Kun an Sarong Namomotan Magbaya ki Jehova

MGA SAKSI ni Jehova si Mark asin Louise. * May pagkamoot asin pagmakolog, tinokdoan ninda an saindang mga aki sa Kasuratan, na isinasadol kan Biblia na gibohon kan Kristianong mga magurang. (Talinhaga 22:6; 2 Timoteo 3:15) Makamomondo, bakong gabos na aki ninda nagpadagos na maglingkod ki Jehova kan magin nasa edad nang mga hoben. “Nakokolgan an boot ko huli sa mga aki na nalagalag sa espirituwal,” an sabi ni Louise. “Paano ako magsasagin na dai nakokolgan na marhay sa aroaldaw? Kun pinag-oolayan kan iba an saindang mga aking lalaki, nakokolgan ako asin kaipuhan kong pogolan na mapahibi.”

Iyo, kun pinipili nin saro na bayaan si Jehova asin an paagi nin pamumuhay na sinasabi sa Kasuratan, an maimbod na mga miembro kan pamilya natural sanang makaeksperyensia nin labi-labing kamondoan. “Namomotan kong marhay an sakong tugang na babae,” an sabi ni Irene. “Gigibohon ko an gabos tanganing maheling ko na magbalik sia ki Jehova!” Si Maria, na an tugang na lalaki tuminalikod ki Jehova tanganing ipadagos an inmoral na paggawe, nagsabi: “Nagin masakit para sa sako na kayanon ini huling sa gabos na iba pang bagay, nagin marahayon siang tugang sa sako. Nangorognang hinihidaw ko sia sa darakulang pagtiripon kan pamilya.”

Taano ta Depisil na Marhay Iyan?

Taano daw an pagkawara sa espirituwal nin sarong aki o iba pang namomotan ta nagigin dahelan nin siring kalabilabing kamondoan sa Kristianong mga kapamilya? Huling aram ninda na an Kasuratan nanunuga nin buhay na daing sagkod sa sarong paraisong daga para sa mga nagdadanay na maimbod ki Jehova. (Salmo 37:29; 2 Pedro 3:13; Kapahayagan 21:3-5) Inaantisipar ninda na makaibanan sa pagkamit kan mga bendisyon na ini an saindang mga agom, aki, magurang, tugang, asin makoapo. Makolog nanggad para sa sainda na isipon na tibaad dai mapabilang dian an saindang mga namomotan na nag-ontok na sa paglilingkod ki Jehova! Dawa kun dapit sa saindang presenteng buhay, nasasabotan kan mga Kristiano na para sa kapakinabangan ninda an mga ley asin prinsipyo ni Jehova. Kun siring, an mga Kristiano namomondong marhay na maheling an saindang mga namomotan na nagtatanom sa paagi na siertong mag-aani nin kakologan.—Isaias 48:17, 18; Galacia 6:7, 8.

Para sa nagkapira na dai pa noarin man nakaeksperyensia nin siring na pagkawara sa espirituwal nin  sarong namomotan, tibaad depisil nindang masabotan kun gurano man nanggad ini kanakakapanluya nin biyo. Apektado an haros gabos na kabtang nin buhay. “Nagigin orog na depisil na umatender sa Kristianong mga pagtiripon asin maheling an mga magurang asin an saindang mga aki na nagngingirisihan asin nag-oorolay,” an sabi ni Louise. “Natatahoban kan kapungawan an ano man na maogmang okasyon huli sa mga namomotan na mayo.” Nagigirumdoman nin sarong Kristianong magurang sa kongregasyon an apat na taon na durante kaiyan pinutol kan aking babae kan saiyang agom an pakikiasosyar sa sainda. Sia nagsabi: “Sa parate, depisil dawa an ‘maogmang mga panahon.’ Kun tinatawan ko nin regalo an sakong agom o ipinapasyar ko sia sa sarong magayon na lugar para magpalipas kan katapusan kan semana, bigla na sana siang minahibi, na nagigirumdoman na dai niamo kaiba sa kaogmahan an saiyang aking babae.”

Sobra man daw an reaksion kan siring na mga Kristiano? Dai man. Sa katunayan, tibaad minsan paano ipinapabanaag ninda an mga kualidad ni Jehova, na sa saiyang ladawan linalang an tawo. (Genesis 1:26, 27) Ano an boot sabihon kaini? Bueno, ano an namatean ni Jehova kan an saiyang banwaan na Israel magrebelde tumang sa saiya? Basado sa Salmo 78:38-41, manonodan niato na nakolgan si Jehova. Alagad, sia mapasensiang nagpatanid asin dinisiplina nia sinda, na paorootrong pinatawad sinda kun sinda nagsosolsol. Malinaw, si Jehova may personal na pagkadayupot sa saiyang mga nilalang, an ‘ginibo kan saiyang mga kamot,’ asin dai tolos nawawaran nin paglaom para sa sainda. (Job 14:15; Jonas 4:10, 11) Itinadom nia sa mga tawo an kakayahan na magkaigwa nin kaagid na maimbod na kadayupotan, asin an bogkos sa pag-oltanan nin  mga miembro kan pamilya puedeng magin mapuersang marhay. Kaya bakong makangangalas na an mga tawo magmondo sa pagkawara sa espirituwal nin sarong namomotan na kapamilya.

