Tampok na mga Kabtang sa Ikalimang Libro nin Salmo
An Tataramon ni Jehova Buhay
Tampok na mga Kabtang sa Ikalimang Libro nin Salmo
AN MGA mayaman tibaad magsabi: “An samuyang mga aking lalaki siring sa saradit na tinanom na nagtubang sa saindang pagkaaki, an samuyang mga aking babae siring sa mga eskina na inukit siring kan sa palasyo, an samuyang tambobong parano, . . . an samuyang mga aripompon nagdadakol nin rinibo.” Dugang pa, an mga mayaman tibaad minakagsing: “Maogma an banwaan na arog kaiyan an kamugtakan!” Minsan siring, sa kabaliktaran, an salmista minasabi: “Maogma an banwaan na an Dios iyo si Jehova!” (Salmo 144:12-15) Paanong dai sia magigin maogma? Si Jehova an maogmang Dios, asin an kaogmahan para sa mga nagsasamba sa saiya. (1 Timoteo 1:11) An katotoohan na ini maririsa sa huring koleksion kan ipinasabong nin Dios na mga awit, na kompuesto kan Salmo 107 sagkod 150.
Itinatampok man kan Ikalimang Libro nin Salmo an daing kabaing na mga kualidad ni Jehova, kaiba an saiyang mamomoton na kabootan, kaimbodan sa katotoohan, asin karahayan. Mantang orog niatong narororop an personalidad nin Dios, mas may tendensia kitang mamotan sia asin matakot sa saiya. Matao man ini sa sato nin kaogmahan. Kanigoan kahalagang mensahe an manonompongan niato sa Ikalimang Libro nin Salmo!—Hebreo 4:12.
MAOGMA HULI SA MAMOMOTON NA KABOOTAN NI JEHOVA
“O magpasalamat logod an mga tawo ki Jehova huli sa saiyang mamomoton na kabootan asin huli sa saiyang makangangalas na mga ginibo sa mga aki nin tawo,” an inawit kan desterradong mga Judio na pabalik na hale sa pagkabihag sa Babilonya. (Salmo 107:8, 15, 21, 31) Inoomaw an Dios, si David nag-awit: “An saimong kaimbodan sa katotoohan sagkod sa kaitaasan.” (Salmo 108:4) Sa kasunod na melodiya, sia namibi: “Tabangan mo ako, O Jehova na sakong Dios; iligtas mo ako oyon sa saimong mamomoton na kabootan.” (Salmo 109:18, 19, 26) An Salmo 110 hula kan pamamahala kan Mesiyas. “An pagkatakot ki Jehova iyo an kapinonan nin kadonongan,” an sabi kan Salmo 111:10. Oyon sa sunod na salmo, “maogma an tawo na natatakot ki Jehova.”—Salmo 112:1.
An Salmo 113 sagkod 118 inaapod na mga Salmong Halel, iyan an apod huli ta paorootrong ginagamit kaiyan an ekspresyon na “Aleluya,” o “Omawon si Jah!” Oyon sa Misna—sarong isinurat kaidtong ikatolong siglo na rekord kan mas naenot na berbal na tradisyon—an mga awit na ini inaawit sa Paskua asin sa tolong taonan na kapiestahan kan mga Judio. Bilang pinakahalaba sa gabos na salmo asin kapitulo sa Biblia, an Salmo 119 nagbabantog kan ihinayag na tataramon, o mensahe, ni Jehova.
Mga Hapot sa Kasuratan na Sinimbag:
109:23—Ano an boot sabihon ni David kan sia magsabi: “Siring sa sarong anino kun iyan nawawara, obligado akong humale”? Sinasabi ni David sa poetikong paagi na namamatean nia na haranihon na an saiyang kagadanan.—Salmo 102:11.
110:1, 2—Ano an ginibo kan “Kagurangnan [ni David],” si Jesu-Cristo, mantang nakatukaw sa too nin Dios? Pagkatapos kan saiyang pagkabuhay liwat, si Jesus suminakat sa langit asin naghalat sa too nin Dios sagkod 1914 tanganing magpoon na mamahala bilang Hade. Durante kan panahon na iyan, si Jesus namahala sa saiyang linahidan na mga parasunod, na ginigiyahan sinda sa saindang paghuhulit asin paggibo nin mga disipulo saka iinaandam sinda na mamahala kaiba nia sa saiyang Kahadean.—Mateo 24:14; 28:18-20; Lucas 22:28-30.
110:4—Sa ano si Jehova ‘suminumpa na dai magbabasol’? An sumpa na ini iyo an pakipagtipan ni Jehova ki Jesu-Cristo tanganing maglingkod bilang Hade asin Halangkaw na Saserdote.—Lucas 22:29.
