Pakanompong nin Espirituwal na Kayamanan sa Guinea

SA LAOG nin dakol na siglo, isinapeligro nin mga eksplorador an buhay asin hawak sa paghanap nin kayamanan. An mga pusoan na nakaabot sa Guinea, sa Solnopan na Aprika, nakanompong nin duwang magkalaen na marhay na klase nin kayamanan—materyal asin espirituwal. An daga, na abunda sa brilyante, bulawan, batbat (iron ore), asin de kalidad na bauxite (na dian kinukua an aluminium), istaran nin labing siyam na milyon na taga Guinea.

Minsan ngani an mga relihion nin Kakristianohan dai nangingibabaw sa nasyon, importante an pagsamba, asin pinapahalagahan na marhay nin dakol an espirituwal na kayamanan. Ano man nanggad an kayamanan na ini? Sinda an maimbod na mga lingkod ni Jehova, na ilinaladawan sa Haggeo 2:7 bilang “an kawiliwiling mga bagay kan gabos na nasyon.”

Espirituwal na Kayamanan

Nangangaipo nin awad-awad na paghihingoa an pagkotkot nin hararom sa daga sa paghanap nin nakatagong kayamanan. Kaagid kaiyan, sa Kristianong ministeryo, kaipuhan an maigot na paghihingoa tanganing manompongan an espirituwal na kayamanan. Sa Guinea, an paghuhulit kan Kahadean nagpoon sa pinakasentro kan nasyon sa kapinonan kan dekada nin 1950 asin nakaabot sa kabisera, an Conakry, kaidto sanang kapinonan kan dekada nin 1960. Igwa na ngonyan nin mga 900 na Saksi ni Jehova sa 21 kongregasyon asin grupo sa bilog na nasyon.

An mga misyonero nag-abot kan 1987 asin naglingkod kaiba kan saro sanang kongregasyon sa Conakry. Ngonyan igwa na nin labing 20 misyonero sa kabisera asin sa interior. Maigot nindang pinapakosog an mga kongregasyon asin nakikikabtang sa ministeryo kaiba kan lokal na mga tugang.

 Si Luc, na nakaistar sa Conakry, nakaeksperyensia nin kagayagayahan kan inadalan nia sa Biblia si Albert, na sarong hoben na doktor. Hinanap ni Albert an relihiosong katotoohan sa manlaenlaen na iglesia, asin naimbuelto sia sa espiritistikong mga gibo. May sulot siang singsing kaidto na itinao sa saiya nin sarong patagolainan na naggagarantiya na matao iyan sa saiya nin marahay na kapaladan. Pakatapos nin dakol na pagkadesganar sa saiyang paghanap sa tunay na relihion, iinapon ni Albert an saiyang singsing asin namibi: “Dios ko, kun ika nag-eeksister, gibohon mong posible na ika mamidbid ko asin mapaglingkodan ko. Ta kun dai, mamumuhay na sana ako oyon sa sadiri kong mga kamawotan.” Dai nahaloy pakatapos kaiyan, si Albert nagbisita sa harong kan saiyang tugang na babae asin nadangog nin dai tinutuyo an saro sa Mga Saksi ni Jehova na inaadalan sa Biblia an saiyang sobrina. Tolos na iinareglo na adalan sia sa Biblia ni Luc.

Kada semana, magayagayang naglalakaw si Luc nin labing limang kilometro paduman tangani na konduktahan an pag-adal. Minsan ngani si Luc may dikit na pormal na edukasyon, si Albert na naggradwar sa unibersidad, naghangang marhay sa saiyang makosog na pagtubod sa Kasuratan asin sa saiyang praktikal na aplikasyon kan kaaraman sa Biblia. Kanigoan an kaogmahan ni Albert kan maaraman nia na bakong an Dios an may sala sa pagsakit nin katawohan kundi, imbes, katuyohan ni Jehova na taposon an gabos na pagsakit asin gibohon na paraiso an dagang ini. (Salmo 37:9-11) An mga katotoohan sa Biblia kaiba an marahay na paggawe na naheheling nia sa tahaw kan mga miembro kan kongregasyon nakapahiro sa puso ni Albert.

