Maglaom Kamo ki Jehova, Asin Magin Makosog an Boot

“Maglaom ka ki Jehova; magin makosog an boot mo asin pakosoga an saimong puso. Iyo, maglaom ka ki Jehova.”—SALMO 27:14.

1. Gurano kahalaga an paglaom, asin paano ginagamit sa Kasuratan an terminong iyan?

AN TUNAY na paglaom garo liwanag. Tinatabangan kita kaiyan na maheling bako sana an mga pagbalo sa presente asin tinatabangan kita kaiyan na atubangon an ngapit na may kosog nin boot asin kagayagayahan. Si Jehova sana an makakatao sa sato nin seguradong paglaom, na ginigibo nia paagi sa saiyang ipinasabong na Tataramon. (2 Timoteo 3:16) Sa katunayan, an mga terminong “paglaom,” “naglaom,” asin “naglalaom” minalataw nin labing 160 beses sa Biblia asin nanonongod sa galaga sagkod seguradong paghalat sa marahay asin sa bagay na hinahalat. * An siring na paglaom nakakalabi sa basta sana mawot, na tibaad mayo nin pundasyon o posibilidad na maotob.

2. Ano an kabtang kan paglaom sa buhay ni Jesus?

² Kan mapaatubang sa mga pagbalo asin kasakitan, si Jesus nagheling bako sanang sa presente asin naglaom ki Jehova. “Huli kan kagayagayahan na ibinugtak sa atubangan nia tinagalan nia an hariging pasakitan, na hinamak an kasupganan, asin nagtukaw sa too kan trono nin Dios.” (Hebreo 12:2) Huling nagkonsentrar sia nin biyo sa oportunidad na pagbindikar kan soberaniya ni Jehova asin pagsantipikar kan Saiyang ngaran, dai noarin man hinale ni Jesus an saiyang kaimbodan sa Dios, ano man an hagadon kaini sa saiya.

3. Ano an kabtang kan paglaom sa buhay kan mga lingkod nin Dios?

³ Sinambit ni Hadeng David an koneksion kan paglaom asin kosog nin boot, na nagsasabi: “Maglaom ka ki Jehova; magin makosog an boot mo asin pakosoga an saimong puso. Iyo, maglaom ka ki Jehova.” (Salmo 27:14) Kun gusto niatong magin makosog an satong puso, dapat na dai niato noarin man togotan na magin malibog an satong paglaom kundi papagdanayon iyan na malinaw sa isip asin harani sa puso. An paggibo kaiyan matabang sa sato na arogon si Jesus sa pagpaheling nia nin kosog nin boot asin kaigotan mantang nakikikabtang kita sa gibohon na isinugo nia sa saiyang mga disipulo. (Mateo 24:14; 28:19, 20) Tunay nanggad, an paglaom nasasambitan kaiba kan pagtubod asin pagkamoot bilang mahalagang marhay asin nagdadanay  na kualidad na nagpapamidbid sa buhay kan mga lingkod nin Dios.—1 Corinto 13:13.

Kamo daw “Abunda sa Paglaom”?

4. Sa ano galagang nag-aantisipar an linahidan na mga Kristiano asin an “ibang karnero” na kaibaiba ninda?

⁴ An banwaan nin Dios may makangangalas na ngapit. An linahidan na mga Kristiano galagang naghahalat na maglingkod kaiba ni Cristo sa langit, mantang an “ibang karnero” naglalaom na “papatalingkason sa pagkaoripon sa kalapaan asin magkakaigwa kan mamuraway na katalingkasan kan [daganon na] mga aki nin Dios.” (Juan 10:16; Roma 8:19-21; Filipos 3:20) Kaiba sa “mamuraway na katalingkasan” na iyan an pagkakalda sa kasalan asin sa makatatakot na mga resulta kaiyan. Tunay nanggad, si Jehova—an Paratao kan “lambang marahay na balaog asin lambang sangkap na regalo”—matao kan pinakamarahay na balaog sa saiyang mga maimbod.—Santiago 1:17; Isaias 25:8.

