Estorya nin Buhay

Tinabangan Ako ni Jehova na Mapangganang Maatubang an mga Kadepisilan sa Buhay

ISINAYSAY NI DALE IRWIN

“IGO NA AN WALO! AN APAT MADOBLE KAN PAGABAT.” Iyan an mababasa sa pangenot na bareta sa sarong lokal na peryodiko na iinaanunsiar an dagdag na quadruplets sa samong pamilya na kompuesto nin apat na aking babae. Bilang sarong hoben, mayo ako nin intension na mag-agom, dai na baga sabihon pa an pagkaigwa nin mga aki. Pero, uya ako—ama nin walong aki!

NAMUNDAG ako kan 1934 sa banwaan nin Mareeba, Australia. Ako an kangudhan sa tolong aki. An samong pamilya sa huri nagbalyo sa Brisbane, na duman nagtokdo an sakong ina sa pan-Domingong eskuelahan sa iglesia nin Metodista.

Sa kapinonan nin 1938, ibinareta kan lokal na mga peryodiko na tibaad sayumahan na palaogon sa Australia si Joseph F. Rutherford na gikan sa opisina prinsipal kan Mga Saksi ni Jehova. “Taano ta ginigibo ninda ini sa saiya?” Hinapot ni Nanay an Saksi na nagdalaw sa samong harong pagkatapos niang mabasa an bareta. An Saksi nagsimbag: “Bakong sinabi ni Jesus na pepersegiron kan mga tawo an saiyang mga parasunod?” Dangan inako ni Nanay an pulyetong Cure, na nagsasabi kan dakol na pagkakalaen kan tunay asin falsong relihion. * Napahanga sa pulyeto, kaming magturugang iiniba ni Nanay sa sarong pagtiripon kan Mga Saksi ni Jehova kan suminunod na Domingo. Kan primero, kontrang marhay an sakong ama, alagad kun minsan naggigibo sia nin sarong lista nin mga hapot sa Biblia tanganing itao ni Nanay sa saro sa mga tugang. Dangan, isinusurat kan tugang an mga simbag na sono sa Kasuratan tanganing itao ni Nanay ki Tatay.

Sarong Domingo nag-iba an sakong ama sa pag-atender niamo sa pagtiripon, na may katuyohan na ipahayag an saiyang pagkadiskontento sa mga Saksi. Minsan siring, pagkatapos na makipag-olay sa  nagbibiaheng paraataman na nagsosongko sa kongregasyon kan panahon na idto, binago ni Tatay an saiyang aktitud asin nagtogot pa ngani na gamiton an samong harong bilang tiriponan para sa semanal na pag-adal sa Biblia, na inaatenderan nin interesadong mga tawo sa lugar niamo.

Kan Setyembre 1938, nabautismohan an sakong mga magurang. Nabautismohan kaming magturugang kan Disyembre 1941 sa sarong nasyonal na kombension na ginibo sa Hargreave Park sa Sydney, New South Wales. Siete anyos ako kaidto. Pagkatapos kaiyan, regular akong nakikikabtang sa ministeryo sa langtad kaiba an sakong mga magurang. Kan mga panahon na idto, an mga Saksi nagdadara sa harong-harong nin aroalsang mga ponograpo asin ipinapadangog sa mga kagharong an nakarekord na mga pahayag sa Biblia.

An sarong Saksi na dai ko malilingawan iyo si Bert Horton. Igwa sia nin auto na may makosog na amplifier asin dakulang speaker na nakakabit sa atop kaini. Nakakaogma an pakiibanan ki Bert, nangorogna para sa sarong solterito na arog ko. Halimbawa, mantang ibinobrodkast an sarong diskurso sa Biblia gikan sa itaas nin sarong bulod, parate kaming nakakatanaw nin kotse nin pulis na pasiring sa samo. Tolos-tolos na ginagadan ni Bert an saiyang rekording, mamaneho pasiring sa saro pang bulod na mga pirang kilometro an rayo, asin duman mapatanog nin iba naman na rekording. Dakol an nanodan ko manongod sa pagtitiwala ki Jehova asin pagkapusoan paagi ki Bert asin sa iba pang maimbod saka makosog an boot na mga tugang na arog nia.—Mateo 10:16.

