an mga Kristiano na mamibi sa Dios para sa kadonongan kun nasa irarom nin pagbalo. (Santiago 1:5) Iiniiba daw nindo an siring na mga bagay sa saindong mga pakimaherak ki Jehova?

17. Kiisay na mga pamibi an inaako ni Jehova?

¹⁷ Dai inaako nin Dios an gabos na pamibi. Kun siring, paano daw kita makakapamibi na may kompiansa na aakoon an satong mga pamibi? An mga tawong maimbod na dinangog nin Dios kan nakaaging mga panahon nagdolok sa saiya na may sinseridad asin may tamang kamugtakan nin puso. Nagpaheling sinda nin pagtubod asin sinuportaran ini nin marahay na mga gibo. Makakakompiar kita na hihinanyogon ni Jehova ngonyan an mga minadolok sa saiya sa siring man na paagi.

18. Tanganing dangogon an saindang mga pamibi, anong kahagadan an kaipuhan na maabot kan mga Kristiano?

¹⁸ Igwa nin dugang na kahagadan. Ipinaliwanag ini ni apostol Pablo, na nagsasabi: “Paagi sa saiya kita . . . nakakadolok sa Ama paagi sa sarong espiritu.” Siisay an pinapanongdan ni Pablo kan sia magsurat na “paagi sa saiya”? Ki Jesu-Cristo. (Efeso 2:13, 18) Iyo, puede kitang dumolok nin suelto sa Ama solamente paagi ki Jesus.—Juan 14:6; 15:16; 16:23, 24.

19. (a) Kasuarin nagin makasusurang nin makuri ki Jehova an dolot na insenso sa Israel? (b) Paano kita makakasegurado na an satong mga pamibi siring sa mahamot na insenso ki Jehova?

¹⁹ Siring kan nasambitan sa enotan, an insenso na idinodolot kan Israelitang mga saserdote nagrerepresentar sa inaakong mga pamibi kan maimbod na mga lingkod nin Dios. Minsan siring, kun beses, an mga dolot na insenso kan mga Israelita makababalde ki Jehova. Arog kaini an kamugtakan kan an mga Israelita nagtototong nin insenso sa templo alagad kasabay kaiyan nagduduko sa mga idolo. (Ezequiel 8:10, 11) Siring man ngonyan, an mga pamibi kan mga naghihingakong naglilingkod ki Jehova alagad kasabay kaiyan naggigibo nin mga bagay na kontra sa saiyang mga ley nagigin siring sa parong na makasusurang nin makuri para sa saiya. (Talinhaga 15:8) Kun siring, padagos niatong papagdanayon na malinig an gabos na aspekto kan satong buhay tanganing an satong mga pamibi garo siring sa mahamot na insenso sa Dios. Si Jehova naoogmang marhay sa mga pamibi kan mga nagsusunod sa saiyang matanos na mga dalan. (Juan 9:31) Minsan siring, may nagkapirang hapot na kaipuhan pang masimbag. Paano kita maninigong mamibi? Ano an puede niatong ipamibi? Asin paano sinisimbag nin Dios an satong mga pamibi? Totokaron ini asin an iba pang hapot sa masunod niatong artikulo.

[Nota sa Ibaba]

Ikakapaliwanag daw Nindo?

• Paano daw makakadolok sa Dios sa inaakong paagi an bakong sangkap na mga tawo?

• Sa satong mga pamibi, paano niato maaarog an mga patriarka?

• Ano an manonodan niato sa mga pamibi kan enot na mga Kristiano?

• Noarin siring sa mahamot na insenso sa Dios an satong mga pamibi?

[Mga Hapot Para sa Pag-adal]

[Ritrato sa pahina 23]

Taano ta inako nin Dios an dolot ni Abel alagad an ki Cain dai?

[Ritrato sa pahina 24]

“Ako kabokabo asin abo”

[Ritrato sa pahina 25]

“Daing salto na itatao ko sa saimo an ikasampulong kabtang kaiyan”

[Ritrato sa pahina 26]

An saindo daw na mga pamibi siring sa mahamot na insenso ki Jehova?