Estorya nin Buhay

Pagkinabang sa Kaimbodan kan mga Namomotan

ISINAYSAY NI KATHLEEN COOKE

MANTANG nagdadalaw sa mga paryente sa Glasgow, Scotland, kan 1911, an sakong lola na si Mary Ellen Thompson nag-atender sa sarong diskurso ni Charles Taze Russell, sarong prominenteng miembro kan Mga Estudyante sa Biblia, na kan huri namidbid na Mga Saksi ni Jehova. Ogmahon si Lola sa saiyang nadangog. Kan magbalik sia sa Aprika del Sur, kinontak nia an lokal na Mga Estudyante sa Biblia. Kan Abril 1914, saro sia sa 16 na nabautismohan sa enot na kombension kan Mga Estudyante sa Biblia sa Aprika del Sur. An aki ni Lola na si Edith, na nagin sakong ina, sais anyos kan panahon na idto.

Pagkagadan ni Tugang na Russell kan 1916, nagkaigwa nin dai pagkaoroyon sa tahaw kan Mga Estudyante sa Biblia sa bilog na kinaban. An 60 maimbod sa Durban nagin mga 12 na sana. An sakong lola sa ama, si Ingeborg Myrdal, asin an saiyang aking lalaki na si Henry, sarong tinedyer na nabautismohan pa sana kaidto, kuminampi sa mga maimbod. Kan 1924, si Henry nagin colporteur, an apod kaidto sa bilog na panahon na mga ministro kan Mga Saksi ni Jehova. Naghulit sia sa dakol na parte kan timog na Aprika sa suminunod na limang taon. Kan 1930, nagpakasal si Henry asin Edith, asin pakalihis nin tolong taon namundag ako.

Sarong Pamilyang Ekstendido

Sa kadikit na panahon nag-istar kami sa Mozambique, alagad kan 1939 nagbalyo kami sa harong ni Lola asin Lolo sa Johannesburg. Si Lolo mayong interes sa katotoohan sa Biblia asin kun beses kinokontra nia si Lola, alagad sia mapag-istimar na marhay. An sakong  tugang, si Thelma, namundag kan 1940, asin nakanood kaming duwa na asikasohon an mga pangangaipo kan mga mas may edad na. Dakol na beses na minalawig an pamanggihan huling pinag-oolayan niamo an mga nangyari sa bilog na aldaw o binabalikan an mga nakaagi.

Ikinakaogma kan samong pamilya an pakiibaiba sa nagdadalaw na mga Saksi, nangorogna an mga nasa bilog na panahon na ministeryo. Nakikiiba sinda sa samong pag-oolay durante nin pamanggihan, asin an saindang mga kapahayagan nakadagdag sa samong pag-apresyar sa espirituwal na pamana sa samo. Pinakosog kaini an pagmawot niamo ni Thelma na magin mga payunir arog ninda.

Sa amay pang marhay na edad, tinokdoan kami na makanompong nin kagayagayahan sa pagbasa. Si Nanay, Tatay, asin Lola gabos nakikabtang sa pagbasa sa samo gikan sa marahay na mga libro nin estorya o direktang gikan sa Biblia. An Kristianong mga pagtiripon asin ministeryo nagin nanggad mahalagang kabtang kan samong buhay siring kan paghangos. Si Tatay an lingkod kan kompanya (ngonyan inaapod na nangengenot na paraataman) kan Kongregasyon nin Johannesburg, kaya gabos kami kaipuhan na umabot nin amay sa mga pagtiripon. Kun igwa kami nin kombension, sibot si Tatay sa pagtabang sa pag-administrar kaiyan, mantang tinabangan ni Nanay an mga delegado sa pag-asikaso kan saindang mga dadagosan.