5. Paano kita magigin “abunda sa paglaom”?

⁵ Gurano kadakula an maninigong kabtang kan Kristianong paglaom sa satong buhay? Sa Roma 15:13, mababasa niato: “Panoon logod kamo kan Dios na nagtatao nin paglaom nin bilog na kagayagayahan asin katoninongan huli sa saindong pagtubod, tanganing kamo magin abunda sa paglaom paagi sa kapangyarihan kan banal na espiritu.” Iyo, an paglaom puedeng iagid, bakong sa sarong kandila sa kadikloman, kundi sa masulang mga sinag kan saldang kun aga, na pinapano nin katoninongan, kaogmahan, katuyohan, asin kosog nin boot an buhay nin saro. Mangnohon na kita “abunda sa paglaom” kun kita nagtutubod sa nasusurat na Tataramon nin Dios asin nag-aako kan saiyang banal na espiritu. An Roma 15:4 nagsasabi: “An gabos na bagay na isinurat kaidto isinurat sa pagtokdo sa sato, tanganing paagi sa satong pakatagal asin sa karangahan hale sa Kasuratan magkaigwa kita nin paglaom.” Kaya hapoton nindo an saindong sadiri: ‘Pinapagdadanay ko daw na maliwanag an sakong paglaom paagi sa pagigin marahay na estudyante sa Biblia, na binabasa iyan aroaldaw? Parate daw akong namimibi para sa banal na espiritu nin Dios?’—Lucas 11:13.

6. Tanganing papagdanayon na maliwanag an satong paglaom, ano an dapat niatong maanan?

⁶ Si Jesus, an satong Arogan, nagkua nin kosog sa Tataramon nin Dios. Paagi sa maingat na paghorophorop dapit sa saiya, malilikayan niato na ‘mapagal asin manluya an satong kalag.’ (Hebreo 12:3) Lohiko sana na kun magrumarom sa satong isip asin puso an paglaom na tao nin Dios o kun an satong konsentrasyon bumalyo sa ibang bagay—tibaad sa materyal na mga bagay o sa sekular na mga pasohan—dai mahahaloy tibaad madaog kita kan espirituwal na kapagalan, na sa kahurihurihi magbubunga nin pagkawara nin moral na kosog asin kosog nin boot. Sa siring kaiyan na kamugtakan nin isip, tibaad makaeksperyensia pa ngani kita nin “pagkabagbag may labot sa [satong] pagtubod.” (1 Timoteo 1:19) Sa ibong na lado, an tunay na paglaom nagpapakosog sa satong pagtubod.

Paglaom—Pundamental na Kabtang nin Pagtubod

7. Sa anong paagi na an paglaom pundamental na kabtang nin pagtubod?

⁷ “An pagtubod iyo an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling,” an sabi kan Biblia. (Hebreo 11:1) Kun siring, an paglaom bako sanang konektado sa pagtubod; iyan pundamental na kabtang nin pagtubod. Estudyare si Abraham. Sa punto de vista nin tawo, sia asin an saiyang agom, si Sara, lihis na sa edad nin pangangaki kan si Jehova manuga sa sainda nin sarong paramana. (Genesis 17:15-17) Ano an nagin reaksion ni Abraham? “Minsan ngani dai nang paglaom, pero basado sa paglaom sia nagtubod, tangani na sia magin ama nin dakol na nasyon.” (Roma 4:18) Iyo, an tao nin Dios na paglaom ki Abraham nagtao nin marigon na pundasyon sa saiyang pagtubod na sia magkakaigwa nin aki. Dangan an saiyang pagtubod nagtao nin liwanag asin nagpakosog sa saiyang paglaom. Tara, si Abraham asin Sara nagkaigwa pa ngani kan kosog nin boot na bayaan an saindang harong saka mga paryente asin mag-istar sa mga tolda sa ibang daga sa natatada nindang buhay!