Minsan siring, kun paanong an dai pa nasapsap na brilyante kaipuhan na maingat na gayong sapsapon nin sarong ekspertong artesano tanganing magluwas an kilyab kaiyan, kaipuhan man ni Albert na haleon an dakol na kinabanon na aktitud tanganing ikaoyon an saiyang buhay sa matanos na mga pamantayan nin Dios. Pinondo na nia an pagkonsulta sa mga patagolainan, pag-abuso sa inomon na de alkohol, asin paghuego. Mas nasakitan si Albert na pondohon an paninigarilyo. Kan sa katapustapusi maigot siang mamibi ki Jehova para sa tabang, sia nagin mapanggana. Pakalihis nin anom na bulan, linegalisar nia an saiyang pag-agoman. An saiyang agom nagpoon na mag-adal kan Biblia. Ngonyan pareho na sindang bautisadong lingkod ni Jehova.

 Si Martin saro pang espirituwal na brilyante. Nagpoon siang mag-adal kan Biblia sa Gueckedou kan sia 15 anyos. Kinontra kan saiyang mga magurang na Katoliko an pag-atender nia sa mga pagtiripon kan Mga Saksi ni Jehova. Rinaot ninda an mga literatura sa Biblia ni Martin, binugbog sia, asin pinalayas sia sa harong kan pamilya. Kun paanong an brilyante napoporma kun an karbon pinapaagi sa grabeng presyon, kuminosog man an pagkamoot ni Martin sa katotoohan sa Biblia bilang resulta kan pagtumang. Pag-abot nin panahon, luminomoy an boot kan saiyang mga magurang, asin sia nagbuelta sa harong. Ano an nagpabago sa aktitud kan saiyang mga magurang? Narisa ninda an dakulang kalaenan kan paggawe ni Martin asin kan saiyang nguhod na mga tugang, na nagin rebelde asin naimbuelto sa seksuwal na inmoralidad. Huling nakombensir na an bagong pagtubod ni Martin nakakarahay sa saiya, inako kan saiyang ama sa saindang harong an mga miembro kan kongregasyon. Dakol na beses na pinasalamatan kan ina ni Martin an mga tugang sa gabos na ginibo ninda tanganing tabangan an saiyang aki. Nabautismohan sa edad na 18, si Martin nag-atender kan huri sa Paadalan sa Ministeryal na Pagsasanay asin naglilingkod ngonyan bilang espesyal payunir na ministro.

Inimportar na Espirituwal na Kayamanan

Mantang ineeksportar kan Guinea an kadaklan kan rekursos naturales kaini, an nagkapira sa espirituwal na kayamanan kaini “inimportar.” Dakol an nag-imigrar hale sa ibang nasyon sa Aprika, sa parate huli sa pinansial na mga dahelan. An iba nag-arabot tanganing makadulag sa halawig asin maringis na mga guerra.

Si Ernestine, hale sa Cameroon, nagpasiring sa Guinea 12 taon na an nakaagi. Sia nakipag-adal sa Mga Saksi ni Jehova asin nag-aatender sa mga pagtiripon sa laog nin dakol nang taon na dai nagpapabautismo. Kan 2003, napaluha sia mantang pinagmamasdan nia an pagbautismo sa sarong pansirkitong asamblea kan Mga Saksi ni Jehova. Huling pinangibabawan nin pakamate nin kasalan, sia namibi ki Jehova: “Ako ngonyan 51 anyos na, asin mayo pa akong nagibong marahay para sa saimo. Gusto kong maglingkod  sa saimo.” Pagkatapos, si Ernestine huminiro kaoyon kan saiyang mapakumbabang pamibi. Ipinaliwanag nia sa kasaroan niang lalaki na puede sindang danay na mag-ibanan solamente kun gigibohon nindang legal an saindang pag-agoman. Uminoyon ini, asin kan huri sia magayagayang napaluha sa mismong bautismo sa saiya kan Nobyembre 2004.

