Relihion—Anong Karahayan an Nagigibo Kaiyan?

“PUEDE akong magin marahay dawa bako akong relihioso!” Siring kaiyan an saboot kan kadaklan na tawo. Dakol na tawong sadiosan, mapagmalasakit, asin masasarigan an bakong interesado sa relihion. Halimbawa, pipira sana na Europeong taga Solnopan an parasimba, minsan ngani an kadaklan nagsasabi na sinda naniniwala sa Dios. * Dawa sa Latin Amerika, 15 sagkod 20 porsiento sana kan mga Katoliko an regular na nagsisimba.

Arog kan dakol na iba pa, tibaad naghohona kamo na bakong mahalaga an relihion sa pagkaigwa nin mas marahay na buhay. Pero, posible na aram man nindo na kaidtong dakol nang taon an nakaagi, kan panahon kan saindong mga apoon, an kadaklan na tawo mas relihioso nanggad kisa ngonyan. Taano ta dakol an dai na naaakit sa relihion? Puede daw na magin marahay an sarong tawo dawa bako siang relihioso? May relihion daw na makakatao sa saindo nin pakinabang?

Kun Taano ta Dakol an Nagbaya sa Relihion

Sa laog nin dakol na siglo, an kadaklan na tawo sa Kakristianohan naniniwala na an pagkuyog kahagadan nin Dios. Sinda nagsisimba tanganing kamtan an pabor nin Dios, magsalang paagi sa mga seremonya na pinapamayohan nin sarong padi o paagi sa paggiya na itinatao nin sarong parahulit. Iyo, dakol an nakakaaram kan pagsaginsagin sa relihion. Midbid na marhay an kabtang kan relihion sa guerra, siring man an mapan-abusong gawe-gawe nin nagkapirang klerigo. Alagad an kadaklan na tawo nagsasaboot na an relihion mismo marahay. An iba nagustohan an pan-akit, tradisyon, asin musika; an nagkapira namotibar pa ngani kan huma na daing sagkod na pasakit sa nagkakalayong impierno, na sarong katokdoan na dai manonompongan sa Kasuratan. Dangan, binago kan nagkapirang pangyayari an pagmansay sa relihion kan dakol na tawo.

An teoriya nin ebolusyon nagin popular. An nagkapira nakombensir na an buhay naglataw huli sa pagkanorongod sana—na mayo nin Dios na naglalang. Nasudya an kadaklan na relihion na magtao nin nakakakombensir na ebidensia na an Dios an Burabod nin buhay. (Salmo 36:9) Dugang pa, mantang nag-ooswag an teknolohiya, an pambihirang mga nagibo sa medisina, transportasyon, asin komunikasyon nagtao sa mga tawo nin ideya na puedeng resolberan kan siensia an ano man na problema. Siring man, pinaghona na an mga eksperto sa siensia sosyal asin sikologo nakatao nin mas marahay na giya kisa sa mga iglesia. An mga iglesia mismo dai nakatao nin nakakakombensir na ebidensia na an pamumuhay sono sa ley nin Dios iyo an pinakamarahay na paagi nin pamumuhay.—Santiago 1:25.

Kaya an ginibo kan dakol na iglesia binago ninda an saindang mensahe. Dai na itinotokdo kan mga padi asin parahulit na an pagkuyog kahagadan nin Dios. Imbes, itinotokdo kan dakol na an lambang indibiduwal an dapat na magdesisyon para sa saiyang sadiri kun ano an tama asin kun ano an sala. Naghihingoang magin popular, hiningako kan nagkapirang lider nin relihion na inaako kamo nin Dios dawa ano an saindong klase nin pamumuhay. An siring na katokdoan nagpapagirumdom sa sato kan ihinula kan Biblia: “Madatong an panahon na dai na sinda matagal sa ikakarahay na  katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga.”—2 Timoteo 4:3.

Imbes na makaakit nin mga tawo, an siring na katokdoan nagparayo sa sainda. Natural na isipon ninda: ‘Kun pinagdududahan kan mga iglesia an kapangyarihan nin Dios na maglalang asin an kadonongan nin Dios na gumibo nin mga ley, anong pakinabang kan pagsimba ko? Taano ta maghihingoa pa akong itokdo sa sakong mga aki an relihion?’ An mga indibiduwal na an mawot sana iyo an mamuhay nin disente nagpoon na ibilang an relihion na daing halaga. Binayaan ninda an mga iglesia, asin an relihion bako nang mahalaga sa sainda. Paano nangyari na nagin mayo na nin halaga an sarong bagay na dapat kutanang kapakipakinabang? An Biblia nagtatao nin nakakabensir na paliwanag.

Ginamit an Relihion Para sa Maraot na mga Katuyohan

Pinatanidan ni apostol Pablo an enot na mga Kristiano na an nagkapira gagamiton an Kristianismo para sa maraot na mga katuyohan. Sia nagsabi: “An mapan-aping mga lobo malaog dian sa tahaw nindo asin dai magigin maboot sa aripompon, asin hale mismo dian sa saindo may mga lalaking matindog asin mataram nin biribid na mga bagay tanganing maguyod ninda sa sainda an mga disipulo.” (Gibo 20:29, 30) An saro na nagtaram nin “biribid na mga bagay” iyo an Katoliko Romanong teologo na si Agustin. Tinokdoan ni Jesus an saiyang mga parasunod na kombensiron an iba paagi sa pangangatanosan basado sa Kasuratan. Minsan siring, biniribid ni Agustin an kahulogan kan mga tataramon ni Jesus na nakarekord sa Lucas 14:23, an “Piriton mo sindang lumaog,” na tinawan ini nin kahulogan na tama lang na gumamit nin puersa sa pagkombertir sa mga tawo. (Mateo 28:19, 20; Gibo 28:23, 24) Ginamit ni Agustin an relihion tanganing kontrolon an mga tawo.