8. Paano pinapasarig kan maimbod na pakatagal an paglaom?

⁸ Pinapagdanay ni Abraham na segurado an saiyang paglaom paagi sa lubos na pagkuyog ki Jehova, dawa pa depisil an paggibo kaiyan. (Genesis 22:2, 12) Kaagid kaiyan, paagi sa pagigin makinuyog asin pagtagal niato sa paglilingkod ki Jehova, makakakompiar kita sa satong balos. An “pakatagal,” an isinurat ni Pablo, nagbubunga “nin pagkainooyonan,” na nagbubunga nin paglaom, “asin an paglaom dai nagbubunga nin pagkadesganar.” (Roma 5:4, 5) Iyan an dahelan kun taano ta isinurat man ni Pablo: “Minamawot niamo na an lambang saro sa saindo  magpaheling kan kaparehong kahigosan tanganing magkaigwa kan lubos na kasiertohan kan paglaom sagkod sa katapusan.” (Hebreo 6:11) An siring na positibong punto de vista, na basado sa dayupot na relasyon ki Jehova, makakatabang sa sato na atubangon an ano man na kasakitan na may kosog nin boot, na may kagayagayahan pa ngani.

“Maggayagaya Kamo sa Paglaom”

9. Makakatabang sa sato na ‘maggayagaya sa paglaom’ an regular na paggibo nin ano?

⁹ An satong tao nin Dios na paglaom nakakalabi nanggad kisa ano pa man na ikakatao kan kinaban. An Salmo 37:34 nagsasabi: “Maglaom ki Jehova asin otobon an saiyang dalan, asin ika ilalangkaw nia na makasadiri kan daga. Kun pohoon na an mga maraot, maheheling mo iyan.” Iyo, yaon sa sato an gabos na dahelan na ‘maggayagaya sa paglaom.’ (Roma 12:12) Minsan siring, tanganing magibo iyan, dapat na dayaday niatong isipon an manongod sa satong paglaom. Regular daw nindong hinohorophorop an saindong tao nin Dios na paglaom? Naiimahinar daw nindo an saindong sadiri sa Paraiso, na buhay na buhay huli sa marahay na salud, na mayo nin mga kahaditan, kaiba kan mga tawong namomotan nindo, asin igwa nin tunay nanggad na nakakakontentong gibohon? Hinohorophorop daw nindo an mga eksena nin Paraiso na ilinaladawan sa satong mga publikasyon? An siring na regular na paghorophorop puedeng iagid sa paglinig nin sarong bintana na nagtatao sa saindo nin kahangahangang tanawon. Kun dai niato lilinigan an salming, dai mahaloy dai na niato mamamaanan an malinaw asin nakakaakit na tanawon huli sa ati. Tibaad an ibang bagay na an makakua kan satong atension. Dai man logod niato noarin man togotan na mangyari iyan!

10. Taano an pagtanaw niato sa balos ta marahay an ipinapaheling manongod sa satong relasyon ki Jehova?

¹⁰ Siempre, an pangenot na dahelan niato sa paglilingkod ki Jehova iyo an satong pagkamoot sa saiya. (Marcos 12:30) Pero, maninigo na galaga niatong tanawon an balos. Sa katunayan, linalaoman ni Jehova na gigibohon niato iyan! An Hebreo 11:6 nagsasabi: “Kun dai nin pagtubod imposible na sia mapanigoan na gayo, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” Taano ta gusto ni Jehova na mansayon niato sia bilang an Parabalos? Huli ta kun ginigibo niato iyan, ipinapaheling niato na midbid tang marhay an satong langitnon na Ama. Buka an palad nia asin namomotan nia an saiyang mga aki. Isip-isipon kun gurano kita kabakong maogma asin kamadaling madesganar kun mayo kita “nin ngapit asin paglaom.”—Jeremias 29:11.