Sarong Espesyal na Kombension Para sa Samo

Espesyal an kombension sa Johannesburg kan 1948. Sa kaenot-enote, presente an mga miembro kan mga tawohan kan opisina prinsipal kan Mga Saksi ni Jehova sa Brooklyn, Nueva York. Inasignaran si Tatay na ipagmaneho si Nathan Knorr asin Milton Henschel gamit an saiyang kotse durante kan sinda yaon duman. Ako nabautismohan sa kombension na iyan.

Dai nahaloy pagkatapos kaiyan, sa pagkabigla ni Tatay sinabi kan saiyang ama na nagbabasol siang marhay huling pagkagadan ni Tugang na Russell, nagpaimpluwensia sia sa mga nagbaya sa Mga Estudyante sa Biblia. Sia nagadan pakalihis nin pirang bulan. Sa ibong na lado, si Lola nagdanay na maimbod sagkod na matapos nia an saiyang daganon na buhay kan 1955.

Mga Pangyayari na Nakaimpluwensia sa Sakong Buhay

Nagpoon akong magregular payunir kan Pebrero 1, 1949. Dai nahaloy nagpoon na madagdagan an kaogmahan kan ianunsiar na magkakaigwa nin internasyonal na kombension sa Siudad nin Nueva York sa masunod na taon. Gustong-gusto niamong magduman, alagad kulang an kuarta niamo. Dangan, kan Pebrero 1950, nagadan si Lolo, asin ginamit ni Lola an kuartang minana nia na pamasahe niamong lima.

Nagkapirang semana bago kami maghale, sarong surat an nag-abot hale sa pankinaban na opisina prinsipal kan Mga Saksi ni Jehova sa Brooklyn, Nueva York. Idto sarong imbitasyon sa sako na mag-adal sa ika-16 na klase kan paadalan nin mga misyonero sa Gilead. Nakakaogma nanggad iyan, huling dai pa akong 17 anyos! Kan magpoon an klase, kabilang ako sa sampulong estudyanteng  gikan sa Aprika del Sur, na ikinaogma an dakulang pribilehiong iyan.

Pagkatapos kan gradwasyon niamo kan Pebrero 1951, walo sa samo an nagbalik tanganing maglingkod bilang mga misyonero sa Aprika del Sur. Sa suminunod na pirang taon, ako asin an sakong kapartner naghulit sa pangenot sa mas sadit na mga banwaan na Aprikano an tataramon. Sa primero, dai ako tataong magtaram kan lenguaheng iyan, asin nagirumdoman ko kan nakasakay ako sa sakong bisikleta sarong aldaw na naghihibi huli ta bako akong epektibo sa ministeryo. Minsan siring, nag-oswag ako pag-abot nin panahon, asin binendisyonan ni Jehova an sakong mga paghihingoa.

Pag-agom Asin Gibohon na Nagbibiahe

Kan 1955, namidbid ko si John Cooke. Nagtabang sia na maponan an paghuhulit sa Pransia, Portugal, asin España bago asin pagkatapos kan Guerra Mundial II asin sia nagin misyonero sa Aprika kan taon na mamidbid ko sia. Pagkatapos sia nagsurat: “May tolong nakasorpresa sa sako sa laog sana nin sarong semana . . . Sarong matinaong marhay na tugang na lalaki an nagtao sa sako nin sadit na kotse; ninombrahan ako bilang lingkod sa distrito; asin namoot ako.” * Ikinasal kami kan Disyembre 1957.

Durante kan samong pag-ilusyonan, inasegurar ako ni John na pirmeng magigin maogma an buhay sa kaibanan nia, asin tama sia. Sinongko niamo an mga kongregasyon sa bilog na Aprika del Sur, sa pangenot sa mga lugar na mga itom an nag-iistar. Kada semana, napaatubang kami sa kadepisilan nin pagkua nin permiso tanganing makalaog sana sa siring na mga lugar, dai na baga sabihon pa an magdanay duman kun banggi. Kun minsan, nagtotorog kami sa salog nin sarong bakanteng pamakalan sa kataed na lugar nin mga puti, na duman hiningoa niamong dai maheling kan mga nag-aaragi. Sa parate kaipuhan niamong magdagos sa pinakaharaning mga Saksing puti, na sa parate nag-iistar sa mga lugar na dakol na kilometro an rayo.