113:3—Sa anong paagi na an ngaran ni Jehova oomawon “magpoon sa pagsirang kan saldang sagkod sa pagsolnop kaiyan”? An kalabot digdi bako sanang sarong grupo nin mga indibiduwal na nagsasamba sa Dios aroaldaw. Magpoon sa pagsirang kan saldang sa sirangan sagkod sa pagsolnop kaiyan sa solnopan, an sinag kan saldang nagtataong liwanag sa bilog na globo. Kaagid kaiyan, si Jehova maninigo na omawon sa bilog na daga. Dai ini magigibo na mayo nin organisadong paghihingoa. Bilang Mga Saksi ni Jehova, yaon sa sato an pinakamamahal na pribilehio na omawon an Dios asin maigot na makikabtang sa pagbalangibog kan Kahadean.
116:15—Gurano ‘kahalaga sa mga mata ni Jehova an kagadanan kan saiyang mga maimbod’? An mga parasamba ki Jehova mahalagang marhay sa saiya kaya para sa saiya, an saindang kagadanan bilang sarong grupo sobra kamahal tanganing itogot nia. Kun itotogot ni Jehova na mangyari iyan, garo baga magigin mas makapangyarihan kisa sa saiya an saiyang mga kaiwal. Apuera dian, mayong matatada sa daga bilang pundasyon para sa bagong kinaban.
119:71—Ano an makukuang pakinabang sa pagtios nin makuring sakit? An kasakitan puedeng magtokdo sa sato na mas lubos na magsarig ki Jehova, na mas odok na mamibi sa saiya, asin magin mas mahigos sa pag-adal kan Biblia asin pag-aplikar kan sinasabi kaiyan. Dugang pa, an satong reaksion sa makuring sakit puedeng maghayag nin mga depekto sa personalidad na puedeng ikorehir. Dai kita maghihinanakit huli sa pagdusa kun totogotan niato na dalisayon kita kaiyan.
119:96—Ano an boot sabihon kan “katapusan kan gabos na pagkasangkap”? An salmista nagtataram manongod sa pagkasangkap sa punto de vista nin tawo. Tibaad nasa isip nia na limitado an ideya nin tawo manongod sa pagkasangkap. Sa kabaliktaran, an togon nin Dios mayo nin limitasyon na siring kaiyan. An paggiya kaiyan minaaplikar sa gabos na aspekto nin buhay. “Naheheling ko an limitasyon sa gabos na pagkasangkap,” an sabi kan New International Version, “alagad an saimong mga togon daing sagkod.”
119:164—May anong kahulogan an pag-omaw sa Dios nin “makapito sa laog kan aldaw”? An numerong pito parateng nangangahulogan nin pagkakompleto. Kun siring, an salmista nagsasabi na si Jehova maninigo sa gabos na pag-omaw.
Mga Leksion Para sa Sato:
107:27-31. An kadonongan kan kinaban ‘mariribaraw’ kun umabot na an Armagedon. (Kapahayagan 16:14, 16) Dai kaiyan ikakaligtas an siisay man sa pagkalaglag. An mga naglalaom sana ki Jehova para sa kaligtasan an mabubuhay tanganing “magpasalamat [sa saiya] para sa saiyang mamomoton na kabootan.”
109:30, 31; 110:5. An toong kamot nin soldados na nagkakapot nin espada sa parate dai napoprotehiran kan kalasag, na kapot kan too. Sa piguratibong pagtaram, si Jehova yaon “sa too” kan saiyang mga lingkod, tanganing makipaglaban para sa sainda. Sa siring, tinatawan nia sinda nin proteksion asin tabang—sarong marahayon na dahelan tanganing ‘omawon niato siang gayo’!
113:4-9. Si Jehova halangkawon kaya sia nagpapakanghababa ngani na “helingon an langit.” Pero, sia mapagmalasakit sa hamak, dukha, asin baog na babae. An Soberanong Kagurangnan na Jehova mapakumbaba asin gusto nia na an saiyang mga parasamba magin arog man kaiyan.—Santiago 4:6.
114:3-7. Dapat na magkaigwa nin hararom na epekto sa sato an pakaaram manongod sa makangangalas na mga ginibo ni Jehova para sa saiyang banwaan sa Dagat na Pula, sa Salog nin Jordan, asin sa Bukid nin Sinai. An katawohan, na irinerepresentar kan “daga,” maninigong makamate nin may pagkangirhat na paggalang—sa piguratibong paagi “makamate nin grabeng kolog”—huli sa Kagurangnan.