11. Paano nakatabang ki Moises an saiyang tao nin Dios na paglaom tanganing makagibo nin madonong na mga desisyon?

¹¹ An pambihirang halimbawa nin saro na nagdanay na nakapokus sa saiyang tao nin Dios na paglaom iyo si Moises. Bilang “aki kan aking babae ni Faraon,” si Moises may poder, prestihio, asin nasa kamot nia an kayamanan kan Egipto. Ini daw an susundon ni Moises, o paglilingkodan nia si Jehova? Makosog an boot na pinili ni Moises an huri. Taano? Huli ta sia ‘tuminuruhok na gayo sa pagtao kan balos.’ (Hebreo 11:24-26) Iyo, si Moises bako nanggad  indiperente manongod sa paglaom na ibinugtak ni Jehova sa atubangan nia.

12. Taano an Kristianong paglaom ta siring sa sarong takop sa payo?

¹² An paglaom ikinomparar ni apostol Pablo sa takop sa payo. An satong piguratibong takop sa payo pinoprotehiran an satong mga pag-isip, na nagpapangyari na kita makagibo nin madonong na mga desisyon, magbugtak nin tamang mga prioridad, asin magdanay na may integridad. (1 Tesalonica 5:8) Igwa daw kamo kan piguratibong takop sa payo sa gabos na panahon? Kun siring, arog ni Moises asin Pablo, ibubugtak nindo an saindong paglaom, “bakong sa kayamanan na bakong segurado, kundi sa Dios, na mayaman na nagtatao sa sato kan gabos na bagay para sa satong pagkaogma.” Totoo, kaipuhan an kosog nin boot tanganing labanan an popular na tendensia paagi sa pagsayuma nindo sa maimot na mga pinag-aaabot, alagad bawi nanggad an mga paghihingoa! An totoo, taano ta makokontento na kamo sa ano man na hababa an klase kisa “tunay na buhay,” na naghahalat sa mga naglalaom asin namomoot ki Jehova?—1 Timoteo 6:17, 19.

“Sa Ano Man na Paagi Dai Taka Babayaan”

13. Anong pag-asegurar an itinatao ni Jehova sa saiyang maimbod na mga lingkod?

¹³ An mga tawong nagbubugtak kan saindang paglaom sa presenteng sistema nin mga bagay dapat na seryosong pakaisipon na may agam-agam an manongod sa ngapit mantang an kinaban paorog nang paorog na nag-aagi nin “mga kolog nin kasakitan.” (Mateo 24:8) Alagad an mga naglalaom ki Jehova mayo nin siring na pagkatakot. Sinda padagos na “mag-eerok na may katiwasayan asin dai mariribok nin takot sa kalamidad.” (Talinhaga 1:33) Huling an saindang paglaom bakong sa presenteng sistema, magayagaya sindang naghihimate sa konseho ni Pablo: “An saindo logod na pamumuhay dai apektado nin pagkamoot sa kuarta, mantang kamo naninigoan na sa presenteng mga bagay. Huli ta sia nagsabi: ‘Sa ano man na paagi dai taka babayaan ni sa ano man na paagi papabayaan taka.’”—Hebreo 13:5.

14. Taano ta dai kaipuhan na mahadit nin labi-labi an mga Kristiano manongod sa saindang materyal na mga pangangaipo?

¹⁴ “Sa ano man na paagi,” “ni sa ano man na paagi”—an may pagdodoon na mga pananaram na ini malinaw na nagpapaheling na papangatamanan kita nin Dios. Inaasegurar man kita ni Jesus sa mamomoton na pagmakolog nin Dios, na nagsasabi: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay [an materyal na mga pangangaipo sa buhay] idadagdag na sana sa saindo. Kaya, dai kamo noarin man maghadit manongod sa masunod na aldaw, huli ta an masunod na aldaw magkakaigwa kan sadiring mga kahaditan kaiyan.” (Mateo 6:33, 34) Aram ni Jehova na masakit para sa sato na magin maigot para sa saiyang Kahadean asin kadungan kaiyan lubos na isaabaga an paninimbagan na sustentohan an satong pisikal na mga pangangaipo. Kaya ibugtak niato an bilog na kompiansa niato sa saiyang kakayahan asin pagmawot na asikasohon an satong mga pangangaipo.—Mateo 6:25-32; 11:28-30.