Iyo, an pagkawara sa espirituwal nin sarong namomotan kabilang sa pinakadepisil na pagbalo na minaagi sa tunay na mga parasamba. (Gibo 14:22) Sinabi ni Jesus na an pag-ako sa saiyang mensahe magigin dahelan nin pagkabaranga sa nagkapirang pamilya. (Mateo 10:34-38) Bako ining huli ta an mensahe sa Biblia mismo an nagigin dahelan nin pagkabaranga sa pamilya. Imbes, an daing pagtubod o bakong maimbod na mga miembro kan pamilya an nagigin dahelan nin pagkabaranga paagi sa paghabo, pagbaya, o pagkontra pa ngani sa dalan kan Kristianismo. Minsan siring, makakapagpasalamat kita na dai binabayaan ni Jehova an mga maimbod sa saiya na mayo nin tabang tanganing maatubang an mga pagbalo na minapurisaw sa sainda. Kun kamo nagmomondo sa presente huli sa pagkawara sa espirituwal nin sarong namomotan, anong mga prinsipyo sa Biblia an makakatabang sa saindo tanganing matagalan an kamondoan asin makanompong nin igong kagayagayahan asin pagkakontento?

Pag-atubang

“Paagi sa pagpakosog sa saindo man sana . . . , magdanay kamo sa pagkamoot nin Dios.” (Judas 20, 21) Depende sa saindong partikular na mga kamugtakan, tibaad mayo kamong magigibo sa panahon na ini tanganing tabangan an sarong miembro kan pamilya na nagpondo na sa paglilingkod ki Jehova. Minsan siring, puede asin maninigo nindong parigonon an saindong sadiri siring man an siisay man na natatadang maimbod na mga miembro kan pamilya. Si Veronica, na naheling an duwa sa tolo niang aking lalaki na nagbaya sa katotoohan, nagsabi: “Pinagirumdom kaming mag-agom na kun kami magdadanay na makosog sa espirituwal, kami magigin nasa pinakamarahay na kamugtakan na maogmang akoon giraray an samong mga aki kun sinda makapag-isip-isip. Saen na daw an gastador na aki kun an saiyang ama mayo sa kamugtakan na akoon sia giraray?”

Tanganing papagdanayon an saindong sadiri na nasa makosog na kamugtakan, magin sibot sa espirituwal na mga aktibidad. Kabilang digdi an pagpapadanay nin iskedyul para sa hararom na pag-adal sa Biblia asin pag-atender sa Kristianong mga pagtiripon. Magin andam na tumabang sa iba sa kongregasyon sagkod sa itinotogot kan saindong mga kamugtakan. Totoo, sa primero tibaad magin depisil para sa saindo an siring na mga aktibidad. Nagirumdoman ni Veronica: “An nagin enot na natural na tendensia ko iyo na isiblag an sakong sadiri na garo nalugadan na hayop. Alagad an sakong agom nag-insistir na kami padagos na magkaigwa nin marahay na rutina sa espirituwal. Sinegurado nia na nag-aatender kami sa mga pagtiripon. Kan panahon nang mag-atender sa kombension, nangaipo ako nin dakulang kosog nin boot tanganing magduman asin makiatubang sa mga tawo. Pero, orog na irinani kami ki Jehova kan programa. An samong aking lalaki na nagdanay na maimbod partikular na napakosog kan kombension na iyan.”

Nanompongan ni Maria, na nasambitan sa kapinonan, na nangorognang makakatabang na magdanay na sibot sa ministeryo sa langtad asin sa presente tinatabangan nia an apat katawo na makanood manongod sa Biblia. Kaagid kaiyan, si Laura nagsabi: “Minsan ngani naghihibi pa man giraray ako aroaldaw, nagpapasalamat ako ki Jehova na dawa kun dai ako nagin mapanggana siring kan nagibo kan nagkapirang magurang sa pagpadakula sa mga aki, yaon sa sako an sangkap na mensahe kan Biblia, na nakakatabang sa mga pamilya sa huring mga aldaw na ini.” Si Ken asin Eleanor, na an nasa edad nang mga aki nagbaya sa kongregasyon, inareglar an saindang mga kamugtakan tanganing bumalyo sa lugar na may orog na pangangaipo para sa mga parahayag kan Kahadean asin maglaog sa bilog na panahon na  ministeryo. Ini nakatabang sa sainda na papagdanayon an tamang punto de vista sa mga bagay-bagay asin malikayan na dai madaog nin kamondoan.