Kan ako 12 anyos, regular akong nagpapatotoo nin solo pagkatapos kan klase. Sa sarong pangyayari, nakamidbid ko an sarong pamilya na an apelyido Adshead. Pag-abot nin panahon, nakanood kan katotoohan an mag-agom, an saindang walong aki, asin dakol na makoapo. Nagpapasalamat ako ki Jehova sa pagtogot sa sako, na sarong solterito pa sana, na iintrodusir an katotoohan sa Biblia sa marahayon na pamilyang ini.—Mateo 21:16.

Enot na mga Pribilehio nin Paglilingkod

Sa edad na 18, ako nagin bilog na panahon na ministrong payunir asin iinasignar sa Maitland, New South Wales. Kan 1956, inimbitaran ako na maglingkod sa sangang opisina kan Australia na nasa Sydney. Sa 20 miembro, mga un-tersio an linahidan, na may paglaom na mamahala kaiba ni Cristo sa saiyang langitnon na Kahadean. Kanigoan nanggad na pribilehio na makaibanan sinda!—Lucas 12:32; Kapahayagan 1:6; 5:10.

Nagbago an sakong desisyon na magdanay na daing agom kan mamidbid ko si Judy Helberg, sarong magayon na tugang na payunir na temporaryong naimbitaran sa sangang opisina tanganing magtabang sa sako sa sarong dakulang proyekto. Nagkaminootan kami ni Judy, asin ikinasal kami pakalihis nin duwang taon. Pakatapos kaiyan, pinonan niamo an gibohon sa sirkito, na kalabot an pagsongko sa sarong kongregasyon kan Mga Saksi ni Jehova kada semana tanganing parigonon an mga tugang.

Kan 1960, ipinangaki ni Judy an samong enot na aking babae, si Kim. Ngonyan, an pagkaigwa nin aki mangangahulogan nin pagbaya sa gibohon sa sirkito asin pagdanay sa sarong lugar. Alagad sa dakulang pagngalas niamo, inimbitaran kami na magpadagos sa gibohon sa sirkito. Pagkatapos nin dakol na pamibi, inako niamo an imbitasyon, asin sa suminunod na pitong bulan, kaiba niamo si Kim na nagbiahe nin 13,000 kilometros paagi sa bus, eroplano, asin tren mantang naglilingkod kami sa hararayong kongregasyon sa Queensland asin sa Amihanan na Teritoryo. Mayo kaming sadiring kotse kan panahon na idto.

Pirme kaming nagdadagos sa mga harong kan mga tugang. Huli sa tropikal na klima, an mga kuartong torogan kan mga panahon na idto sa parate may mga kurtina imbes na mga pinto, na nakadagdag  sa tension niamo kun si Kim naghihibi sa banggi. An responsabilidad nin pag-ataman sa aki asin sa samong asignasyon nagin depisilon pag-abot nin panahon. Kaya namirmehan kami sa Brisbane, asin nagpoon akong magtrabaho sa pagpinta nin mga karatula, sarong klase nin komersial na arte. Duwang taon pagkamundag ni Kim, kami nagkaaki nin saro pang babae, si Petina.

Pag-atubang sa Trahedya

Kan 1972, kan an mga aki 12 asin 10 anyos, nagadan si Judy sa Hodgkin’s disease, sarong klase nin lymphoma. An pagkawara nia haros dai makaya kan samong pamilya. Minsan siring, durante kan paghelang ni Judy asin kan pagkagadan nia, rinanga kami ni Jehova paagi sa saiyang Tataramon, banal na espiritu, asin kasararoan nin magturugang. Nag-ako man kami nin kosog gikan sa magasin na Torrengbantayan na samong naresibi pagkatapos tolos kan trahedya. Iyan may artikulong nagtotokar sa personal na mga pagbalo, kaiba na an pagkagadan nin namomotan, asin ipinaheling kaiyan kun paano an mga pagbalo makakatabang sa sato na kultibaron an diosnon na mga kualidad na siring kan pakatagal, pagtubod, asin integridad. *—Santiago 1:2-4.