15. Paano pinapagdadanay kan mga Kristiano an ‘simpleng mata’?

¹⁵ Ipinapaheling niato an satong pagsarig ki Jehova kun pinapagdadanay niato an ‘simpleng mata.’ (Mateo 6:22, 23) An simpleng mata sinsero, dalisay an motibo, asin mayo nin kahanaban asin maimot na ambisyon. An pagkaigwa nin simpleng mata dai nangangahulogan nin pamumuhay sa kaherakherak na kadukhaan o pagigin pabaya sa pag-asikaso sa satong Kristianong mga paninimbagan. Imbes, iyan nangangahulogan nin pagpaheling nin “toltol na isip” mantang padagos niatong ineenot an paglilingkod ki Jehova.—2 Timoteo 1:7.

16. Taano ta kaipuhan an pagtubod asin kosog nin boot tanganing papagdanayon an simpleng mata?

¹⁶ An pagpapadanay nin simpleng mata nangangaipo nin pagtubod asin kosog nin boot. Halimbawa, kun iinsistir nin sarong among na regular kamong magtrabaho sa oras na nakaiskedyul para sa Kristianong mga pagtiripon, kamo daw may kosog nin boot na magdadanay sa saindong espirituwal na mga prioridad? Kun an saro nagdududa na ootobon ni Jehova an Saiyang panuga na pangangatamanan nia an Saiyang mga lingkod, kun siring kaipuhan sana ni Satanas na paorogon an sakit asin an siring na indibiduwal tibaad biyo nang umontok sa pag-atender sa mga pagtiripon. Iyo, an kadaihan niato nin pagtubod puedeng magtogot ki Satanas na kontrolon kita tangani na sia, bakong si Jehova, an magbugtak kan satong mga prioridad. Makamomondo nanggad iyan!—2 Corinto 13:5.

“Maglaom Kamo Ki Jehova”

17. Paanong an mga nagtitiwala ki Jehova binebendisyonan dawa ngonyan?

¹⁷ Paorootrong ipinapaheling kan Kasuratan na an mga naglalaom asin nagtitiwala ki Jehova dai noarin man masusudya. (Talinhaga 3:5, 6;  Jeremias 17:7) Totoo, kun beses tibaad kaipuhan nindang manigoan sa dikit, alagad ibinibilang ninda ining sadit na sakripisyo kun ikokomparar sa mga bendisyon na nakatagama para sa sainda. Sa siring, ipinapaheling ninda na sinda ‘naglalaom ki Jehova’ asin may kompiansa na sa katapustapusi itatao nia sa mga maimbod sa saiya an gabos na matanos na mawot kan saindang puso. (Salmo 37:4, 34) Huli kaini, sinda talagang maogma dawa ngonyan. “An linalaoman kan mga matanos paggayagaya, alagad an mismong paglaom kan mga maraot mapapara.”—Talinhaga 10:28.

18, 19. (a) Anong mamomoton na pag-asegurar an itinatao sa sato ni Jehova? (b) Paano niato pinapagdadanay na nasa satong “too” si Jehova?

