“Kanigoan an Sakong Pagkamoot sa Saimong Ley!”

AN SALMO 119 sarong awit manongod sa mga saboot kan kompositor kaiyan sa ipinasabong na mensahe, o tataramon, nin Dios. An salmista nag-awit: “Sa sakuyang puso rinimpos ko an saimong kasabihan.” “Magpapaheling ako nin pagkagusto sa saimong mga reglamento.” “An sakong kalag lupaypay sa paghidaw sa saimong hudisyal na mga desisyon sa gabos na panahon.” “An saimong mga pagirumdom iyo an sakong nawiwilihan.” “Nagmawot ako kan saimong mga kapagbotan.” “Magpapaheling ako nin pagkagusto sa saimong mga togon na namotan ko.” “Aatoman ko an saimong mga reglamento.” “Kanigoan an sakong pagkamoot sa saimong ley! Sa bilog na aldaw iyan an sakong inaatoman.”—Salmo 119:11, 16, 20, 24, 40, 47, 48, 97.

Kanigoan nanggad na odok sa pusong pag-apresyar an namatean kan salmista sa ihinayag na tataramon nin Dios! Arog daw kaini an saindong namamatean manongod sa mensahe kan Tataramon nin Dios, an Biblia? Mawot daw nindong pataluboon an siring na pagkagusto dian? Kun iyo, kaipuhan nguna nindong pataluboon an ugale nin regular na pagbasa sa Biblia, na aroaldaw kun posible. Si Jesu-Cristo nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mateo 4:4) Ikaduwa, maninigo nindong horophoropon an saindong binabasa. An paghorophorop sa katotoohan manongod sa Dios, sa saiyang mga kualidad, sa saiyang kabotan, asin sa saiyang katuyohan magpapatalubo kan saindong pag-apresyar sa Biblia. (Salmo 143:5) Asin pinakamahalaga, iaplikar an madonong na sadol kaiyan sa aroaldaw na pamumuhay.—Lucas 11:28; Juan 13:17.

Paano kamo makikinabang sa pagkultibar nin pagkagusto sa sinasabi kan Biblia? ‘Maogma an mga nag-ootob sa mga pagirumdom nin Dios,’ an sabi kan Salmo 119:2. An mga pagirumdom na manonompongan sa Biblia matabang sa saindo na maatubang nin mapanggana an mga problema sa buhay. (Salmo 1:1-3) Kamo makakakua nin kadonongan, pakarorop, asin pakasabot, na matabang sa saindo na ‘pogolan an saindong mga bitis sa gabos na maraot na dana.’ (Salmo 119:98-101) An pakaaram kan katotoohan manongod sa Dios asin sa saiyang katuyohan para sa daga magpapangyari sa saindong buhay na magin orog na makahulogan asin magin maliwanag an saindong paglaom para sa ngapit.—Isaias 45:18; Juan 17:3; Kapahayagan 21:3, 4.

An mga Saksi ni Jehova interesadong marhay na tabangan an iba na orog na masabotan an Biblia asin mapatalubo an pagkamoot sa mensahe kaiyan. Odok sa puso niamo kamong iniimbitaran na maghimate sa minasunod na alok.