“Taano ta Yaon Kita Digdi?”

INAPOD iyan kaidto ni Eli Wiesel, na nanggana nin Premyong Nobel asin natadang buhay sa Holocaust nin Nazi, bilang “an pinakamahalagang hapot na dapat pensaron nin sarong tawo.” Ano iyan? An hapot na, “Taano ta yaon kita digdi?”

Pinensar na lamang daw nindo an hapot na iyan? Dakol na an nagpensar, alagad mayo sindang makuang simbag. Sa saiyang paghihingoa na aramon an kahulogan nin buhay, an Britanong historyador na si Arnold Toynbee nagsurat: “An tunay na katuyohan nin tawo iyo na pamurawayon an Dios asin magin maogma huli sa Saiya sagkod lamang.”

Interesante nanggad, saro pang tawo kaidtong labing tolong milenyo na an nakaagi, na nagin bantog sa pagigin galagang paramasid nin buhay, an nakaaram na kan pundamental na simbag. An madonong na si Hadeng Salomon nagsabi: “An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”—Eclesiastes 12:13.

An pundamental na prinsipyong ini sinuportaran kan Aki nin Dios, si Jesu-Cristo. Mantang nasa daga, lubos na naghingoa si Jesus tanganing pamurawayon an saiyang langitnon na Ama. Nakadugang sa kualidad kan buhay ni Jesus an paglilingkod sa saiyang Kaglalang. Sinusteniran sia kaiyan, na nagpahiro sa saiya na magsabi: “An sakong kakanon iyo an sakong paggibo kan kabotan nia na nagsugo sa sako.”—Juan 4:34.

Kaya taano ta yaon kita digdi? Arog ni Jesus, Salomon, asin dakol na iba pang lingkod nin Dios, makakanompong kita nin tunay na kahulogan asin nagdadanay na kaogmahan sa buhay paagi sa paggibo kan kabotan nin Dios. Boot daw nindong makaaram nin orog pa manongod sa kun paano sasambahon an Dios “sa espiritu asin katotoohan”? (Juan 4:24) An mga Saksi ni Jehova sa saindong lugar maoogma na tabangan kamo na simbagon an hapot na, “Taano ta yaon kita digdi?”