Dai mawaran nin paglaom. An pagkamoot “naglalaom kan gabos na bagay.” (1 Corinto 13:7) Si Ken, na nasambitan sa enotan, nagsabi: “Kan an samong mga aki magbaya sa dalan nin katotoohan, naisip ko na idto garo kagadanan na ninda. Alagad pagkagadan kan sakong tugang na babae, nagbago an sakong pagmansay. Nagpapasalamat ako na an sakong mga aki bakong literal na gadan asin na si Jehova padagos na pinapagdanay na bukas an dalan para sainda tanganing bumalik sa saiya.” Sa katunayan, ipinapaheling kan eksperyensia na dakol na nagbaya sa katotoohan an sa kahurihurihi talagang minabalik.—Lucas 15:11-24.

Labanan an pagbasol sa sadiri. An mga magurang nangorognang tibaad may tendensia na balikan an nakaagi asin magbasol na dai ninda naasikaso sa ibang paagi an nagkapirang situwasyon. Minsan siring, an pangenot na punto na ipinapasabot sa Ezequiel 18:20 iyo na pinapaninimbag ni Jehova an nagkasala, bakong an saiyang mga magurang, sa saiyang salang pagpili. Interesante nanggad, minsan ngani dakol na sinasabi an libro nin Talinhaga manongod sa obligasyon kan magurang na padakulaon an saindang mga aki sa tamang paagi, iyan igwa nin labing apat na beses na konseho para sa mga hoben na maghinanyog asin magkuyog sa saindang mga magurang. Iyo, an mga aki may paninimbagan na maghimate sa pagsasanay na basado sa Biblia kan saindang bakong sangkap na mga magurang. Posibleng marhay na inasikaso nindo sa pinakamarahay na paaging magigibo nindo an mga bagay-bagay sa panahon na idto. Pero, dawa kun sa pagmate nindo may mga sala kamo asin na ini talagang sala nindo, dai iyan pirmeng nangangahulogan na an saindong mga sala an nagin dahelan kan pagbaya sa katotoohan kan saindong namomotan. Ano man an nangyari, mayo nin magigibong marahay an pagparataram nin “kun kutana.” Makanood sa saindong mga nagin sala, magin determinado na dai na pag-otrohon iyan, asin mamibi ki Jehova para sa kapatawadan. (Salmo 103:8-14; Isaias 55:7) Dangan magtanaw kamo sa ngapit, bakong sa nakaagi.

Magin mapasensia sa iba. Tibaad depisil para sa nagkapira na maaraman kun paano man nanggad kamo paparigonon o rarangahon, nangorogna kun nungka sindang nagkaigwa nin kaagid na eksperyensia. Apuera kaiyan, an mga tawo magkakalaen sa kun ano an ibinibilang nindang nakakaparigon asin nakakaranga. Kaya kun an nagkapira magsabi nin mga bagay na nakakakolog sa saindo, iaplikar an hatol ni apostol Pablo na manonompongan sa Colosas 3:13: “Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro.”

Igalang an areglo ni Jehova para sa disiplina. Kun an saindong kapamilya dinisiplina kan kongregasyon, girumdomon na ini kabtang kan areglo ni Jehova asin para sa pinakaikakarahay kan gabos, kaiba na an nagkasala. (Hebreo 12:11) Kun siring, labanan an ano man na inklinasyon na kritikaron an kamagurangan na nagin imbuelto o an nagin mga desisyon ninda. Girumdomon, an pinakamarahay na mga resulta minagikan sa paggibo kan mga bagay oyon sa paagi ni Jehova, mantang an pagkontra sa mga areglo ni Jehova maresulta sana sa dagdag na kasakitan.

Pagkatapos kan pagkakalda nin Israel sa Egipto, si Moises regular na naglingkod bilang hukom. (Exodo 18:13-16) Huling an paghusgar apabor sa sarong indibiduwal tibaad nagin kontra sa iba, bakong makangangalas na an nagkapira nadesganar sa mga desisyon ni Moises. An pagkritikar sa mga paghusgar ni Moises tibaad nagin dahelan kan nagkapirang pagrebelde tumang sa saiyang pamomoon. Minsan siring, ginagamit ni Jehova si Moises tanganing pangenotan an Saiyang banwaan, asin pinadusahan Nia, bakong si Moises, kundi an mga rebelde asin an saindang mga pamilya na nagsuportar sa sainda. (Bilang 16:31-35) Makakanood kita digdi paagi sa paghihingoa na igalang asin makikooperar sa mga desisyon na ginigibo kan mga may teokratikong autoridad ngonyan.