Napaatubang man kami sa kadepisilan nin simpleng mga pasilidad para sa asamblea na itinogdok  sa mga kapalongpongan. Nagpasale kami nin mga pelikula na ginibo kan Mga Saksi ni Jehova na nagtabang sa mga tawo na maapresyar an satong pambilog na kinaban na kasararoan nin magturugang. Dinadara niamo an sadiri ming dienereytor, huling sa parate mayo nin elektrisidad sa mga lugar na idto. Kaipuhan man niamong atubangon an mga kadepisilan sa mga lugar na kontrolado asin protektado kan Britania na duman prohibido kan panahon na idto an literatura niamo, siring man an kadepisilan nin pag-adal kan lenguaheng Zulu. Pero, naggayagaya kami na mapaglingkodan an samong mga tugang.

Kan Agosto 1961, si John an enot na nagin instruktor kan apat na semanang kurso nin Pang-Kahadean na Paadalan sa Pagmiministro sa Aprika del Sur, na dinisenyo tanganing tabangan an mga paraataman sa kongregasyon. Sia eksperto sa teknika sa pagtotokdo asin nataros nia an puso kan saiyang mga estudyante paagi sa saiyang simpleng lohika asin malinaw na mga ilustrasyon. Sa laog nin haros saro may kabangang taon, nagpabarobalyo kami nin lugar sa sunod-sunod na klase na Ingles an tataramon. Mantang nagtotokdo si John, nakikikabtang ako sa ministeryo sa langtad kaiba an lokal na mga Saksi. Dangan, sa samong pagkabigla, nakaresibi kami nin surat na iniimbitaran kaming maglingkod sa sangang opisina sa Aprika del Sur harani sa Johannesburg poon Hulyo 1, 1964.

Pero sa panahon na ini, nagpoon kaming magngalas sa salud ni John. Kan 1948 inaatake sia nin tisis asin pagkatapos kaiyan parate siang biyong pinanluluyahan nin hawak. Sia nakakamate nin mga sintomas na garo trangkaso asin nakahigda sa laog nin pirang aldaw—dai sia makagibo nin ano man o dai nia kayang makipaghelingan sa siisay man. Nadiskobre nin sarong doktor na samong kinonsulta dai nahaloy bago kami inapodan sa sangang opisina na depresyon an problema ni John.

Dai mi lamang pinensar na bagohon an dalagan kan buhay niamo, siring kan isinuherir kan doktor. Sa sangang opisina, iinasignar si John sa Departamento sa Paglilingkod, asin ako sa pagbasa asin pagkorehir. Asin kanigoan nanggad na bendisyon na magkaigwa kami nin sadiring kuarto! Naglingkod si John sa mga teritoryo nin Portugues bago kami ikinasal, kaya kan 1967 pinakiolayan kami na tabangan an solamenteng Portugues na pamilyang Saksi duman na maghulit sa dakulang komunidad nin mga Portugues sa laog asin sa palibot kan Johannesburg. Ini nangahulogan na kaipuhan kong mag-adal nin saro pang lenguahe.

Huling an komunidad nin mga Portugues suruwaysuway sa mahiwas na lugar, parate kaming nagbibiahe—kun beses sagkod sa 300 kilometros tanganing mahulitan an mga maninigo. Sa panahon na ini, an mga Saksi na Portugues an tataramon na gikan sa Mozambique nagpoon na dumalaw sa samo sa mga panahon nin asamblea, na sarong dakulang tabang sa mga bagohan. Durante kan 11 taon na paghuhulit niamo sa mga Portugues, naheling mi na nagin apat na kongregasyon an sadit niamong grupo na kompuesto nin mga 30.