Poon kan kapinonan kan dekada nin 1990, inako sa Guinea an rinibong dulag hale sa Liberia asin Sierra Leone, kaiba an ginatos na lingkod ni Jehova. Dai nahaloy pag-abot sa sarong kampo nin mga dulag, inareglo kan mga tugang an regular na mga pagtiripon, inorganisar an paghuhulit, asin itinogdok an sarong Kingdom Hall. May nagkapira na nagin lingkod ni Jehova sa kampo nin mga dulag. Saro si Isaac sa mga ini. Pakabautismohi sa saiya, nagin posible na magbuelta si Isaac sa dati niang posisyon sa sarong dakulang kompanya sa Liberia. Imbes, pinili nia na magdanay sa kampo nin mga dulag sa Laine bilang sarong regular payunir. Sia nagpaliwanag: “Ngonyan dai ko kaipuhan na maghagad nin permiso sa sarong among tanganing mag-atender sa mga pagtiripon o asamblea. Libre akong maglingkod ki Jehova.” Kan Disyembre 2003, ginibo an sarong pandistritong kombension sa harayong kampong ini para sa 150 Saksi na nag-iistar sa tahaw nin 30,000 na dulag. Nakakaogma ta 591 an nag-atender, kaiba an 9 na bungog na sinundan an programa sa pagtaram sa senyas. Dose an nabautismohan. Inapresyar na marhay kan mga tugang an ginibong mga paghihingoa tanganing magtao sa sainda nin sarong espirituwal na bangkete.

Naggibo nin Kinakaipuhan na mga Pagbabago an “Kawiliwiling mga Bagay”

Mayo nin olang na garo baga dakulaon para sa mga naghahanap nin bulawan asin brilyante. Minsan siring, nakakaogma na maheling an mga paghihingoa kan mga bagohan na pangganahan an gabos na olang tanganing makapaglingkod ki Jehova. Estudyare an eksperyensia ni Zainab.

Sa edad na 13, si Zainab puersahan na ilinaog sa pan-ooripon sa mga aki. Dinara sia sa Guinea hale sa sadiri niang lugar sa saro pang nasyon sa Solnopan na Aprika. Sa edad na 20, nadangog nia an mensahe kan Biblia. Gustong-gusto niang iaplikar an nanonodan nia.

Depisil para ki Zainab an pag-atender sa Kristianong mga pagtiripon sa pagsamba. Alagad inaapresyar niang marhay an mga pagtiripon asin determinado sia na dai mapaltahan an mga iyan. (Hebreo 10:24, 25) Itinatago nia an saiyang mga libro sa luwas tanganing kuanon an mga iyan kun sia mapasiring sa mga pagtiripon. Sa nagkapirang pangyayari, sia maringis na binugbog kan “nakakasadiri” sa saiya huli sa pag-atender sa espirituwal na mga pagtiripon na ini.

Nagbago an mga kamugtakan kan huri, asin si Zainab pinatalingkas. Tolos-tolos na nagpoon siang mag-atender sa gabos na pagtiripon, na nakatabang sa saiya na marikas na umoswag sa espirituwal. Sinayumahan nia an sarong trabaho na may halangkaw na sueldo na makakaolang kutana sa pag-atender nia sa mga pagtiripon tanganing mag-ako nin Kristianong pagtotokdo. Nagpalista sia sa Teokratikong Paadalan sa Pagmiministro, nagin dai pa bautisadong parahayag kan Kahadean, asin sa huri sinimbolisaran an saiyang pagdusay ki Jehova paagi sa bautismo sa tubig. Pagkatapos tolos kaiyan, nakikabtang sia sa ministeryo bilang auxiliary payunir. Pakalihis nin anom na bulan, sia nag-aplay na maglingkod bilang regular payunir na ministro.

Pagkatapos na mag-atender sa pira sanang pagtiripon, an sarong interesado nagsabi: “Dai ko namamatean na dukha ako kun ako yaon digdi.” Minsan ngani an dakol na tawo interesado sana sa materyal na kayamanan sa Guinea, an mga namomoot ki Jehova gustong-gustong maghanap nin espirituwal na mga kayamanan. Iyo, “an kawiliwiling mga bagay kan gabos na nasyon” minadolok sa dalisay na pagsamba ki Jehova ngonyan!

[Kahon sa pahina 8]

GUINEA-2005

Pinakahalangkaw na kabilangan nin mga Saksi: 883

Mga pag-adal sa Biblia: 1,710

Nag-atender sa Memorial: 3,255

[Mga Mapa sa pahina 8]

(Para sa aktuwal na format, hilingon an publikasyon)

GUINEA

Conakry

SIERRA LEONE

LIBERIA

[Ritrato sa pahina 9]

Si Albert asin Luc

[Ritrato sa pahina 9]

Kingdom Hall sa Conakry

[Ritrato sa pahina 10]

Si Ernestine

[Ritrato sa pahina 10]

Si Martin

[Ritrato sa pahina 10]

Si Zainab

[Picture Credit Line sa pahina 8]

USAID