 Mapadapit digdi, nagigirumdoman ni Delores kun gurano kadepisil para sa saiya na papagdanayon an timbang na pagmansay kan an saiyang aking babae dinisiplina kan kongregasyon. “An nakatabang sa sako,” an sabi nia, “iyo an pagbasa nin paorootro kan mga artikulo manongod sa pagkamakatanosan kan mga areglo ni Jehova. Naggibo ako nin espesyal na kuaderno nin mga punto gikan sa mga pahayag asin mga artikulo na makakatabang sa sako na makayanan iyan asin makapadagos sa paglilingkod.” Ini naggigiya sa saro pang mahalagang paagi nin pag-atubang.

Ipahayag an saindong mga saboot. Tibaad manompongan nindong nakakatabang na magsabi kan namamatean nindo sa saro o duwang mapagsabot na katood na pinagtitiwalaan nindo. Sa paggibo kaiyan, pilion an mga katood na makakatabang sa saindo na papagdanayon an positibong aktitud. Siertong magigin epektibong marhay na ‘biyong ipahayag ki Jehova an laog kan saindong puso’ paagi sa pamibi. * (Salmo 62:7, 8) Taano? Huling lubos na nasasabotan nia an rarom kan saindong namamatean. Halimbawa, tibaad mamatean nindo na bakong makatanosan na kaipuhan nindong maeksperyensiahan an siring na makuring kolog sa emosyon. Total, dai nindo binayaan si Jehova. Ipaaram an mga saboot nindo ki Jehova, asin hagadon sa saiya na tabangan kamo na mansayon an situwasyon sa bakong gayong makolog na paagi.—Salmo 37:5.

Sa pag-agi nin panahon, posibleng marhay na mas makakaya na nindong kontrolon an saindong mga pagmate. Mientras tanto, dai sumuko sa saindong mga paghihingoa na mapaogma an saindong langitnon na Ama, asin nungkang isipon na an mga ini daing kamanungdanan. (Galacia 6:9) Girumdomon, kun babayaan niato si Jehova, magkakaigwa pa man giraray kita nin mga problema. Sa ibong na lado, paagi sa pagdadanay na maimbod sa saiya, yaon sa sato an tabang nia sa mga pagbalo na napapaatubang sa sato. Kun siring, makakasierto kamo na nasasabotan ni Jehova an gabat kan saindong situwasyon asin sia padagos na magtatao sa saindo nin kinakaipuhan na kosog sa tamang panahon.—2 Corinto 4:7; Filipos 4:13; Hebreo 4:16.

[Mga Nota sa Ibaba]

[Kahon sa pahina 19]

Kun Paano Makakaatubang

◆ “Paagi sa pagpakosog sa saindo man sana . . . , magdanay kamo sa pagkamoot nin Dios.”—Judas 20, 21.

◆ Dai mawaran nin paglaom.—1 Corinto 13:7.

◆ Labanan an pagbasol sa sadiri.—Ezequiel 18:20.

◆ Magin mapasensia sa iba.—Colosas 3:13.

◆ Igalang an areglo ni Jehova para sa disiplina.—Hebreo 12:11.

◆ Ipahayag an saindong mga saboot.—Salmo 62:7, 8.

[Kahon/​Ritrato sa pahina 21]

Binayaan daw Nindo si Jehova?

Kun iyo, ano man an dahelan, nasa peligro an saindong relasyon ki Jehova asin an saindong daing sagkod na mga oportunidad. Tibaad intension nindo na magbalik ki Jehova. Maigot daw nindong pinag-aaabot ini ngonyan? O idinidigson daw nindo iyan sagkod sa “tamang panahon”? Girumdomon, marikas na nagdadangadang an panganoron nin bagyo nin Armagedon. Dugang pa, an buhay sa sistemang ini halipot asin dai masasarigan. Dai nindo aram kun buhay pa ngani kamo sa aga. (Salmo 102:3; Santiago 4:13, 14) An sarong lalaki na nadiskobreng may ikakagadan na helang nagsabi: “Nagkahelang ako mantang naglilingkod ki Jehova nin bilog na panahon, na mayo nin itinatagong hilom na dapat ikasupog. Asin nakakarangang mamatean iyan ngonyan mismo.” Pero, imahinaron kun ano kutana an saiyang mamamatean kun nagkahelang sia mantang sinasabi, “Sa maabot na panahon, mabalik ako ki Jehova!” Kun binayaan nindo si Jehova, ngonyan na an pinakamarahay na panahon na bumalik.

[Mga Ritrato sa pahina 18]

An pagigin sibot sa espirituwal na mga aktibidad makakatabang sa saindo na papagdanayon an tamang punto de vista