¹⁸ Kun an sarong sadit na aki naglalakaw na kapot an kamot kan saiyang ama, namamatean nia na sia ligtas asin tiwasay. Totoo man iyan sa sato mantang kita naglalakaw sa kaibahan kan satong langitnon na Ama. “Dai ka matakot,” an sabi ni Jehova sa Israel, “huli ta ako nasa saimo. . . . Tatabangan taka nanggad. . . . Huli ta ako, si Jehova na saimong Dios, nagkakapot sa saimong toong kamot, an Saro na nagsasabi sa saimo, ‘Dai ka matakot. Ako mismo an matabang sa saimo.’”—Isaias 41:10, 13.

¹⁹ Kanigoan kamamomoton na ladawan an ipinapaheling kaiyan—kapot-kapot ni Jehova an kamot nin saro! “Danay kong ibinubugtak si Jehova sa atubangan ko,” an isinurat ni David. “Huli ta sia yaon sa sakong too, dai ako matatanyog.” (Salmo 16:8) Paano niato pinapagdadanay na nasa satong “too” si Jehova? Ginigibo niato iyan sa kisuerra duwang paagi. Enot, pinapabayaan niato na giyahan kita kan saiyang Tataramon sa gabos na aspekto nin buhay; asin ikaduwa, nakapokus kita sa mamuraway na premyo na ibinugtak ni Jehova sa atubangan niato. An salmistang si Asaf nag-awit: “Ako danay na nasa kaibanan mo; kinapotan mo an too kong kamot. Paagi kan saimong hatol gigiyahan mo ako, asin pagkatapos dadarahon mo pa ngani ako sa kamurawayan.” (Salmo 73:23, 24) Huli sa siring na pag-asegurar, talagang maaatubang niato an ngapit na may kompiansa.

“An Saindong Pagkaligtas Naghaharani Na”

20, 21. Anong ngapit an naghahalat sa mga naglalaom ki Jehova?

²⁰ Sa kada aldaw na minaagi, nagigin orog na apurado na papagdanayon niato na nasa satong too si Jehova. Sa dai na mahahaloy, na mapoon sa paglaglag sa falsong relihion, an kinaban ni Satanas makakaeksperyensia nin kahorasaan na dai pa kaiyan naeksperyensiahan kaidto. (Mateo 24:21) An daing pagtubod na katawohan papangibabawan nin takot. Pero, durante kan maribok na panahon na iyan, an makosog an boot na mga lingkod ni Jehova maggagayagaya sa saindang paglaom! “Kun an mga bagay na ini magpoon nang mangyari,” an sabi ni Jesus, “tindog kamo nin tanos asin tingagan an saindong mga payo, huli ta an saindong pagkaligtas naghaharani na.”—Lucas 21:28.

²¹ Kun siring, maggayagaya kita sa satong tao nin Dios na paglaom asin dai kita magpadaya o magpadara sa sugot kan tusong mga pandisturbo ni Satanas. Kadungan kaiyan, maigot niatong kultibaron an pagtubod, pagkamoot, asin diosnon na takot. Sa paggibo kaiyan, magkakaigwa kita kan kosog nin boot na kuyogon si Jehova sa gabos na kamugtakan asin na tumangon an Diablo. (Santiago 4:7, 8) Iyo, “magin makosog an boot nindo, asin magin logod marigon an saindong puso, kamo gabos na naghahalat ki Jehova.”—Salmo 31:24.

[Nota sa Ibaba]

Masisimbag daw Nindo?

• Sa anong paagi na an paglaom ni Jesus nakakontribwir sa saiyang kosog nin boot?

• Paano konektado an pagtubod asin paglaom?

• Paano an paglaom na may kaibang pagtubod nagtatao nin kosog nin boot sa sarong Kristiano na magbugtak nin tamang mga prioridad sa buhay?

• Taano an mga ‘naglalaom ki Jehova’ ta makakatanaw sa ngapit na may kompiansa?

[Mga Hapot Para sa Pag-adal]

[Ritrato sa pahina 28]

Baga man hoben o gurang, naiimahinar daw nindo an saindong sadiri sa Paraiso?