Pagkagadan ni Judy, nagin mas orog na dayupot kami kan mga aki ko. Alagad inaadmitir ko na masakit an paghihingoa na otobon an kabtang bilang ama sagkod ina. Minsan siring, huli sa sakong duwang marahayon na aking babae, nagin mas pasil an kabtang kong iyan.

Pag-agom Liwat Asin Sarong Nagdakulang Pamilya

Pag-abot nin panahon, ako nag-agom liwat. Kami kan sakong bagong agom, si Mary, dakol an pagkakapareho. Nagadan man an saiyang agom sa Hodgkin’s disease. Igwa man sia nin duwang aking babae—si Colleen asin Jennifer. Si Petina mas nguhod nin mga tolong taon ki Colleen. Kaya an samong pamilya ngonyan kompuesto nin apat na aking babae, na may edad na 14, 12, 9, asin 7.

Nagdesisyon kami ni Mary na sa primero kanya-kanya kami sa pagdisiplina sa samong sadiring mga aki sagkod na an ibang aki magin komportable na sa pag-ako nin paggiya gikan sa padrasto o madrasta. Sa mismong relasyon niamo bilang mag-agom, igwa kami ni Mary nin duwang importanteng susundon. Enot, nungka niamong ipinapadangog sa mga aki an dai mi pagkakaoyon, asin ikaduwa, kaoyon sa prinsipyo sa Biblia na nakasurat sa Efeso 4:26, nag-oolay kami sagkod na maresolberan niamo an mga bagay-bagay—dawa mangaipo iyan nin dakol na oras!

An gabos makangangalas nanggad na nakaadaptar nin marhay sa buhay bilang sarong pamilya na may padrasto asin madrasta, alagad dai tolos nawara an paggirumdom sa mga nawara niamong mahal sa buhay. Halimbawa, an Lunes na banggi nagin “banggi para sa paghibi” ni Mary. Pagkatapos kan pampamilyang pag-adal niamo, kun an mga aki torog na, an pinupugolan na mga emosyon ni Mary sa parate ikinakaluwas.

Gusto ni Mary na magkaigwa nin sadiri ming aki. Makamomondo, nakuanan sia. Kan si Mary magbados giraray, sarong dakulang sorpresa an naghahalat sa samo. Ihinayag nin ultrasound na an ibinabados nia, bako sanang sarong aki, kundi apat! Namungnan ako na dai makapaniwala. Uya ako, 47 anyos asin dai na mahahaloy magigin ama nin walong aki! An quadruplets ipinangaki paagi sa operasyon kan Pebrero 14, 1982, na ibinados sa laog nin 32 na semana. Oyon sa pagkasunodsunod kan pagkamundag,  an mga aki iyo si Clint, 1.6 kilos; Cindy, 1.9 kilos; Jeremy, 1.4 kilos; asin Danette, 1.7 kilos. Mayong magkalalauogon sa sainda.

Pagkamundag tolos, nag-abot an doktor ni Mary asin nagtukaw sa kataed ko.

“Ano, nahahadit kamo manongod sa pag-ataman sa mga aki?” an hapot nia.

“Bueno,” an sabi ko, “dai ko pa noarin man naeksperyensiahan an arog kaining situwasyon.”

An saiyang suminunod na sinabi talagang ikinabigla ko asin nakaparigon sa boot ko.

“Dai kamo papabayaan kan kongregasyon nindo,” an sabi nia. “Kaipuhan sana nindo na magbahon, asin sangribong tisyu an iaalok sa saindo!”

Huli sa dakulang tabang kan marahayon na obstetrician na ini asin kan saiyang kaibang mga doktor, apat na medyo marahay an salud na omboy an nagpuli gikan sa ospital sa laog sana nin duwang bulan.

