Pagnabegar sa Mahiwason na Kadagatan

AN Marshall Islands kompuesto nin labing 1,200 na darakula asin saradit na isla, na an kadaklan may langkaw na dai malabi sa 6 metros poon sa kapatagan kan dagat. An mga iyan nawawara tolos sa pagheling minsan ngani dai ka pa nakakarayo sa lawod. Pero, an suanoy na mga paradagat na Marshales nakayang magnabegar pabarobalyo sa saradit na isla gamit an saindang de-katig na mga bangka, na mapangganang naabot an mga tres-kuarto kan 2 milyones kilometro kuadrado kan Kadagatan nin Pasipiko. Paano ninda nagibo iyan? Sinda giniyahan paagi sa paggamit nin simple, pero epektibong marhay, na “mga mapa” na inaapod na mga tsart na bala.

Paagi sa eksperyensia, nanodan kan mga nabeganteng Marshales na an pagkaigwa nin daga nagbubunga nin nagkapirang porma nin alon na naghahayag kan namumugtakan nin sarong isla na sagkod sa 30 kilometros an rayo. Dakol na porma nin alon an kaipuhan na manodan, asin an mga tsart na bala nagserbing mga pantabang sa memorya. Ano an itsura kan mga tsart na bala? Siring kan maheheling nindo sa retrato, an mga bala na gibo sa mga bandala nin mga gamot nin pandan o sa mga gihoy nin dahon nin niyog pinagborogkos tanganing makaporma nin sarong pala-pala na nagrerepresentar sa mga porma nin alon. May saradit na bibi na itinakod dian tanganing magserbing tanda kan kanya-kanyang posisyon nin mga isla.

Sa laog nin dakol na taon, isinekreto an pagnabegar na gamit an tsart na bala, na ihinayag sana sa nagkapirang piling indibiduwal. Paano makakanood an sarong bagohan na nabegante na gamiton an tsart na bala? Solamente paagi sa pagsasanay asin praktis. An sarong eksperyensiadong nabegante tinotokdoan sa pribado an bagohan na paralayag, na tibaad iiniiba sia sa mga paglayag sa kaharaning mga isla. Mantang nanonodan kan bagohan na mamidbid an mga porma nin alon, sia nagigin kompiadong gamiton an saiyang tsart na bala. Pag-abot nin panahon, nakakaya na niang magnabegar nin solo sa kadagatan.

Sa kaagid na paagi, an Tataramon nin Dios, an Biblia, puedeng magserbing giya niato sa buhay. Sa primero, tibaad may magtabang sa sato na magkaigwa nin pundamental na pakasabot sa Kasuratan. Dangan, mantang kita nagpapadagos sa pag-adal kan Tataramon nin Dios asin iinaaplikar an mga prinsipyo kaiyan, kita nagkakaigwa nin pagsarig sa sinasabi kaiyan. Sinabihan si Josue, an lider kan mga Israelita, na padagos na basahon an Tataramon nin Dios tanganing sia “makapag-ingat na gibohon an segun sa gabos na nasusurat dian.” “Paagi kaiyan,” an sabi nin Dios ki Josue, “gigibohon mong mapanggana an saimong dalan asin paagi kaiyan mahiro ka na may kadonongan.” (Josue 1:8) Iyo, puedeng itokdo sa sato kan Biblia an sarong segurado asin mapangganang direksion nin buhay.

[Picture Credit Line sa pahina 32]

© Greg Vaughn