Mga Pagbabago sa Harong

Mientras tanto, nagkaigwa nin mga pagbabago sa harong kan sakong mga magurang. Kan 1960 an sakong tugang, si Thelma, ikinasal ki John Urban, sarong payunir gikan sa Estados Unidos. Kan 1965 sinda nag-eskuela sa ika-40 klase nin Gilead asin maimbod na naglingkod bilang mga misyonero sa Brazil sa laog nin 25 taon. Kan 1990 sinda nagbalik sa Ohio tanganing atamanon an may helang nang mga magurang ni John. Sa ibong nin mga sakit sa pag-ataman, sinda nagdanay sa bilog na panahon na ministeryo sagkod ngonyan.

Natapos ni Lola an saiyang daganon na buhay kan 1965, na maimbod pa man giraray sa Dios sa edad na 98 anyos. Nagretiro si Tatay sa sekular na trabaho kan taon man sanang idto. Kaya kan kami ni John pinakiolayan na magtabang sa lokal na langtad nin mga Portugues, nagboluntaryo si Tatay asin Nanay na umiba sa samo. Sinda nagin pamparigon sa grupo, asin pakalihis nin pirang bulan, naestablisar an enot na kongregasyon. Dai nahaloy pagkatapos kaiyan, nagpoon na mamatean ni Nanay an mga epekto nin kanser, na ikinagadan nia kan 1971. Si Tatay nagadan pakalihis nin pitong taon.

Pag-atubang sa Helang ni John

Kan dekada nin 1970, nagin malinaw na dai nagrarahay an salud ni John. Luway-luway, kaipuhan niang butasan an nagkapira sa saiyang pinakamamahal na pribilehio nin paglilingkod, kaiba na an pamamayo sa samong semanal na Pag-adal sa Torrengbantayan asin pan-agang mga pagtokar sa Biblia bilang pamilya sa sangang opisina. An saiyang asignasyon na trabaho na dati sa  Departamento sa Paglilingkod ibinalyo sa Opisina Para sa mga Surat dangan sa pagtrabaho sa hardin.

An kahigosan ni John an nagpagin depisil para sa saiya na gumibo nin mga pagbabago. Kan pirme kong hinihingoa na paluwayluwayon sia, pasuba nia akong iinaagid sa bolang batbat asin kadena nin mga preso—na sa parate sinasabayan nia nin mapag-apresyar na kugos. Sa kahurihurihi, namatean niamo na marahay na bayaan an langtad nin mga Portugues asin maglingkod kami sa kongregasyon na an pagtiripon ginigibo sa Kingdom Hall sa sangang opisina.

Mantang nagluluya an salud ni John, nakakapahiro sa boot na maheling an saiyang dayupot na relasyon ki Jehova. Kun si John nagmamata sa kamatangaan nin banggi na grabe an depresyon, nag-oolay kami sagkod na magin kalmado na sia tanganing makapamibi para sa tabang ni Jehova. Sa kahurihurihi, nakaya niang atubangon nin solo an maraot na mga panahon na idto paagi sa pagpirit sa saiyang sadiri na otrohon nin maluway an Filipos 4:6, 7: “Dai kamo maghadit sa ano man na bagay . . .” Dangan magigin kalmado na sia tanganing makapoon na mamibi. Parateng mata ako asin daing girong na hineheling an saiyang mga ngabil na naghihiro mantang haloy siang odok na nagngangayongayo ki Jehova.

Huling an mga pasilidad kan sangang opisina niamo nagin piot nang marhay, pinonan an pagtogdok nin bago asin dakulang sangang opisina sa luwas kan Johannesburg. Kami ni John parateng nagpapasyar sa matoninong na lugar na ini, na harayo sa ribok asin polusyon kan siudad. Nakatabang na marhay ki John kan tinogotan kaming magbalyo sa temporaryong mga istaran duman sagkod na matapos an bagong sangang opisina.