An Angat nin Pagpadakula nin Quadruplets

Tanganing mapagdanay na areglado an gabos, naggibo kami ni Mary nin 24 oras na iskedyul. An apat na matuang aking babae nakakatabang na marhay bilang mga paraaling nin aki. Asin napatunayan na totoo an sinabi kan doktor—sarong “bahon” sana asin an kongregasyon nagkasararo na tumabang sa samo. Bago kaidto, an haloy nang kaamigo na si John MacArthur inorganisar an mga Saksi na mga panday tanganing padakulaon an samong harong. Kan mamundag an mga aki, sarong grupo nin mga tugang na babae an nagtabang sa pag-ataman sa mga aki. An gabos na kabootan na ini patunay nin Kristianong pagkamoot paagi sa gibo.—1 Juan 3:18.

Sa sarong sentido, an quadruplets nagin “mga aki kan kongregasyon.” Sagkod sa panahon na ini, minamansay kan mga aking ini bilang pamilya an dakol na mamomoton na tugang na nagtabang sa samo. Kun dapit ki Mary, sia nagin sarong marahayon na agom asin ina na daing kaimotan na inataman an saiyang mga aki. Talagang inaplikar nia an saiyang nanodan gikan sa Tataramon nin Dios asin sa organisasyon. Mayo nang sadol na mas marahay pa kisa dian!—Salmo 1:2, 3; Mateo 24:45.

An Kristianong mga pagtiripon asin paghuhulit nagdanay na mahalagang kabtang kan samong semanal na rutina, minsan ngani masakit an pag-asikaso sa apat na omboy. Kan panahon na idto sarong bendisyon an mga pag-adal sa Biblia na samong kinokondukta sa duwang mag-agom, na maboot na nagduduman sa harong niamo tanganing mag-adal. Minsan ngani pinagin mas pasil kaini an mga bagay para sa samo, kun minsan si Mary pagalon nang marhay kaya sia napapatorog sa panahon nin pag-adal, na may torog man na omboy sa saiyang mga takyag. Sa kahurihurihi, an duwang mag-agom nagin satong espirituwal na mga tugang.

Espirituwal na Pagsasanay sa Amay na Edad

Dawa bago makalakaw an mga aki, sinda iiniiba niamo ni Mary asin kan mga matuang aking babae sa ministeryo sa langtad. Durante kan panahon na sinda sadit pa, tigduwa kami ni Mary sa pagdara sa sainda, asin sinda bakong pagabat. Sa katunayan, parateng sinda an pinoponan nin pakikipag-olay sa makikatood na mga kagharong. Sarong aldaw, nanuparan ko an sarong lalaki na naghihingako na kun kamo namundag sa irarom nin partikular na tanda sa astrolohiya sa sarong partikular na aldaw, an saindong magigin personalidad may nakatalaga nang susundan. Dai ako nakidiskutir sa saiya, alagad hinapot ko sia kun puede akong magbalik pagtaodtaod kan aga. Nag-oyon sia, kaya nagbalik ako kaiba an quadruplets. Mantang sia nakaheling na may pagngalas, pinalinya ko sinda oyon sa pagkasunodsunod kan pagkamundag. Dangan nagkaigwa kami nin makikatood na pag-oolay, bako sanang manongod sa saindang risang-risang mga pagkakalaen sa pisikal kundi manongod man sa dakulang mga pagkakalaen sa saindang personalidad, na sarong hampak sa saiyang teoriya. “Garo baga makangingisi na ipapakipag-olay ko sa saindo an teoriyang ini,” an sabi nia. “Kaipuhan kong orog pang magsiyasat, bako daw?”

 Bilang sadit pang mga aki, ikinakaanggot nindang apat na disiplinahon sinda bilang grupo kun sinda dai minagawe nin tama, kaya saro-saro mi sindang ikinokorehir. Minsan siring, nanodan ninda na an iyo man sanang mga susundon minaaplikar sa gabos. Sa eskuelahan, kun sinda napapaatubang sa mga isyu na kalabot an konsensia, sinda nagdanay na marigon para sa mga prinsipyo sa Biblia asin sinusuportaran an lambang saro, na si Cindy an saindang parataram. Dai nahaloy, nanodan kan mga tawo na an quadruplets na ini kaipuhan na midbidon bilang sarong makosog na puersa!