119:97-101. An pagkaigwa nin kadonongan, pakarorop, asin pakasabot sa Tataramon nin Dios nagpoprotehir sa sato sa espirituwal na kapahamakan.
119:105. An Tataramon nin Dios ilawan sa satong bitis sa bagay na nakakatabang iyan sa sato na atubangon an presenteng mga problema. Sa piguratibong paagi, iyan man nagtatao nin liwanag sa satong dalan, huli ta sinasabi kaiyan antes pa an katuyohan nin Dios para sa ngapit.
MAOGMA SA IBONG NIN MGA KASAKITAN
Paano niato maaatubang an mapagbalong mga kamugtakan asin matagalan an mga kasakitan? An Salmo 120 sagkod 134 nagtatao nin malinaw na simbag sa hapot na ini. Matatagalan niato an kasakitan asin mapapagdanay an satong kagayagayahan paagi sa pagsarig ki Jehova para sa tabang. An mga salmong ini, na inaapod na mga Awit sa Pagtukad, inawit gayod mantang an mga Israelita nagtuturukad pasiring sa Jerusalem sa pagselebrar kan saindang taonan na mga kapiestahan.
An Salmo 135 asin 136 ilinaladawan si Jehova bilang Paraotob kan ano man na nasosonoan nia, na kabaliktaran na marhay kan daing maginibong mga idolo. An ika-136 na Salmo kinomponer para sa simbagan na pag-awit, na an huring kabtang kan kada bersikulo inaawit bilang simbag sa enot. An sunod na salmo nagsasaysay manongod sa makamomondong kamugtakan kan mga Judio sa Babilonya na gustong sumamba ki Jehova sa Sion. Ki David an Salmo 138 sagkod 145. Gusto niang ‘omawon si Jehova sa bilog niang puso.’ Taano? “Huli ta sa makangingirhat na paagi makangangalas an pagkagibo sa sako,” an sabi nia. (Salmo 138:1; 139:14) Sa sunod na limang salmo, si David namibi na logod proteksionan sia sa maraot na mga tawo, na tawan nin matanos na mga pagsagwe, na iligtas sa mga nagpepersegir, asin na giyahan sa paggawe. Itinampok nia an kaogmahan kan banwaan ni Jehova. (Salmo 144:15) Pagkatapos repasohon an kadakulaan asin karahayan nin Dios, si David nagsabi: “An kaomawan ni Jehova itataram kan sakong ngoso; asin an gabos na laman mag-omaw logod sa saiyang banal na ngaran sa panahon na daing talaan, sagkod lamang pa ngani.”—Salmo 145:21.
Mga Hapot sa Kasuratan na Sinimbag:
122:3—Paanong an Jerusalem sarong siudad na “pinag-iriba sa pagkasararo”? Arog kan sa parateng kamugtakan kan mga siudad kan suanoy na mga panahon, an mga harong sa Jerusalem itinogdok na magkahararani. Taraedtaed an mga harong sa siudad asin kun siring pasil na idepensa. Dugang pa, an pagkahararani kan mga harong nagpagin posible na an mga nag-iistar sa siudad magsinarigan para sa tabang asin proteksion. Ipinaparisa kaini an espirituwal na pagkasararo kan 12 tribo kan Israel kun sinda nagtitiripon sa pagsamba.
123:2—Ano an boot sabihon kan ilustrasyon manongod sa mata kan mga lingkod? An mga lingkod asin surugoon na babae nakaheling sa kamot kan saindang kagurangnan o babaeng kinakagurangnan sa duwang dahelan: tanganing aramon an saiyang mga mawot asin mag-ako nin proteksion patin mga pangangaipo sa buhay. Siring man, kita nakaheling ki Jehova tanganing mabatid an saiyang kabotan asin makua an saiyang pabor.
131:1-3—Paano ‘pinakalma asin pinatoninong ni David an saiyang kalag siring sa omboy na binutas sa suso kan saiyang ina’? Kun paanong an sarong aki na binutas sa suso nakakanood na makanompong nin karangahan asin satispaksion sa mga takyag kan saiyang ina, si David nakanood na pakalmahon asin patoninongon an saiyang kalag “siring sa omboy na binutas sa suso kan saiyang ina.” Paano? Paagi sa dai pagkaigwa nin maabhaw na puso asin mapaabaw-abaw na mga mata asin paagi sa dai paghanap nin mga bagay na dakulaon para sa saiya. Imbes na maghingoang magin prominente, parateng rinerekonoser ni David an saiyang mga limitasyon asin nagpapaheling sia nin kapakumbabaan. Madonong na arogon niato an saiyang aktitud, partikularmente kun naghihingoa kitang magkapribilehio sa kongregasyon.
