Mga Hapot Hale sa mga Parabasa

Ano an paninimbagan kan kongregasyon kun an sarong Kristianong nagmamaneho nin auto nagkaigwa nin aksidente na nagbunga nin pagkagadan nin iba?

Maninigong estudyaran kun baga may pagkakasala sa dugo huling kaipuhan na malikayan kan kongregasyon na magin kadamay sa paninimbagan sa pagigin may kasalan sa dugo. (Deuteronomio 21:1-9; 22:8) An drayber na responsable sa sarong aksidente na may nagadan tibaad igwa nin kasalan sa dugo kun sia nagin daing ingat o tuyong linapas an saro sa mga ley kan gobyerno na pan-olang sa aksidente o na may labot sa trapiko. (Marcos 12:14) Alagad may iba pang bagay na kaipuhan na estudyaran.

Kaipuhan na bistahon an sarong nakagadan nin tawo na nagdulag pasiring sa saro sa mga siudad na pailihan sa Israel. Kun an paggadan mapatunayan na dai tinutuyo, sia totogotan na magdanay sa siudad, na ligtas sa parabalos kan dugo. (Bilang 35:6-25) Kaya kun an sarong Kristiano responsable sa pagkagadan nin saro huli sa aksidente, an kamagurangan maninigong mag-imbestigar sa mga bagay-bagay tanganing madeterminaran kun baga may pagkakasala sa dugo. An punto de vista kan gobyerno o an desisyon nin korte bakong iyo an kompletamenteng magdedeterminar kun anong aksion an gigibohon kan kongregasyon.

Halimbawa, tibaad ideklarar kan korte na an drayber nagkasala nin sarong teknikal na pagbalga sa ley, alagad an nag-iimbestigar na kamagurangan tibaad magdesisyon na an drayber mayong kasalan sa dugo huling sia daing gayo o mayo nin kontrol sa mga kamugtakan na nagresulta sa pakagadan. Minsan siring, dawa kun iabsuelto kan korte an kaso, an kamagurangan tibaad magkonklusyon na sia talagang may kasalan sa dugo.

An desisyon kan kamagurangan na nag-iimbestigar kan kaso maninigong basado sa Kasuratan asin sa malinaw na probadong mga impormasyon—pag-ako nin sala kan drayber asin/o patotoo nin duwa o tolong masasarigan na nakaheling mismo. (Deuteronomio 17:6; Mateo 18:15, 16) Kun mapatunayan an pagigin may kasalan sa dugo, sarong hudisyal na komite an maninigong bilogon. Kun mapatunayan kan komite na an tawong nagkasala sa dugo nagsosolsol, sia tatawan nin angay na pagsagwe gikan sa Kasuratan asin nin restriksion kun manongod sa mga pribilehio sa kongregasyon. Dai na sia maglilingkod bilang sarong magurang o ministeryal na lingkod sa kongregasyon. Matao man nin iba pang mga restriksion. Asin maninimbag sia sa Dios huli sa saiyang kadaihan nin pag-iingat, pagpabaya, o kakulangan nin pagmamaan na nagresulta sa aksidente asin pakagadan.—Galacia 6:5, 7.

Sa pag-ilustrar: Kun maraot an kamugtakan nin panahon kan mangyari an aksidente, an drayber maninigo kutanang orog na nagmaan. Kun sia natutungka, sia kutana nagpondo asin nagpahingalo sagkod na mawara an saiyang tungka, o nagpasalida kutana sia sa pagmaneho.

Ipamugtak na kaskason an pagpadalagan kan drayber. Kun an siisay man na Kristiano lumampas sa itinalaan na rikas, ini dai pagtao ki ‘Cesar kan mga bagay na ki Cesar.’ Nagpapaheling man iyan nin dai paggalang sa pagigin sagrado nin buhay, huling yaon an posibilidad na may magadan. (Mateo 22:21) Mapadapit digdi, estudyaran pa an sarong bagay. Anong klaseng halimbawa an ipapaheling sa aripompon nin sarong magurang sa kongregasyon kun sia dai nagin mapagmaan sa mga regulasyon sa trapiko nin gobyerno o tuyong dai kinuyog an mga iyan?—1 Pedro 5:3.

An mga Kristiano dai maninigong hagadon sa iba na umabot sa sarong lugar sa oras na malinaw na magigin imposible kun dai sinda malampas sa itinalaan na rikas sa pagmaneho. Minsan siring, sa kadaklan na kaso, iyan nangangahulogan nin pagpoon nin mas amay o nin pagbabago nin iskedyul nin saro tanganing magkaigwa nin supisyenteng panahon sa pagbiahe. Kun iyan ginigibo, an sarong Kristiano dai matetentaran na magmaneho nin mas marikas kisa sa maninigo, kundi mahihimo niang sumunod sa mga ley sa trapiko kan “superyor na mga autoridad” kan gobyerno. (Roma 13:1, 5) Ini makakatabang sa nagmamaneho na malikayan an nakakagadan na mga aksidente na may posibilidad na magkasala sa dugo. Iyan magpapangyari man sa saiya na magpaheling nin tamang halimbawa asin mapagdanay an marahay na konsensia.—1 Pedro 3:16.