Inagihan mi ni Mary an parate nang mga kadepisilan sa pagtabang sa mga aki na magdanay na maimbod ki Jehova durante kan saindang pagkatinedyer. An masasabi sana niamo iyo na an paninimbagan na iyan nagin mas depisil kutana kun mayo an suporta nin sarong mamomoton na kongregasyon asin an abundang espirituwal na pagkakan na inako niamo gikan sa naheheling na kabtang kan organisasyon ni Jehova. Naghingoa kami na magkaigwa nin regular na pampamilyang pag-adal sa Biblia asin papagdanayon na bukas an mga linya nin komunikasyon, minsan ngani bako ining pirmeng pasil. Pero, an paghihingoa bakong sayang huling an gabos na walong aki niamo pinili na paglingkodan si Jehova.

Pag-atubang sa Naglalangkaw na Edad

Sa nag-aging mga taon, nagkaigwa ako nin dakol na espirituwal na pribilehio: magurang sa kongregasyon, paraataman sa siudad, asin kasalihid na paraataman sa sirkito. Naglingkod man ako bilang miembro kan lokal na Hospital Liaison Committee, na an katuyohan iyo na tabangan an mga doktor na makikooperar sa mga pasyenteng Saksi kun nagigin isyu an pag-ineksion nin dugo. Sa laog nin 34 taon nagkaigwa man ako kan pribilehio nin pagigin rehistrado na magkasal. Nagkondukta ako nin haros 350 seremonya sa kasal, kaiba na an sa anom kong aking babae.

Nagpapasalamat ako nin daing ontok ki Jehova huli sa maimbod na suporta na sakong inako, enot ki Judy asin ngonyan ki Mary. (Talinhaga 31:10, 30) Mantang sinusuportaran ako sa sakong gibohon bilang magurang sa kongregasyon, sinda man nagtatao nin marahay na halimbawa sa ministeryo asin nagtabang tanganing itadom an espirituwal na mga kualidad sa mga aki.

Kan 1996, nadiskobre na may diperensia ako sa hotok na nagigin causa nin pagkibigkibig kan kamot ko asin pagkaraot kan sakong panimbang. Huli kaini, dai na ako nakatrabaho sa pagpinta nin mga karatula. Minsan siring, nakakanompong pa man giraray ako nin dakol na kagayagayahan sa paglilingkod ki Jehova, minsan ngani maluway na akong maghiro. An positibong aspekto iyo na napatalubo ko an orog pang pakikidamay para sa ibang mga mas may edad.

Mantang hinohorophorop ko an sakong buhay, nagpapasalamat ako ki Jehova huli sa pagigin pirmeng andam nia na tabangan ako asin an sakong pamilya tanganing maatubang niamo an dakol na kadepisilan na may kagayagayahan. (Isaias 41:10) Kami ni Mary, kaiba an samong walong aki, nagpapasalamat man sa marahayon asin mapagsuportar na pamilya nin espirituwal na mga tugang. Pinatunayan kan gabos an saindang pagkamoot sa dakol na paagi na dai niamo kayang isaysay.—Juan 13:34, 35.

[Mga Nota sa Ibaba]

[Ritrato sa pahina 12]

Kaiba ko si Nanay, an sakong matuang mga tugang na si Garth asin Dawn, na andam nang magbiahe pasiring sa kombension sa Sydney kan 1941

[Ritrato sa pahina 13]

Kaiba ko si Judy asin an aking si Kim kan ako nasa gibohon sa sirkito sa Queensland

[Ritrato sa pahina 15]

Pagkatapos na ipangaki an “quadruplets,” an samong apat na matuang aking babae asin an kongregasyon nagkasararo tanganing tumabang sa samo