Pagsamba na Marahay Para sa Saindo

“AN PAGRANI sa Dios marahay para sa sako,” an ipinahayag kan salmistang si Asaf. Naisip niang arogon idtong mga nagin daing labot sa Dios tanganing magkaigwa nin komportableng buhay. Alagad pinag-isipan ni Asaf an mga bentaha nin pagrani sa Dios asin nagkonklusyon na iyan marahay para sa saiya. (Salmo 73:2, 3, 12, 28) Marahay daw para sa saindo ngonyan an tunay na pagsamba? Paano kamo makikinabang dian?

Tinatabangan kamo kan pagsamba sa tunay na Dios na magkaigwa nin sarong bagay na mas mahalaga kisa sa pamumuhay na puro na sana sadiri an iniintindi. Huli sa paagi kan pagkalalang sa sato kan “Dios nin pagkamoot, an mga naghahanap kan saindang sadiring mga kapakanan sana nungkang makakanompong nin kaogmahan.” (2 Corinto 13:11) Itinokdo ni Jesus an sarong pundamental na katotoohan manongod sa naturalesa nin tawo kan sabihon nia: “Igwang orog na kaogmahan sa pagtao kisa pag-ako.” (Gibo 20:35) Iyan an dahelan kun taano ta naoogma kita sa paggibo nin mga bagay para sa satong mga katood asin pamilya. Alagad an pinakadakulang kaogmahan minagikan sa paggibo nin mga bagay para sa Dios. Sia orog na maninigo sa satong pagkamoot kisa kiisay pa man. Nanompongan nin minilyon na tawo gikan sa gabos na klase nin pamumuhay na an pagsamba sa Dios paagi sa paggibo kan hinahagad nia nakakakontentong marhay.—1 Juan 5:3.

Pagkaigwa nin Katuyohan sa Buhay

An tunay na pagsamba marahay man para sa saindo huli ta iyan nagtatao sa saindo nin katuyohan sa buhay. Narisa daw nindo kun gurano kaparate na an kaogmahan konektado sa pakamate na kamo may nagigibong sarong bagay na kapakipakinabang? An kadaklan na tawo igwang pasohan sa buhay, baga man konektado sa saindang pamilya, mga katood, negosyo, o kawilihan. Huli sa mga kadaihan nin kasegurohan sa buhay, an mga bagay na ini parateng dai nakakapaogma sa sainda. (Eclesiastes 9:11) Minsan siring, tinatabangan kamo kan tunay na pagsamba na makanompong nin mas halangkaw na katuyohan, katuyohan na padagos na nakakakontento dawa kun an ibang aspekto kan buhay nagigin nakakadesganar.

Kalabot sa tunay na pagsamba an pakamidbid ki Jehova asin paglilingkod sa saiya nin may kaimbodan. An mga nagsasagibo kaiyan napaparaning marhay sa Dios. (Eclesiastes 12:13; Juan 4:23; Santiago 4:8) Tibaad madepisilan kamong imahinaron na an pakamidbid na marhay sa Dios mangangahulogan na sia magigin saindong katood. Alagad paagi sa paghorophorop sa mga pagkasaysay dapit sa mga pagtratar nia sa mga tawo asin paagi sa pag-estudyar sa mga linalang nia, talagang masasabotan nindo an mga aspekto kan saiyang personalidad. (Roma 1:20) Dugang pa, paagi sa pagbasa kan Tataramon nin Dios, masasabotan nindo kun taano ta yaon kita digdi, kun taano ta tinotogotan nin Dios an pagdusa, kun paano nia tataposon an pagdusa asin, tibaad an pinakainteresante sa gabos, kun paano kamo magkakaigwa nin mahalagang kabtang sa ginigibo nin Dios. (Isaias 43:10; 1 Corinto 3:9) An siring na pakasabot magtatao sa saindo nin bagong dahelan tangani na mabuhay!