Mga Leksion Para sa Sato:
120:1, 2, 6, 7. An mapagbalobagi asin malanit na mga tataramon puedeng magbunga nin dai kayang tioson na kapurisawan sa iba. An pagkontrol sa satong dila sarong paagi na ikakapaheling niato na kita ‘naninindogan para sa katoninongan.’
120:3, 4. Kun kaipuhan niatong tioson an saro na may “madayang dila,” mararanga kita sa pakaaram na huhusayon ni Jehova an mga bagay-bagay sa saiyang itinalaan na panahon. An mga parapakaraot mapapahamak sa kamot nin “sarong makosog na lalaki.” Siertong mapapasainda an malaad na paghokom ni Jehova na isinisimbolisar kan “naglalaad na mga baga kan mga poon nin retama.”
127:1, 2. Sa gabos niatong paghihingoa, maninigong umasa kita ki Jehova para sa paggiya.
133:1-3. An pagkasararo kan banwaan ni Jehova nakakapakalma, nakakarahay, asin nakakarepresko. Maninigo na dai niato pagraoton iyan paagi sa pananatsar, pakikiiwal, o pagreklamo.
137:1, 5, 6. An desterradong mga parasamba ki Jehova dayupot sa Sion, na nagrerepresentar sa organisasyon nin Dios. Kumusta man kita? Kita daw maimbod nang nakaasosyar sa organisasyon na ginagamit ni Jehova ngonyan?
138:2. ‘Ibinabantog ni Jehova an kadakulaan kan saiyang tataramon nin orog pa kisa saiyang ngaran’ sa dahelan na an kaotoban kan gabos na ipinanuga nia sa ngaran nia malalabihan nanggad an ano man na tibaad inaasahan niato. Totoo nanggad na marahayon na ngapit an tinatanaw niato.
139:1-6, 15, 16. Aram ni Jehova an satong mga aktibidad, an satong mga iniisip, asin an satong mga tataramon dawa bago pa niato itaram iyan. Midbid nia kita poon kan maporma an embrion, bago magin klaro an kada kabtang kan hawak. An aram nin Dios manongod sa sato bilang mga indibiduwal “makangangalas na marhay” na saboton. Nakakaranga nanggad na maaraman na bako sanang naheheling ni Jehova an mapagbalong situwasyon na tibaad inaatubang niato kundi nasasabotan man nia an epekto kaiyan sa sato!
139:7-12. Mayo nin lugar na puedeng dumanan niato na harayong marhay tanganing mapakosog kita nin Dios.
139:17, 18. Kawiliwili na daw sa sato an kaaraman dapit ki Jehova? (Talinhaga 2:10) Kun iyo, nanompongan na niato an dai nauubosan na burabod nin dakulang kaogmahan. An mga kaisipan ni Jehova ‘labi pa kadakol kisa sa baybay.’ Pirme kitang may manonodan pa manongod sa saiya.
139:23, 24. Maninigong booton niato na ipasiyasat ki Jehova an satong personang nasa laog tanganing maheling kun igwang “nakakaraot na dalan”—salang mga kaisipan, kamawotan, asin inklinasyon—asin tabangan kita na haleon iyan.
143:4-7. Paano niato matatagalan dawa an grabeng mga kasakitan? Itinao sa sato kan salmista an pinakaliabe: Horophoropon an aktibidad ni Jehova, papagdanayon an satong sadiri na interesado sa mga gibo nia, asin mamibi sa saiya para sa tabang.
“Omawa Nindo si Jah!”
An kada saro kan enot na apat na koleksion nin mga salmo nagtatapos paagi sa ekspresyon nin pag-omaw ki Jehova. (Salmo 41:13; 72:19, 20; 89:52; 106:48) Arog man kaiyan an huring koleksion. An Salmo 150:6 nagsasabi: “An lambang bagay na naghahangos—mag-omaw iyan ki Jah. Omawa nindo si Jah!” Iyan magigin katunayan nanggad sa bagong kinaban nin Dios.
Mantang inaantisipar niato an magayagayang panahon na iyan, igwa kita nin bastanteng dahelan na pamurawayon an tunay na Dios asin omawon an saiyang ngaran. Kun naiisip niato an kaogmahan na naeeksperyensiahan niato huli ta midbid niato si Jehova asin igwa kita nin marahay na relasyon sa saiya, bako daw na napapahiro kita na omawon sia na may mapagpasalamat na puso?
[Ritrato sa pahina 15]
An makangangalas na mga gibo ni Jehova nakakapukaw nin may pagkangirhat na paggalang
[Ritrato sa pahina 16]
An mga kaisipan ni Jehova ‘labi pa kadakol kisa sa baybay’