Bagong mga Kadepisilan

Mantang orog na nagluluya an mga kakayahan sa pag-iisip asin pangangatanosan ni John, nagin orog na depisil an paggibo nia kan saiyang mga asignasyon. Biyong napahiro ako kan suporta na itinao kan iba ki John sa saiyang mga paghihingoa. Halimbawa, kun an sarong tugang na lalaki minaduman sa pampublikong libreriya tanganing magsiyasat, iiniiba nia si John. Pano-pano an mga bulsa ni John nin mga pulyeto asin magasin para sa pagluwas sa aldaw na iyan. Nakatabang ini ki John na papagdanayon an pakamate na sia may nagigibo asin may halaga.

Pag-abot nin panahon, huli sa helang na Alzheimer’s imposible na ki John na makabasa. Nagpapasalamat kami sa mga audiotape nin mga literatura sa Biblia asin mga awit na pang-Kahadean. Paorootro kaming naghihinanyog sa mga iyan. Si John parateng nariribok kun dai ako nagtutukaw asin naghihinanyog kaiba nia, kaya ginigibo kong sibot an sakong sadiri durante kan dakol na oras na idto paagi sa pagbuburda. Huli kaiyan nagkaigwa kami nin kadakol na sueter asin tamong!

Pag-abot nin panahon, huli sa kamugtakan ni John kinaipuhan ko siang orog pang atamanon. Minsan ngani parateng pagalon ako na magbasa o mag-adal, sarong pribilehio na atamanon sia sagkod sa katapusan. Uminabot an katapusan na iyan kan 1998 kan si John toninong na nagadan sa sakong mga takyag dai nahaloy pakatapos niang mag-85 anyos—na dagos-dagos na maimbod sagkod sa katapusan. Talagang hinihidaw ko na maheling sia sa pagkabuhay liwat, na nakabalik sa dati an saiyang salud asin isip!

Naginhawahan

Pagkagadan ni John, bakong pasil sa sako na makanood na mabuhay nin solo. Kaya kan Mayo 1999, dinalaw ko an sakong tugang, si Thelma, asin an saiyang agom sa Estados Unidos. Nakakaogmang marhay asin nakakaginhawa nanggad na magkaherelingan kan dakol na maimbod asin mahal na katood, nangorogna durante kan samong pagsongko sa pankinaban na opisina prinsipal kan Mga Saksi ni Jehova sa Nueva York! Iyan nanggad an espirituwal na pagparigon na kaipuhan ko.

Pagbinabalikan ko an buhay kan sakong maimbod na mga namomotan, iyan sarong pagirumdom dapit sa kadakol na bagay na nagin kapakipakinabang sa sako. Paagi sa saindang pagtotokdo, halimbawa, asin tabang, nanodan kong pahiwason an sakong pagkamoot sa mga tawo kan ibang nasyon asin rasa. Nanodan ko kun paano magin mapasensia, magtagal, asin makibagay. Orog sa gabos, naeksperyensiahan ko an pagkamaugayon ni Jehova, an Paradangog nin pamibi. Nakakapareho ko an saboot kan salmista na nagsurat: “Maogma an saro na saimong pinili asin pinadolok mo, tanganing sia mag-erok sa saimong mga patyo. Kami maninigoan nanggad sa karahayan kan saimong harong.”—Salmo 65:4.

[Nota sa Ibaba]

[Ritrato sa pahina 8]

Si Lola kaiba an saiyang mga aking babae

[Ritrato sa pahina 9]

Kaiba ko an sakong mga magurang kan ako nabautismohan kan 1948

[Ritrato sa pahina 10]

Kaiba ko si Albert Schroeder, an rehistrador kan Gilead, asin an siyam pang estudyante gikan sa Aprika del Sur

[Ritrato sa pahina 10]

Kaiba ko si John kan 1984