Pagigin Mas Marahay na Tawo

An tunay na pagsamba marahay para sa saindo huling tinatabangan kamo kaiyan na magin mas marahay na tawo. Mantang isinasagibo nindo an tunay na pagsamba, kinukultibar nindo an sarong personalidad na nagbubunga nin mas maogmang mga relasyon sa iba. Nakakanood kamo sa Dios asin sa saiyang Aki manongod sa sadiosan na paggawe, maboot na pagtaram, asin pagigin masasarigan. (Efeso 4:20–5:5) Kun midbid na nindong marhay an Dios kaya namomotan na nindo sia, kamo napapahiro na arogon sia. An Biblia nagsasabi: “Magin kamong mga paraarog sa Dios, bilang mga aki na namomotan na marhay, asin padagos kamong maglakaw sa pagkamoot.”—Efeso 5:1, 2.

Bako daw na sarong dakulang kaogmahan na makaibanan nin mga tawo na inaarog an pagkamoot nin Dios? Marahay sana ta an pagsamba sa tunay na Dios bakong aktibidad na ginigibo nindo nin solo.  Iinaasosyar kamo kaiyan sa iba na namomoot sa kun ano an tama asin marahay. Siempre, tibaad nasasakitan kamong isipon an ideya nin pag-asosyar sa establisadong relihion. Minsan siring, arog kan naheling niato sa naenot na artikulo, an problema sa kadaklan na relihion bakong huli ta sinda establisado kundi huli ta sinda bakong establisado sa tamang paagi asin para sa tamang mga katuyohan. Dakol na establisadong relihion an may mga katuyohan na bakong sa Kristiano. An banwaan nin Dios inestablisar ni Jehova mismo para sa nobleng katuyohan. An Biblia nagsasabi: “An Dios sarong Dios, bakong nin karibarawan, kundi nin katoninongan.” (1 Corinto 14:33) Arog kan minilyon na iba pa, tibaad manompongan nindo na an pakikiasosyar sa aregladong marhay na grupo nin mga Kristiano igwa nin marahayon na impluwensia sa saindong paglaom sa ngapit.

Paglaom sa Ngapit

Ipinapaheling kan Banal na Kasuratan na inoorganisar nin Dios an tunay na mga parasamba tanganing sinda makaligtas sa katapusan kan presenteng sistema nin mga bagay asin magmana nin sarong bagong daga na dian “magdadanay an katanosan.” (2 Pedro 3:13; Kapahayagan 7:9-17) Kun siring, an pagsamba na marahay para sa saindo nagtatao nin paglaom, na kaipuhan nanggad sa kaogmahan. An nagkapira ibinabasar an saindang mga linalaoman sa ngapit sa estabilidad kan mga gobyerno, mga oportunidad sa negosyo, o pag-antisipar nin marahay na salud asin nakakakontentong pagretiro. Alagad pira sana kun igwa man sa mga bagay na ini an nagtatao nin marigon na basehan tanganing laoman an sarong maogmang ngapit. Sa ibong na lado, si apostol Pablo nagsurat: “Ibinugtak niato an satong paglaom sa nabubuhay na Dios.”—1 Timoteo 4:10.

Kun kamo lubos na maghahanap, manonompongan nindo an tunay na mga parasamba. Sa nababangang kinaban ngonyan, an pagkamoot asin pagkasararo malinaw na nagpapamidbid sa mga Saksi ni Jehova. Gikan sinda sa haros gabos na nasyon asin pinaghalean; alagad, sinda nagkakasararo huli sa pagkamoot sa lambang saro asin pagkamoot ki Jehova. (Juan 13:35) Iniimbitaran ninda kamo na aramon nindo mismo kun ano an saindang naeeksperyensiahan. Si Asaf nagsurat: “An pagrani sa Dios marahay para sa sako.”—Salmo 73:28.

[Ritrato sa pahina 7]

Puede kamong magin katood nin Dios