Si Satanas, sarong rebeldeng anghel, iyo an nasa likod kan salang paggamit asin pagraot sa relihion. Sinutsutan nia an mga tawong relihioso kan enot na siglo na probaran na raoton an Kristianong mga kongregasyon. An Biblia nagsasabi manongod sa mga lalaking idto: “An siring na mga tawo falsong mga apostol, madayang mga trabahador, na nagmamalemale na mga apostol ni Cristo. Asin iyan bakong makangangalas, huli ta minsan si Satanas pirmeng nagmamalemale na anghel nin liwanag. Kun siring, bakong dakulang bagay kun an saiyang mga ministro nagmamalemale man na mga ministro nin katanosan.”—2 Corinto 11:13-15.

Ginagamit pa man giraray ni Satanas an relihion na nagsasagin Kristiano, may moral, asin nagtatao nin kaliwanagan tanganing madara an mga tawo na mamuhay sono sa saiyang mga pamantayan imbes na sa pamantayan nin Dios. (Lucas 4:5-7) Tibaad narisa nindo na ginagamit kan dakol na klerigo ngonyan an relihion tanganing ilangkaw an saindang sadiri paagi sa nakakalulang mga titulo asin tanganing kuartahan an saindang aripompon. Ginamit man kan mga gobyerno an relihion tanganing kombensiron an mga siudadano na isakripisyo an saindang sadiri sa guerra.

Ginagamit kan Diablo an relihion sa mas mahiwas na paagi na dai naaaraman kan kadaklan na tawo. Tibaad iniimahinar nindo na kadikit sanang radikal sa relihion an ginagamit ni Satanas. Alagad oyon sa Biblia, “an inaapod Diablo asin Satanas . . . ilinalagalag an bilog na ineerokan na daga.” An Biblia nagsasabi man: “An bilog na kinaban namumugtak sa kapangyarihan kan maraot.” (Kapahayagan 12:9; 1 Juan 5:19) Ano daw an saboot  nin Dios sa relihion na ginagamit kan mga lider na an gusto sana iyo na pasunodon sa sainda an mga tawo?

“Ano an Halaga sa Sako?”

Kun kamo nabibigla sa paggawe kan nagkapirang iglesia kan Kakristianohan, aramon nindo na sinda ikinakaanggot na marhay kan Makakamhan sa Gabos na Dios. Hinihingako kan Kakristianohan na sinda nakipagtipan sa Dios; siring man kaiyan an paghihingako kan suanoy na Israel. Pareho sindang dai nagin maimbod. Kun siring, an pagdenunsiar ni Jehova sa Israel aplikado man sa Kakristianohan ngonyan. Sinabi ni Jehova: “Dai sinda naghinanyog sa sakong mga tataramon asin isinikwal ninda an sakong ley. Ano an halaga sa sako kan insenso gikan sa Seba? . . . An saindong mga atang dai nakakapaogma sa sako.” (Jeremias 6:19, 20, New International Version) Dai minidbid nin Dios an mga akto nin pagsamba kan mga mapagsaginsagin. Sia bakong interesado sa saindang mga ritual asin pamibi. Sinabihan nia an Israel: “An saindong mga panahon nin kapiestahan ikinaongis kan sakong kalag. Para sa sako an mga iyan nagin pagabat; pagal na ako sa kapapasan kaiyan. Asin kun binubuka nindo an saindong mga palad, tinatago ko an sakong mga mata sa saindo. Dawa pa namimibi kamo nin dakol, dai ako naghihinanyog.”—Isaias 1:14, 15.

Nagugustohan daw ni Jehova an mga kapiestahan kan mga iglesia na ipinepresentar bilang Kristiano alagad sa kapoonpooni nagtataong onra sa falsong mga dios? Hinihinanyog daw nia an mga pamibi kan mga klerigo na rinaraot an mga katokdoan ni Cristo? Inaako daw nin Dios an ano man na relihion na isinisikwal an saiyang ley? Makakasierto kamo na an reaksion nia sa mga ritual ngonyan kan mga iglesia kapareho kan nagin reaksion nia sa mga atang kan Israel kan suanoy, na mapadapit dian sia nagsabi: “Ano an halaga sa sako?”

Minsan siring, si Jehova talagang interesadong marhay sa pagsamba na itinatao kan sinserong mga tawo oyon sa katotoohan. Naoogma an Dios kun an mga tawo nagpapahayag nin pag-apresyar sa gabos na inaako ninda gikan sa saiya. (Malaquias 3:16, 17) Kaya puede daw kamong magin marahay dawa dai nagsasamba sa Dios? An sarong tawo na mayong ginigibo para sa saiyang mamomoton na mga magurang mayo nanggad nin katanosan na ibilang an saiyang sadiri na marahay, bako daw? Puede daw na magin marahay an sarong tawo na mayong ginigibo para sa Dios? Rasonable nanggad, maninigo kitang magkaigwa nin aktibong interes sa tunay na Dios, na pinaggikanan kan buhay mismo. Sa masunod na artikulo, maheheling niato kun paanong an tunay na pagsamba bako sanang nagtatao nin onra sa Dios kundi nagtatao man sa sato nin pakinabang.

[Nota sa Ibaba]

[Ritrato sa pahina 4]

Itinokdo daw kan mga iglesia an ebidensia na linalang kan Dios an gabos na bagay?

[Ritrato sa pahina 4, 5]

Dapat daw na imbuelto sa arog kaining kamugtakan an sarong representante nin Dios?

[Ritrato sa pahina 5]

Ano an pagmansay nin Dios sa arog kaining klase nin kapiestahan?

[Credit Line]

Retrato kan AP/Georgy Abdaladze